SOLOMOŊ YƖƖL-SƖMƖŊ 5 - WƖA TENIŊ

Baala

¹ Mɩ dɩhaala, mɩ ha-falɩŋ, mɩ kʋ jʋʋ mɩ lɩga nɛ. Mɩ kɛŋ mɩ tɩɩ-kel-la sʋɔra sɩ sɩma baa yɩrɛ mɛɛ arɩ mɩ tegisiŋ hɛ dɔŋɔ nɛ. Mɩ dii mɩ tʋʋ-nʋʋŋ arɩ ʋ tʋʋ-jaga kala nɛ. Mɩ nyʋa mɩ girep nɛnɛɛ sɩnɩŋ arɩ mɩ nayɩlɩŋ ma kala nɛ. La nɩchooloo, má dagɛ ma chonuŋ, a magɛ ŋɩɩ kala ma sɩɩ chɛ, a nagɛ nɩa sɩ dii kɩaa a nyʋa kɩaa vɔgɛ.

Tanlɔsʋŋ

² Mɩ pɩŋ doŋ nɛ, ama mɩ tʋɔŋ-na bɩ pɩna. Mɩ dɩgɩlɩŋ nɩa arɩ mɩ hɩɩla ka du boro. Mɩ dɩhaala, mɩ hɩɩla, mɩ kokomo, mɩ nɩɩ-la sɩ bɩ nyɔɔ kala kɛnɛ: Suri boiŋ pɩmɛ. Mɩ nyuŋ kala nɛ fɩɛla arɩ nyalɩŋ, bʋrʋŋ ma tele daŋ mɩ nyuŋ lɛ.

Baala Haala

³ Mɩ wuri mɩ gɛrɩŋ nɛ, ʋ maga mɩ bɩra joŋo laalɛ nɛɛ? Mɩ sɔŋ mɩ naasɩŋ ma nɛ, ʋ maga mɩ bɩra leŋ dɩ ba birisi nɛɛ?

⁴ Mɩ hɩɩla sɩ joŋ ʋ nɩsɩŋ hɛ boro bʋa lɛ, mɩ tʋɔŋ faasa fɩɛlɛ nɛ.

⁵ Mɩ sii dɩ mɩ kɛŋ boro suro pɩ mɩ hɩɩla, mɩ nɩsaa kala tɔ arɩ tɩɩ-kel-la sʋɔra sɩ sɩma ba yɩrɛ mɛɛ boro-la gʋlʋŋmʋlʋŋ lɛ.

⁶ Ŋɩɩ nɛ mɩ suro pɩ mɩ hɩɩla, ama dɩ ʋ mɩɩra viiri. Ʋ sɩ viire ŋɩɩ, mɩ daagaa viisi. Mɩ bee chɛʋ, ama mɩ bɩ ʋ na. Mɩ yɩrʋ, ama ʋ bɩ sɛyɛ.

⁷ Nɩalɩŋ sɩɩ pɔ leriŋ, a faa golli tabal-la namɛ. Nɩalɩŋ sɩ sagɛ jebie-la nyuŋ a bibeŋ tabal-la, ŋmoomi, a pɩrɛmɛ, aŋ laa mɩ gɛrɩ-balɩŋ.

⁸ Jerusalɛm toloo, mɩɩ sʋlma dɩ ma nɛ na mɩ hɩɩla-la. Má bʋla pʋ arɩ mɩɩ sʋʋ ʋ wɩaa nɛ.

Tanlɔsʋŋ

⁹ Haalaa tʋɔŋ ha-zɔmʋŋ, ɛɛ nɛ ŋ bɩɩnɛ dɩ ŋ hɩɩla nɛ zɔmɔ kɩɩ baalaa kala? Ɛɛ nɛ ŋ bɩɩnɛ ŋ hɩɩla nɛ zɔmɔ kɩɩ baalaa kala ŋ sɩ dɩ la bʋl wɩɩŋ deeŋ pʋ?

Haala

¹⁰ Mɩ hɩɩla ŋaa bapʋɔsɩ fɩaŋ zɔŋ-bie nɛ. Dɩ baalaa bʋɩ fii nɛ paala chɩŋ ma, ʋ nɛ zɔmɔ kɩɩ ba kala.

¹¹ Ʋ nyuŋ nagɛ sɛlɩmɛ sɩ chaasa zɔŋ nɛ, ʋ nyu-pʋnaa mɩɛla pɩŋ a biri a nagɛ gɩlɩŋgaaŋ.

¹² Ʋ sɩaa zɔmɔ nagɛ kokosuŋ sɩ chɩŋ fuoŋ sɛmɛ nɛ, ba kɛŋ nayɩlɩŋ chɛsɛba aŋ laalɛ ʋ kpɩɛraa.

¹³ Ʋ chaŋkpaŋŋaa nagɛ lɩga-la ba sɩ duu tegisiŋ arɩ kʋsʋɔrʋsʋŋ sʋɔra sɩ sɩma nɛ ʋ lɛ. Ʋ niipinee nagɛ fuo-chalba nɛ a chuchuori tɩɩ-kel-la sʋara sɩ sɩma baa yɩrɛ mɛɛ.

¹⁴ Ʋ vaasɩŋ nagɛ sɛlɩmɛ hɔ-daasɩŋ nɛ ba joŋ tabɩɩ-la ba sɩɩ yɩrɛ kirisola hɛ. Ʋ yaraa nagɛ batu-nyɩlɩŋ ba sɩ wasa ta ʋ tʋtʋl nɛ, ba kɛŋ tabɩɩ-zɔŋ-la ba sɩɩ yɩrɛ safɩya a kpɩɛrɛ.

¹⁵ Ʋ naasɩŋ nagɛ ba sɩ kɛŋ tabɩɩ-naŋkpachɩllɩŋ saa kɛrɩsɩŋ nɛ a joŋo daŋ kʋŋ ba sɩ kɛŋ sɛlɩmɛ ŋaa bʋbʋa-chala nyuŋ. Ʋ chɩnɩŋ nagɛ Lɛbanɔŋ peeliŋ nɛ, a zɔmɔ nagɛ Lɛbanɔŋ kuolu tɩɩsɩŋ.

¹⁶ Ʋ niiŋ mʋsʋŋ sɩma, ʋ wɩɩkala zɔmɔ nɛ. Jerusalɛm toloo, mɩ hɩɩla nɛ ŋɩɩ, mɩ tanlɔŋɔ ma nɛ ŋɩɩ.