Tɩntɩŋŋaa 23 - WƖA TENIŊ

¹ Pɔɔl fa sɩ chɩŋ ŋɩɩ, ʋ chaarɛ ʋ sɩaa pɛ nɩalɩŋ fa sɩ yie hilime vʋvʋʋrɛ wɩaa lɛ aŋ bʋla pɩba, “Mɩ naambiiriŋ, mɩ to Wɩa mɩ mɩɩsɩŋ kala lɛ nɛ. Mɩ sɩ tou, mɩ tʋɔbɩɩnaa kala yie chesi nɛ a kaa kɔ tapʋlʋŋ deeŋ.”

² Ŋɩɩ nɛ Wɩɩsʋllɩ sɩpaalaaraa kʋhɩaŋ, baa yɩrɛ Ananɩas, bʋla pɩ nɩalɩŋ sɩ chɩna kpagɛ Pɔɔl dɩ ba ŋmoo ʋ niiŋ lɛ.

³ Ŋɩɩ nɛ Pɔɔl ma bʋla pʋ, “Ŋ lɔrɔ nagɛ jeeŋ sɩ yɛrɛ, ka ba ŋaa tʋɔrʋŋ bʋgɛ nɛ dɩ nɩaa sɩ́ na. Wɩa ma jaŋ ŋmobuŋ ŋɩɩ. Ŋ hɔnɔ dɩ ŋ to wɩalɩŋ ba sɩ ŋmʋnsa bil dɩ la tuto nɛ a didiimi sarɩya, aŋ ka ŋ bʋl dɩ ba ŋmoomi a chei wɩalɩŋ ŋɩɩ.”

⁴ Nɩalɩŋ sɩ chɩna kpagɛ Pɔɔl pɩɛsʋ, “Wɩɩsʋllɩ sɩpaalaaraa kʋhɩaŋ nɛ ŋ tʋʋsɛ ŋɩɩ?”

⁵ Ŋɩɩ nɛ Pɔɔl bɩra bʋl, “Mɩ naambiiriŋ, ba ŋmʋnsɛ Wɩa teniŋ tʋɔŋ arɩ ʋ bɩ maga dɩ la bʋl wʋbɔŋŋɔɔ a pɩ nɩɩ-la sɩɩ beŋ nɩaa. Mɩ bɩ jɩŋ arɩ ʋ nɛ ŋaa Wɩɩsʋllɩ sɩpaalaaraa kʋhɩaŋ.”

⁶ Pɔɔl sɩ kʋ jɩŋ dɩ nɩalɩŋ sɩ yie hilime vʋvʋʋrɛ wɩaa, arɩ dɔnsʋŋ ŋaa nɩalɩŋ ba sɩɩ yɩrɛ Saduusi tɩŋŋaa nɛ, dɔnsʋŋ ma ŋaa Farisii tɩŋŋaa, ʋ faasa bʋl nɩalɩŋ sɩ yie hilime vʋvʋʋrɛ wɩaa teeŋ a bʋl, “Mɩ naambiiriŋ, mɩ ma ŋaa Farisii tɩɩna nɛ, nɩɩ-la sɩ lʋlmɛ ma ŋaa Farisii tɩɩna nɛ. Mɩ laa dii arɩ nɩalɩŋ sɩ sʋba jaŋ sii sʋʋŋ lɛ a kɛŋ mɩɩsɩŋ. Ŋɩɩ nɛ tɩɩ baa diimi sarɩya.”

⁷ Ʋ sɩ bʋl wɩɩŋ deeŋ, Farisii tɩmma-la arɩ Saduusi tɩmma-la kɛŋ wɩɩ-la lɩlɛrɛ. Ŋɩɩ leŋ nɩalɩŋ sɩ hilime pɔrɛ dɔŋɔ lɛ.

⁸ Saduusi tɩŋŋaa sɩ dɩ nʋʋ nɛ sʋba, ʋ bɩra bɩ jaŋ sii sʋʋŋ lɛ a kɛŋ mɩɩsɩŋ, a bɩra bʋl dɩ Wɩa tɩndaaraa ma tuo, dɩ nɩdɩnsɩŋ ma tuo, ka Farisii tɩŋŋaa sɩ dɩ wɩaa deemba kala hɛ nɩmɛ.

⁹ Ŋɩɩ nɛ nɩalɩŋ sii a faasa ŋɩŋaa goŋ. Wɩa teniŋ kerichiba-la dɔnsʋŋ sɩ ŋaa Farisii tɩŋŋaa sii a faasa kɛŋ wɩalɩŋ lɩlɛrɛ a bʋl, “La bɩ na baala deeŋ sɩ ŋaa wɩɩ-la chei. Ʋ naga arɩ nɩdɩma nɛ koo Wɩa tɩndaara nɛ sɛnɛ bʋl wɩaa pʋpʋ.”

¹⁰ Ŋɩɩ nɛ ba kɛŋ wɩɩ-la faasa lɛrɛ, leriŋ kala hosi. Fawʋllʋŋ kɛŋ laalɩyuoroo kʋhɩaŋ-la arɩ ba jaŋ kɛŋ Pɔɔl lɛrɛ pʋɔsɛ. Ŋɩɩ nɛ ʋ ŋaa ʋ laalɩyuoroo jʋʋ nɩalɩŋ tʋɔŋ a lorigo laaʋ nɩalɩŋ teeŋ, a kɛnʋ kaa mʋ laalɩyuoroo dɩɩ-duo-la.

¹¹ Ʋ taŋ sɩ bire, tɩtaŋ-la tɩtɩa La Tɩɩna Yesu kɔ Pɔɔl teeŋ, a chɩna kpagʋ, a bʋla pʋ, “Nyɩrɛ ŋ bɔyɛ. Ʋ maga dɩ ŋ ŋaa nɩɩ-la sɩ pɛ na mɩ wɩaa nɛ bʋlba Rom lɛ arɩ ŋ sɩ bʋl mɩ wɩaa ŋɩɩ Jerusalɛm lɛ.”

Juu tɩŋŋaa ka vʋʋrɛ dɩ ba kpʋ Pɔɔl

¹² Ʋ taŋ sɩ pʋla, Juu tɩŋŋaa dɔnsʋŋ hilimi dɔŋɔ lɛ a vʋʋrɛ dɩ ba kpʋ Pɔɔl. Ba ŋmɩɛsa nɛ arɩ ba nɛ bɩ ʋ kpʋa, ba bɩ jaŋ dii kɩaa, a bɩ jaŋ nyʋa lɩɩŋ ma.

¹³ Nɩalɩŋ fa sɩ vʋʋrɛ wɩɩŋ deeŋ kɩɩ nɩaa mahɩŋ balɩa.

¹⁴ Ŋɩɩ nɛ ba mʋ Wɩɩsʋllɩ sɩpaalaaraa kʋhɩasɩŋ arɩ nɩalɩŋ kʋhɩasɩŋ teeŋ a bʋla pɩba, “La ŋmɩɛsa nɛ dɩ la nɛ bɩ Pɔɔl kpʋa, la bɩ jaŋ dii kɩaa.

¹⁵ Ŋɩɩ wɩaa ma dɩ nɩalɩŋ sɩ yie hilime vʋvʋʋrɛ wɩaa kʋhɩasɩŋ saa tɩŋ dɩ ba bʋla pɩ Rom laalɩyuoroo kʋhɩaŋ-la dɩ ʋ leŋ dɩ Pɔɔl kɔ ma teeŋ. Má fugi arɩ maa chɛ dɩ ma wasa dii ʋ sarɩya nɛ. La jaŋ kɛŋ la tɩtɩa hɛ dɔŋɔ dɩ ʋ nɛ leŋe ʋ kʋkɔ, ʋ bɩ jaŋ yi daha, ka dɩ la kpʋʋ.”

¹⁶ Pɔɔl dɩhaala bie ma nɩɩ ba sɩɩ vʋʋrɛ ŋɩɩ, a mʋ jʋʋ laalɩyuoroo dɩɩ-duo-la a bʋl wɩɩ-la pɩ Pɔɔl.

¹⁷ Ŋɩɩ nɛ Pɔɔl yɩrɛ laalɩyuoroo kʋhɩaŋ dɔŋɔ a bʋla pʋ, “Kɛŋ bapʋɔsɩ-bie deeŋ kaa mʋ ma kʋhɩaŋ teeŋ, ʋ kɛŋ wɩɩ nɛ dɩ ʋ bʋla pʋ.”

¹⁸ Ŋɩɩ nɛ ʋ kɛnʋ kaa mʋ ba kʋhɩaŋ teeŋ a bʋla pʋ, “Pɔɔl, nɩɩ-la ba sɩ kaa tɔ dɩa nɛ yɩrɛmɛ a bʋla pɩmɛ dɩ mɩ kɛŋ bapʋɔsɩ-bie deeŋ kaa kɔ ŋ teeŋ, dɩ ʋ kɛŋ wɩɩ nɛ dɩ ʋ bʋla pɩŋ.”

¹⁹ Ŋɩɩ nɛ laalɩyuoroo kʋhɩaŋ-la kɛŋ bile nɩsɩŋ lɛ a kɛnʋ lɩɩ mʋa, a fɩɛla pɩɛsʋ, “Wʋbɛɛ nɛ ŋ kɛŋ dɩ ŋ bʋla pɩmɛ?”

²⁰ Ŋɩɩ nɛ ʋ bʋl, “Juu tɩŋŋaa vʋʋrɛ nɛ dɩ ba bʋla pɩŋ dɩ ŋ chie leŋ dɩ Pɔɔl kɔ nɩalɩŋ sɩ yie hilime vʋvʋʋrɛ wɩaa kʋhɩasɩŋ teeŋ. Baa fugi arɩ baa chɛ dɩ ba wasa dii ʋ sarɩya nɛ.

²¹ Saa sɩ́ sɛɩ, bɛɛ wɩaa nɩalɩŋ dɔnsʋŋ jaŋ faa wombiiŋ lɛ a gbɛrʋ. Ba kɩɩ nɩaa mahɩŋ balɩa. Ba ŋmɩɛsa nɛ dɩ ba nɛ bɩ Pɔɔl kpʋa, ba bɩra bɩ jaŋ dii kɩaa, ba bɩ jaŋ nyʋa lɩɩŋ maa. Ba kɛŋ ba tɩtɩa hɛ dɔŋɔ nɛ dɩ ŋ pʋ wombiiŋ dɩ ʋ kɔ.”

²² Ʋ sɩ bʋl ŋɩɩ dɛrɛ, laalɩyuoroo kʋhɩaŋ-la bʋla pɩ bapʋɔsɩ-bie-la, “Sɩ́ bʋla pɩ nʋʋkala arɩ ŋ bʋl wɩɩŋ deeŋ pɩmɛ,” aŋ leŋ ʋ viiri.

Ba kɛŋ Pɔɔl mʋ Fɛlɩs teeŋ

²³ Ŋɩɩ nɛ laalɩyuoroo kʋhɩaŋ-la yɩrɛ ʋ laalɩyuoroo kʋhɩasɩŋ balɩa a bʋla pɩba, “Má lɩɩsɛ laalɩyuoroo zɔɔ-balɩa dɩ ba kɛŋ ba tɩtɩa hɛ dɔŋɔ dɩ ba dɩ Pɔɔl mʋ Sɩzarɩya, a pɛ ja-jɩllaa mahɩŋ batori arɩ fii lɛ, arɩ nɩalɩŋ ma sɩ kɛŋ tiŋŋee zɔɔ-balɩa. Leŋ dɩ ba kɛŋ ba tɩtɩa hɛ dɔŋɔ dɩ ba lɩɩ tɩtaŋɩŋ deeŋ kerifi nibi lɛ.

²⁴ Má chɛ janɩŋ a lɩɩsa pɩ Pɔɔl dɩ ʋ ma jɩl, a kɛnʋ woruŋ a kaa mʋ Sɩzarɩya, a kɛnʋ kaa mʋ hɛ Fɛlɩs sɩ chɩŋ kuoru-balɩŋ nyuŋ nɩsɩŋ lɛ.”

²⁵ Ŋɩɩ nɛ ka laalɩyuoroo kʋhɩaŋ-la ŋmʋnsɛ teniŋ a pɩba dɩ ba kaa mʋ pɩ kuoru-la a tɩŋ wɩɩŋ deeŋ wɩaa. Ŋ-la nɛ ʋ bʋl teŋ-la lɛ:

²⁶ “Mɩ-na Kɩlaadɩa Lisias nɛ ŋmʋnsɛ teniŋ deeŋ a pɩpɩ mɩ nyɩmma Fɛlɩs sɩ chɩŋ kuoru-balɩŋ nyuŋ. Mɩɩ chʋɔlʋŋ woruŋ.

²⁷ Baala deeŋ mɩ sɩ ŋaa ba kaa kɔ ŋ leriŋ, Juu tɩŋŋaa nɛ fa kɛnʋ dɩ ba kpʋʋ. Ba sɩɩ chɛ dɩ ba ŋaa ŋɩɩ, mɩ nɩɩ arɩ ʋ ŋaa Rom tɩɩna nɛ. Ŋɩɩ nɛ mɩ kɛŋ mɩ laalɩyuoroo mʋ, la lorigo laaʋ ba nɩsɩŋ lɛ.

²⁸ Mɩ faa chɛ dɩ mɩ nɩɩ wɩɩ-la sɩ tɩɩ ba bʋbʋl ʋ teeŋ. Ŋɩɩ nɛ mɩ kɛnʋ kaa mʋ ba nɩhɩasɩŋ sɩ yie hɔnɔ vʋvʋʋrɛ wɩaa teeŋ.

²⁹ Ba sɩ pɩɛsʋ wɩaa, mɩ na arɩ ʋ bɩ wɩɩkala cheye a magɛ dɩ ba kpʋʋ koo dɩ ba kɛnʋ tɔ dɩa. Wɩɩ-la sɩ tɩɩ ba bʋbʋl ʋ teeŋ tɩgɛ wɩalɩŋ Mosis sɩ fa sɩ ŋmʋnsa bil dɩ la tuto lɛ nɛ.

³⁰ Ba sɩ bʋla pɩmɛ arɩ Juu tɩŋŋaa dɔnsʋŋ vʋʋra nɛ dɩ ba kpʋʋ, ŋɩɩ nɛ mɩ sɩ dɩ ba kɛnʋ kaa kʋ pɩŋ lɩma lɩma. Mɩ saa bʋla pɩ nɩalɩŋ sɩɩ bʋl ʋ teeŋ nɛ dɩ ba kɔ ŋ teeŋ, a ma dagɛ wɩɩ-la ʋ sɩ ŋaa chei a pɩŋ.”

³¹ Ʋ sɩ ŋmʋnsɛ teŋ-la dɛrɛ, laalɩyuoro-la ŋaa ŋɩɩ ʋ sɩ bʋla pɩba. Tɩtaŋ-la ba kɛŋ Pɔɔl kaa mʋ yi taŋ kʋbala baa yɩrɛ Antɩpatɩs.

³² Ʋ taŋ sɩ pʋla, laalɩyuoro-la sɩɩ vɛŋ naasɩŋ lɛ nɛ mɩɩra kɔ ba dɩɩ-duo-la, aŋ ka ja-jɩllaa kɛnʋ mʋ Sɩzarɩya.

³³ Ba sɩ yi nɩmɛ, ba joŋ Pɔɔl pɩ nɩɩ-la sɩ chɩŋ ba kuoru-balɩŋ nyuŋ, a joŋ teŋ-la ma pɛ.

³⁴ Ŋɩɩ nɛ nɩɩ-la sɩ chɩŋ ba kuoru-balɩŋ nyuŋ karɩmɛ teŋ-la aŋ pɩɛsɛ Pɔɔl lee-la ʋ sɩ lɩa. Ʋ bʋl dɩ ʋ lɩɩ Siliisia nɛ. Ʋ sɩ nɩɩ ŋɩɩ,

³⁵ ʋ bʋla pʋ, “Dɩ nɩalɩŋ sɩɩ bʋl ŋ teeŋ nɛ kɔ, mɩ jaŋ nɩɩ wɩɩ-la ŋ sɩ kɛnɛ dɩ ŋ bʋl, aŋ ka dɩ mɩ-na dii ŋ sarɩya.” Ŋɩɩ nɛ ʋ ŋaa ba kɛŋ Pɔɔl mʋ hɛ dɩɩ-bal-la Hɛrɔd sɩ saa, a ŋaa laalɩyuoroo pʋpɔʋ nɩmɛ.