SƖPAALAARAA 9 - WƖA TENIŊ

Abɩmɛlɛk

¹ Abɩmɛlɛk, Gɩdɩɔŋ nanʋala sii a mʋ ʋ naaŋ dɩbaalaa teeŋ taŋ-la ba sɩɩ yɩrɛ Sɛkɛm lɛ, a bʋla pɩ ba dɩ ʋ naaŋ doho nɩaa kala,

² “Má pɩɛsɛ Sɛkɛm nɩaa kala na, ‘Wʋbɛɛ nɛ jaŋ zɔmɔ pɩma, Gɩdɩɔŋ hambolibiisiŋ mahɩŋ batori arɩ fii-la kala sɩ jaŋ dii ma kuoruŋ nɛ zɔmɔ koo nɩbala sɩ jaŋ dii ma kuoruŋ nɛ zɔmɔ?’ Má jɩŋ arɩ mɩ-na ŋaa ma chalɩŋ nɛ.”

³ Ʋ naaŋ dɩbaalaa sɩ bʋl wɩɩŋ deeŋ a pɩ Sɛkɛm tɩŋŋaa kala, ba kala sɛɩ dɩ ba to Abɩmɛlɛk harɩŋ, bɛɛ wɩaa, ba sɩ́, “Ʋ ŋaa la naambii nɛ.”

⁴ Ba sii mʋ ba vene Baal-Bɛrɩf dɩa, a lɩɩsɛ warɩpʋla mahɩŋ batori arɩ fii a kaa kʋ pɩ Abɩmɛlɛk. Ʋ kaa mʋ yɔɔ nɩtɔɔnʋŋ ba ŋaa ʋ harɩ-tooroo.

⁵ Ʋ sii kɛmba ba mʋ ʋ nyɩmma dɩa Ɔpɩra lɛ, a kpʋ ʋ nyɩmma Gɩdɩɔŋ hambolibiisi-la mahɩŋ batori arɩ fii kala sɩ ŋaa ʋ naambiiriŋ, tabɩɩ-bala nyuŋ. Ba tʋɔŋ kʋbie ba sɩɩ yɩrɛ Jotam dʋndʋŋa nɛ wuo faa, ʋ bɩ ʋ na.

⁶ Ŋɩɩ nɛ Sɛkɛm tɩŋŋaa arɩ Bɛf Milo nɩaa kala kʋ hilimi tɩɩ-bal kʋbala bʋbʋɔŋ sɩ chɩna kpagɛ jebii kʋbala sɩ hɛ Sɛkɛm lɛ, dɩ ba bil Abɩmɛlɛk kuoruŋ.

⁷ Ba sɩ bʋl wɩɩŋ deeŋ a pɩ Jotam, ʋ sii jɩl peel-la ba sɩɩ yɩrɛ Gɛrɩzɩm nyuŋ aŋ ŋaa goŋ a bʋl, “Sɛkɛm tɩmma, má jegile nɩɩ mɩ teeŋ, dɩ Wɩa ma wuo jegile nɩɩ ma teeŋ.

⁸ Tapʋlɩɩ kʋbala nɛ tɩɩsɩŋ kala sii dɩ ba lɩɩsɛ ba kuoro. Ba bʋla pɩ Olif tɩa, ‘Ŋaa la kuoro.’

⁹ Olif tɩa-la ma bʋl, ‘Ʋ bɩ maga dɩ mɩ leŋ mɩ nʋʋ-la ba sɩ kaa zizil vesiŋ arɩ nuhuobiine kala ta aŋ kʋ bibeŋ tɩɩsɩŋ.’

¹⁰ Tɩɩsɩ-la bɩra bʋla pɩ tutogo ma, ‘Kʋ ŋaa la kuoro.’

¹¹ Tutogo-la ma bɩra bʋl, ‘Ʋ bɩ maga mɩ leŋ mɩ nɛnɛ-la sɩ zɔmɔ aŋ sɩŋ ta aŋ kʋ bibeŋ tɩɩsɩŋ.’

¹² Ŋɩɩ nɛ tɩɩsɩ-la bɩra bʋla pɩ girep tɩa, ‘Kʋ ŋaa la kuoro.’

¹³ Girep tɩa-la ma bʋl, ‘Ʋ bɩ maga dɩ mɩ leŋ mɩ nɛŋ-sɩma-la sɩnɩŋ sɩ leŋe vesiŋ arɩ nuhuobiinee tʋɔŋ tʋtɔrɛ ta, aŋ kʋ bibeŋ tɩɩsɩŋ.’

¹⁴ Dɩdɛrɩŋ, tɩɩsɩ-la bʋla pɩ chɛɛŋ, ‘Kʋ ŋaa la kuoro.’

¹⁵ Chɛɛ-la bʋla pɩ tɩɩsɩ-la, ‘Dɩ ma nɛ sɛnɛɛ chɛ dɩ ma leŋ dɩ mɩ ŋaa ma kuoro, má kʋ jʋʋ mɩ fɩɛlɩŋ dɩ mɩ tɔ hɛ ma lɛ, dɩ ŋɩɩ dee, nyiniŋ jaŋ lɩɩ mɩ lɛ a joŋ kuolu tɩɩsɩ-la kala sɩ hɛ Lɛbanɔŋ lɛ a dii.’

¹⁶ Ma sɩ lɩɩsɛ Abɩmɛlɛk ʋ ŋaa kuoro, ma to wʋtɩtɩɩ bʋa nɛ a ŋaa wɩalɩŋ sɩ magaa? Ma liisi wʋzɔmɔ-la Gɩdɩɔŋ sɩ ŋaa nɛ a joŋ ŋɩɩ to ʋ dɩa nɩaa lɛɛ?

¹⁷ Ma jɩŋ arɩ mɩ nyɩmma yuo laalɩŋ pɩma nɛ. Ʋ joŋ ʋ mɩɩsɩŋ yɔɔ sʋʋŋ a laama ta Midiaŋ tɩŋŋaa nɩsɩŋ lɛ.

¹⁸ Ama jɩnɩŋ ma sii chɩŋ mɩ nyɩmma dɩa nɩaa lɛ nɛ a kpʋ ʋ hambolibiisiŋ mahɩŋ batori arɩ fii tabɩɩ bala nyuŋ. Abɩmɛlɛk ŋaa mɩ nyɩmma yoŋ-haala bie nɛ. Ama a tɩŋ ʋ sɩ ŋaa ma naambii wɩaa, ma leŋe ʋ dii Sɛkɛm kuoruŋ nɛ.

¹⁹ Dɩ ma nɛ fa to wʋtɩtɩɩ bʋa a ŋaa wɩalɩŋ sɩ maga a pɩ Gɩdɩɔŋ arɩ ʋ dɩa nɩaa, ŋɩɩ-na a leŋ ma dɩ Abɩmɛlɛk pɛgɛ wɩaa vɩvɛŋ woruŋ.

²⁰ Ama dɩ ma nɛ bɩ woruŋ ŋaa, Abɩmɛlɛk jaŋ nagɛ nyiniŋ a joŋ ma Sɛkɛm tɩŋŋaa arɩ Bɛf Milo nɩaa dii, dɩ ma Sɛkɛm tɩŋŋaa arɩ Bɛf Milo nɩaa ma nagɛ nyiniŋ a joŋ Abɩmɛlɛk dii.”

²¹ Ŋɩɩ nɛ Jotam fá, a mʋ hɛ taŋ kʋbala lɛ ba sɩɩ yɩrɛ Bɛɛ, bɛɛ wɩaa fawʋllʋŋ fa kɛnʋ nɛ a tɩŋ ʋ naambie Abɩmɛlɛk wɩaa.

²² Abɩmɛlɛk sɩ beŋ Iziral nɩaa jɩsɩŋ batori,

²³ Wɩa joŋ yuosuŋ hɛ Abɩmɛlɛk arɩ Sɛkɛm tɩŋŋaa pɛgɛ, ba bɩra bɩ Abɩmɛlɛk kaa tɩtɩŋ.

²⁴ Wɩa ŋaa wɩɩŋ deeŋ a tɩŋ wʋbɔŋ-la ba sɩ joŋo ŋaa Gɩdɩɔŋ hambolibiisi-la mahɩŋ batori arɩ fii lɛ nɛ a kpʋba, dɩ ʋ to ŋɩɩ lɛ a joŋ ʋ baanɩŋ a fɩɩsɛ ba naambie Abɩmɛlɛk arɩ Sɛkɛm tɩmma-la sɩ pɛ ʋ lɛ ba kpʋ ʋ naambiiriŋ.

²⁵ Sɛkɛm tɩŋŋaa hɛ nɩaa nɛ ba mʋ faa dundolluŋ nyuŋ dɩ ba kɛŋ Abɩmɛlɛk, dɩ nʋʋkala ma nɛ kʋ to lee-la a mʋmʋ, ba yie kɛŋ tɩɩna nɛ a laa ʋ kɩaa. Ŋɩɩ nɛ nʋʋ bʋl wɩɩ-la pɩ Abɩmɛlɛk.

²⁶ Tapʋlɩɩ kʋbala Ɛbɛd nanʋala Gaal sii a kɛŋ ʋ naambiiriŋ ba mʋ Sɛkɛm. Ŋɩɩ nɛ Sɛkɛm tɩŋŋaa laaʋ dii woruŋ.

²⁷ Tɩɩ-nɛnɛ-la ba sɩɩ yɩrɛ girep tɔrʋŋ sɩ yie, Sɛkɛm tɩŋŋaa kala lɩɩ mʋ ba tɩɩnɛnɛɛ bagɩsɩŋ, a tɔrɔ paa hɛ bʋɔsʋŋ lɛ a chagɛ ba lɩɩŋ a kaa ŋaa sɩnɩŋ. Ŋɩɩ nɛ ba jʋʋ ba vene dɩa a gbigbieli, a dii kɩaa aŋ nyʋnyʋa kɩaa, aŋ tʋtʋʋsɛ Abɩmɛlɛk.

²⁸ Gaal Ɛbɛd nanʋala pɩɛsɛ, “Abɩmɛlɛk nɛ kʋbɛɛ, a magɛ la Sɛkɛm tɩŋŋaa tutou? Ʋ ŋaa Jeru-Baal nanʋala nɛ, Zebul ma nɩɩ tɩgɛ ʋ lɛ kuoruŋ lɛ. Má tɩma pɩpɩ ma naabalɩma Hamɔ doho nɩaa. Hamɔ nɛ ŋaa Sɛkɛm nyɩmma. Bɛɛ nɛ tɩɩ la jaŋ tɩma pɩpɩ Abɩmɛlɛk?

²⁹ Dɩ mɩ nɛ fa ŋaa Sɛkɛm nɩaa laalɩyuoru-hɩaŋ, mɩ fa jaŋ kiri Abɩmɛlɛk. Mɩ jaŋ bʋla pʋ, ‘Kɛŋ ŋ laalɩyuoroo kala hɛ dɔŋɔ a kɔ dɩ la yuo laalɩŋ.’ ”

³⁰ Zebul, nɩɩ-la sɩɩ beŋ taŋ-la sɩ nɩɩ wɩɩ-la Ɛbɛd nanʋala Gaal sɩ bʋla, ʋ faasa na baanɩŋ.

³¹ Ŋɩɩ nɛ ʋ lʋara tɩŋ nɩaa ba mʋ Abɩmɛlɛk teeŋ a bʋl, “Ɛbɛd nanʋala Gaal arɩ ʋ naambiiriŋ nɛ kɔ Sɛkɛm a yigi jaŋ nɩaa kala hɛ ŋ lɛ.

³² Ŋɩɩ wɩaa, tɩtaŋɩŋ ʋ maga dɩ ŋ kɛŋ ŋ laalɩyuoroo dɩ ma kʋ faa pɔkɔŋ nyuŋ nɛ a gbɛrɛ.

³³ Dɩ taŋ nɛ pʋla chʋchʋɔŋ dɩ wɩɩ-muluŋ pɔsɔɔ lɩɩ, má sii guu mʋ a yuo taŋ-la. Dɩ Gaal arɩ ʋ laalɩyuoroo nɛ kʋ lɩɩ dɩ ba yuoma, má ŋaaba wɩɩ na-kala ma sɩ jaŋ wuo ŋaa.”

³⁴ Ŋɩɩ nɛ Abɩmɛlɛk kɛŋ ʋ laalɩyuoroo kala kpaa leree banɛsɛ, ba sii tɩtaŋɩŋ a mʋ faa a kpagɛ Sɛkɛm dɩ ba yuoba.

³⁵ Ɛbɛd nanʋala Gaal lɩɩ a chɩŋ ba taŋ boi-baal-la ba sɩ to jʋjʋʋ taŋ-la, dɩ Abɩmɛlɛk arɩ ʋ laalɩyuoroo sii lere-la ba sɩ faa a kʋʋ lɩɩ.

³⁶ Gaal sɩ naba, ʋ bʋla pɩ Zebul, “Bee na, nɩaa nɛ lɩɩ peelee nyuŋ kʋʋ tuu!” Zebul bʋl, “Nɩaa dee, peelee daaliimee nɛ ŋ na ŋɩɩ.”

³⁷ Gaal bɩra bʋl: “Bee na, nɩaa nɛ lɩɩ peelee nyuŋ a kʋʋ tuu ŋɩɩ, ka dɔnsʋŋ ma lɩɩ vʋgʋraa tɩa-la leriŋ dɩɩrɩŋ a kʋkɔ.”

³⁸ Ŋɩɩ nɛ Zebul bɩra bʋla pʋ, “Nɩɩ nɛ ŋ wʋbala-la kala ŋ sɩ bʋla hɛ lɛɛlɛ? Ŋ sɩ, ‘Kʋbɛɛ nɛ Abɩmɛlɛk a magɛ dɩ la tutou?’ Nɩaa deemba lɛ dee ŋ sieri ŋɩɩ? Saa lɩɩ yuoba.”

³⁹ Ŋɩɩ nɛ Gaal kɛsɛ Sɛkɛm tɩŋŋaa lɩɩ ba yuo Abɩmɛlɛk.

⁴⁰ Abɩmɛlɛk kiru ʋ fá, ka ba bolimi nɩaa woruŋ laal-la lɛ. Ba kiriba ŋɩɩ nɛ halɩɩ a mʋ yi ba jaŋ boi-baalɩŋ.

⁴¹ Abɩmɛlɛk hɔŋ lee-la ba sɩɩ yɩrɛ Aruma lɛ nɛ a kpagɛ Sɛkɛm, ka Zebul kiri Gaal arɩ ʋ naambiiriŋ kala ba lɩɩ Sɛkɛm lɛ.

⁴² Taŋ sɩ pʋla Sɛkɛm nɩaa kala ŋaa siri dɩ ba lɩɩ mʋ bagɩsɩŋ, nʋʋ dɔŋ kʋ bʋl wɩɩ-la pɩ Abɩmɛlɛk.

⁴³ Ʋ sii kɛŋ ʋ laalɩyuoroo kpaa leree batori ba lɩɩ faa pɔkɔŋ nyuŋ a gbɛrɛ. Ba sɩ na nɩalɩŋ dɩ ba lɩɩ taŋ tʋɔŋ a kʋkɔ, ba sii lere-la ba sɩ faa dɩ ba yuoba.

⁴⁴ Abɩmɛlɛk arɩ laalɩyuoro-la dɔnsʋŋ guu fá mʋ pɔ ba taŋ boi-baalɩŋ. Laalɩyuoro-la bugoo balɩa-la ma guu mʋ nɩalɩŋ sɩ hɛ bagɩsɩŋ lɛ a kpʋba.

⁴⁵ Tapʋlɩɩ-la kala Abɩmɛlɛk pɛsɛ taŋ-la lɛ ŋɩɩ nɛ halɩɩ a yuo laaʋ, a kpʋ nɩalɩŋ kala. Ʋ sɩ chei taŋ-la dɛrɛ, ʋ joŋ yɩsɩŋ mɩsɛ ʋ kala.

⁴⁶ Sɩpaalaara-la sɩ hɛ Sɛkɛm dɩɩ-leŋii-la lɛ sɩ nɩɩ wɩɩŋ deeŋ, ba sii fá jʋʋ ba vene Ɛl-Bɛrɩf dɩa sɩpaaŋ a faa.

⁴⁷ Abɩmɛlɛk sɩ nɩa dɩ ba kala hilimi nɩmɛ,

⁴⁸ ʋ dɩ ʋ nɩaa kala sii jɩl peel-la ba sɩɩ yɩrɛ Zalɩmɔŋ. Abɩmɛlɛk joŋ saaŋ a mʋ keri tɩɩ-naakelee a paa baasɛ, aŋ bʋla pɩ nɩalɩŋ ma kala, “Má ŋaa lɩma, a ŋaa wɩɩ-la ma sɩ na dɩ mɩɩ ŋaa.”

⁴⁹ Ŋɩɩ nɛ baala-la ma kala keri tɩɩ-naakelee a baasa tuto ʋ harɩŋ. Ba kaa mʋ faara tɔ dɩa-la tʋɔŋ nɩalɩŋ sɩ jʋʋ faa, a joŋ nyiniŋ hɛ ʋ dii nɩalɩŋ kala sɩ hɛ nɩmɛ. Nɩalɩŋ fa sɩ jʋʋ faa Sɛkɛm dɩɩ-leŋii-la tʋɔŋ, baalaa arɩ haalaa kala yi bʋɩ nɛ a kala sʋʋ.

⁵⁰ Ʋ ŋɩɩ harɩŋ nɛ Abɩmɛlɛk bɩra mʋ golli Tɛbɛs chu a yuo diiu.

⁵¹ Taŋ-la tʋtʋɔbaanɩŋ, dɩɩ-leŋii kʋbala nɛ fa chɩŋ nɩmɛ. Ŋɩɩ nɛ taŋ-la baalaa arɩ haalaa kala jʋʋ faa ʋ tʋɔŋ. Ba kɛŋ boiŋ tɔ a hɛ ba tɩtɩa lɛ, aŋ kiele jɩla hɔŋ dɩa-la nyuŋ.

⁵² Abɩmɛlɛk arɩ ʋ laalɩyuoroo sɩ mʋa a wʋwalɩmɛ dɩ ba jʋʋ dɩɩ-leŋii-la, Abɩmɛlɛk tɩtɩa nɩnɛrɩgɛ dɩ ʋ nyɩgɛ dɩa-la borusuŋ.

⁵³ Ʋ sɩɩ ŋaa ŋɩɩ, haal kʋbala joŋ nɔŋ-biiŋ yuo ta ʋ lɩɩ dɩa-la nyuŋ kʋ tuu yagɛ Abɩmɛlɛk nyuŋ yɛrɛ.

⁵⁴ Ŋɩɩ nɛ Abɩmɛlɛk guu yɩrɛ laalɩyuoru-la sɩɩ kori ʋ laalɩyuori kɩaa, a bʋla pʋ, “Lɩɩsɛ ŋ tokobiiŋ a kpʋmɛ, dɩ nɩaa sɩ́ bʋl arɩ haala nɛ kpʋmɛ.” Ŋɩɩ nɛ laalɩyuoru-la lɩɩsɛ tokobiiŋ tɔɔ Abɩmɛlɛk ʋ sʋʋ.

⁵⁵ Iziral tɩŋŋaa sɩ na dɩ Abɩmɛlɛk sʋba, ba mɩɩra mʋ dɩa.

⁵⁶ Wɩa sɩ to ŋɩɩ a tiŋ nɩbɔŋ wɩalɩŋ Abɩmɛlɛk sɩ ŋaa ʋ nyɩmma dɩa lɛ, a kpʋ ʋ naambiiriŋ mahɩŋ batori arɩ fii-la chɩmɩŋ nɛ ŋɩɩ.

⁵⁷ Wɩa ha bɩra joŋ nɩbɔŋ wɩalɩŋ Sɛkɛm tɩŋŋaa ma sɩ ŋaa chɩmɩŋ a tiŋ ba lɛ nɛ. Gɩdɩɔŋ nanʋala Jotam ŋmɩaŋ-la sɛnɛ diiba nɛ.