Tɩntɩŋŋaa 2 - WƖA TENIŊ

Wɩa Dɩŋ-zɔmʋŋ kʋ tuu

¹ Ba gbieli-bal kʋbala chɛɛŋ kʋ yi baa yɩrɛ Pɛntɩkɔs. (Tapʋlɩɩ-la nɛ ba yie kɛŋ ba baga kʋ-bumbumba kʋ mʋ pɩ Wɩa.) Chɛɛ-la ba kʋ hilimi dɩ-bala.

² Goŋ kʋbala guu lɩɩ wɩa-nyuŋ kʋ tuu a nagɛ pel-duoŋ, a su dɩa-la tʋɔŋ ba fa sɩ hɔnɔ.

³ Ŋɩɩ nɛ ba na kɩaa a nagɛ nyiŋ-gel-biisiŋ. Ba nagɩsɩŋ nagɛ nandelimee. Ba lɩɩ pɩsɛ. Nyiŋ-gel-bie kala togili nʋʋkala sɩ hɛ dɩa-la lɛ.

⁴ Ba sɩ togili nʋʋkala lɛ ŋɩɩ, Wɩa Dɩŋ-zɔmʋŋ hɛba kala lɛ, a pɩba doluŋ ba suomo bʋbʋl yikori dosunuŋ.

⁵ Juu tɩŋŋaa dɔnsʋŋ ma fa hɛ Jerusalɛm lɛ aa fá Wɩa, a lɩɩ dʋnɩa sɛmɛ-na kala.

⁶ Nɩ-daŋ sɩ nɩɩ goŋ deeŋ, ba kala kʋ hilimi. Ba sɩ hilimi ŋɩɩ, ba nɩa dɩ baa bʋl wɩaa ba tɩtɩa yikorusuŋ lɛ. Ʋ ŋaaba wʋkpuŋkpere.

⁷ Ba faasa hirigi a bʋla pɩ dɔŋɔ, “Nɩaa deemba kala ŋaa Galilii tɩŋŋaa nɛ.

⁸ Ɛɛ nɛ saa laa nɩɩ dɩ baa bʋl wɩaa la yikorusuŋ lɛ?

⁹ La dɔnsʋŋ lɩɩ Paatɩa, dɔnsʋŋ lɩɩ Miidia, dɔnsʋŋ lɩɩ Ɩlam. La dɔnsʋŋ lɩɩ Mesopotemia, dɔnsʋŋ lɩɩ Judiya, dɔnsʋŋ lɩɩ Kapadoosia, dɔnsʋŋ lɩɩ Pɔntɔs, dɔnsʋŋ ma lɩɩ Esia.

¹⁰ La dɔnsʋŋ lɩɩ Firijia, dɔnsʋŋ lɩɩ Pamfiilia, dɔnsʋŋ lɩɩ Ijipiti, dɔnsʋŋ ma lɩɩ Libiya sɛmɛ dɔŋɔ sɩ kpagɛ taŋ-la ba sɩɩ yɩrɛ Siriini. La dɔnsʋŋ ma ŋaa nʋhʋɔraa a lɩɩ Rom.

¹¹ La dɔnsʋŋ ŋaa Juu tɩmma nɛ, la dɔnsʋŋ ŋaa nɩaa sɩ bɩ Juu tɩŋŋaa ŋaa aŋ tuto Juu tɩŋŋaa Wɩɩchʋɔlɛ wombiiŋ. La dɔnsʋŋ lɩɩ Kiriiti, dɔnsʋŋ lɩɩ Arebia. La kalaa bʋl yikori dabaŋ dabamba nɛ, ka la nɩɩ dɩ baa bʋl wɩaa la yikorusuŋ lɛ. Wɩa sɩ tɩŋ tɩntɩŋ-duori-la wɩaa nɛ ba bʋbʋl ŋɩɩ.”

¹² Ba kala hirigi, a bɩ jɩŋ wɩɩ-la tʋɔŋ ba sɩ hɛ, ba pɩpɩɛsɛ dɔŋɔ, “Bɛɛ kʋŋ wɩɩ nɛ ŋ-la?”

¹³ Dɔnsʋŋ ma sisieriba lɛ dɩ ba bugo nɛ.

Pɩɩta bʋl Wɩa wɩaa a pɩ nɩaa

¹⁴ Pɩɩta arɩ Yesu nanzɔɔba-la fii arɩ kʋbala fa sɩ hɛ nɩmɛ ŋɩɩ, Pɩɩta sii chɩŋ a faasa bʋl, “Mɩ naambiiriŋ Juu tɩmma arɩ ma nɩalɩŋ kala sɩ hɛ Jerusalɛm lɛ, má wuoli ma dɩgɩlaa dɩ mɩ bʋl wɩɩ-la sɩ ŋaa a pɩma.

¹⁵ Ma bɩɩna nɩaa deemba bugo nɛɛ? Ba bɩ bugo chʋchʋɔ-fɩɛla deeŋ.

¹⁶ Jowɛl ma fa bʋl wɩɩŋ deeŋ sɩ ŋaa wɩaa nɛ. Ʋ fa ŋaa Wɩa wʋlaabʋllʋ nɛ. Ʋ sɩ,

¹⁷ ‘Wɩa bʋla, ŋ-la nɛ mɩ jaŋ ŋaa tapʋlaa dɩdɛrɩŋ: Mɩ jaŋ joŋ mɩ Dɩŋ-zɔmʋŋ hɛ nʋʋkala lɛ. Ma hambolibiisiŋ arɩ ma toloo jaŋ bʋl wɩaa mɩ Dɩŋ-zɔmʋŋ doluŋ lɛ. Ma bapʋɔsɩ-biisiŋ ma jaŋ nɩna wɩaa a nagɛ duosoo tʋɔŋ. Ma banɩhɩasɩŋ ma jaŋ duduosi duosoo.

¹⁸ Chɛɛ-la mɩ jaŋ joŋ mɩ Dɩŋ-zɔmʋŋ hɛ baala-la arɩ haala-la sɩ ŋaa mɩ tɩntɩnnaa lɛ dɩ ba kaa bʋbʋl mɩ wɩaa.

¹⁹ Mɩ jaŋ ŋɩŋaa wʋkpuŋkperisiŋ wɩa-nyuŋ, aŋ ŋɩŋaa wʋmagɩlaa ma tinteeŋ lɛ. Chalɩŋ, nyiniŋ arɩ nyʋɔ-bine jaŋ hɛ nɩmɛ.

²⁰ Wɩɩpɔsʋŋ jaŋ biri. Chɛnɛ ma jaŋ fɩɛsɛ a nagɛ chalɩŋ, ka dɩ La Tɩɩna tapʋl-bal-la ʋ sɩ jaŋ laa yɩrɩŋ-na yi.

²¹ Nɩɩ-la kala sɩ yɩrɛ La Tɩɩna yɩrɩŋ, ʋ jaŋ laaʋ ta.’ ”

²² Ŋɩɩ nɛ Pɩɩta bɩra bʋl, “Iziral tɩmma, má jegile nɩɩ wɩaa deemba mɩ sɩɩ chɛ mɩ bʋla pɩma. Yesu sɩ lɩɩ Nazarɛt nɛ Wɩa lɩɩsa pɩma. Wʋmagɩlaa arɩ wʋkpuŋkperisiŋ Wɩa sɩ to ʋ lɛ ŋaa ma sɩɩŋ lɛ nɛ dagɛ ŋɩɩ. Ma ma jɩma nɛ.

²³ Wɩa jɩma nɛ aŋ leŋ Yesu jʋʋ ma nɩsɩŋ. Ma nɛ leŋe wʋbɔŋ ŋaaraa kpaasʋ mɛrɛ daagɛsɛ nyuŋ ʋ sʋʋ.

²⁴ Ama Wɩa chɩsʋ sʋʋŋ lɛ nɛ, a lɩɩsɛ hɛɛ-la ʋ sɩ na bʋa-la lɛ ʋ sɩɩ sʋʋ. Sʋʋŋ fa bɩ ʋ wuo kaa bibil.

²⁵ Devit fa bʋl wɩɩŋ deeŋ nɛ a tɩgɛ ʋ lɛ: ‘Mɩ yie na mɩ Tɩɩna nɛ mɩ sɩpaaŋ bʋa na-kala, ʋ kpagɛmɛ nɛ, wɩɩkala bɩ jaŋ wuo jigisimi.

²⁶ Ŋɩɩ wɩaa mɩ tʋɔŋ tɔrɔ nɛ, mɩ bʋbʋl tʋɔ tɔrɛ wɩaa. Mɩ ŋaa nuhuobiiŋ nɛ a jaŋ sʋʋ. Mɩɩ yɩɛlɛ wɩalɩŋ Wɩa sɩ jaŋ ŋaa lɛ nɛ.

²⁷ Dɩ mɩ nɛ sʋba, ŋ bɩ jaŋ leŋ dɩ mɩ ka bʋa tʋɔŋ, koo a leŋ dɩ mɩ-na ŋ Tɩntɩnnɩ-tɩtɩɩ-la yaraa pʋa.

²⁸ Ŋ dagɛmɛ wombie-la mɩ sɩ jaŋ to a kɛŋ mɩɩsɩŋ nɛ. Ŋ jaŋ leŋ dɩ mɩ kɛŋ tʋɔtɔrʋŋ ŋ sɩpaaŋ.’ ”

²⁹ Ŋɩɩ nɛ Pɩɩta bɩra bʋl, “Mɩ naambiiriŋ, mɩ jaŋ chaasa bʋl la naabalɩma Devit wɩaa pɩma. Ʋ sʋba nɛ, ba joŋu hugi, ʋ vaamɩŋ ha pɩna nɛ la jaŋ lɛ a kaa kɔ jɩnɩŋ.

³⁰ Ʋ fa ŋaa Wɩa wʋlaabʋllʋ nɛ a wuo jɩŋ wɩalɩŋ Wɩa sɩ sɩ ʋ jaŋ ŋaa pʋ. Wɩa ŋmɩɛsa pʋʋ nɛ arɩ ʋ jaŋ leŋ dɩ ʋ-na Devit doho nɩaa dɔŋɔ dii kuoruŋ ʋ nyuŋ lɛ.

³¹ Devit sɩ na wɩɩ-la Wɩa fa sɩɩ chɛ dɩ ʋ ŋaa, ʋ wuo bʋl arɩ Kirisito jaŋ sii sʋʋŋ lɛ, a bɩra bʋl arɩ Wɩa bɩ jaŋ leŋ dɩ ʋ ka bʋa tʋɔŋ dɩ ʋ yaraa pʋa.

³² Yesu deeŋ nɛ Wɩa chɩsɛ sʋʋŋ lɛ ʋ kɛŋ mɩɩsɩŋ. La kala na wɩɩŋ deeŋ nɛ a jɩŋ ʋ lɛ.

³³ Wɩa chɩsʋ ʋ sii jɩla hɔŋ Wɩa nadiiŋ, nɩduoŋ dɩhɔnʋŋ, a bɩra pʋ ʋ Dɩŋ-zɔmʋŋ arɩ ʋ fa sɩ bʋl ŋɩɩ. Dɩŋ-zɔmʋŋ deeŋ Yesu sɩ joŋo hɛ la lɛ jɩnɩŋ, ʋ nɛ wɩalɩŋ ma sɩɩ na a nɩnɩɩ ma.

³⁴ Devit tɩtɩa fa bɩ Wɩa-jaŋ jɩla, ama aŋ bʋla tɩgɛ Yesu lɛ, “La Tɩɩna bʋla pɩ mɩ Tɩɩna: Hɔŋ mɩ nadiiŋ, nɩduoŋ dɩhɔnʋŋ,

³⁵ see dɩ mɩ yuo dii ŋ dʋndɔŋŋɔɔ kala dɛrɛ.”

³⁶ Ma Iziral tɩŋŋaa, ma jɩŋ ʋ sɛnɛ ŋaa wʋtɩtɩɩ arɩ Yesu deeŋ ma sɩ kaa kpaasɛ daagɛsɛ nyuŋ, ʋ nɛ Wɩa leŋ ʋ ŋaa La Tɩɩna. Ʋ nɛ bɩra Kirisito ma.”

³⁷ Nɩalɩŋ sɩ nɩɩ wɩɩŋ deeŋ Pɩɩta sɩ bʋla, ʋ faasa wʋwalɩmɛba kɩŋkɛŋ. Ŋɩɩ nɛ ba pɩɛsɛ Pɩɩta arɩ Yesu nanzɔɔba-la dɔnsʋŋ, “La naambiiriŋ, bɛɛ kʋŋ nɛ saa la jaŋ ŋaa?”

³⁸ Ŋɩɩ nɛ Pɩɩta bʋla pɩba, “Má bɩrɩma lɩɩ ma wʋbɔŋŋɔɔ lɛ, aŋ leŋ dɩ ba foma Wɩɩchʋɔlɛ lɩɩŋ Yesu Kirisito yɩrɩŋ lɛ, dɩ Wɩa joŋ ma wʋbɔŋŋɔɔ chɛma, aŋ joŋ ʋ Dɩŋ-zɔmʋŋ dii zile ma lɛ.

³⁹ Wɩalɩŋ Wɩa sɩ bʋla, ma nɛ ʋ bʋla pa, ma dɩ ma biiriŋ arɩ nɩalɩŋ kala sɩ lɩɩ dɩ-boluŋ, nʋʋ na-kala Wɩa sɩ yɩra dɩ ʋ kɔ ʋ teeŋ.”

⁴⁰ Pɩɩta sɩ bʋl ŋɩɩ, ʋ sʋlba a paala chaasa bʋl wɩaa dɔnsʋŋ yʋgɛ a bʋl, “Má lɩɩsɛ ma tɩtɩa nɩbɔŋŋɔɔ deemba tʋɔŋ.”

⁴¹ Ba tʋɔŋ nɩaa yʋga a laa wɩalɩŋ ʋ sɩ bʋla dii, ba foba Wɩɩchʋɔlɛ lɩɩŋ. Tapʋlɩɩ-la nɩaa yi bʋɩ batori a kʋ pɛ nɩalɩŋ sɩ laa Yesu wɩaa dii lɛ.

⁴² Ba joŋ ba nyuŋ kala hɛ wɩalɩŋ Yesu nanzɔɔba-la sɩɩ dagʋ lɛ arɩ sɩɩfɩɛsɩŋ a kɛŋ nii-bala. Ba kala hɔŋ a didii kʋdiile-la Yesu fa sɩ́ sɩ dɩ ba dii a liliisi ʋ wɩaa, aŋ pɛ gbaara chʋchʋɔlɛ Wɩa.

Nɩalɩŋ sɩ laa Yesu wɩaa dii dɩhɔnʋŋ

⁴³ Ŋɩɩ nɛ ba kʋŋkala fɩfá Wɩa, bɛɛ wɩaa Yesu nanzɔɔba-la ŋaa wʋkpuŋkperisiŋ arɩ wʋmagɩlaa yʋgɛ nɛ kɩŋkɛŋ.

⁴⁴ Nɩalɩŋ kala sɩ laa wɩalɩŋ dii, ba kala kʋ hihilimi bʋa na-kala lɛ, ba kɩaa kala ma ŋaa kʋbala.

⁴⁵ Ba yie joŋ ba kɩaa ma yallɛ a kɛŋ moribie-la a kpɩkpaa dɔŋɔ, a magɛ ŋɩɩ nʋʋkala sɩɩ chɛ.

⁴⁶ Tapʋlɩɩ kala ba yie mʋ hilimi Wɩa dɩɩ-bal-la lɛ arɩ ba dɩɩsɩŋ ma lɛ, a kɛŋ tʋɔ-bala a didii kʋdiile-la Kirisito fa sɩ́ sɩ ba dii a liliisi ʋ wɩaa arɩ tʋɔtɔrʋŋ,

⁴⁷ a dɩdɛnnɛ Wɩa. Nɩaa ma kala bɩbɛsɛ ba lɛ. Tapʋlɩɩ-na kala La Tɩɩna yie laa nɩ-falaa ta nɛ, ba kʋʋ pɛ nɩalɩŋ sɩ laa Yesu wɩaa dii lɛ.