TƖƖCHA 6 - WƖA TENIŊ

¹ Wʋbɔŋ dɔŋɔ ma nɛ mɩ na dʋnɩa lɛ, ʋ yuŋŋie nɛ woruŋ a daŋ nuhuobiinee nyuŋ:

² Wɩa yie joŋ dʋa a pɩ nʋʋ ʋ kɛŋ kɩaa ba zizilu, dɩ ʋ sɩ́ kʋŋkala ʋ sɩ cho chɛ ka. Ama Wɩa yie bɩ leŋe ʋ nɩnɩɩ ba sɩma, ka nɩwogo mɩɩra nɩnɩɩ ba sɩma. Wɩɩŋ deeŋ bɩ bʋbʋɔ kɛnɛ, ʋ ŋaa wɩɩ sɩ chaasa lɔrɛ nɛ.

³ Nʋʋ jaŋ wuo kɛŋ biiriŋ zɔlɔ a hɛ dʋnɩa lɛ jɩ-daŋ, ama ʋ sɩ diene ʋ mɩɩsɩŋ lɛ a magɛ ŋɩɩ ma kala, dɩ ʋ nɛ bɩ wuo dii ʋ dʋa sɩma, ka ba bɩra bɩ ʋ woruŋ ma hugo, mɩ jaŋ bʋl arɩ bii-sʋʋŋ ba sɩ lʋla nɛ kpɩaʋ.

⁴ Bile-na kɔɔnʋŋ bɩ bʋbʋɔ kɛnɛ, ʋ to birimiŋ lɛ nɛ a viiri, ʋ bɩ yɩrɩŋ kɛnɛ.

⁵ Ʋ sɩ bɩ wɩɩpɔsʋŋ na ma kala, a bɩ wɩɩkala jɩŋ, ʋ nɛ ha na wiese a kɩɩ nɩɩ-la,

⁶ dɩ nɩɩ-la nɛ paala hɛ ʋ mɩɩsɩŋ lɛ jɩsɩŋ bʋɩ balɩa ma, aŋ bɩ wuo nɩɩ kɩalɩŋ ʋ sɩ kɛnɛ sɩma, dɩ-bala nɛ ba kala mʋmʋ.

⁷ Nuhuobiine yie tɩtɩŋ dɩ ʋ na kɩaa nɛ a dii, ama ʋ ha bɩ vɔgɛ.

⁸ Bɛɛ kʋŋ nɛ wʋjɩnna kaa kpɩa nɩyaarɩŋ lɛ? Bɛɛ kʋŋ nyʋʋrɩ nɛ summo sɩ jɩŋ ʋ tɩtɩa kɛnɩŋ nɩaa tʋɔŋ yie na?

⁹ Dɩ ŋ sɩɩŋ nɛ su kʋ-la ŋ sɩ kɛnɛ nɛ kpɩa ŋ sɩɩ hɩɛnɛ kʋŋ ŋ sɩ bɩ kɛnɛ. Wɩɩŋ deeŋ ma bɩ bʋbʋɔ kɛnɛ, ʋ nagɛ nʋʋ sɩɩ kiri peliŋ nɛ.

¹⁰ Kʋŋkala sɩ hɛ nɩmɛ laa sɩpaaŋ kɛŋ yɩrɩŋ nɛ, la kala jɩŋ ŋɩɩ nuhuobiine sɩ naga nɛ. Ŋ dɩ nʋʋ sɩ kɛŋ doluŋ a kɩɩŋ bɩ kaalɛrɛ wuo kɛŋ.

¹¹ Wʋbʋl kɩŋkɛŋ bɩ bʋbʋɔ kɛnɛ, ŋɩɩ saa bɩ nyʋʋrɩ kɛnɛ nʋʋkala teeŋ.

¹² Kʋbɛɛ nɛ jɩŋ wɩɩ-la sɩ zɔmɔ a pɩ nuhuobiine, ʋ sɩ hɛ ʋ mɩɩsɩŋ lɛ tapʋlɩa-la baŋmɛnɛ sɩ bɩ bʋbʋɔ kɛnɛ, a bɩbal a nagɛ daaliimiŋ? Kʋbɛɛ nɛ jaŋ wuo bʋl wɩɩ-la sɩ jaŋ ŋaa ʋ lɛ dɩ ʋ nɛ lɩɩ dʋnɩa deeŋ lɛ?