SOLOMOŊ YƖƖL-SƖMƖŊ 2 - WƖA TENIŊ

¹ Mɩ nagɛ Sarɔŋ tinteeŋ tɩɩfɩɩlaa sʋɔra sɩ sɩma nɛ, a nagɛ fuo-chalba sɩ hɛ fuonaaŋ lɛ.

Baala

² A nagɛ fuo-chalba sɩ hɛ sɔsʋŋ tʋɔŋ, ŋɩɩ nɛ mɩ hɩɩla nagɛ a hɛ hatoloo tʋɔŋ.

Haala

³ A nagɛ tɩa nɛnɩŋ sɩ sɩma duuŋ tɩɩsɩŋ kala tʋɔŋ, ŋɩɩ nɛ mɩ hɩɩla nagɛ a hɛ bapʋɔsaa tʋɔŋ. Mɩ cho dɩ mɩ hɔŋ ʋ fɩɛlɩŋ lɛ nɛ. Ʋ nɛnɛɛ sɩma a pɩmɛ.

⁴ Ʋ kɛmmɛ kaa mʋ sɩ-dɩa nɛ. Ʋ chonuŋ nagɛ jɔnjɔŋ nɛ a keese tɔ mɩ nyuŋ.

⁵ Pɩmɛ tɩɩnɛnɛɛ dɩ mɩ dii a kɛŋ doluŋ, a pɩmɛ tɩɩnɛnɛ-la sɩ sɩma dɩ mɩ dii dɩ mɩ sɩaa fɩɛlɛ, bɛɛ wɩaa ŋɩɩ mɩ sɩɩ chɛ dɩ ŋ chomi leŋe mɩ bugumi nɛ.

⁶ Mɩ nyuŋ yelli ʋ nagʋa nɩsɩŋ nɛ, ka ʋ nadiiŋ nɩsɩŋ guorimi.

⁷ Jerusalɛm toloo, ma ŋmɩɛsɛ wieme arɩ aamɩŋ arɩ ma bɩ jaŋ kɛŋ la chono-la pugi.

⁸ Mɩ nɩɩ mɩ hɩɩla yikoro. Bee na, ʋ nɩɩ kɔ a fɩla kikieli peelee arɩ dundolluŋ.

⁹ Mɩ hɩɩla nagɛ tɛhɩɩ nɛ koo tɛhɩɩ-bel-pɔrʋŋ. Bee na, ʋ nɛ chɩŋ la jeeŋ harɩŋ ŋɩɩ, a to tokoro a bibeŋ a to daasɩŋ pɛgɛ a nyinyilimi.

¹⁰ Mɩ hɩɩla bʋl wɩaa pɩmɛ, ʋ sɩ, “Mɩ hɩɩla, sii, mɩ hɩɩlɩ-zɔmʋŋ, sii to mɩ harɩŋ dɩ la mʋ.

¹¹ Bee na, taŋ lɩa nɛ, duonuŋ bʋa kiele nɛ a mʋ.

¹² Tɩɩ-fɩɩlaa pɔsɔ nɛ tinteeŋ lɛ. Yɩɩlaa yɩɩnɩŋ bʋa kɔ nɛ, laa nɩɩ kokosuŋ yele nɛ la tinteeŋ lɛ.

¹³ Tutogusuŋ ka nɛŋ ba nɛŋ-falaa nɛ. Girep fɩɩlaa suomoo pɔsɛ nɛ a sʋɔra lɩlaa leriŋ. Mɩ hɩɩla, sii kɔ, mɩ hɩɩlɩ-zɔŋ, sii to mɩ harɩŋ dɩ la mʋ.”

Baala

¹⁴ Mɩ kokomo sɩ hɛ bʋbʋa tʋɔŋ, a hɛ peelee lere-la kɩaa sɩɩ faa, leŋ dɩ mɩ na ŋ sɩaa, leŋ dɩ mɩ nɩɩ ŋ yikoro, bɛɛ wɩaa ŋ yikoro sɩma, ŋ sɩaa ma zɔŋ woruŋ.

¹⁵ Kɛsɛ jolluŋ pɩla, jol-biisi-la sɩɩ chei girep tɩɩsɩŋ bagɩsɩŋ, bɛɛ wɩaa la girep tɩɩsɩŋ ka fɩɩlɛ nɛ.

Haala

¹⁶ Mɩ hɩɩla nɛ tɩɩmɛ, mɩ ma tɩɩ mɩ hɩɩla. Ʋ cho fuo-chalba tʋɔŋ jʋʋnʋŋ.

¹⁷ Ʋ yie hɛ ba tʋɔŋ halɩɩ taŋ pʋl daaliimee lɛl. Mɩ hɩɩla, mɩɩra kɔ, fá a nagɛ tɛhɩɩ koo aaŋ-bel-pɔrʋŋ peele-la sɩ bɩ dɔŋɔ maga nyuŋ.