TƖƖCHA 5 - WƖA TENIŊ

Fɩfá Wɩa

¹ Dɩ ŋ nɛ mʋ Wɩa dɩa, kɛŋ ŋ tɩtɩa woruŋ. Mʋ kpagɛ a jegile nɩɩ wɩaa woruŋ. Ʋ nɛ kpɩa ŋ sɩ kpʋ pʋsʋŋ a ŋaa Wɩɩsʋlʋŋ a nagɛ nɩyaaraa sɩɩ ŋaa ŋɩɩ, aŋ bɩ jɩŋ wɩɩ-la ba sɩɩ ŋaa ʋ bʋa lɛ dee ŋɩɩ.

² Sɩ́ leŋe dɩ ŋ niiŋ lɩŋ, sɩ́ pese hɛ niiŋ Wɩa teeŋ. Wɩa hɛ ʋ jaŋ lɛ nɛ, ka ŋ ma hɛ dʋnɩa lɛ, ŋɩɩ wɩaa sɩ́ wʋdaŋ bʋl.

³ Dɩ wʋwalɩmaa nɛ yʋga ŋ lɛ, ŋ jaŋ duduosi duosi bɔŋŋɔɔ. Dɩ ŋ nɛ bʋl wɩaa yʋgɛ, ŋ jaŋ bʋl nɩyaarɩ wɩaa.

⁴ Dɩ ŋ nɛ ta niiŋ Wɩa teeŋ, sɩ́ leŋe dɩ ʋ dieni ka dɩ ŋ lɩɩsɛ nii-la. Ʋ tʋɔŋ bɩ nɩyaaraa nyuŋ ka tɔrɛ. Lɩɩsɛ nii-la ŋ sɩ ta.

⁵ Dɩ ŋ nɛ bɩ niiŋ ta, ʋ nɛ kpɩa ŋ sɩ ta niiŋ aŋ bɩ lɩɩsa.

⁶ Sɩ́ leŋe dɩ ŋ niiŋ wʋbʋlaa kɛnɩŋ hɛ wʋbɔmʋŋ lɛ. Pʋpɔ ŋ sɩ́ bʋla pɩ Wɩa tɩntɩnna, “Nii-la mɩ sɩ ta, mɩ perige nɛ.” Sɩ́ leŋe dɩ ŋ wʋbʋlaa ŋaa dɩ Wɩa na baanɩŋ ŋ nyuŋ a chei ŋ tɩntɩŋŋaa.

⁷ Tʋɔbɩɩnaa kɩŋkɛŋ arɩ wʋbʋl daŋ bɩ bʋbʋɔ kɛnɛ. Fɩfá Wɩa.

Kɩaa kɛnɩŋ bɩ bʋbʋɔ kɛnɛ

⁸ Sɩ́ leŋe dɩ ʋ ŋaa wʋkpuŋkpere ŋ lɛ, dɩ ŋ nɛ na dɩ ba nyagɛ summoo bil ma tinteeŋ lɛ, aŋ vɩa wʋtɩtɩɩ arɩ wɩalɩŋ sɩ maga dɩ ba joŋo ŋaa ba lɛ ta, bɛɛ wɩaa tɩntɩnnɩ-hɩaŋ kala kɛŋ nɩhɩaŋ nɛ ʋ bibenu. Ka ba kala ha kɛŋ nɩhɩasɩŋ ba bibemba.

⁹ Tinteeŋ sɩ kɛŋ kɩalɩŋ ŋaa nʋʋkala kɩaa nɛ, kuoro ma tɩtɩa yie na kɩalɩŋ ba sɩ pɛrɛ nyʋʋrʋŋ nɛ.

¹⁰ Nɩɩ-la kala sɩ cho moribiee bɩ moribiee ka vɔgɛ. Nɩɩ-la ma kala sɩ cho dʋa bɩ kɩaa ka vɔgɛ. Wɩɩŋ deeŋ ma bɩ bʋbʋɔ kɛnɛ.

¹¹ Dɩ kɩaa nɛ pʋŋa pɛ, diiree ma yie pʋŋa pɛ nɛ. Nɩɩ-la sɩ tɩɩba bɩ nyʋʋrɩ kala kɛnɛ, ʋ wɩɩŋ nɛ dɩ ʋ tuo bibeŋ.

¹² Tɩntɩnna doŋ pɩnɩŋ nɛ sɩma, dɩ ʋ dii kɩaa vɔgɛ koo dɩ ʋ bɩ vɔgɔ. Ama kɩaa tɩɩna dʋa bɩ leŋe ʋ pɩpɩŋ doŋ.

¹³ Wʋbɔŋ sɩ chaasa lɔrɛ nɛ mɩ na dʋnɩa lɛ: Kɩaa tɩɩna joŋ dʋa bil nɛ, ʋ bɩrɩmɛ ʋ nyu-bɔŋ.

¹⁴ Naabɔmʋŋ jʋʋ dʋa-la nɛ ʋ lɛl, ʋ bɩ kʋŋkala leŋe bil ʋ biiriŋ lɛ.

¹⁵ Ba lʋl nuhuobiine arɩ yarɩ-biree nɛ, ŋɩɩ tɩtɩa nɛ ʋ jaŋ bɩra kaa mʋ. Ʋ bɩ kɩalɩŋ ʋ sɩ tɩma na kʋŋkala wuo kaa pɛ mʋmʋ.

¹⁶ Wɩɩŋ deeŋ ma ŋaa wʋbɔŋ sɩ chaasa lɔrɛ nɛ: Nuhuobiine sɩ kɛŋ ŋɩɩ kɔ dʋnɩa, ŋɩɩ nɛ ʋ bɩra kaa mʋ. Ʋ bɩ nyʋʋrɩ kala na, ʋ lɔlɔ ta nɛ.

¹⁷ Ʋ na hɛɛŋ nɛ ʋ tapʋlaa kala lɛ, a kɛŋ tʋɔ-cheeŋ kɩŋkɛŋ, wʋwalɩmaa, ʋ baanɩŋ sisii arɩ nyanyalaa.

¹⁸ Ŋɩɩ nɛ mɩ jɩŋ dɩ ʋ ŋaa wʋzɔŋ nɛ a magɛ dɩ nuhuobiine dii aŋ nyʋa, a nɩɩ sɩma ʋ mɩɩsɩŋ lɛ tapʋlɩa-la baŋmɛnɛ Wɩa sɩ joŋo pʋ ʋ kaa tɩma lɔl dʋnɩa lɛ a na kɩalɩŋ. Ʋ kpaalɩŋ nɛ ŋɩɩ.

¹⁹ Dɩ Wɩa nɛ joŋ dʋa pɩ nuhuobiine dɩ ʋ kɛŋ kɩaa, a wuo leŋ ʋ nɩɩ kɩalɩŋ sɩma, ʋ maga dɩ ʋ tʋɔŋ tɔrɛ nɛ ʋ sɩ nɩɩ kɩalɩŋ ʋ sɩ tɩma na sɩma. Wɩa nɛ joŋo pʋ.

²⁰ Wɩa sɩ folo leŋ ʋ tʋɔŋ tɔrɛ, ʋ bɩra bɩ jaŋ liliisi ʋ mɩɩsɩŋ tapʋlaa wɩaa kɩŋkɛŋ.