Taatɩs 2 - WƖA TENIŊ

Wʋtɩtɩɩ-la sɩ maga dɩ la tuto

¹ Ama ŋ-na Taatɩs, dɩdagɛ Wɩa wʋtɩtɩɩ-la.

² Bʋla pɩ banɩhɩasɩ-la sɩ hɛ ma tʋɔŋ dɩ ba leŋ dɩ ba sɩaa fɩɛlɛ, a kɛŋ mɛl-zɔmʋŋ, a kɛŋ ba tɩtɩa woruŋ, a jɩŋ wɩalɩŋ ba sɩ laa dii woruŋ, a cho nɩaa, a kɛŋ kenyiri.

³ Bʋla pɩ hanɩhɩasɩ-la ma dɩ ba ŋaa wɩalɩŋ sɩ daga arɩ baa to Wɩa wombiiŋ nɛ. Ʋ bɩ maga dɩ ba gɩgaa nɩaa harɩŋ koo dɩ ba ŋaa sɩ-nyʋaraa. Bʋla pɩba dɩ ba dɩdagɛ wɩalɩŋ sɩ zɔmɔ,

⁴ dɩ ba wuo dagɛ hatoloo ma dɩ ba cho ba balaba arɩ ba biiriŋ,

⁵ a wuo kɛŋ ba tɩtɩa woruŋ, a sɩ́ wʋlɩɩlɩŋ ŋɩŋaa, a beŋ ba dɩa nɩaa woruŋ, a kɛŋ zile, a tuto ba balaba niiŋ woruŋ, dɩ nʋʋkala sɩ́ wuo bʋl wʋbɔŋ kala a tɩgɛ Wɩa wʋzɔmɔ-la lɛ.

⁶ Bʋl ŋɩɩ tɩtɩa a nyaasɛ bapʋɔsaa ma nyuŋ dɩ ba jɩma kɛŋ ba tɩtɩa woruŋ.

⁷ Ŋ-na tɩtɩa Taatɩs, wɩɩ na-kala ŋ sɩɩ ŋaa lɛ, leŋ dɩ nɩaa na ŋ wʋŋaalaa sɩ zɔmɔ dɩ ba tuto. Wɩalɩŋ kala ŋ sɩɩ dagʋ, leŋ dɩ ba na arɩ ŋ kɛŋ wʋtɩtɩɩ arɩ sɩɩfɩɛsɩŋ.

⁸ Bʋl wʋtɩtɩɩ, dɩ nʋʋkala sɩ́ wuo kaa lɛrɛ. Dɩ ŋ nɛ ŋaa ŋɩɩ, hɩɩsɩŋ jaŋ kɛŋ ŋ dʋndɔŋŋɔɔ, bɛɛ wɩaa ba bɩ jaŋ wuo na wʋbɔŋ kala a bʋla tɩgɛ la lɛ.

⁹ Bʋla pɩ yosuŋ ma dɩ ba tuto nɩalɩŋ sɩ tɩɩba niiŋ wɩɩkala lɛ, a ŋaa wɩalɩŋ kala sɩ maga dɩ ba tɩŋŋaa tʋɔŋ tɔrɛ ba nyuŋ. Ʋ bɩ maga dɩ ba laa wɩaa bʋbʋl ba teeŋ.

¹⁰ Ba sɩ́ ba tɩɩnaba kɩaa gɩgaa. Wɩalɩŋ kala ba sɩɩ ŋaa, ʋ maga dɩ ba leŋ dɩ nɩalɩŋ sɩ tɩɩba laaba dii arɩ ba kɛŋ wʋtɩtɩɩ. Dɩ ba nɛ ŋaa ŋɩɩ, nʋʋkala jaŋ zil la Laataara Wɩa wʋzɔmɔ-la.

¹¹ Wɩa dagɛ ʋ zile pɩla nɛ, a kɔ dɩ ʋ laa nʋʋkala ta.

¹² Wɩa wʋzɔmɔ-la dagɛla dɩ la sɩ́ wʋbɔŋŋɔɔ ŋaa, a sɩ́ la tɩtɩa joŋo hɛ dʋnɩa wɩaa lɛ, a jɩma kɛŋ la tɩtɩa, a kɛŋ wʋtɩtɩɩ, a tuto Wɩa wombiiŋ dʋnɩa deeŋ lɛ.

¹³ La sɩ hɛ dʋnɩa deeŋ lɛ ŋɩɩ, laa gbɛrɛ tapʋlɩɩ-la la Wɩɩ-balɩŋ arɩ la Laataara Yesu Kirisito sɩ jaŋ mɩɩra kɔ arɩ ʋ tʋla nɛ.

¹⁴ La wɩaa nɛ tɩɩ ʋ sʋʋ, dɩ ʋ laala ta la wʋbɔŋŋɔɔ lɛ a pɩɩsɛ la disiniŋ ta, dɩ la ŋaa ʋ nɩaa. Ʋʋ chɛ dɩ la ŋaa nɩa sɩ joŋ la nyuŋ hɛ wʋzɔŋŋɔɔ ŋaanɩŋ lɛ.

¹⁵ Ŋɩɩ wɩaa, joŋ wɩaa deemba a dagɛba, a kɛŋ dol-la Wɩa sɩ joŋo pɩŋ, a bʋl wɩaa nyaasɛ ba nyuŋ, dɩ ba nɛ ŋaa wɩɩ ma chei dɩ ŋ bʋl ba teeŋ. Sɩ́ leŋe dɩ nʋʋkala bee gʋʋnʋŋ.