Tɩntɩŋŋaa 8 - WƖA TENIŊ

Sɔɔl to naasɩŋ dɔgɩsɛ nɩalɩŋ sɩ laa Yesu wɩaa dii aa hilimi

¹ Sɔɔl ma sɛɩ arɩ ba kpʋ Sɩtɩɩvɩŋ. Chɛɛ-la ba suomo to naasɩŋ a dʋdɔgɩsɛ nɩalɩŋ sɩ laa Yesu wɩaa dii aa hilimi Jerusalɛm lɛ. Ba kala pɩsɛ Judiya arɩ Samarɩa tinteeŋ kala lɛ, see Yesu nanzɔɔba-la dʋndʋŋa nɛ ka.

² Nɩalɩŋ sɩɩ fá Wɩa joŋ Sɩtɩɩvɩŋ a hugi aŋ yel ʋ yoho woruŋ.

Ba bʋl Wɩa wʋzɔmɔ-la Samarɩa lɛ

³ Sɔɔl faa chɛ dɩ ʋ pugi nɩalɩŋ sɩ laa Yesu wɩaa dii, a to naasɩŋ dʋdɔgɩsɛba. Ʋ to dii-niiriŋ a kɛsɛ baalaa arɩ haala-la sɩ laa Yesu wɩaa dii, a lɛrɛba lɩɩ ba dɩɩsɩŋ lɛ, aŋ leŋ ba kɛmba kaa mʋ tɔ bɩnɩŋ dɩa.

⁴ Nɩalɩŋ fa sɩ pɩsa, ba mʋ gɔllɛ lee-kala a bʋbʋl Wɩa niiŋ wɩaa.

⁵ Fɩlɩp sii mʋ taŋ kʋbala baa yɩrɛ Samarɩa, a bʋl Kirisito wɩaa pɩ nɩalɩŋ sɩ hɛ nɩmɛ.

⁶ Nɩ-daŋ-la kala sɩ nɩɩ wɩalɩŋ Fɩlɩp sɩ bʋla a na ʋ wʋmagɩla-la ʋ sɩ ŋaa, ba kala joŋ ba nyuŋ hɛ wɩalɩŋ ʋ sɩɩ bʋl lɛ.

⁷ Fɩlɩp sɩ bʋl wɩaa ŋɩɩ, jɩŋ-bɔŋŋɔɔ fa kɛŋ nɩaa a yʋgɛ, ba lemba. Dɩ ba nɛ lemba, ba yie lɩɩ a faasa yiyel. Nɩaa ma yʋga a gbɛrɩgɛ, dɔnsʋŋ kɛŋ naasʋʋnʋŋ arɩ na-sʋʋnʋŋ, ba ma kala duori.

⁸ Samarɩa tɩŋŋaa kala tʋɔŋ faasa tɔrɛ.

⁹ Taŋ-la lɛ baal kʋbala ma nɛ fa hɛ nɩmɛ, baa yɩrɛ Saamɔŋ. Ʋ fa kɛŋ daalusuŋ nɛ a ŋɩŋaa wʋkpuŋkperisiŋ taŋ-la lɛ nɩaa nɩna, a dɩdagɛ arɩ ʋ nɛ kɛŋ doluŋ.

¹⁰ Nɩbalaa arɩ nɩbiisiŋ kala joŋ ba nyuŋ hɛ ʋ wʋŋaalaa lɛ a bʋl, “Baala deeŋ nɛ ŋaa wɩa. Ʋ kɛŋ doluŋ, dol-la ba sɩɩ yɩrɛ Wɩa dol-balɩŋ.”

¹¹ Ʋ sɩ ŋaa wʋkpuŋkperisiŋ deemba nɩaa na ʋ diene, ŋɩɩ nɛ tɩɩ nɩaa joŋ ba nyuŋ kala hɛ ʋ wʋŋaalaa lɛ.

¹² Ama Fɩlɩp sɩ bʋl Wɩa wʋzɔmɔ-la a tɩgɛ Wɩa kuorii-la lɛ, a bʋl Yesu Kirisito ma wɩaa, ba laa wɩalɩŋ dii, ba foba Wɩɩchʋɔlɛ lɩɩŋ, baalaa arɩ haalaa kala.

¹³ Saamɔŋ tɩtɩa kʋ laa wɩalɩŋ dii, ba fou ma Wɩɩchʋɔlɛ lɩɩŋ, ka ʋ mɛrɛ Fɩlɩp lɛ. Ʋ sɩ na wʋkpuŋkperisi-la arɩ wʋmagɩlaa Fɩlɩp sɩɩ ŋaa, ʋ ŋaaʋ wʋkpuŋkpere.

¹⁴ Yesu nanzɔɔba-la sɩ hɛ Jerusalɛm lɛ aŋ nɩɩ arɩ Samarɩa tɩŋŋaa laa Wɩa wɩaa dii, ŋɩɩ nɛ ba tɩŋ Pɩɩta arɩ Jɔɔŋ dɩ ba mʋ ba teeŋ.

¹⁵ Ba mʋ a chʋɔlɛ Wɩa pɩba dɩ Wɩa joŋ ʋ Dɩŋ-zɔmʋŋ pɩba,

¹⁶ bɛɛ wɩaa bʋa-la lɛ Wɩa Dɩŋ-zɔmʋŋ ha bɩ ba kʋŋkala lɛ hɛ. La Tɩɩna Yesu yɩrɩŋ dʋndʋŋa lɛ nɛ ba fa foba Wɩɩchʋɔlɛ lɩɩŋ.

¹⁷ Pɩɩta arɩ Jɔɔŋ joŋ ba nɩsaa daŋ ba lɛ, ŋɩɩ nɛ Wɩa Dɩŋ-zɔmʋŋ kʋ tuu hɛba lɛ.

¹⁸ Saamɔŋ sɩ na dɩ Yesu nanzɔɔba-la joŋ ba nɩsaa daŋ ba lɛ Wɩa Dɩŋ-zɔmʋŋ kʋ hɛ ba lɛ, ʋ joŋ moribiee pɩba,

¹⁹ aŋ bʋl, “Má pɩmɛ ma doluŋ deeŋ dɩ mɩ ma nɛ joŋ mɩ nɩsɩŋ daŋ nʋʋkala lɛ, dɩ Wɩa Dɩŋ-zɔmʋŋ kʋ hɛ tɩɩna lɛ.”

²⁰ Ŋɩɩ nɛ Pɩɩta bʋla pʋ, “Ŋ bɩɩna ŋ jaŋ wuo joŋ moribiee yɔɔ Wɩa sɩ joŋ kʋa dii zile nɩaa lɛɛ? Ŋ dɩ ŋ moribiee kala jaŋ jʋʋ nyiniŋ.

²¹ Ŋ bɩ toru kala kɛnɛ tɩntɩmɩŋ deeŋ lɛ. Ŋ bɩ ŋ tʋɔŋ pʋlla Wɩa teeŋ.

²² Bɩrɩma lɩɩ wʋbɔmʋŋ deeŋ lɛ, aŋ sʋl La Tɩɩna Wɩa dɩ ʋ joŋ ŋ tʋɔbɩɩnaa deemba ŋ sɩ kɛnɛ ŋ tʋɔŋ lɛ a chɛŋ.

²³ Mɩ na dɩ ŋ kɛŋ yarɩ-bieri kɩŋkɛŋ nɛ, wʋbɔŋŋɔɔ ma mɩlɩŋ kpɛrɛ.”

²⁴ Ŋɩɩ nɛ Saamɔŋ bʋl, “Má chʋɔlɛ Wɩa pɩmɛ dɩ wɩaa deemba kala ma sɩ bʋla sɩ́ mɩ lɛ ŋaa.”

²⁵ Ba sɩ bʋl La Tɩɩna Yesu wʋzɔmɔ-la arɩ wɩalɩŋ kala ʋ sɩ ŋaa pɩba dɛrɛ, ba sii dɩ ba mɩɩra mʋ Jerusalɛm. Ba sɩɩ mʋ Jerusalɛm ŋɩɩ, ba bʋl Yesu wʋzɔmɔ-la Samarɩa tinteeŋ tabiisiŋ ma lɛ a yʋgɛ.

Fɩlɩp cheŋ baal-la sɩ lɩɩ Itoopia tinteeŋ

²⁶ Ŋɩɩ nɛ La Tɩɩna Wɩa tɩndaarʋ kʋbala kʋ bʋla pɩ Fɩlɩp, “Sii mʋ taŋ-bʋbʋɔŋ a mʋ wombii-bɩnɩɩ-la sɩ lɩɩ Jerusalɛm a mʋmʋ Gaza.”

²⁷ Ʋ sɩ lɩa dɩ ʋ mʋ, ʋ cheŋ baal kʋbala dɩ ʋ lɩɩ Itoopia tinteeŋ. Ʋ ŋaa bafere nɛ a tɩma pɩpɩ Itoopia kuoro ba sɩɩ yɩrɛ Kandaasɩ. Kandaasɩ fa ŋaa haal nɛ. Ba-fere-la nɛ faa beŋ ʋ kɩaa kala. Ʋ fa mʋ Jerusalɛm nɛ a chʋɔlɛ Wɩa aŋ hɔŋ ʋ toruko nyuŋ,

²⁸ a mɩɩra mʋmʋ dɩa. Ʋ fa sɩɩ vɛŋ ŋɩɩ nɛ ʋ kɩkarɩmɛ Wɩa teniŋ sɛmɛ dɔŋɔ, Wɩa wʋlaabʋlla Azaaya sɩ ŋmʋnsa.

²⁹ Ŋɩɩ nɛ Wɩa Dɩŋ-zɔmʋŋ bʋla pɩ Fɩlɩp, “Mʋ a chɩna kpagɛ toruko-la.”

³⁰ Fɩlɩp fá mʋ kpagʋ a nɩɩ dɩ ʋʋ karɩmɛ Wɩa teŋ-la sɛmɛ dɔŋɔ Wɩa wʋlaabʋlla Azaaya fa sɩ ŋmʋnsa. Fɩlɩp pɩɛsʋ, “Ŋ jɩŋ wɩalɩŋ ŋ sɩɩ karɩmʋ bʋbʋɔŋ nɛɛ?”

³¹ Ŋɩɩ nɛ baal-la bʋl, “Mɩ bɩ jaŋ wuo jɩŋ ba bʋbʋɔŋ, see dɩ nʋʋ dagɛmɛ.” Ŋɩɩ nɛ aŋ yɩrɛ Fɩlɩp dɩ ʋ jɩla hɔnɔ pɛ ʋ lɛ.

³² Wɩa niiŋ wɩalɩŋ bafere-la fa sɩɩ karɩmʋ nɛ ŋ-la: “Ʋ tɔrɛ ʋ niiŋ a nagɛ piese ba sɩ kaa mʋ dɩ ba kpʋ, a bɩra nagɛ pie-bie ma sɩ tɔrɛ ʋ niiŋ, ka ba kɩkɛ ʋ pʋnaa nɛ. Ʋ bɩ ʋ niiŋ suro.

³³ Ba hɩɩsʋ nɛ, a kpaa kʋsɩŋŋaa vɔmʋ. Nʋʋkala bɩ ʋ doho naasɩŋ wuo to, bɛɛ wɩaa ba lɩɩsɛ ʋ mɩɩsɩŋ nɛ dʋnɩa lɛ.”

³⁴ Ŋɩɩ nɛ bafere-la pɩɛsɛ Fɩlɩp, “Kʋbɛɛ wɩaa nɛ Wɩa wʋlaabʋllʋ-la bʋbʋl ŋɩɩ? Ʋ tɩtɩa wɩaa nɛ koo nʋʋ ma dɔŋ wɩaa nɛ?”

³⁵ Ŋɩɩ nɛ Fɩlɩp suomi Wɩa niiŋ wɩalɩŋ Wɩa teniŋ sɛmpɛɛ-la tɩtɩa lɛ, a bʋl Wɩa wʋzɔmɔ-la sɩ tɩgɛ Yesu lɛ.

³⁶ Ba fa sɩ joŋ wombii-la a mʋmʋ, ba mʋ yi lee kʋbala dɩ ʋ kɛŋ lɩɩŋ. Ŋɩɩ nɛ baal-la bʋla pɩ Fɩlɩp, “Na lɩɩŋ nɛ ŋ-la. Bɛɛ nɛ jaŋ kɛrɛmɛ dɩ ŋ sɩ́ mɩ Wɩɩchʋɔlɛ lɩɩŋ fo?”

³⁷ Ŋɩɩ nɛ Fɩlɩp bʋla pʋ, “Dɩ ŋ nɛ laa Yesu wɩaa dii arɩ ŋ tʋɔŋ kala, mɩ jaŋ foŋ Wɩɩchʋɔlɛ lɩɩŋ.” Ŋɩɩ nɛ baal-la bʋl, “Mɩ laa dii arɩ Yesu Kirisito nɛ ŋaa Wɩa Bie.”

³⁸ Ŋɩɩ nɛ bafere-la ŋaa janɩ-la fa sɩɩ lɛrɛ toruko-la chɩŋ. Ʋ dɩ Fɩlɩp kala tuu a jʋʋ lɩɩ-la. Fɩlɩp fou Wɩɩchʋɔlɛ lɩɩŋ.

³⁹ Ba sɩ kʋ lɩɩ lɩɩ-la tʋɔŋ, La Tɩɩna Dɩŋ-zɔmʋŋ guu kʋ joŋ Fɩlɩp kaa lɛl. Baal-la bɩra bɩ Fɩlɩp na aŋ joŋ ʋ wombiiŋ vɩvɛŋ, a kala ŋaa tʋɔtɔrʋŋ.

⁴⁰ Fɩlɩp ŋaa dɩ ʋ chɩŋ dɩ ʋ hɛ taŋ kʋbala baa yɩrɛ Azotus (Asɩdɔd) lɛ. Ʋ gɔllɛ tabiisi-la kala sɩ hɛ nɩmɛ a bʋbʋl Wɩa wʋzɔmɔ-la. Ʋ ŋaa ŋɩɩ nɛ a mʋ yi taŋ kʋbala baa yɩrɛ Sɩzarɩya.