Tɩntɩŋŋaa 5 - WƖA TENIŊ

Ananɩas arɩ Safɩɩra

¹ Ba tʋɔŋ baal kʋbala ma nɛ fa hɛ nɩmɛ, baa yɩrɛ Ananɩas. Ʋ haala ma yɩrɩŋ nɛ fa Safɩɩra. Ʋ ma joŋ ʋ dʋa a yallɛ

² a lɩɩsɛ moribie-la dɔnsʋŋ faa, ʋ haala jɩŋ, aŋ kɛŋ kʋkaana-la kaa mʋ Yesu nanzɔɔba-la teeŋ.

³ Pɩɩta pɩɛsʋ, “Ananɩas, bɛɛ nɛ tɩɩ ŋ leŋ Sɩtaanɩ nyɩsɩŋ, ŋ joŋ tintee-la ŋ sɩ yalla moribie-la dɔnsʋŋ faa, aŋ nyɩɛ wɩaa pɩ Wɩa Dɩŋ-zɔmʋŋ?

⁴ Ka ŋ-na joŋ kʋ-la yallɛ, ŋ dee bɩ ʋ tɩɩ? Moribie-la maa ŋ sɩ yalla, ŋ dee bɩba tɩɩ? Bɛɛ nɛ saa tɩɩ ŋ bɩɩnɛ ŋ tʋɔŋ lɛ aŋ ŋaa wɩɩŋ deeŋ? Nuhuobiinee dʋndʋŋa dee ŋ nyɩɛ wɩaa pa, ŋ nyɩɛ wɩaa pɩ Wɩa ma nɛ.”

⁵ Ananɩas sɩ nɩɩ wɩɩŋ deeŋ, ʋ tele sʋʋ. Fawʋllʋŋ chaasa kɛŋ nɩalɩŋ ma kala sɩ nɩɩ wɩɩ-la sɩ ŋaa.

⁶ Ŋɩɩ nɛ bapʋɔsaa kʋ joŋ gɛrɩŋ bɛʋ a joŋu kaa lɩɩ a kaa mʋ hugi.

⁷ Ʋ yi hawa batori dɩ ʋ haala kʋ jʋʋ. Ʋ fa bɩ jɩŋ wɩɩ-la kala sɩ ŋaa.

⁸ Pɩɩta pɩɛsʋ ma, “Moribie-la ŋ bala sɩ kaa kɔ, magɛ ŋɩɩ nɛ ma joŋ ma tintee-la yallɛɛ?” Ŋɩɩ nɛ haal-la bʋl, “Ba niiŋ nɛ ŋɩɩ.”

⁹ Ŋɩɩ nɛ Pɩɩta bɩra pɩɛsʋ, “Bɛɛ nɛ tɩɩ ŋ dɩ ŋ bala vʋʋrɛ dɩ ma magɩsɛ Wɩa Dɩŋ-zɔmʋŋ? Bee na, nɩalɩŋ sɩ joŋ ŋ bala mʋ hugi, ba nɛ chɩŋ boiŋ niiŋ ŋɩɩ. Ba saa jaŋ joŋuŋ ma lɩɩ.”

¹⁰ Ʋ ma guu tel ʋ sɩpaaŋ a sʋʋ. Bapʋɔsɩa-la sɩ joŋ ʋ bala kaa mʋ hugi, ba kʋ jʋʋ dɩ ʋ sʋba. Ŋɩɩ nɛ ba joŋu kaa lɩɩ, a hugu kpɛrɛ ʋ bala.

¹¹ Nɩalɩŋ kala sɩ laa Yesu wɩaa dii aa hilimi arɩ nɩalɩŋ dɔnsʋŋ ma sɩ nɩɩ wɩɩ-la, fawʋllʋŋ kɛmba woruŋ.

Wʋkpuŋkperisiŋ arɩ wʋmagɩlaa

¹² Yesu nanzɔɔba-la ŋaa wʋmagɩlaa arɩ wʋkpuŋkperisiŋ yʋgɛ nɩaa tʋɔŋ. Nɩalɩŋ kala sɩ laa Yesu wɩaa dii, ba kala yie hihilimi zawʋra-la ba sɩ kaa yɩrɛ Solomoŋ zawʋra lɛ.

¹³ Nʋʋkala sɩ bɩ Yesu wɩaa laa dii bɩ nyuduoŋ kɛnɛ dɩ ʋ guoli ba tʋɔŋ, arɩ nɩaa sɩɩ bɛsɛ ba lɛ ma kala.

¹⁴ Nɩalɩŋ sɩ laa Yesu wɩaa dii a kʋ pɛ nɩalɩŋ lɛ, ba kɩɩ nɩalɩŋ kala Wɩa fa sɩ vɛnɛ kaa kʋʋ pɛ, baalaa arɩ haalaa.

¹⁵ A tɩŋ wɩalɩŋ kala sɩɩ ŋaa wɩaa, ba paala paa puwuoloo kaa lɩɩ wombiiŋ niiŋ, a bilba godoba lɛ arɩ bɔsʋnʋŋ lɛ. Ba ŋaa ŋɩɩ dɩ Pɩɩta nɛ kʋʋ bal, dɩ ʋ daaliimiŋ wuo hɛ ba dɔnsʋŋ lɛ dɩ ba duori.

¹⁶ Nɩaa ma yʋga a lɩɩ tabiisi-la sɩ kpagɛ Jerusalɛm, a kɛŋ puwuoloo arɩ nɩalɩŋ jɩŋ-bɔŋŋɔɔ sɩ kɛnɛ a kaa kɔ ʋ teeŋ, ba kala duori.

Ba to naasɩŋ dɔgɩsɛ Yesu nanzɔɔba

¹⁷ Ŋɩɩ nɛ Wɩɩsʋllɩ sɩpaalaaraa kʋhɩaŋ arɩ ʋ harɩŋ nɩaa sii. Ʋ harɩŋ nɩalɩŋ kala hɛ Saduusi tɩŋŋaa paatɩɩ-la tʋɔŋ nɛ Jerusalɛm lɛ. Ba yaraa faasa bibieri.

¹⁸ Ba kɛsɛ Yesu nanzɔɔba-la kaa mʋ tɔ dɩa, lee-la ba sɩɩ tɔ ba nɩaa.

¹⁹ Ama tɩtaŋ-la tɩtɩa Wɩa tɩndaara kʋbala kʋ kɛŋ dɩa-la boiŋ-niiree suri, a leŋ Yesu nanzɔɔba-la lɩɩ. Ka ʋ bʋla pɩba,

²⁰ “Má mʋ jʋʋ chɩŋ Wɩa dɩɩ-bal-la lɛ a chaasa bʋl wombii-falɩŋ deeŋ wɩaa pɩ nɩaa.”

²¹ Yesu nanzɔɔba-la sɛɩ. Sɩɩpʋʋraa ba jʋʋ Wɩa dɩɩ-bal-la a suomo dɩdagɛ nɩaa. Ŋɩɩ nɛ Wɩɩsʋllɩ sɩpaalaaraa kʋhɩaŋ arɩ ʋ harɩŋ nɩaa kɔ, a yɩrɛ Juu tɩŋŋaa kʋhɩasɩŋ arɩ nɩalɩŋ sɩ yie hilime vʋvʋʋrɛ wɩaa, ba kala kʋ hilimi aŋ tɩŋ dɩ ba mʋ dɩa-la lɛ ba sɩ tɔ Yesu nanzɔɔba-la a chaarɛba kaa kɔ.

²² Tɩntɩnnɩ hɩasɩ-la sɩ mʋa, ba bɩ ba na nɩtɔɔrɩ dɩa-la lɛ. Ba mɩɩra kʋ bʋl,

²³ “La sɩ mʋ dɩa-la lɛ ba sɩ tɔba, la na dɩ ba yaga, nʋʋkala bɩ suro, ka nɩalɩŋ sɩɩ beŋ dɩa-la, ba ma chɩŋ boiŋ niiŋ. Ama la mʋ suri, la bɩ Yesu nanzɔɔba-la na.”

²⁴ Nɩalɩŋ sɩɩ pɔ Wɩa dɩɩ-bal-la nɩhɩaŋ arɩ Wɩɩsʋllɩ sɩpaalaaraa kʋhɩasɩŋ sɩ nɩɩ wɩɩŋ deeŋ, ʋ kperiba kɩŋkɛŋ, ba bɩ jɩŋ wɩɩ-la kala ba sɩ jaŋ ŋaa.

²⁵ Ŋɩɩ nɛ baal kʋbala kʋ jʋʋ a bʋla pɩba, “Má bee na, nɩalɩŋ ma sɩ kaa tɔ dɩa, ba nɛ chɩŋ Wɩa dɩɩ-balɩŋ tʋɔŋ a dɩdagɛ nɩaa.”

²⁶ Ŋɩɩ nɛ nɩalɩŋ sɩɩ pɔ Wɩa dɩɩ-bal-la nɩhɩaŋ arɩ ʋ nɩaa mʋ kɛsɛ Yesu nanzɔɔba-la kaa kɔ. Ba bɩ ba fʋga, bɛɛ wɩaa fawʋllʋŋ fa kɛmba nɛ arɩ nɩalɩŋ fa sɩ hɛ Wɩa dɩɩ-bal-la tʋɔŋ jaŋ paa tabɩaa yagɛba.

²⁷ Ba kɛŋ Yesu nanzɔɔba-la kʋ jʋʋ, a leŋ ba chɩŋ nɩalɩŋ sɩ yie hilime vʋvʋʋrɛ wɩaa sɩpaaŋ. Ŋɩɩ nɛ Wɩɩsʋllɩ sɩpaalaaraa kʋhɩaŋ bʋla pɩba,

²⁸ “La bʋla pɩma arɩ sɩɩfɩɛsɩŋ: Má bɩra sɩ́ wɩɩkala dagʋ Yesu yɩrɩŋ lɛ. Ama ma bee na, ma kɛŋ wɩɩ-la kaa gaara cheŋ Jerusalɛm kala aa chɛ ma joŋ cheeriŋ pɩla a tɩŋ baala deeŋ sʋʋŋ wɩaa.”

²⁹ Pɩɩta arɩ Yesu nanzɔɔba-la dɔnsʋŋ mɩɩra bʋla pɩba, “Ʋ maga dɩ la to Wɩa niiŋ nɛ a kɩɩ nuhuobiine niiŋ.

³⁰ La naabalɩmaba faa to Wɩa nɛ, ʋ nɛ chɩsɛ Yesu sʋʋŋ lɛ, nɩɩ-la ma fa sɩ kaa kpaasɛ daagɛsɛ nyuŋ ʋ sʋʋ.

³¹ Wɩa chɩsʋ ʋ sii jɩla hɔŋ Wɩa nadiiŋ, nɩduoŋ dɩhɔnʋŋ, dɩ ʋ ŋaa ba Sɩpaalaara arɩ ba Laataara, a leŋ dɩ Iziral tɩŋŋaa bɩrɩma lɩɩ ba wʋbɔŋŋɔɔ lɛ, ka dɩ ʋ joŋ ba wʋbɔŋŋɔɔ chɛba.

³² La pɛ na wɩaa deemba nɛ. Wɩa Dɩŋ-zɔmʋŋ ma, Wɩa sɩ joŋo hɛ nɩalɩŋ sɩɩ to ʋ niiŋ ma ŋaa pɛ-naaraa.”

³³ Nɩalɩŋ sɩ nɩɩ wɩɩŋ deeŋ, ba faasa na baanɩŋ a chɩchɛ dɩ ba kpʋba.

³⁴ Farisii tɩɩna kʋbala ma nɛ fa hɛ nɩalɩŋ sɩ yie hilime vʋvʋʋrɛ wɩaa tʋɔŋ baa yɩrɛ Gamalɩɛl. Ʋ nɛ faa dagɛ wɩalɩŋ Mosis fa sɩ ŋmʋnsa bil dɩ nɩaa tuto. Nʋʋkala zizilu. Ʋ sii chɩŋ a bʋl dɩ ba leŋ dɩ Yesu nanzɔɔba-la lɩɩ dɩ-jalɩŋ mʋapɩlɩɩ.

³⁵ Ŋɩɩ nɛ ka ʋ bʋla pɩba, “Ma Iziral tɩmma, má fɩɛlɛ ma sɩaa arɩ wɩɩ-la ma sɩɩ bɩɩnɛ dɩ ma ŋaa nɩaa deemba lɛ.

³⁶ Bʋa kʋbala lɛ, baal kʋbala nɛ fa hɛ nɩmɛ, baa yɩrɛ Tuudas. Ʋ bʋla arɩ ʋ ŋaa nɩbal nɛ, nɩaa yi zɔɔ-banɛsɛ aa to ʋ harɩŋ. Ba kpʋʋ, ka ʋ harɩ-tooro-la kala pɩsɛ, ʋ yɩrɩ-la kala dɩsɛ.

³⁷ Ŋɩɩ harɩŋ lɛ nɛ, baal kʋbala ma lɩɩ, bʋa-la lɛ ba sɩɩ dɩɩsɛ nɩaa, baa yɩrɛ Judas, a lɩɩ Galilii. Ʋ fa kɛsɛ nɩ-daŋ nɛ a kaa to ʋ harɩŋ, ba kpʋʋ ma, nɩ-daŋ-la ma sɩɩ to ʋ harɩŋ, ba ma pɩsɛ.

³⁸ Ka lɛɛlɛ wɩɩŋ deeŋ, mɩ jaŋ bʋla pɩma arɩ ma sɩ́ wɩɩkala ŋaa nɩaa deemba lɛ. Má lemba. Dɩ tɩntɩmɩŋ deeŋ lɩɩ nuhuobiine doluŋ lɛ nɛ, ʋ jaŋ lɛl.

³⁹ Ama dɩ Wɩa tɩntɩmɩɩ nɛ, ma bɩ jaŋ wuo cheyu. Dɩ ma nɩɩ chɛ dɩ ma cheyu, ma jaŋ na dɩ Wɩa nɛ ma paala yuyuo ŋɩɩ.”

⁴⁰ Ŋɩɩ nɛ ba jegile nɩɩ ʋ niiŋ. Ba yɩrɛ Yesu nanzɔɔba-la ba kʋ jʋʋ, a ŋaa ba vɩɩrɛba, aŋ bʋla pɩba dɩ ba bɩra sɩ́ wɩaa bʋl Yesu yɩrɩŋ lɛ, aŋ leŋ ba viiri.

⁴¹ Ŋɩɩ nɛ ba lɩɩ nɩalɩŋ fa sɩ hilime teeŋ. Ba tʋɔŋ tɔrɛ arɩ ba sɩ dɔgɩsɛba a tɩŋ Yesu wɩaa.

⁴² Tapʋlɩɩ-na kala ba yie jʋʋ Wɩa dɩɩ-bal-la a pɛɛ mʋ nɩaa dɩɩsɩŋ, a ha bʋbʋl Wɩa wʋzɔmɔ-la a mʋ tɩgɛ Yesu Kirisito lɛ.