WƖA YƖƖLAA 10 - WƖA TENIŊ

Devit sʋl Wɩa dɩ ʋ pɛ ʋ lɛ

¹ La Tɩɩna, bɛɛ nɛ tɩɩ mɩ dɩŋ pɛgɛ bol? Bɛɛ nɛ tɩɩ ŋ kɛŋ ŋ tɩtɩa faala, bʋa-la lɛ wɩaa sɩ jʋʋla?

² Nɩbɔŋŋɔɔ ka dagɛ ba tɩtɩa nɛ aa dɔgɩsɛ summoo. Leŋ dɩ wʋbɔmɔ-la ba sɩ vʋʋra gʋra dii ba tɩtɩa.

³ Wʋbɔmɔ-la leŋe ba bibigisi ba tɩtɩa lɛ nɛ. Tʋɔ-bɔŋ tɩŋŋaa vɩa La Tɩɩna nɛ a chichei ʋ yɩrɩŋ.

⁴ Nɩbɔŋŋɔɔ ka dagɛ ba tɩtɩa kɩŋkɛŋ nɛ a vɩa Wɩa, ba bɩ ʋ wɩaa ka liisi.

⁵ Ba wɩɩkala chɩna nɛ woruŋ, ama ba bɩ jɩŋ ŋɩɩ Wɩa sɩ jaŋ dii ba sarɩya, aŋ bee gʋgʋʋnɛ ba dʋndɔŋŋɔɔ.

⁶ Ba tʋɔŋ lɛ ba sɩ, “Wɩɩkala bɩ jaŋ ŋaa la lɛ. La tʋɔŋ jaŋ tɔrɛ bʋa na-kala, wɩɩkala bɩ jaŋ jʋʋla.”

⁷ Ba yie ŋmɩɛsa hɩhɛ nɩaa lɛ aŋ pɛ nyɩnyɩɛ wɩaa, a fufugisi nɩaa ma. Ba wɩɩŋ kala nɛ dɩ ba hɩhɛ wɩaa aŋ bʋbʋl wʋbɔŋŋɔɔ.

⁸ Ba yie faa tabiisiŋ jeeŋ harɩŋ nɛ a gbɩgbɛrɛ dɩ ba kpʋ nʋʋ sɩ bɩ wɩɩ cheye, a bagɩlaa chɛ nɩaa.

⁹ Ba yie pɔ lere-la a nagɛ naachigiŋ nɛ, dɩ ba kɛsɛ nɩalɩŋ sɩ bɩ lee kɛnɛ. Ba yie kɛmba ba bɛrɛ lɛ a lɛrɛ viiri.

¹⁰ Ba yie ŋmoo nɩalɩŋ sɩ bɩ lee kɛnɛ lo nɛ arɩ doluŋ, ba pɩŋ vɩntɩm,

¹¹ aŋ bʋl, “Wɩa sɩpaa tuo. Ʋ kɛŋ ʋ sɩaa tɔ nɛ, ʋ bɩ wɩɩ-la ka na.”

¹² La Tɩɩna Wɩa, sii a ŋaa wɩɩ. Sɩ́ nɩalɩŋ sɩ bɩ lee kɛnɛ wɩaa yʋ.

¹³ Bɛɛ nɛ tɩɩ nɩbɔŋŋɔɔ mʋmɔŋ Wɩa lɛ? Ba yie bʋl ba tʋɔŋ lɛ, “Wɩa bɩ jaŋ dɔgɩsɛla.”

¹⁴ Ama ŋ-na Wɩa yie na mɩ hɛɛŋ arɩ wɩalɩŋ kala sɩ jʋʋmɛ nɛ. Ŋ yie beŋ nɩmɛ nɛ a ŋaa wɩɩ. Nɩalɩŋ sɩ bɩ lee kɛnɛ joŋ ba tɩtɩa hɛ ŋ nɩsɩŋ lɛ nɛ. Ŋ nɛ ŋaa Nɩɩ-la sɩɩ pɛ biisinsiŋ lɛ.

¹⁵ Leŋ dɩ nɩbɔŋŋɔɔ doluŋ dɛrɛ. Dɔgɩsɛba a tɩŋ ba wʋbɔmɔ-la wɩaa, aŋ ŋaa dɩ ba leŋ wʋbɔŋŋɔɔ ŋaanɩŋ.

¹⁶ La Tɩɩna nɛ kuoro a kaa mʋ wuu. Tinteye-la nɩaa sɩ bɩ ʋ jɩŋ jaŋ nyɩɩgɛ ʋ tinteeŋ lɛ.

¹⁷ Ŋ nɩɩ nɩalɩŋ sɩɩ na hɛɛŋ nii-ŋmobo nɛ, a ŋaa wɩɩ-la ba sɩɩ chɛ a leŋ ba nyuŋ nyaasɛ.

¹⁸ Ŋ chɩŋ biisinsiŋ arɩ nɩalɩŋ wɩaa sɩ nyaga bil harɩŋ nɛ, dɩ nuhuobiiŋ kala bɩra sɩ́ wuo joŋ fawʋllʋŋ hɛ ʋ dɔŋɔ lɛ.