SOLOMOŊ YƖƖL-SƖMƖŊ 7 - WƖA TENIŊ

¹ Kuori-bie tolo, ŋ naasɩŋ arɩ nɛntɛŋŋɛɛ zɔmɔ nɛ woruŋ. Ŋ naakʋɔlaa nagɛ yaraa kpɩɛraa gɔgɔ sɩ libe nɛ.

² Ŋ kawule nagɛ gbaŋ-guguluŋ nɛ a bɩ tɩɩnɛnɛɛ sɩnɩŋ ba sɩ hɛ tegisiŋ lɛ ka nyaa. Ŋ tɩŋa nagɛ mɩɩchaha nɛ, fuo-chalba gollu.

³ Ŋ yɩlaa nagɛ tɛhɩɩ biiriŋ balɩa nɛ a nagɛ tɛhɩɩ-bii-daalɩarɩŋ

⁴ Ŋ baŋŋaa nagɛ ba sɩ kɛŋ batu-nyɩlɩŋ saa dɩɩ-leŋiŋ nɛ. Ŋ sɩaa nagɛ fuonu-la sɩ hɛ Hɛsɩbɔŋ tabalɩŋ lɛ nɛ, a kpagɛ boi-baal-la ba sɩɩ yɩrɛ Baf Rabim. Ŋ mɩɩsɩŋ nagɛ Lɛbanɔŋ dɩɩ-leŋii-la sɩ chaasɛ Damasɩkʋs nɛ.

⁵ Ŋ nyuŋ je a nagɛ peel-la ba sɩɩ yɩrɛ Kamɛl nɛ. Ŋ nyu-pʋnaa nagɛ kuori-gɛrɩŋ ba sɩ kɛŋ ŋmɛŋ dabaŋ dabaŋ ba sʋa nɛ. Dɩ kuoro nɛ na ŋ nyu-pʋŋ duduosu-la, ʋ kala yie sʋʋ daŋ nɛ.

⁶ Ŋ chaasa zɔŋ nɛ, a tɔrɛ mɩ tʋɔŋ. Ŋ chonuŋ chaasa kɛŋ tʋɔtɔrʋŋ nɛ.

⁷ Ŋ chɩnɩŋ nagɛ abɛ tɩa nɛ, ŋ yɩlaa nagɛ tɩɩnɛnɛɛ jaga.

⁸ Mɩ sɩ, “Mɩ jaŋ jɩl abɛ tɩa-la, a kɛŋ ʋ nɛnɛɛ lɛ.” Ŋ yɩlaa nagɛ girep nɛnɛɛ jaga nɛ mɩ teeŋ, ŋ wiese ma sʋɔra sɩŋ a nagɛ tɩa-la ba sɩɩ yɩrɛ apʋl-fɩlaa,

⁹ ŋ niiŋ ma nagɛ girep nɛnɛɛ sɩnɩŋ sɩ chaasa zɔŋ. A leŋ dɩ sɩŋ-la pɛllɛ tegi tegi a tuu mɩ hɩɩla niiŋ, a to ʋ niipinee arɩ ʋ nyɩlaa pɛgɛ.

Haala

¹⁰ Mɩ ŋaa mɩ hɩɩla kʋŋ nɛ, ʋ hɩhɩɛnɛ mɩ.

¹¹ Mɩ hɩɩla, kɔ dɩ la dʋʋra mʋ pɔkɔŋ nyuŋ, a chʋa tabiisiŋ lɛ [a chʋa leele tɩɩsɩŋ sɩ fɩɩla tʋɔŋ].

¹² Leŋ dɩ la mʋ girep tɩɩsɩŋ baga chʋchʋɔ-fɩɛla a bee na tɩɩsɩ-la tɔsɔ nɛɛ? Ba fɩɩlaa suro nɛɛ, koo kampoyee tɩɩsɩŋ ma fɩɩla nɛɛ? Mɩ jaŋ joŋ mɩ tɩtɩa kala pɩŋ.

¹³ Halʋllɩ tɩɩsɩŋ sʋɔra sɩ sɩma, sʋɔra laa leriŋ nɛ, tɩɩ-nɛŋ zɔmɔ-la kala hɛ la boiŋ niiŋ nɛ, kʋbɩnaa arɩ kʋfalaa kala, mɩ chɛ bil ŋ lɛ nɛ, mɩ hɩɩla.