SOLOMOŊ YƖƖL-SƖMƖŊ 4 - WƖA TENIŊBaala 1 Mɩ hɩɩla, ŋ chaasa zɔŋ nɛ woruŋ. Wʋtɩtɩɩ, ŋ chaasa zɔŋ nɛ. Ŋ sɩaa zɔmɔ a nagɛ kokomo nɛ nyu-kpal duduoŋ ŋ sɩ tɔ tʋɔŋ. Ŋ nyu-pʋnaa nagɛ bʋ-laalɩŋ sɩ lɩɩ Gɩlɩad peeliŋ nyuŋ a kʋʋ tuu nɛ, mɛlɛlɛ. 2 Ŋ nyɩlaa pʋlla nɛ a nagɛ piesee ba sɩ kɛ ba pʋnaa ʋ bɩ diene aŋ foba lɩɩŋ. Ba kala magɛ dɔŋɔ nɛ, ba kʋŋkala bɩ fuolo. 3 Ŋ niipinee nagɛ ŋmɛŋ-fɩaŋ nɛ, Ŋ niiŋ zɔmɔ. Ŋ chaŋkpaŋŋaa nagɛ kampoi nɛnɩŋ ba sɩ kaa kpaa balɩa nɛ a hɛ ŋ nyu-kpal duduoŋ-la tʋɔŋ. 4 Ŋ baŋŋaa duomo aŋ zɔŋ a nagɛ dɩɩ-leŋii-la Devit sɩ saa nɛ, ŋ joŋ baŋŋaa kɩaa jɩma kpɩɛrʋ woruŋ. Ʋ nagɛ ba sɩ joŋ hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ sagɛ. 5 Ŋ yɩlaa nagɛ tɛhɩɩ biiriŋ balɩa nɛ a nagɛ tɛhɩɩ-bii-daalɩarɩŋ a didii lee-la fuo-chalba sɩ hɛ. 6 Mɩ jaŋ mʋ tɩɩ-kel-la sʋɔra sɩ sɩma ba yɩrɛ mɛɛ peel-la arɩ kʋsʋɔrʋsʋŋ dɔnsʋŋ dundolo-la, a gbɛrɛ dɩ taŋ pʋl, dɩ daaliimee lɛl. 7 Mɩ hɩɩla, ŋ chaasa zɔŋ nɛ, ŋ bɩ nyɔɔ kala kɛnɛ. 8 Mɩ ha-falɩŋ, to mɩ harɩŋ dɩ la lɩɩ Lɛbanɔŋ lɛ, kɔ dɩ la lɩɩ Lɛbanɔŋ lɛ. Lɩɩ peel-la ba sɩɩ yɩrɛ Amana nyuŋ kʋ tuu, lɩɩ peele-la ba sɩɩ yɩrɛ Sɛnɩ arɩ Hɛmɔŋ nyuŋ kʋ tuu, lere-la naachigee arɩ kpeyee sɩɩ jʋʋ. 9 Mɩ dɩhaala, mɩ ha-falɩŋ, bene-la ŋ sɩ bemmi arɩ ŋ baŋŋaa kpɩɛra-la lɩɩsɛ mɩ tʋɔŋ nɛ. 10 Mɩ dɩhaala, mɩ ha-falɩŋ, ŋ sɩ chomi ŋɩɩ chaasa kɛŋ tʋɔtɔrʋŋ nɛ. Ŋ sɩ chomi ŋɩɩ paala kɛŋ tʋɔtɔrʋŋ a kɩɩ girep nɛnɛɛ sɩnɩŋ. Ŋ tʋlaalɩ sʋɔra paala sɩma kɩɩ tegisi na-kala. 11 Mɩ ha-falɩŋ, ŋ niiŋ wʋbʋlaa sɩma a nagɛ tʋʋŋ. Dɩ ŋ nɛ mʋsɛ mɩ niiŋ, ʋ sɩma a nagɛ nayɩlɩŋ arɩ tʋʋŋ nɛ mɩ teeŋ. Ŋ gɛnnɩŋ sʋɔra sɩma a nagɛ Lɛbanɔŋ tɩɩfɩɩlaa sʋɔra nɛ. 12 Mɩ hɩɩla, mɩ ha-falɩŋ, ŋ nagɛ lɩga ba sɩ lɩga nɛ mɩ teeŋ. Ŋ nagɛ lɩɩ-bulo ba sɩ gɩba nɛ. 13 Ŋ nagɛ tɩɩnɛnɛɛ lɩga nɛ, a nagɛ kampoyee tɩɩsɩŋ baga, a kɛŋ nɛŋ-zɔŋŋɔɔ sɩ sɩma, a pɛ kɛŋ leele arɩ biriŋ tɩɩsɩŋ. 14 Biriŋ arɩ tʋlaalɩ tegisiŋ, tegisi-la ba sɩɩ yɩrɛ kalamus arɩ Sɩnamɔŋ, a pɛ kʋsʋɔrʋsʋŋ tɩa na-kala lɛ, arɩ tɩɩ-kel-la sʋɔra sɩ sɩma baa yɩrɛ mɛɛ, arɩ chaŋgbɛɛ, arɩ tegisi kala sɩ chaasa zɔŋ. 15 Ŋ nagɛ lɩga lɩɩ-bulo nɛ, a nagɛ fuoŋ lɩɩŋ sɩɩ pɛllʋ a pɛllɛ lɩɩ Lɛbanɔŋ peelee a kʋkɔ. Haala 16 Wɩɩpɔsʋŋ nagʋa peliŋ, sii, wɩɩpɔsʋŋ nadiiŋ peliŋ, kɔ. Ma du hɛ mɩ lɩga lɛ, dɩ ʋ sʋɔra laa leriŋ kala. Leŋ dɩ mɩ hɩɩla kʋ jʋʋ ʋ lɩga a dii ʋ tɩɩ-nɛŋ zɔŋŋɔɔ sɩ sɩma. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.