SƖPAALAARAA 8 - WƖA TENIŊ

Midiaŋ kuoroo Zɩba arɩ Zalɩmʋna

¹ Bʋa deeŋ lɛ nɛ Efirem tɩŋŋaa pɩɛsɛ Gɩdɩɔŋ, “Bɛɛ nɛ tɩɩ ŋ ŋaala ŋ-la? Bɛɛ nɛ tɩɩ ŋ sɩɩ chɛ dɩ ŋ yuo Midiaŋ tɩŋŋaa ŋ bɩ la yɩra?” Ba chaasa bʋl ʋ teeŋ woruŋ.

² Ama Gɩdɩɔŋ bʋla pɩba, “Wɩɩ-la mɩ sɩ ŋaa, nʋʋ jaŋ wuo kɛnʋ a magɩsɛ wɩalɩŋ ma sɩ ŋaa? Ma Efirem tɩŋŋaa sɩ ŋaa wʋbie-la nɛ paala kɩɩ wɩɩ-la mɩ nyɩŋ-nɩaa kala sɩ ŋaa.

³ Wɩa paala leŋ ma kpʋ Midiaŋ tɩŋŋaa sɩpaalaaraa Ɔrɛb arɩ Zɛɛb nɛ. Wʋbɛɛ nɛ mɩ ma ŋaa ʋ magɛ wɩɩ-la ma sɩ ŋaa?” Ʋ sɩ bʋl wɩɩŋ deeŋ, baaŋ-la ba fa sɩ na ʋ nyuŋ fɩɛlɛ.

⁴ Gɩdɩɔŋ arɩ ʋ laalɩyuoro-la zɔɔ-batori sɩ kiri Midiaŋ tɩŋŋaa a mʋ chol Jɔdaŋ fuo-la, lɔlʋŋ chaasa kɛŋ ʋ dɩ ʋ nɩaa kala. Ka ba ha vɩa aŋ kikiri.

⁵ Dɩ taŋ-la ba sɩɩ yɩrɛ Sʋkɔf kpagɛ nɩmɛ. Gɩdɩɔŋ mʋ a bʋla pɩ Sʋkɔf nɩaa, “Má pɩ mɩ laalɩyuoro-la kʋdiilee mʋa, ba lɔlɔ nɛ, ka mɩ haa kikiri Zɛba arɩ Zalɩmʋna sɩ ŋaa Midiaŋ tɩŋŋaa kuoroo.”

⁶ Ŋɩɩ nɛ Sʋkɔf tɩŋŋaa nɩhɩasɩŋ pɩɛsɛ, “Ŋ ha bɩ Zɛba arɩ Zalɩmʋna kɛsɛ, bɛɛ nɛ saa tɩɩ ŋ chɩchɛ dɩ la pɩ ŋ laalɩyuoroo kʋdiilee?”

⁷ Gɩdɩɔŋ bʋl, “Ʋ maga, dɩ La TƖƖNA nɛ leŋe mɩ yuo dii Zɛba arɩ Zalɩmʋna, mɩ jaŋ mɩɩra kɔ ma lɛ, a vɩɩrɛma arɩ sɔ-fɩaŋ-mie arɩ lɔgɔdɩnlɔgɔ, dɩ ma yaraa kala bɩɛlɛ.”

⁸ Nɩmɛ nɛ ʋ lɩɩ, a joŋo mʋ taŋ-la ba sɩɩ yɩrɛ Pɛnɩɛl, a sʋl kʋdiilee ba ma teeŋ. Ba ma bʋl wɩɩ-la tɩtɩa Sʋkɔf nɩaa fa sɩ bʋla.

⁹ Ŋɩɩ nɛ ʋ bʋla pɩ Pɛnɩɛl tɩmma-la ma, “Dɩ mɩ nɛ yuo diiba aŋ mɩɩra kɔ, mɩ jaŋ ŋmoo ma dɩɩ-leŋiŋ deeŋ lo.”

¹⁰ Zɛba arɩ Zalɩmʋna arɩ ba laalɩyuoroo fa hɛ lee-la ba sɩɩ yɩrɛ Kaakɔ lɛ nɛ. Ba nɩaa fa yi bʋɩ fii arɩ banɔŋ. Tinteye-la sɩ hɛ wɩɩpɔsʋŋ dɩɩrɩŋ laalɩyuoro-la kala fa sɩ ka nɛ ŋɩɩ, bɛɛ wɩaa ba laalɩyuoroo bʋɩ zɔlɔ arɩ mara nɛ ba fa kpʋ laalɩŋ lɛ.

¹¹ Gɩdɩɔŋ to tintee-hɩlɩŋ niiŋ nɛ a mʋ jʋʋ ʋ dʋndɔŋŋɔɔ dɩhɔnʋŋ sɩ hɛ tasɩ-la ba sɩɩ yɩrɛ Nɔba arɩ Jogbeha wɩɩpɔsʋŋ a yuo dɩ ba lɛ.

¹² Midiaŋ kuorusu-la balɩa, Zɛba arɩ Zalɩmʋna fá, ama ʋ kire kɛsɛba, aŋ yuo dii ba laalɩyuoroo kala.

¹³ Gɩdɩɔŋ, Jʋas nanʋala sɩ mɩɩra lɩɩ laalɩŋ kʋkɔ, ʋ to wombii-bie-la sɩ hɛ peelee tʋɔŋ Hɛrɛs lɛ nɛ,

¹⁴ nɩmɛ nɛ ʋ kɛŋ bapʋɔsɩ-bie kʋbala sɩ lɩɩ Sʋkɔf a pɩɛsʋ wɩaa. Ʋ ŋmʋnsɛ Sʋkɔf tɩŋŋaa nɩhɩasɩŋ mahɩŋ batori arɩ fii arɩ balɩpɛ yɩraa pʋ.

¹⁵ Ŋɩɩ nɛ Gɩdɩɔŋ mʋ Sʋkɔf nɩaa teeŋ a bʋl, “Má na Zɛba arɩ Zalɩmʋna nɛ ŋ-la, nɩalɩŋ wɩaa ma fa sɩ sieri mɩ lɛ a bʋl, ‘Ŋ ha bɩ Zɛba arɩ Zalɩmʋna kɛsɛ, bɛɛ nɛ saa tɩɩ ŋ chɩchɛ dɩ la pɩ ŋ laalɩyuoro-la sɩ lɔlɔ kʋdiilee?’ ”

¹⁶ Aŋ kɛsɛ Sʋkɔf nɩhɩasɩ-la a dɔgɩsɛba woruŋ arɩ sɔ-fɩaŋ-mie arɩ lɔgɔdɩnlɔgɔ.

¹⁷ Ʋ ha bɩra mʋ Pɛnɩɛl ma a ŋmoo ʋ dɩɩ-leŋii-la a lo, aŋ kpʋ baala-la sɩ hɛ taŋ-la lɛ.

¹⁸ Ŋɩɩ nɛ Gɩdɩɔŋ pɩɛsɛ Zɛba arɩ Zalɩmʋna, “Nɩbɛɛ ba doho nɛ ma kpʋ Tabɔ lɛ?” Ba bʋl, “Ba nagɛ ŋɩɩ ŋ sɩ naga nɛ, ba kʋŋkala nagɛ kuoru-bii nɛ.”

¹⁹ Gɩdɩɔŋ bʋl, “Ba kala ŋaa mɩ naambiiriŋ nɛ, mɩ naaŋ tɩtɩa bii-lʋlaa nɛ, La TƖƖNA sɩ weye yɩrɩŋ lɛ, dɩ ma nɛ fa bɩ ba kpʋa, mɩ ma bɩ jaŋ kpʋma.”

²⁰ Ŋɩɩ nɛ aŋ bʋla pɩ ʋ hambolibii-hɩaŋ Jɛta, “Sii kpʋba!” Ama Jɛta fa sɩ ŋaa hambie ŋɩɩ, ʋ bɩ bɔyɛ kɛnɛ arɩ ʋ sɩ jaŋ kpʋba.

²¹ Zɛba arɩ Zalɩmʋna bʋl, “Ŋ tɩtɩa kʋ kpʋla. Baala sɩ yi ŋɩɩ, ʋ doluŋ ma yi ŋɩɩ nɛ.” Ŋɩɩ nɛ Gɩdɩɔŋ sii a kpʋ Zɛba arɩ Zalɩmʋna, aŋ chaarɛ kpɩɛra-la fa sɩ hɛ ba bʋntaŋŋaba baŋŋaa lɛ.

Gɩdɩɔŋ gɛrɩ-laala-daŋɩŋ

²² Laalɩŋ sɩ dɛrɛ harɩŋ, Iziral tɩŋŋaa bʋla pɩ Gɩdɩɔŋ, “Ŋ nɛ sɩ laala ta Midiaŋ tɩŋŋaa nɩsɩŋ lɛ ŋɩɩ, ŋaa la kuoro, dɩ ŋ nɛ kʋ tuo, dɩ ŋ nanʋala ma bɩra ŋaa la kuoro, dɩ ʋ ma nɛ kʋ tuo, dɩ ŋ nihiŋ ma bɩra dii la kuoruŋ.”

²³ Gɩdɩɔŋ bʋla pɩba, “Mɩ bɩ jaŋ ŋaa ma kuoro, mɩ nanʋala ma bɩ jaŋ dii ma kuoruŋ, La TƖƖNA nɛ jaŋ ŋaa ma kuoro.”

²⁴ Gɩdɩɔŋ bɩra bʋla pɩba, “Wɩɩ-la kala mɩ sɩɩ chɛ dɩ ma ŋaa pɩmɛ nɛ, kɩalɩŋ ma sɩ yuo laa laalɩŋ lɛ a kaa kpaa tʋɔŋ, má kʋŋkala tʋɔsɛ sɛlɩmɛ dɩgɩlɩŋ-kpɛnsɩŋ pɩmɛ.” (Ʋ fa ŋaa Midiaŋ tɩŋŋaa naabalɩma wɩɩ nɛ dɩ ba hɩhɛ sɛlɩmɛ dɩgɩlɩŋ-kpɛnsɩŋ.)

²⁵ Ba bʋl, “La tʋɔŋ tɔrɔ nɛ, la jaŋ pɩŋ.” Ŋɩɩ nɛ aŋ joŋ gɛrɩŋ jɛrɛ, ba kʋŋkala tʋɔsɛ kɩalɩŋ ba sɩ yuo dii tʋɔŋ dɩgɩlɩŋ-kpɛnsɩŋ a joŋo lo hɛ ʋ lɛ.

²⁶ Ba sɩ joŋ sɛlɩmɛ dɩgɩlɩŋ-kpɛnsɩ-la ʋ sɩ leŋe ba kaa kɔ a magɩsɛ, ba yuŋuŋ ka mʋa dɩ ʋ yi kilo mara. Ba kpɩɛraa dɔnsʋŋ: baŋŋaa kɩaa, gɛrɩ-mʋɔla-la Midiaŋ kuoroo sɩɩ laalʋ, koo chɔrʋmɔ-la kala ba sɩ yie joŋo hɩhɛ bʋntaŋŋaba baŋŋaa-na bɩ pɛ.

²⁷ Gɩdɩɔŋ kɛŋ sɛlɩmɛ-la libi gɛrɩ-laala-daŋɩŋ, ʋ ŋaa vene, a bil ʋ jaŋ Ɔpɩra lɛ. Iziral tɩŋŋaa kala suomo kpʋkpaarʋ nɩmɛ. Ʋ ŋɩɩ ŋaa bɛrɛ a pɩ Gɩdɩɔŋ arɩ ʋ dɩa nɩaa kala.

Gɩdɩɔŋ sʋba

²⁸ Iziral tɩŋŋaa yuo dii Midiaŋ tɩŋŋaa, ba bɩra bɩ doluŋ kɛnɛ. Gɩdɩɔŋ sɩ hɛ ʋ mɩɩsɩŋ lɛ, Iziral nɩaa fa hɔŋ tintee-la lɛ arɩ fɩɛlɩŋ jɩsɩŋ mahɩŋ balɩa nɛ.

²⁹ Ŋɩɩ nɛ Jʋas nanʋala Gɩdɩɔŋ ba sɩ kaa yɩrɛ Jerub-Baal, mɩɩra mʋ hɔŋ ʋ dɩa lɛ.

³⁰ Ʋ fa kɛŋ hambolibiisiŋ mahɩŋ batori arɩ fii nɛ, bɛɛ wɩaa ʋ haalaa fa yʋga.

³¹ Haal-la ma ʋ sɩ bile aŋ bɩ jaa, aŋ leŋ ʋ hɔŋ Sɛkɛm lɛ, ʋ ma fa lʋl hambolibie nɛ a pʋ, ʋ hɛ ʋ yɩrɩŋ Abɩmɛlɛk.

³² Jʋas nanʋala Gɩdɩɔŋ fa hɩɛsa nɛ woruŋ aŋ sʋʋ. Ba hugu ʋ nyɩmma Jʋas bʋa-la sɩ hɛ Ɔpɩra lɛ, Abieza tɩŋŋaa tinteeŋ.

³³ Gɩdɩɔŋ sʋʋŋ harɩŋ lɛ, Iziral tɩŋŋaa bɩra mɩɩra tuto vesi-la ba sɩɩ yɩrɛ Baal nɛ, a joŋ Baal Bɛrɩf ʋ ŋaa ba vene ba kpʋkpaarɛ,

³⁴ aŋ yʋ ba TƖƖNA Wɩa sɩ laaba ta ba dʋndɔmɔ-la kala sɩ golliba nɩsɩŋ lɛ.

³⁵ Ba bɩra bɩ Jeru-Baal (Gɩdɩɔŋ nɛ ŋɩɩ) dɩa nɩaa maa zil, arɩ ʋ sɩ ŋaa wʋzɔmɔ-la kala pɩba ma.