TƖƖCHA 9 - WƖA TENIŊ

Sʋʋŋ nɛ la kala dɩdɛrɩŋ

¹ Mɩ sɩ kɛŋ wɩaa deemba kala a bɩɩnɛ, ʋ dɩdɛrɩŋ mɩ na dɩ tʋɔpʋl tɩŋŋaa arɩ wʋjɩnnaa arɩ wɩalɩŋ kala ba sɩɩ ŋaa hɛ Wɩa nɩsɩŋ lɛ nɛ. Ama nʋʋkala bɩ jɩŋ dɩ chonuŋ nɛ koo dɩ bɛrɩŋ nɛ ba kaa gbɛrʋ.

² Sʋʋŋ nɛ la kala dɩdɛrɩŋ, tʋɔpʋl tɩŋŋaa arɩ nɩbɔŋŋɔɔ, wʋzɔŋ ŋaaraa arɩ wʋbɔŋ ŋaaraa, nɩalɩŋ sɩ bɩ disiniŋ kɛnɛ arɩ nɩalɩŋ sɩ kɛŋ disiniŋ, nɩalɩŋ sɩ kpʋ pʋsʋŋ a sʋsʋl Wɩa arɩ nɩalɩŋ sɩ bɩ ŋɩɩ ŋaa. Ŋɩɩ ʋ sɩ naga wʋzɔŋ ŋaara lɛ, ŋɩɩ nɛ ʋ nagɛ wʋbɔŋ ŋaara ma lɛ. Ŋɩɩ ʋ sɩ naga nɩalɩŋ sɩ ta niiŋ Wɩa teeŋ, ŋɩɩ nɛ ʋ nagɛ nɩalɩŋ ma sɩɩ fá fawʋllʋŋ a bɩ ta lɛ.

³ Wɩalɩŋ kala sɩɩ ŋaa dʋnɩa lɛ a kɛŋ tʋɔ-cheeŋ nɛ ŋ-la: Wʋbala nɛ sɩ jaŋ kɛŋ la kala mʋ. Nuhuobiinee tʋɔŋ lɔrɔ kɩŋkɛŋ ba bɩbɩɩnɛ nyɩnyɛ wɩaa ba mɩɩsɩŋ lɛ, ʋ ŋɩɩ harɩŋ ba sʋʋ.

⁴ Nɩalɩŋ sɩ weye kɛŋ yɩɛlaa, a nagɛ va-weiŋ sɩ kpɩa naachigi-sʋʋŋ ŋɩɩ nɛ.

⁵ Nɩalɩŋ sɩ weye jɩma dɩ ba jaŋ sʋʋ, ama nɩalɩŋ sɩ sʋba-na bɩ wɩɩ jɩŋ. Ba bɩra bɩ time kɛnɛ baa yɩɛlɛ, nɩaa paala yʋ ba wɩaa nɛ.

⁶ Ŋɩɩ ba sɩ cho nɩaa, ŋɩɩ ba sɩ bɛrɛ nɩaa arɩ ba yarɩ-bieriŋ kala lɛlɛ nɛ. Ba-na bɩra bɩ jaŋ pɛ wɩɩ na-kala sɩɩ ŋaa dʋnɩa lɛ.

⁷ Ŋɩɩ wɩaa, dii kɩaa arɩ tʋɔtɔrʋŋ, a nyʋa kɩaa a nɩɩ sɩma, bɛɛ wɩaa Wɩa sɩ cho dɩ ŋ ŋaa wɩɩ-la nɛ ŋɩɩ lɛɛlɛ.

⁸ Ŋɩŋaa wɩalɩŋ sɩ tɔrɛ ŋ tʋɔŋ bʋa-kala lɛ.

⁹ Leŋ ŋ dɩ ŋ haala sɩ cho nɩɩ sɩma ma mɩɩsɩŋ deeŋ sɩ bɩ bʋbʋɔ kɛnɛ lɛ, tapʋlɩa-la kala Wɩa sɩ joŋo pɩ ma dʋnɩa deeŋ lɛ. Má nɩɩ sɩma tapʋlɩa-la kala sɩ bɩ bʋbʋɔ kɛnɛ lɛ, bɛɛ wɩaa ŋ toruŋ nɛ ŋɩɩ ŋ sɩ tɩma lɔl a na dʋnɩa deeŋ lɛ.

¹⁰ Tɩntɩmɩɩ-la kala ŋ sɩɩ tɩŋ, fɩɛsɛ sɩɩŋ a faasa tɩmʋ. Ʋ bɩ jaŋ dieni ka ŋ mʋ lɛlɛɛ-jaŋ, lee-la nɩaa sɩ bɩ tɩŋ, a bɩ wɩaa ka bɩɩnɛ, a bɩ wʋjɩmɩŋ kɛnɛ, a bɩ wɩaa sɩaa ma jɩŋ.

¹¹ Wɩɩ dɔŋ ma nɛ mɩ bɩra na dʋnɩa lɛ: Naachɛ-lɩmɩŋ tɩɩna dee bɩ fá didii, nɩduoŋ ma dee bɩ laalɩŋ yuo didii. Wʋjɩnna dee bɩ kʋdiilee na didii bʋa-kala, nɩɩ-la sɩ jɩŋ wɩaa sɩaa ma dee bɩ dʋa ka kɛŋ. Nɩalɩŋ sɩ kɛŋ jɩma yie bɩ lere-la sɩ maga dɩ ba jomba hɛ ka na, ama nyu-sɩmɩŋ ka puu nʋʋkala nɛ.

¹² Nʋʋkala bɩ ʋ sʋʋŋ tapʋlʋŋ jɩŋ. Ʋ nagɛ jóŋ sɩ yie kɛŋ chenfiliŋ nɛ, koo ba sɩ bɛrɛ kɛŋ diibie. Ŋɩɩ nɛ wʋbɔmʋŋ bʋa ma nagɛ nuhuobiine lɛ, ʋ yie guu jʋʋba dɩ ba bɩ yɩɛla.

Wʋjɩmɩŋ nɛ kpɩa yaarɩŋ

¹³ Wɩɩ dɔŋ ma nɛ mɩ bɩra na dʋnɩa lɛ a mʋ tɩgɛ wʋjɩmɩŋ lɛ ʋ sɩma pɩmɛ kɩŋkɛŋ.

¹⁴ Tabie kʋbala nɛ fa hɛ nɩmɛ, ʋ nɩaa bɩ yʋgɛ. Ŋɩɩ nɛ kuoru-duo kʋbala sii kɔ dɩ ʋ yuou, a leŋ ʋ laalɩyuoroo gollu chu a saa laalɩyuori vaŋkumba dɩ ba jʋʋ.

¹⁵ Dɩ baal kʋbala ma hɛ taŋ-la lɛ a nyaabɛ aŋ jɩŋ wɩaa. Ʋ kɛŋ ʋ wʋjɩmɩɩ-la laa taŋ-la ta. Ama nʋʋkala bɩ nyaabʋ-la wɩaa liise.

¹⁶ Ŋɩɩ nɛ mɩ bʋl, “Wʋjɩmɩŋ nɛ kpɩa doluŋ.” Ama nʋʋkala bɩ nyaabɩ-la wʋjɩmɩɩ-la joŋo dɩ ʋ ŋaa kʋŋ, ba bɩ wɩalɩŋ ma ʋ sɩ bʋla jegile nɩɩ.

¹⁷ Dɩ ŋ nɛ jegile nɩɩ wʋjɩnna sɩ fɩɛla bʋl wɩɩŋ, ʋ nɛ kpɩa nɩyaaraa kuoro sɩɩ kpɩa goŋ.

¹⁸ Wʋjɩmɩŋ nɛ kpɩa laalɩyuori kɩaa, ama wʋbɔŋ ŋaarɩ bala yie chei wʋzɔŋŋɔɔ yʋgɛ nɛ.