TƖƖCHA 1 - WƖA TENIŊ

Kʋŋkala bɩ bʋbʋɔ kɛnɛ

¹ Wɩalɩŋ nɩɩ-la sɩ kɛŋ wʋjɩmɩŋ a dɩdagɛ nɩaa sɩ bʋla nɛ ŋ-la. Ʋ fa ŋaa Devit nanʋal nɛ a ŋaa kuoro Jerusalɛm lɛ.

² Nɩɩ-la sɩ kɛŋ wʋjɩmɩŋ a dɩdagɛ nɩaa sɩ, “Kʋŋkala bɩ bʋbʋɔ kɛnɛ, kʋŋkala chaasa bɩ bʋbʋɔ kɛnɛ, kʋŋkala bɩ bʋbʋɔ kɛnɛ.”

³ Bɛɛ kʋŋ nɛ nuhuobiine yie na, ʋ sɩ yie faasa tɩma suoli ʋ mɩɩsɩŋ kala lɛ?

⁴ Nɩaa yie sʋsʋʋ nɛ, aŋ ka ba bɩra lʋlʋl dɔnsʋŋ, ama dʋnɩa ha nagɛ ʋ nagɩsɩŋ nɛ a kaa mʋ wuu.

⁵ Wɩɩ-muluŋ yie pɔsɛ, a tuu jʋʋ, aŋ bɩra guu mʋ lee-la ʋ sɩ chɩna pɔsɛ.

⁶ Peliŋ yie lu a mʋ wɩɩpɔsʋŋ nadiiŋ dɩɩrɩŋ, aŋ ville mʋ wɩɩpɔsʋŋ nagʋa dɩɩrɩŋ, ʋ yie golli golli, aŋ bɩra mɩɩra mʋ ʋ dɩ-suomuŋ.

⁷ Fuonuŋ kala pɛllɛ hɩhɛ mʋgʋ-balɩŋ lɛ nɛ, arɩ ŋɩɩ kala ʋ bɩ su. Lee-la kala fuonu-la sɩ lɩɩ kɔ, ba yie bɩra mɩɩra mʋ nɩmɛ nɛ.

⁸ Kʋŋkala chaasa lʋlɔl nɛ a kɩɩ ŋɩɩ nʋʋ sɩ jaŋ wuo dagɛ. Sɩɩŋ nɩna wɩaa ʋ bɩ vɔgɛ, dɩgɩlɩŋ ma nɩnɩɩ wɩaa ʋ bɩ vɔgɛ.

⁹ Kʋŋkala fa sɩ hɛ nɩmɛ ha jaŋ hɛ nɩmɛ. Wɩalɩŋ sɩ laa sɩpaaŋ a ŋaa nɛ jaŋ bɩra ŋaa. Wɩɩkala bɩ wʋfalɩɩ ŋaa dʋnɩa lɛ.

¹⁰ Nʋʋ jaŋ wuo bʋl, “Má bee na, kʋa deeŋ-na ŋaa kʋfalɩɩ nɛ.” Ama ʋ fa hɛ nɩmɛ faafaa kala nɛ, ka ba-na lʋlla.

¹¹ Ba bɩ faafaa nɩaa wɩaa ka liisi. Nɩalɩŋ ma ba ha sɩ jaŋ lʋl, nɩalɩŋ sɩ tɩgɛ ba lɛ, ma paala bɩ jaŋ liisi ba wɩaa.

Wʋjɩmɩŋ bɩ bʋbʋɔ kɛnɛ

¹² Mɩ-na nɩɩ-la sɩ dagɛ nɩaa nɛ fa dii Iziral tinteeŋ kuoruŋ Jerusalɛm lɛ.

¹³ Mɩ fa joŋ mɩ nyuŋ kala nɛ hɛ dɩ mɩ gʋnnɛ a kɛŋ wʋjɩmɩŋ a chɛ na wɩɩkala sɩ hɛ dʋnɩa lɛ. Chʋgʋ yuŋii nɛ Wɩa joŋo daŋ nuhuobiine nyuŋ.

¹⁴ Mɩ na dɩ wɩalɩŋ kala ba sɩɩ ŋaa dʋnɩa lɛ bɩ bʋbʋɔ kɛnɛ, ba nagɛ nʋʋ sɩɩ kiri peliŋ nɛ.

¹⁵ Ŋ bɩ jaŋ wuo tʋrɛ kʋŋ sɩ golibo, dɩ kʋŋ nɛ tuo, ŋ bɩ jaŋ wuo dɩɩsʋ.

¹⁶ Mɩ bɩɩna mɩ tʋɔŋ lɛ, “Bee na, mɩ waa nɛ mɩ wʋjɩmɩŋ lɛ a kɩɩ nʋʋ na-kala sɩ laa sɩpaaŋ mɩ lɛ a dii kuoruŋ Jerusalɛm lɛ. Mɩ gʋnnɛ wʋjɩmɩŋ nɛ kɩŋkɛŋ a jɩŋ wɩaa sɩaa.”

¹⁷ Ŋɩɩ nɛ mɩ joŋ mɩ nyuŋ kala hɛ dɩ mɩ jɩŋ wʋjɩmɩŋ arɩ yaarɩŋ pɛgɛ, a jɩŋ wʋjɩmɩŋ arɩ chʋʋlʋŋ pɛgɛ. Ama mɩ na dɩ ŋɩɩ ma nagɛ nʋʋ sɩɩ kiri peliŋ nɛ.

¹⁸ Dɩ ŋ nɛ kɛŋ wʋjɩmɩŋ kɩŋkɛŋ, wɩaa yie faasa walɩmɩŋ nɛ. Dɩ ŋ nɛ jɩŋ wɩaa sɩaa ma kɩŋkɛŋ, ŋɩɩ nɛ wɩaa ma yie wʋwɩɩŋ.