SOLOMOŊ YƖƖL-SƖMƖŊ 8 - WƖA TENIŊ

¹ Mɩ fa cho dɩ ŋ ŋaa mɩ dɩ-baal nɛ, nʋʋ sɩ wasɛ mɩ naaŋ yɩlɩŋ. Dɩ ŋɩɩ nɛ fa, dɩ mɩ nɛ naŋ dɩ-jalɩŋ, mɩ fa guoruŋ a mʋsɛ ŋ niiŋ, ka nʋʋkala bɩ jaŋ leenimi.

² Mɩ fa jaŋ laa ŋ sɩpaaŋ a kɛnɩŋ jʋʋ mɩ naaŋ dɩa, nɩɩ-la sɩ dagɛmɛ. Mɩ fa jaŋ pɩŋ tɩɩnɛnɛɛ sɩnɩŋ ba sɩ hɛ tegisiŋ, mɩ kampoi nɛnɛɛ lɩɩŋ dɩ ŋ nyʋa.

³ Mɩ nyuŋ yelli ʋ nagʋa nɩsɩŋ lɛ nɛ, ka ʋ nadiiŋ guorimi.

⁴ Jerusalɛm toloo, má ŋmɩɛsɛ pɩmɛ arɩ ma bɩ jaŋ kɛŋ la chono-la pugi.

Tanlɔsʋŋ

⁵ Kʋbɛɛ nɛ lɩɩ tintee-hɩlɩŋ kʋkɔ ŋ-la a yelli ʋ hɩɩla? Mɩ chɩsɩŋ tɩa-la ba sɩɩ yɩrɛ apʋl bʋbʋɔŋ nɛ. Nɩmɛ nɛ ŋ naaŋ kɛŋ ŋ luoruŋ. Nɩmɛ nɛ ʋ luoruŋ wɩɩ ʋ lʋlʋŋ.

Haala

⁶ Kɛmmɛ mɛrɛ ŋ tɩtɩa lɛ a nagɛ magɩlɩŋ dɩ mɩ nagɛ nenii-pɩrɩŋ ŋ nɩsɩŋ lɛ. Chonuŋ kɛŋ doluŋ a nagɛ sʋʋŋ nɛ, ʋ yarɩ-bieriŋ ma pɛsɛ a nagɛ lɛlɛɛ sɩ bɩ sʋʋnʋŋ joŋo tɩta ŋɩɩ. Ʋʋ dii a nagɛ nyiŋgeliŋ nɛ, a nagɛ nyiŋ-gel balɩŋ.

⁷ Lɩɩŋ cho dɩ ʋ magɛ ŋɩɩ kala ma, ʋ bɩ chonuŋ wuo dɩsɛ, fuonuŋ bɩ ʋ wuo pɛllɛ paa viviiri. Dɩ nʋʋ nɛ paala joŋ ʋ dɩa dʋa kala dɩ ʋ yɔɔ chonuŋ ma, ʋ bɩ jaŋ wuo naʋ, ka dɩ nɩaa chaasa mɔŋ ʋ lɛ.

Haal-la naambiiriŋ

⁸ La kɛŋ dɩha-bie nɛ, ʋ ha bɩ yɩlaa kpʋra. Wʋbɛɛ nɛ la jaŋ ŋaa pɩ la dɩhaala tapʋlɩɩ-la nʋʋ sɩ jaŋ kɔ a chɩchɛ ʋ jaaʋ?

⁹ Dɩ ʋ nɛ fa nagɛ jebiiŋ, la fa jaŋ kɛŋ hɔpʋla saa dɩɩ-leŋee ʋ nyuŋ. Dɩ ʋ nɛ fa nagɛ boiŋ niiŋ, la fa jaŋ kɛŋ kuolu daasɩŋ ŋaa boro hɛ.

Haala

¹⁰ Mɩ nagɛ jebiiŋ nɛ, mɩ yɩlaa ma nagɛ dɩɩ-leŋee. Mɩ hɩɩla teeŋ, mɩ nagɛ nʋʋ sɩ yie ŋaa ʋ tʋɔŋ tɔrɛ ʋ yaraa fɩɛlɛ nɛ.

¹¹ Solomoŋ fa kɛŋ girep tɩɩsɩŋ baga nɛ lee-la ba sɩɩ yɩrɛ Baal Hamɔŋ lɛ, a joŋo chɩŋ paaraa. Paara-la kʋŋkala fa maga ʋ kɛŋ warɩpʋla bʋɩ nɛ a kʋ tiŋ tɩɩnɛnɛ-la chɩmɩŋ.

¹² Ama mɩ nɛ tɩɩ mɩ tɩtɩa girep tɩɩsɩŋ baga, Solomoŋ, mɩ joŋ warɩpʋla bʋɩ nɛ aa pɩŋ, aŋ joŋ warɩpʋla zɔɔ-balɩa aa pɩ nɩalɩŋ ma sɩɩ tɔrɛ tɩɩnɛnɛ-la.

Baala

¹³ Mɩ hɩɩla, ŋ hɛ lɩga tʋɔŋ nɛ, ŋ tanlɔsʋŋ golluŋ, leŋ dɩ mɩ nɩɩ ŋ yikoro.

Haala

¹⁴ Mɩ hɩɩla, fá kɔ mɩ teeŋ a nagɛ tɛhɩɩ koo aaŋ-bel-pɔrʋŋ sɩ hɛ tegisiŋ peeliŋ nyuŋ.