TƖƖCHA 2 - WƖA TENIŊ

Tʋɔtɔrʋŋ bɩ bʋbʋɔ kɛnɛ

¹ Mɩ bɩɩna mɩ tʋɔŋ lɛ, “Mɩ jaŋ kɛŋ tʋɔtɔrʋŋ ŋaa wɩaa a na sɩma-la sɩ hɛ ʋ lɛ.” Ama mɩ na dɩ ŋɩɩ ma bɩ bʋbʋɔ kɛnɛ.

² Mɩ sɩ, “Mɔmʋŋ ŋaa nɩyaarɛ wɩɩ nɛ.” Bɛɛ kʋŋ nɛ tʋɔtɔrʋŋ kaa kʋkɔ?

³ Mɩ bɩɩna mɩ tʋɔŋ lɛ arɩ mɩ nɛ nyʋa sɩnɩŋ mɩ yaraa jaŋ nyaasɛ dɩ mɩ tʋɔŋ tɔrɛ, ka dɩ mɩ ha kɛŋ wʋjɩmɩŋ. Mɩ faa chɛ dɩ mɩ na wɩɩ-la sɩ zɔmɔ a magɛ dɩ nuhuobiine ŋaa tapʋlɩa-la baŋmɛnɛ, ʋ sɩ hɛ ʋ mɩɩsɩŋ lɛ dʋnɩa lɛ nɛ.

⁴ Mɩ tɩŋ tɩntɩŋ daŋ nɛ: Mɩ saa dɩɩsɩŋ a bil girep tɩɩsɩŋ bagɩsɩŋ.

⁵ Mɩ pɛrɛ ŋmaŋkaanɩŋ nɛ a chɔnsɛ tɩɩsɩŋ sɩ kɛŋ fɩɛlɩŋ arɩ tɩɩ-dosunu-la nɛnɛɛ ba sɩɩ dii.

⁶ Mɩ lu vilee a ŋaa ba lɩɩŋ hɩhɛ tɩɩ-daŋ-la.

⁷ Mɩ yɔɔ yosuŋ, baalaa arɩ haalaa a pɛ yosu-la ma ba sɩ lʋla mɩ dɩa lɛ. Mɩ bɩra kɛŋ nɛsɩŋ arɩ piesee a kɩɩ nʋʋ na-kala sɩ laa sɩpaaŋ hɔŋ Jerusalɛm lɛ mɩ lɛ.

⁸ Mɩ dʋa sɛlɩmɛ arɩ hɔpʋla chʋɔrɛ nɛ, aŋ laa dɔnsʋŋ ma kuoroo arɩ leree dɔnsʋŋ nɩaa teeŋ. Mɩ kɛŋ yɩɩlɩ yɩɩraa baalaa arɩ haalaa, mɩ kɛŋ haala-la kala baala sɩ yie cho dɩ ʋ kɛnɛ nɛ.

⁹ Mɩ ŋaa nɩbal nɛ kɩŋkɛŋ, a kɩɩ nʋʋ na-kala sɩ laa sɩpaaŋ hɔŋ Jerusalɛm lɛ mɩ lɛ. Wɩaa deemba kala wʋjɩmɩŋ harɩŋ nɛ mɩ to.

¹⁰ Mɩ bɩ kʋŋkala mɩ sɩɩŋ sɩ na a cho vɩa, mɩ bɩ mɩ tʋɔtɔrɛ wɩaa vɩa. Mɩ tʋɔŋ tɔrɛ tɩntɩmɩɩ-la kala mɩ sɩ tɩma lɛ nɛ. Wɩɩŋ deeŋ nɛ ŋaa mɩ tɩŋŋaa kala time.

¹¹ Mɩ sɩ kɛŋ wɩalɩŋ kala mɩ sɩ ŋaa bɩɩnɛ arɩ ŋɩɩ mɩ sɩ faasa tɩŋ a na kɩaa, mɩ na dɩ wɩalɩŋ kala mɩ sɩ ŋaa bɩ bʋbʋɔŋ kɛnɛ. Ʋ nagɛ nʋʋ sɩɩ kiri peliŋ nɛ, kʋŋkala bɩ nyʋʋrɩ kɛnɛ dʋnɩa deeŋ lɛ.

Wʋjɩmɩŋ arɩ yaarɩŋ bɩ bʋbʋɔ kɛnɛ

¹² Dɩ kuoro nɛ tuo ka dɩ nʋʋ dii kuoruŋ ʋ nyuŋ lɛ, bɛɛ nɛ ʋ jaŋ ŋaa dɩ wɩalɩŋ ba sɩ laa sɩpaaŋ ŋaa aŋ ka dee? Ŋɩɩ nɛ mɩ suomo kɛŋ wʋjɩmɩŋ, chʋʋlʋŋ arɩ yaarɩŋ wɩaa a bɩbɩɩnɛ.

¹³ Mɩ na dɩ wʋjɩmɩŋ nɛ kpɩa yaarɩŋ, a nagɛ pʋlʋmʋŋ sɩ kpɩa birimiŋ ŋɩɩ.

¹⁴ Nɩɩ-la sɩ kɛŋ wʋjɩmɩŋ na lee-la ʋ sɩɩ mʋ nɛ, ka nɩyaara-na vɩvɛŋ birimiŋ tʋɔŋ. Ama mɩ kʋ jɩŋ dɩ wʋbala nɛ jaŋ ŋaa ba kala lɛ ba dɩdɛrɩŋ.

¹⁵ Ŋɩɩ nɛ mɩ bʋl mɩ tʋɔŋ lɛ, “Wɩɩ-la sɩ jaŋ ŋaa nɩyaarɩŋ lɛ nɛ, jaŋ ŋaa mɩ ma lɛ. Bɛɛ kʋŋ nyʋʋrʋŋ nɛ mɩ saa jaŋ na dɩ mɩ nɛ kɛŋ wʋjɩmɩŋ?” Mɩ bɩra bʋl mɩ tʋɔŋ lɛ, “Wɩɩŋ deeŋ ma bɩ bʋbʋɔŋ kɛnɛ.”

¹⁶ Nɩɩ-la sɩ kɛŋ wʋjɩmɩŋ arɩ nɩɩ-la sɩ yaara kala, ba bɩ jaŋ liliisi ba wɩaa deeŋ deeŋ. Bʋa kʋbala jaŋ yi dɩ ba yʋ ba wɩaa. Nɩyaarɩŋ sʋʋ nɛ, wʋjɩnna maa sʋʋ.

Ŋ sɩ tɩma lɔl kɩŋkɛŋ bɩ bʋbʋɔ kɛnɛ

¹⁷ Ŋɩɩ wɩaa mɩ mɩɩsɩŋ fɩɩ dʋnɩa wɩaa nɛ, bɛɛ wɩaa tɩntɩmɩɩ-la kala la sɩɩ tɩŋ ŋaa hɛɛ nɛ mɩ teeŋ. Ʋ bɩ bʋbʋɔ kɛnɛ, ʋ nagɛ nʋʋ sɩɩ kiri peliŋ nɛ.

¹⁸ Kɩalɩŋ kala mɩ sɩ tɩma lɔl a na dʋnɩa lɛ, mɩ bɩra bɩ ba cho, bɛɛ wɩaa mɩ jaŋ lemba pɩ nɩɩ-la sɩɩ tɩgɛ mɩ lɛ, dɩ mɩ nɛ tuo.

¹⁹ Nʋʋkala bɩ jaŋ jɩŋ dɩ nɩɩ-la sɩ jaŋ tɩgɛ mɩ lɛ ŋaa wʋjɩnnʋ koo nɩyaarɩ. Ka ʋ nɛ jaŋ dii kɩalɩŋ kala mɩ sɩ kɛŋ mɩ wʋjɩmɩŋ faasa tɩma na dʋnɩa lɛ. Wɩɩŋ deeŋ ma bɩ bʋbʋɔ kɛnɛ.

²⁰ Ŋɩɩ nɛ ʋ wɩɩmɛ, mɩ sɩ faasa tɩma lɔl ŋɩɩ dʋnɩa lɛ.

²¹ Nuhuobiine yie kɛŋ ʋ wʋjɩmɩŋ, ʋ wɩaa sɩaa jɩmɩŋ arɩ ʋ jɩma kala a tɩma na kɩaa, aŋ leŋ kɩalɩŋ kala ʋ sɩ na pɩ nʋʋ sɩ bɩ tɩma chɛ kɩalɩŋ. Wɩɩŋ deeŋ ma bɩ bʋbʋɔ kɛnɛ, ʋ ŋaa naabɔŋ bal nɛ.

²² Bɛɛ kʋŋ nɛ nuhuobiine na, ʋ sɩ yie walɩmɛ ʋ tɩtɩa a faasa tɩma lɔl dʋnɩa lɛ?

²³ Tapʋlɩɩ-la kala ʋ sɩ yie tɩŋ a na hɛɛŋ ʋ tʋɔŋ chei, tɩtaŋɩŋ ma ʋ tʋɔbɩɩnaa bɩ leŋe ʋ wiwiesi. Wɩɩŋ deeŋ ma bɩ bʋbʋɔ kɛnɛ.

²⁴ Nuhuobiine bɩ jaŋ wuo nɩɩ sɩma kala ʋ tɩntɩŋŋaa lɛ, a pɛ ʋ sɩ na kɩaa dii aŋ nyʋa lɛ. Mɩ na dɩ wɩɩŋ deeŋ ma lɩɩ Wɩa teeŋ nɛ.

²⁵ Dɩ Wɩa nɛ tuo, kʋbɛɛ nɛ jaŋ wuo na kɩaa dii koo a nɩɩ sɩma?

²⁶ Wɩa yie joŋ wʋjɩmɩŋ, wɩaa sɩaa jɩmɩŋ arɩ tʋɔtɔrʋŋ a pɩ nɩɩ-la sɩ ŋaa wɩaa a tʋtɔrɛ ʋ tʋɔŋ nɛ. Ama wʋbɔŋ ŋaara-na Wɩa yie leŋ ʋ tɩŋ nɛ a chɛ kɩaa tʋɔla bil, ʋ joŋo pɩ nɩɩ-la sɩ ŋaa wɩaa a tʋtɔrɛ ʋ tʋɔŋ. Wɩɩŋ deeŋ ma bɩ bʋbʋɔ kɛnɛ, ʋ nagɛ nʋʋ sɩɩ kiri peliŋ nɛ.