TƖƖCHA 8 - WƖA TENIŊ

¹ Kʋbɛɛ nɛ nagɛ wʋjɩnnʋ? Kʋbɛɛ nɛ jaŋ wuo chaarɛ wɩaa sɩaa woruŋ? Wʋjɩmɩŋ yie leŋ nɩa sɩaa chaanɛ nɛ, a kɛŋ tɩɩna sɩɩ-nyalaa bɩrɩmɛ.

To kuoro niiŋ

² To kuoro wʋdagaa, a tɩŋ nii-la ŋ sɩ ta Wɩa sɩpaaŋ wɩaa.

³ Sɩ́ pipesu dɩ ŋ sii kuoro sɩpaaŋ. Sɩ́ nɩalɩŋ sɩ bɩ ʋ harɩŋ chɩna lɛ pɛ, bɛɛ wɩaa ʋ jaŋ wuo ŋaa wɩɩ-la kala ʋ sɩ cho.

⁴ Kuoro nɛ kɛŋ doluŋ a ŋɩŋaa wɩaa. Kʋbɛɛ nɛ jaŋ wuo pɩɛsʋ, “Bɛɛ nɛ ŋ ŋɩŋaa ŋɩɩ?”

⁵ Nɩɩ-la kala sɩɩ to ʋ wʋdagaa bɩ jaŋ jʋʋ wɩɩ. Nɩɩ-la sɩ kɛŋ wʋjɩmɩŋ jɩŋ bʋa-la lɛ sɩ maga dɩ ʋ ŋaa wɩɩŋ arɩ ŋɩɩ ʋ sɩ jaŋ ŋaaʋ nɛ.

⁶ Wɩɩkala kɛŋ bʋa-la lɛ sɩ maga dɩ ba ŋaaʋ arɩ ŋɩɩ ba sɩ jaŋ ŋaaʋ nɛ. Ama wʋjʋʋlaa nyagɛ nuhuobiine kɩŋkɛŋ nɛ.

⁷ Nʋʋkala bɩ maachie jɩŋ, kʋbɛɛ nɛ saa jaŋ wuo bʋl wɩɩ-la sɩ jaŋ kɔ?

⁸ Nʋʋkala bɩ doluŋ kɛnɛ dɩ ʋ wuo kɛŋ peliŋ bil. Nʋʋkala bɩ tapʋlɩɩ-la ʋ sɩ jaŋ sʋʋ doluŋ kɛnɛ. Laalɩŋ tapʋlʋŋ nʋʋkala bɩ fori, wʋbɔŋŋɔɔ ma bɩ jaŋ laa nɩalɩŋ sɩɩ ŋaaba ta.

⁹ Mɩ sɩ na wɩaa deemba kala, mɩ kɛŋ wɩalɩŋ kala sɩɩ ŋaa dʋnɩa lɛ kaa chɔ na. Bʋa dɔŋɔ nʋʋ yie kɛŋ doluŋ nɩaa nyuŋ a bibemba, a leŋ ba nɩna hɛɛŋ.

¹⁰ Ŋɩɩ nɛ mɩ bɩra na dɩ ba paa nɩbɔŋŋɔɔ lɩɩ lee-la sɩ bɩ disiniŋ kɛnɛ lɛ a kaa mʋ sʋʋnʋŋ dɩ-huguŋ a hugi. Nɩaa bɩbɛsɛ ba lɛ tabal-la lɛ tɩtɩa ba sɩ ŋaa wʋbɔŋŋɔɔ. Wɩɩŋ deeŋ ma bɩ bʋbʋɔ kɛnɛ.

¹¹ Dɩ ba nɛ bɩ nʋʋ sɩ ŋaa wʋbɔŋ dɔgʋsɔ lɩma, nɩaa yie bɩbɩɩnɛ ba ŋɩŋaa wʋbɔŋŋɔɔ nɛ.

¹² Dɩ nɩbɔmʋŋ nɛ jaŋ ŋaa wʋbɔŋŋɔɔ zɔlɔ aŋ ha hɛ ʋ mɩɩsɩŋ lɛ a dieni, mɩ jɩma nɩalɩŋ sɩɩ fá Wɩa a zizilu, ba-na wɩaa jaŋ vɛŋ woruŋ pɩba.

¹³ Ama wɩaa bɩ jaŋ vɛŋ woruŋ a pɩ nɩbɔŋŋɔɔ-na. Ba mɩɩsɩŋ bɩ jaŋ duomi, a nagɛ daaliimiŋ sɩ yie duomo pɩpɛ ŋɩɩ, bɛɛ wɩaa ba bɩ Wɩa ka fá.

¹⁴ Wɩɩ dɔŋ ma nɛ bɩra ŋaa dʋnɩa lɛ a bɩ bʋbʋɔ kɛnɛ: Ba yie joŋ nɩbɔŋŋɔɔ time a tiŋ tʋɔpʋl tɩŋŋaa lɛ, aŋ joŋ tʋɔpʋl tɩŋŋaa time a tiŋ nɩbɔŋŋɔɔ lɛ. Mɩ sɩ, wɩɩŋ deeŋ ma bɩ bʋbʋɔ kɛnɛ.

¹⁵ Ŋɩɩ nɛ mɩ bɩɩnɛ arɩ nuhuobiine mɩɩsɩŋ lɛ ʋ maga ʋ dii aŋ nyʋa nɛ a nɩɩ sɩma dɩ ʋ tʋɔŋ tɔrɛ, bɛɛ wɩaa kʋŋkala bɩra tuo dʋnɩa lɛ a kpɩa ŋɩɩ. Ŋɩɩ nɛ tʋɔtɔrʋŋ jaŋ hɛ ʋ teeŋ tɩntɩmɩɩ kala ʋ sɩɩ tɩŋ ʋ mɩɩsɩŋ tapʋlɩa-la Wɩa sɩ joŋo pʋ dʋnɩa deeŋ lɛ.

¹⁶ Mɩ sɩ joŋ mɩ nyuŋ hɛ dɩ mɩ gbilli wʋjɩmɩŋ, aŋ-na tɩŋ tɩntɩmɩɩ-la kala nɩaa sɩɩ tɩŋ dʋnɩa deeŋ lɛ, mɩ bɩ doŋ wuo pɩŋ wɩɩhɛyɛ arɩ tɩtaŋɩŋ kala.

¹⁷ Ŋɩɩ nɛ mɩ na dɩ wɩalɩŋ kala Wɩa sɩ ŋaa, nʋʋkala tuo sɩ jɩŋ wɩalɩŋ ʋ sɩɩ ŋaa dʋnɩa deeŋ lɛ sɩaa. Dɩ nʋʋ nɩɩ walɩmɛ dɩ ʋ jɩŋ ma, ʋ bɩ jaŋ wuo jɩŋ ba bʋbʋɔŋ. Dɩ wʋjɩnnʋ kala nɛ paala bʋl dɩ ʋ jɩma ma, ʋ bɩ wuo chaasaa jɩŋ.