TƖƖCHA 7 - WƖA TENIŊ

Wʋjɩmɩŋ

¹ Yɩrɩ zɔmʋŋ nɛ kpɩa tʋlaalɩ-zɔmʋŋ. Tapʋlɩɩ-la nʋʋ sɩ sʋba nɛ kpɩa tapʋlɩɩ-la ba sɩ lʋlʋ.

² Nʋʋ sɩ mʋ lee-la ba sɩɩ yel nɛ kpɩa nʋʋ sɩ mʋ lee-la ba sɩ dii kɩaa a gbigbieli, bɛɛ wɩaa sʋʋŋ ŋaa nuhuobiiŋ kala kʋŋ nɛ. Nʋʋkala sɩ weye maga dɩ ʋ jɩŋ ŋɩɩ lɛ.

³ Tʋɔ-cheeŋ nɛ kpɩa mɔmʋŋ, bɛɛ wɩaa tʋɔ-cheeŋ jaŋ wuo leŋ nɩaa gʋnnɛ wʋjɩmɩŋ.

⁴ Wʋjɩnna ka bɩɩnɛ lee-la ba sɩɩ yel wɩaa nɛ, ama nɩyaara-na yie bɩbɩɩnɛ lee-la tʋɔtɔrʋŋ sɩ hɛ wɩaa nɛ.

⁵ Wʋjɩnna sɩ kpɩa ŋ lɛ, ʋ nɛ kpɩa ŋ nɩyaarɩŋ sɩ bɛsɛ ŋ lɛ.

⁶ A nagɛ ba sɩ joŋ sɔsʋŋ hɛ nyiniŋ lɛ ba pʋpɔsɛ, ŋɩɩ nɛ nɩyaarɩŋ mɔmʋŋ nagɛ. Wɩɩŋ deeŋ ma bɩ bʋbʋɔŋ kɛnɛ.

⁷ Gɩrɩma dii nɛ yie leŋ wʋjɩnna bɩrɩmɛ nɩyaarɩŋ. Kpalaa laanɩŋ ka chei nɩaa nɛ.

⁸ Wɩɩŋ dɩdɛrɩŋ nɛ kpɩa ʋ dɩ-suomuŋ, kenyiri ma nɛ kpɩa babii-ballɩŋ.

⁹ Sɩ́ guu nɩna baanɩŋ, bɛɛ wɩaa nɩyaarɩŋ nɛ yie guu na baanɩŋ.

¹⁰ Ʋ bɩ wʋjɩŋ wɩɩ ŋaa dɩ ŋ pɩɛsɛ, “Bɛɛ nɛ tɩɩ faafaa kpɩa lɛɛlɛ?”

¹¹ Wʋjɩmɩŋ ŋaa kʋzɔŋ nɛ, a nagɛ ŋ sɩ dii dʋa. Ʋ kɛŋ nyʋʋrʋŋ a pɩ dʋnɩa nɩaa.

¹² Wʋjɩmɩŋ jaŋ wuo pɔŋ a nagɛ moribiee sɩ jaŋ wuo pɔŋ ŋɩɩ. Ama wʋjɩmɩŋ wɩɩŋ nɛ ŋ-la: Ʋ yie pɔ nɩɩ-la sɩ kɛnʋ mɩɩsɩŋ nɛ.

¹³ Kɛŋ wɩalɩŋ Wɩa sɩ ŋaa a bɩɩna na. Kʋbɛɛ nɛ jaŋ wuo kɛŋ kʋŋ ʋ sɩ ŋaa ʋ golibi a tʋrɛ?

¹⁴ Dɩ wɩaa nɛ vɛŋ woruŋ a pɩŋ, leŋ dɩ ŋ tʋɔŋ tɔrɛ, ama dɩ wɩaa nɛ bɩra lɔrɔ ma, kaa bɩɩna na. Wɩa nɛ ŋaa ba kala. Ŋɩɩ wɩaa nuhuobiine bɩ jaŋ wuo ŋaa wɩɩkala a mʋ tɩgɛ ʋ chiemiŋ lɛ.

¹⁵ Mɩ na wɩaa deemba kala nɛ mɩ mɩɩsɩŋ deeŋ sɩ bɩ bʋbʋɔ kɛnɛ lɛ mɩ sɩ hɛ: Mɩ na dɩ tʋɔpʋl tɩɩna sɩɩ ŋaa tʋɔpʋl wɩaa aŋ buuro sʋʋ, a bɩra na nɩbɔmʋŋ ma sɩɩ ŋaa wʋbɔŋŋɔɔ aŋ ha hɛ ʋ mɩɩsɩŋ lɛ a dieni.

¹⁶ Sɩ́ ŋ tɩtɩa joŋ arɩ ŋ faasa ŋaa tʋɔpʋl tɩɩna nɛ, koo dɩ ŋ ŋaa wʋjɩnnʋ kɩŋkɛŋ tɩɩna. Bɛɛ nɛ tɩɩ ŋ chɩchɛ dɩ ŋ chei ŋ tɩtɩa?

¹⁷ Sɩ́ faasa ŋaa nɩbɔŋ a bɩra sɩ́ nɩyaarɩ ma ŋaa. Bɛɛ nɛ tɩɩ ŋ chɛ dɩ ŋ sʋʋ, dɩ ŋ sʋʋŋ bɩ yie?

¹⁸ Ʋ ŋaa wʋzɔŋ nɛ dɩ ŋ hɛ wɩaa deemba balɩa pɛgɛ. Nɩɩ-la sɩɩ fá Wɩa nɛ jaŋ wuo lɩɩ ba kala lɛ.

¹⁹ Wʋjɩmɩŋ nɛ yie leŋ wʋjɩnna kɛŋ doluŋ a kɩɩ nɩduoruŋ fii sɩɩ beŋ tabalɩŋ.

²⁰ Tʋɔpʋl tɩɩna kala tuo dʋnɩa lɛ a ŋɩŋaa wɩaa ba bʋa lɛ, a ha bɩ wʋbɔŋ kala ŋaa.

²¹ Sɩ́ wɩɩkala nɩaa sɩɩ bʋl jegilu, ŋɩɩ dee ŋ jaŋ nɩɩ dɩ ŋ tɩntɩnna bʋl wʋbɔŋŋɔɔ a tɩgɛ ŋ lɛ.

²² Ŋ tɩtɩa jɩma ŋ tʋɔŋ lɛ dɩ ŋ bʋl wʋbɔŋŋɔɔ yʋgɛ nɛ a tɩgɛ nɩaa lɛ.

²³ Mɩ kɛŋ mɩ wʋjɩmɩŋ nɛ a kaa magɩsɛ wɩaa deemba kala na a bʋl: Mɩ faa chɛ dɩ mɩ ŋaa wʋjɩnnʋ nɛ, ama wɩɩŋ deeŋ kɩɩmɛ nɛ.

²⁴ Wʋjɩmɩŋ bolie, a luŋ ma. Kʋbɛɛ nɛ jaŋ wuo jɩŋ ʋ bʋbʋɔŋ?

²⁵ Ŋɩɩ nɛ mɩ joŋ mɩ nyuŋ hɛ dɩ mɩ jɩŋ wɩaa sɩaa, a gbille chɛ wʋjɩmɩŋ dɩ mɩ na ŋɩɩ wɩaa sɩɩ vɛŋ, a bɩra chɩchɛ dɩ mɩ jɩŋ ŋɩɩ bɔnsʋŋ sɩ naga arɩ ŋɩɩ chʋʋlʋŋ sɩ naga.

²⁶ Mɩ na dɩ ha-bɔmʋŋ nɛ bɔmɔ kɩɩ sʋʋŋ, Ʋ nagɛ bɛrɛ nɛ. Ʋ nɩsɩŋ nagɛ chɔrʋmɔɔ nɛ. Nɩɩ-la wʋŋaalaa sɩ tɔrɛ Wɩa tʋɔŋ dʋndʋŋa nɛ jaŋ fori ʋ nɩsɩŋ lɛ. Ama wʋbɔŋ ŋaara-na ʋ jaŋ bɛrɛ kɛnʋ.

²⁷ Nɩɩ-la sɩ kɛŋ wʋjɩmɩŋ a dɩdagɛ nɩaa sɩ, “Má bee na, wɩɩ-la mɩ sɩ chɛ na nɛ ŋ-la: Mɩ joŋ wɩɩ nɛ a pɛ wɩɩ-la lɛ dɩ mɩ na wɩaa sɩɩ vɛŋ ŋɩɩ,

²⁸ mɩ haa gbillu nɛ, ama mɩ ha bɩ ba sɩaa na. Mɩ na dɩ nɩaa bʋɩ tʋɔŋ ba-bala dʋndʋŋ nɩɩ ŋaa wɩaa ba bʋa lɛ. Ama ha-bala ma tuo ba kala tʋɔŋ.

²⁹ Wʋbala-la mɩ sɩ na nɛ ŋ la: Wɩa ŋaa nuhuobiine ʋ tʋʋlɛ nɛ. Ama ʋ mɩɩra kɛŋ ʋ tɩtɩa a kperi nɛ.”