SOLOMOŊ YƖƖL-SƖMƖŊ 6 - WƖA TENIŊ

Tanlɔsʋŋ

¹ Haalaa tʋɔŋ ha-zɔmʋŋ, nɩɩ nɛ ŋ hɩɩla mʋ? Nɩɩ nɛ ŋ hɩɩla to mʋ? Dagɛla dɩ la pɛ ŋ lɛ a chɛʋ.

Haala

² Mɩ hɩɩla mʋ ʋ lɩga nɛ, lee-la ba sɩ duu tegisiŋ, dɩ ʋ kɛŋ ʋ piesee mʋ dɩ ba dii yaŋ aŋ pɛ chɛ fuo-chalba.

³ Mɩ hɩɩla nɛ tɩɩmɛ, mɩ ma tɩɩʋ. Ʋ leŋe ʋ piesee didii fuo-chalba tʋɔŋ nɛ.

Baala

⁴ Mɩ hɩɩla, ŋ zɔmɔ nɛ woruŋ a nagɛ tabal-la ba sɩɩ yɩrɛ Tɩza, a zɔmɔ nagɛ Jerusalɛm, a gigenni a nagɛ laalɩyuoroo sɩ kori jɔnjɔmba.

⁵ Kɛŋ ŋ sɩaa viire chaasɛ lee dɔŋ a sɩ́ mɩ beŋ, ba leŋe mɩɩ hɩɛnɩŋ nɛ. Ŋ nyu-pʋnaa nagɛ bʋ-laalɩŋ sɩ lɩɩ Gɩlɩad peeliŋ nyuŋ a kʋʋ tuu nɛ, mɛlɛlɛ.

⁶ Ŋ nyɩlaa pʋlla a nagɛ piesee sɩ lɩɩ lɩɩŋ dɩ-fooluŋ a kʋkɔ nɛ. Ba kala magɛ dɔŋɔ nɛ, ba kʋŋkala bɩ fuolo.

⁷ Ŋ chaŋkpaŋŋaa nagɛ kampoi nɛnɩŋ ba sɩ kaa kpaa balɩa nɛ a hɛ ŋ nyu-kpal duduoŋ tʋɔŋ.

⁸ Kuoro habidiiree mahɩŋ batori jaŋ wuo hɛ nɩmɛ, dɩ haala-la ʋ sɩ bile aŋ bɩ jaa mahɩŋ banɛsɛ ma hɛ nɩmɛ, dɩ hatoloo ma ha sɩ bɩ baalaa jɩŋ a bɩ nii kɛnɛ hɛ nɩmɛ,

⁹ ama mɩ kokomo nɛ ha, mɩ ha-zɔmʋŋ sɩ bɩ nyɔɔ kɛnɛ, ʋ dɔŋ tuo. Ʋ naaŋ tolo kala nɛ ŋɩɩ, ʋ nɛ ŋaa ʋ naaŋ bii-chooluŋ. Hatoloo naʋ, a kɛnʋ yɩrɛ nʋʋ lɛ Wɩa sɩ pɛ. Kuoro habidiiree arɩ haala-la ʋ sɩ bile aŋ bɩ jaa ma bɩbɛsɛ ʋ lɛ.

Tanlɔsʋŋ

¹⁰ Kʋbɛɛ nɩɩ tʋl ŋ-la, a nagɛ taŋ sɩ pʋlaa kɔ, a pʋllɛ a nagɛ chɛnɛ, a chaanɛ a nagɛ wɩɩpɔsʋŋ, a gigenni a nagɛ laalɩyuoroo sɩ kori jɔnjɔmba kɩɛla vɩvɛŋ?

Baala

¹¹ Mɩ tuu kube tɩɩsɩŋ leriŋ nɛ dɩ mɩ na tɩɩ-falɩa-la sɩ waa fuonaaŋ lɛ, dɩ mɩ na girep tɩɩsɩŋ tɔsɔ nɛɛ koo kampoyee ma ka fɩɩlɛ nɛ.

¹² Mɩɩ jɩŋ dɩ mɩ wʋchɛɛlɛɛ lɛrɛmɛ mʋ hɛ mɩ nɩaa kuoro laalɩŋ janɩŋ torukoba tʋɔŋ.

Tanlɔsʋŋ

¹³ Sulam tɩŋŋaa tolo, mɩɩra kɔ, mɩɩra kɔ. Mɩɩra kɔ, mɩɩra kɔ dɩ la bagɩsɩŋ. Bɛɛ nɛ tɩɩ ma jaŋ chaarɛ sɩaa pɛ Sulam tɩŋŋaa tolo-la sɩɩ gʋa lɛ ka nɩaa chɩnaa beŋ?