Taatɩs 3 - WƖA TENIŊ

Má ŋɩŋaa wʋzɔŋŋɔɔ bʋa na-kala lɛ

¹ Bʋla pɩ Wɩa nɩaa dɩ ba joŋ ba tɩtɩa pɩ nɩalɩŋ sɩ kɛŋ doluŋ ba lɛ arɩ nɩalɩŋ sɩɩ bemba a tutoba, a ŋaa siri dɩ ba ŋaa wɩɩ na-kala sɩ zɔmɔ.

² Bʋla pɩba dɩ ba sɩ́ wʋbɔŋ kala bʋla tɩgɛ nʋʋkala lɛ. Ʋ bɩ maga dɩ ba cho yuosuŋ, ama ʋ maga dɩ ba leŋ ba dɩ nʋʋkala pɛgɛ zɔŋ, a leŋ dɩ ba sɩaa fɩɛlɛ nʋʋkala teeŋ.

³ La ma tɩtɩa fa ŋaa nɩyaara nɛ, a fa bɩ Wɩa niiŋ to, wʋbɔŋŋɔɔ fa leŋ la yeŋŋi. La fa to la tʋɔtɔrɛ wʋŋaalaa harɩŋ nɛ a bɩrɩmɛ ba yosi. La fa cho dɩ nɩaa jʋʋ wʋbɔŋŋɔɔ a fa kɛŋ yarɩ-bieriŋ dɔŋɔ lɛ. Nɩaa fa bɛrɛla, la ma fa bɛrɛba.

⁴ Ama la Laataara Wɩa dagɛ ŋɩɩ ʋ sɩ kɛŋ zile arɩ ŋɩɩ ʋ sɩ cho nɩaa nɛ,

⁵ a laala ta. Ʋ bɩ naga arɩ la sɩ ŋaa tʋɔpʋl tɩmma nɛ tɩɩ ʋ laala ta. Ama ʋ sɩɩ fá nɩaa nenige nɛ tɩɩ ʋ laala ta. Ʋ laala ta nɛ, bɛɛ wɩaa ba fola Wɩɩchʋɔlɛ lɩɩŋ nɛ Wɩa Dɩŋ-zɔmʋŋ doluŋ lɛ. Ŋɩɩ dagɛ arɩ Wɩa bɩra wasa lʋlla nɛ, la kɛŋ mɩɩ-falɩŋ ʋ teeŋ.

⁶ Wɩa to la Laataara Yesu Kirisito lɛ nɛ a joŋ ʋ Dɩŋ-zɔmʋŋ a hɛ la lɛ woruŋ.

⁷ Ʋ lahɔrɩmɔ lɛ ʋ ŋaa ŋɩɩ dɩ la kɛŋ tʋɔpʋla ʋ sɩpaaŋ, a wuo kɛŋ mɩɩsɩ-la sɩ bɩ dɛrɛ, wɩɩ-la la sɩɩ yɩɛlʋ lɛ.

⁸ Wɩɩŋ deeŋ ŋaa wʋtɩtɩɩ nɛ. Mɩɩ chɛ dɩ ŋ paala chaasa bʋl wɩaa deemba, dɩ nɩalɩŋ sɩ laa Wɩa wɩaa dii, dɩ ba ŋaa siri a ŋɩŋaa wʋzɔŋŋɔɔ bʋa na-kala lɛ. Wɩaa deemba ŋaa wʋzɔmɔ nɛ. Ba jaŋ wuo pɛ nɩaa lɛ.

⁹ Má leŋ nɩyaarɩ wʋkaalɛrɛ, a sɩ́ ma naabalɩmaba gentine sɩ duomo dɩɩsʋ. Má sɩ́ yuosuŋ hɛ a sɩ́ dɔŋɔ yuo a tɩŋ wɩalɩŋ Mosis fa sɩ ŋmʋnsa bil dɩ nɩaa tuto wɩaa. Ŋɩɩ bɩ bʋbʋɔ kɛnɛ, ŋɩɩ bɩ nʋʋ lɛ ka pɛ.

¹⁰ Dɩ nʋʋ nɛ hɛ ma tʋɔŋ aa chɛ dɩ ʋ kɛŋ ma nyusuŋ yagɛ dɔŋɔ, yɩrʋ a kpʋrɩsɛ ʋ dɩgɩlaa. Dɩ ʋ nɛ vɩa aŋ ŋɩŋaa, bɩra yɩrʋ lɩa lɛ a kpʋrɩsɛ ʋ dɩgɩlaa, aŋ lɩɩsɛ ŋ nɩsɩŋ ʋ lɛ.

¹¹ Nɩɩ-la sɩɩ ŋaa ŋɩɩ vɩa wʋtɩtɩɩ-la nɛ aŋ ŋɩŋaa wʋbɔŋŋɔɔ. Ʋ wʋŋaalaa gʋra diiu sarɩya nɛ.

Wʋkaanɩŋ

¹² Dɩ mɩ nɛ tɩŋ Atɩmas koo Takɩkʋs dɩ ʋ kɔ ŋ teeŋ, hɛ doluŋ aŋ kɔ mɩ teeŋ Nikopolis lɛ, bɛɛ wɩaa mɩ bɩɩna dɩ mɩ hɔŋ nɩmɛ nɛ waarɩŋ chɛnsɩ-la tʋɔŋ.

¹³ Dɩ Ziinas sarɩya diiru-la arɩ Apɔlɔs nɩɩ vɛŋ ba wombiiŋ, pɛ ba lɛ woruŋ. Pɩba kʋ-la kala ba sɩɩ chɛ.

¹⁴ La nɩaa ma maga ba gʋnnɛ wʋzɔŋŋɔɔ ŋaanɩŋ nɛ, a wuo pɩpɛ nɩalɩŋ sɩ maga dɩ ba pɛ lɛ, aŋ sɩ́ mɛlɛ-la sɩ bɩ chie kɛnɛ kɛŋ.

¹⁵ La dɩ nɩalɩŋ kala sɩ hɔnɔ, laa chʋɔlʋŋ. Chʋɔlɛ nɩalɩŋ kala sɩ laa Yesu wɩaa dii a chola. Wɩa jaŋ pɛ ma kala lɛ woruŋ.