SƖPAALAARAA 7 - WƖA TENIŊ

Gɩdɩɔŋ yuo dii Midiaŋ tɩŋŋaa

¹ Taŋ sɩ pʋla chʋchʋɔ-fɩɛla, Jerub-Baal (Gɩdɩɔŋ nɛ ŋɩɩ) arɩ ʋ laalɩyuoroo kala sii a mʋ ŋmoo buguŋ Harɔd lɩɩ-bulo leriŋ. Ka Midiaŋ tɩŋŋaa ma hɛ wɩɩpɔsʋŋ nagʋa fuonaaŋ lɛ a kpagɛ Mɔrɛ dundolo-la.

² La TƖƖNA bʋla pɩ Gɩdɩɔŋ, “Ŋ laalɩyuoro-la yʋga nɛ arɩ mɩ sɩ jaŋ leŋ dɩ ma yuo dii Midiaŋ tɩŋŋaa. Dɩ ŋ nɛ ŋaa ŋɩɩ, Iziral tɩŋŋaa jaŋ bɩɩnɛ arɩ ba tɩtɩa nɛ yuo dii laal-la. Ba bɩ jaŋ joŋ yɩrɩŋ pɩmɛ.

³ Ŋɩɩ wɩaa, heele bʋla pɩ laalɩyuoroo kala, ‘Nɩɩ-la kala fawʋllʋŋ sɩ kɛnɛ, ʋ jaŋ wuo chɩŋ Gɩlɩad peel-la lɛ a mɩɩra mʋ dɩa.’ ” Ŋɩɩ nɛ nɩaa bʋɩ mara arɩ balɩa mɩɩrɛ, aŋ ka nɩaa bʋɩ fii.

⁴ La TƖƖNA bɩra bʋla pɩ Gɩdɩɔŋ, “Ŋ nɩalɩŋ ha yʋga nɛ. Kɛmba tuu lɩɩŋ leriŋ, mɩ jaŋ kɛmba pɔrɔ pɩŋ nɩmɛ. Dɩ mɩ nɛ sɩ, ‘Nɩa deeŋ jaŋ to ŋ harɩŋ mʋ,’ ʋ jaŋ mʋ, ama dɩ mɩ nɛ sɩ, ‘Nɩa deeŋ bɩ jaŋ to ŋ harɩŋ mʋ,’ ʋ bɩ jaŋ mʋ.”

⁵ Ŋɩɩ nɛ Gɩdɩɔŋ kɛŋ laalɩyuoro-la kala ba tuu lɩɩ-la leriŋ. Nɩmɛ nɛ La TƖƖNA bʋla pʋ, “Kɛŋ nɩalɩŋ sɩ chu nyʋnyʋa lɩɩ-la a nagɛ vaha, a pɔrɛ nɩalɩŋ sɩ kpirime a kɛŋ nɩsɩŋ ŋaa nyʋnyʋa lɛ.”

⁶ Nɩaa zɔɔ-batori nɛ fa kɛŋ nɩsaa a ŋaa lɩɩ-la nyʋnyʋa. Ka nɩkaanaa ma kala kpirimi a chu nyʋnyʋa.

⁷ La TƖƖNA bʋla pɩ Gɩdɩɔŋ, “Nɩalɩŋ zɔɔ-batori sɩ kɛŋ nɩsaa ŋaa lɩɩ-la nyʋa, ŋ dɩ ba nɛ mɩ jaŋ kaa laa Iziral tɩŋŋaa ta Midiaŋ tɩŋŋaa nɩsɩŋ lɛ. Mɩ jaŋ leŋ dɩ ma yuo diiba. Leŋ dɩ nɩkaana-la kala mɩɩra mʋ ba dɩɩsɩŋ.”

⁸ Ŋɩɩ nɛ Gɩdɩɔŋ arɩ laalɩyuoro-la zɔɔ-batori laa Iziral nɩkaana-la kʋdiilee a laa ba banyilliŋ ma pɛ. Ka ʋ leŋ ba mɩɩra mʋ ba dɩɩsɩŋ. Dɩ Midiaŋ tɩŋŋaa tuu hɔŋ fuonaaŋ lɛ, ka ba ma hɔŋ dundolo nyuŋ.

⁹ Tɩtaŋɩŋ La TƖƖNA bʋla pɩ Gɩdɩɔŋ, “Má sii tuu yuo Midiaŋ tɩmma-la ba dɩhɔnʋŋ. Mɩ jaŋ jomba hɛ ma nɩsɩŋ lɛ.

¹⁰ Dɩ fawʋllʋŋ nɛ kɛnɩŋ arɩ ŋ sɩ jaŋ mʋ yuoba, kɛŋ ŋ tɩntɩnna ba sɩɩ yɩrɛ Pʋra dɩ ma lʋara mʋ ba buguŋ,

¹¹ a nɩɩ wɩalɩŋ ba sɩɩ bʋl. Dɩ ŋ nɛ nɩɩ wɩalɩŋ, ŋ nyuŋ jaŋ duori dɩ ŋ wuo yuoba.” Ŋɩɩ nɛ Gɩdɩɔŋ sii kɛŋ ʋ tɩntɩnna Pʋra ba mʋ ba dʋndɔmɔ-la dɩhɔnʋŋ niiŋ.

¹² Dɩ Midiaŋ tɩŋŋaa, Amalɛk tɩŋŋaa arɩ nɩalɩŋ dɔnsʋŋ kala sɩ lɩɩ wɩɩpɔsʋŋ dɩɩrɩŋ hɔnɔ su fuonaa-la kala a nagɛ hɔbɔ sɩ su leriŋ. Ba bʋntaŋŋaba ma yʋgɛ woruŋ a nagɛ hagɩlɩ-bumbugulo sɩ pɩŋ mʋgʋ-balɩŋ niiŋ, ŋ bɩ ba wuo dɩɩsɛ.

¹³ Gɩdɩɔŋ sɩ mʋ yi Midiaŋ laalɩyuoro-la buguŋ, ʋ nɩa dɩ ba dɔŋɔ bʋl ʋ sɩ duoso wɩaa a pɩpɩ ʋ nandɔŋɔ. Ʋ sɩ, “Mɩ duoso na boroboro gulumuŋ ba sɩ kɛŋ mɩaa ŋaa dɩ ʋ bilime kʋ jʋʋ la buguŋ arɩ doluŋ a yɩ lɛbɩŋ, ʋ tel a bɩrɩma chu.”

¹⁴ Ʋ nandɔŋ-la bʋla pʋ, “Ŋ duoso-la mʋ tɩgɛ Jʋas nanʋala Gɩdɩɔŋ lɛ nɛ, Iziral tɩŋŋaa laalɩyuoroo nɩhɩaŋ-la. Wɩa joŋ la Midiaŋ tɩŋŋaa arɩ la laalɩyuoroo kala a hɛ ʋ nɩsɩŋ lɛ nɛ.”

¹⁵ Gɩdɩɔŋ sɩ nɩɩ duoso-la arɩ ŋɩɩ ba sɩ dagɛ ʋ bʋbʋɔŋ, ʋ dɛnnɛ Wɩa. Ŋɩɩ nɛ aŋ mɩɩra mʋ ba Iziral tɩŋŋaa buguŋ aŋ kpɩa, “Má sii la mʋ! La TƖƖNA joŋ Midiaŋ tɩŋŋaa laalɩyuoroo kala a hɛ la nɩsɩŋ lɛ nɛ.”

¹⁶ Gɩdɩɔŋ kɛŋ ʋ laalɩyuoro-la zɔɔ-batori a kpaa leree batori, a joŋ banyilliŋ arɩ tagɩ-wuoloo a joŋ tʋʋ-diiri kapɩlaa arɩ nyiniŋ hɛ ba tʋɔŋ a pɩ ba kʋŋkala.

¹⁷ Ŋɩɩ nɛ ʋ bʋla pɩba, “Máa beŋ mɩ lɛ, máa to mɩ harɩŋ. Dɩ mɩ nɛ mʋ yi Midiaŋ tɩmma-la dɩhɔnʋŋ niiŋ, a ŋaa wɩɩ, má ma ŋaa ŋɩɩ tɩtɩa.

¹⁸ Dɩ mɩ dɩ nɩalɩŋ kala sɩɩ to mɩ harɩŋ nɛ ŋmʋʋ la banyilliŋ, ma nɩkaana-la sɩ golli ba dɩhɔnʋŋ chu, má ma ŋmʋʋ ma kɩaa, aŋ ŋaa goŋ a bʋl, ‘Má yuo laalɩŋ pɩ La TƖƖNA, má yuo laalɩŋ pɩ Gɩdɩɔŋ.’ ”

¹⁹ Gɩdɩɔŋ arɩ nɩalɩŋ zɔlɔ sɩɩ to ʋ harɩŋ mʋ yi Midiaŋ tɩmma-la buguŋ niiŋ tɩta-siesee nɛ, dɩ nɩaa dɔnsʋŋ kʋ laa nɩalɩŋ sɩɩ pɔba lɛ, a pɔ. Ŋɩɩ nɛ ba ŋmʋʋ banyilliŋ aŋ joŋ ba tagɩsɩ-la ba sɩ koro a yaga yɛrɛ.

²⁰ Gɩdɩɔŋ laalɩyuori-kaana-la bʋbʋɔ-bugoo balɩa ma ŋmʋʋ banyilli-la ba sɩ koro ba nadiiŋ nɩsaa lɛ. Ŋɩɩ nɛ aŋ joŋ tagɩsɩ-la ba ma sɩ koro yaga yɛrɛ, aŋ kori tʋʋ-diiri kapɩla-la arɩ nyiniŋ ba nagʋa nɩsaa lɛ, aŋ kala ŋaa goŋ a bʋl, “Má yuo laalɩŋ pɩ La TƖƖNA, má yuo laalɩŋ pɩ Gɩdɩɔŋ.”

²¹ Ka ba kʋŋkala chɩŋ ʋ dɩchɩnɩŋ a golli Midiaŋ tɩŋŋaa buguŋ a chu, Midiaŋ tɩmma-la kala fá, aŋ ŋmuŋmoo niiŋ.

²² Bʋa-la lɛ ba sɩ ŋmʋʋ banyilli-la kala zɔɔ-batori, La TƖƖNA leŋ Midiaŋ tɩŋŋaa laalɩyuoroo chaarɛ tokobiee a gʋra yuyuo dɔŋɔ ba buguŋ lɛ. Laalɩyuoro-la fá mʋ taŋ-la ba sɩɩ yɩrɛ Bɛf Sɩta a tʋʋlɛ Zɛrɛra fuonaaŋ a mʋ yi taŋ-la ba sɩɩ yɩrɛ Abɛl Mehola sɩ kpagɛ lee-la ba sɩɩ yɩrɛ Tabaf.

²³ Ʋ ŋɩɩ harɩŋ, ba yɩrɛ Iziral laalɩyuoro-la kala sɩ lɩɩ Nafɩtalɩ, Asa arɩ Manasɛ doho doho, ba kʋ kire to Midiaŋ tɩmma-la harɩŋ.

²⁴ Ka Gɩdɩɔŋ tɩŋ nɩaa ba mʋ laalɩyuoroo sɩ hɛ Efirem tintee-la peelee sɩ yʋga lɛ teeŋ a bʋl, “Má sii kʋ tuu a yuo Midiaŋ tɩmma-la, má pɔ Jɔdaŋ fuo-la arɩ fuonu-la kala a kɛŋ ŋɩɩ mʋ yi lee-la ba sɩɩ yɩrɛ Bɛf Bara dɩ Midiaŋ tɩmma-la sɩ chol.” Ŋɩɩ nɛ Efirem laalɩyuoro-la kala ba fa sɩ yɩra kɔ, a chɩna pɔ fuonu-la kala a kaa mʋ yi Bɛf Bara.

²⁵ Ba ha bɩra yuo kɛŋ Midiaŋ tɩŋŋaa sɩpaalaaraa ma balɩa nɛ baa yɩrɛ, Ɔrɛb arɩ Zɛɛb. Ba kpʋ Ɔrɛb bʋŋ-la ba lɛɛlɛ sɩɩ yɩrɛ Ɔrɛb lɛ nɛ, aŋ kpʋ Zɛɛb ma lee-la ba sɩɩ chagɛ tɩɩnɛnɛɛ sɩnɩŋ ba lɛɛlɛ sɩɩ yɩrɛ Zɛɛb. Ba ha kire to Midiaŋ tɩmma-la harɩŋ nɛ, aŋ kɛŋ Ɔrɛb arɩ Zɛɛb nyusuŋ kaa kʋ pɩ Gɩdɩɔŋ, dɩ ʋ fa hɛ Jɔdaŋ fuo-la wɩɩpɔsʋŋ dɩɩrɩŋ.