TƖƖCHA 4 - WƖA TENIŊ

Nɩaa nyagɛ dɔŋɔ bil

¹ Mɩ bɩra beŋ, a na nɩalɩŋ kala ba sɩ nyaga bil dʋnɩa lɛ: Mɩ na ŋɩɩ nɩalɩŋ ba sɩ nyaga bil sɩɩ yel sɩlɩɩrɩŋ, ka nʋʋkala tuo dɩ ʋ nyagɛ ba bɔyɛ. Nɩalɩŋ sɩ nyagɛba bil kɛŋ doluŋ nɛ, ka nɩalɩŋ ba sɩ nyaga bil bɩ nʋʋ kɛnɛ dɩ ʋ nyagɛ ba bɔyɛ.

² Ŋɩɩ nɛ mɩ bʋl mɩ tʋɔŋ lɛ: Nɩalɩŋ sɩ sʋba nɛ kɛŋ tʋɔtɔrʋŋ a kɩɩ nɩalɩŋ ha sɩ weye.

³ Ama nɩɩ-la sɩ kpɩa ba kala nɛ, nɩɩ-la ba ha sɩ bɩ lʋla, nɩɩ-la ha sɩ bɩ wʋbɔmɔ-la ba sɩɩ ŋaa dʋnɩa lɛ na.

⁴ Mɩ bɩra na dɩ tɩntɩmɩɩ-la kala nɩaa sɩɩ tɩŋ arɩ kɩalɩŋ kala ba sɩ yie na lɩɩ ba yaraa sɩɩ bieri ba dɔŋɔ nyuŋ nɛ. Wɩɩŋ deeŋ ma bɩ bʋbʋɔ kɛnɛ, ʋ nagɛ nʋʋ sɩɩ kiri peliŋ nɛ.

⁵ Nɩyaarɩŋ nɛ yie paa ʋ vaasɩŋ vɔɔ hɔŋ aŋ sʋʋ losuŋ.

⁶ Nʋʋ sɩ bɩ faasa lɔl, aŋ na kɩaa nɩsɩŋ sɩɩŋ nɛ kpɩa nʋʋ sɩ lɔlɔ kɩŋkɛŋ aŋ na kɩaa nɩsɩŋ sɩɩŋ bʋlɩa, tɩɩna nagɛ nʋʋ sɩɩ kiri peliŋ nɛ.

⁷ Wɩɩ dɔŋ ma nɛ mɩ bɩra na dʋnɩa lɛ sɩ bɩ bʋbʋɔ kɛnɛ:

⁸ Baal kʋbala nɛ fa hɛ nɩmɛ ʋ dʋndʋŋ, ʋ bɩ bii kɛnɛ, ʋ bɩ naambii ma kɛnɛ, aŋ ka ʋ lɔlʋŋ fa bɩ dɛrɛ, ʋ sɩɩŋ fa bɩ ʋ dʋa ka su. Ŋɩɩ nɛ ʋ pɩɛsɛ ʋ tɩtɩa, “Kʋbɛɛ nɛ mɩ lɔlɔ pɩpa, bɛɛ nɛ tɩɩ mɩ bɩ chɛ dɩ nɩɩ kɩalɩŋ mɩ sɩ kɛnɛ sɩma?” Wɩɩŋ deeŋ ma bɩ bʋbʋɔ kɛnɛ, tʋɔ-chei tɩntɩmɩɩ nɛ.

⁹ Nɩaa balɩa nɛ kpɩa nɩbala, bɛɛ wɩaa dɩ ba nɛ gbaara tɩŋ, ba yie na kɩaa yʋgɛ nɛ.

¹⁰ Dɩ dɔŋɔ nɛ tele, dɔŋɔ jaŋ wuo kɛnʋ dɩ ʋ sii. Ama dɩ nʋʋ nɛ tele aŋ bɩ nʋʋ kɛnɛ dɩ ʋ pɛ ʋ lɛ dɩ ʋ sii, ŋɩɩ kɛŋ nenige nɛ.

¹¹ Dɩ nɩaa balɩa nɛ pɩna ma, baa tɔ dɔŋɔ waarɩŋ nɛ. Ama dɩ nɩbala nɛ pɩna, waarɩŋ jaŋ kɛnʋ.

¹² Nʋʋ jaŋ wuo ŋmoo nɩbala, ama dɩ ba nɛ ŋaa balɩa, ʋ bɩ jaŋ wuoba. Ŋmɛŋ-biee batori bɩ ŋɩɩ lɩmaa kɛrɛ.

Nyaaŋ arɩ wʋjɩmɩŋ wɩaa

¹³ Bapʋɔsɛ-bie sɩ nyaaba aŋ kɛŋ wʋjɩmɩŋ, ʋ nɛ kpɩa kuoro sɩ hɩɛsa aŋ yaarɛ a bɩra bɩ sɛɩ dɩ ba chagɩlʋ.

¹⁴ Dɩ ba lʋl bapʋɔsɛ-bie-la hɛ sunnuŋ lɛ nɛ koo dɩ ʋ lɩɩ bɩnɩŋ dɩa lɛ nɛ, ʋ jaŋ wuo dii kuoruŋ.

¹⁵ Mɩ na dɩ nɩaa kala sɩ hɛ dʋnɩa lɛ ka to bapʋɔsɛ-bie kʋbala sɩ dii kuoruŋ harɩŋ.

¹⁶ Nɩaa fa yʋga a bɩ nii kɛnɛ a tuto ʋ harɩŋ. Ama nɩalɩŋ sɩ to harɩŋ kɔ tʋɔŋ bɩ nɩɩ-la sɩ laa kuoru-la nyuŋ tɔrɔ. Wɩɩŋ deeŋ ma bɩ bʋbʋɔ kɛnɛ, ʋ nagɛ nʋʋ sɩɩ kiri peliŋ nɛ.