SƖPAALAARAA 4 - WƖA TENIŊ

Iziral tɩŋŋaa sɩpaalaara Debora

¹ Ehud sɩ sʋba harɩŋ, Iziral tɩŋŋaa bɩra ŋaa wʋbɔŋ La TƖƖNA teeŋ.

² Ŋɩɩ nɛ La TƖƖNA leŋ Kɛnaŋ tɩŋŋaa kuoro Jabɩŋ sɩ hɛ Hazɔ lɛ aŋ bibemba yuo dii Iziral nɩaa. Ʋ laalɩyuoroo nɩhɩaŋ ma nɛ fa ŋaa Sɩsɛra a hɛ taŋ-la ba sɩɩ yɩrɛ Harɔsɛf Hagoyim lɛ.

³ A tɩŋ Jabɩŋ fa sɩ kɛŋ hɔɔŋ janɩŋ torukoba zɔlɔ nibi, ʋ chaasa dɔgɩsɛ Iziral tɩŋŋaa woruŋ jɩsɩŋ mara, ba yele pɩ La TƖƖNA dɩ ʋ pɛ ba lɛ.

⁴ Lapɩdɔf haala Debora sɩ ŋaa Wɩa wʋlaabʋllʋ nɛ fa ŋaa Iziral tɩŋŋaa sɩpaalaara bʋa-la lɛ.

⁵ Debora fa yie hɔŋ ʋ tɩtɩa abɛ tɩa kʋbala bʋbʋɔŋ nɛ, Rama arɩ Bɛtɛl pɛgɛ, Efirem tintee-la peelee sɩ yʋga lɛ. Iziral tɩŋŋaa fa yie kɛŋ ba kaalɛrɛba kɔ ʋ teeŋ nɩmɛ, ʋ jɩma pɩpɩba.

⁶ Ŋɩɩ nɛ ʋ tɩma yɩrɛ Abɩnʋam nanʋala Barak sɩ lɩɩ Kɛdɛs sɩ hɛ Nafɩtalɩ tinteeŋ lɛ, ʋ kɔ ʋ bʋla pʋ, “La TƖƖNA Iziral tɩŋŋaa Wɩa sɩ, ‘Mʋ tʋɔsɛ nɩaa bʋɩ fii Nafɩtalɩ arɩ Zebuluŋ doho nɩaa tʋɔŋ a laa ba sɩpaaŋ dɩ ma mʋ peel-la ba sɩɩ yɩrɛ Tabɔ.

⁷ Mɩ jaŋ nyɩsɛ Sɩsɛra sɩ ŋaa Jabɩŋ laalɩyuoroo kʋhɩaŋ arɩ ʋ laalɩŋ janɩŋ torukoba arɩ ʋ laalɩyuoroo dɩ ba kɔ Kɩsɔŋ fuoŋ, a jomba hɛ ŋ nɩsɩŋ lɛ.’ ”

⁸ Barak bʋla pʋ, “Dɩ ŋ nɛ jaŋ to mɩ harɩŋ mʋ, mɩ jaŋ mʋ, ama dɩ ŋ nɛ bɩ jaŋ to mɩ harɩŋ, mɩ ma bɩ jaŋ mʋ.”

⁹ Debora bʋl, “Ʋ zɔmɔ, mɩ jaŋ mʋ. Ama ŋɩɩ ŋ sɩ jaŋ yuo dii Sɩsɛra, yɩrɩ-la bɩ jaŋ ŋaa ŋ kʋŋ, bɛɛ wɩaa La TƖƖNA nɩɩ chɛ dɩ ʋ joŋu a hɛ haala nɩsɩŋ lɛ.” Ŋɩɩ nɛ Debora sii ʋ dɩ Barak mʋ Kɛdɛs.

¹⁰ Barak yɩrɛ Zebuluŋ doho nɩaa laalɩyuoroo arɩ Nafɩtalɩ doho nɩaa laalɩyuoroo ba mʋ taŋ-la ba sɩɩ yɩrɛ Kɛdɛs. Nɩaa bʋɩ fii nɛ fa to ʋ harɩŋ a mʋ, Debora ma to mʋ.

¹¹ Bʋa deeŋ lɛ dɩ Hɛba, Keni tɩɩna kʋbala sɩ ŋaa Hobab doho nʋʋ, a ŋaa Mosis ma bajene, lɩɩsɛ ʋ tɩtɩa Keni tɩŋŋaa tʋɔŋ a mʋ hɛ ʋ lɛbɩŋ a hɔŋ tɩɩ-bal kʋbala bʋbʋɔŋ, Zaananim lɛ a kpagɛ Kɛdɛs.

¹² Ba sɩ bʋla pɩ Sɩsɛra arɩ Abɩnʋam nanʋala Barak jɩla hɔŋ peel-la ba sɩɩ yɩrɛ Tabɔ lɛ nɛ,

¹³ Sɩsɛra sii kɛŋ ʋ hɔɔŋ janɩŋ torukoba-la zɔlɔ nibi arɩ ʋ laalɩyuoroo kala, ba lɩɩ Harɔsɛf Hagoyim lɛ a mʋ Kɩsɔŋ fuo-la.

¹⁴ Ŋɩɩ nɛ Debora bʋla pɩ Barak, “Jɩnɩŋ La TƖƖNA joŋ Sɩsɛra a hɛ ŋ nɩsɩŋ lɛ nɛ, ŋɩɩ wɩaa mʋ! La TƖƖNA paala laa ŋ sɩpaaŋ a mʋ nɛ dɩ ʋ yuou pɩŋ.” Barak sii peel-la ba sɩɩ yɩrɛ Tabɔ nyuŋ a tuu, ʋ laalɩyuoroo bʋɩ fii ma to ʋ harɩŋ.

¹⁵ Barak sɩ mʋa a yuyuo laal-la, La TƖƖNA leŋ Sɩsɛra arɩ ʋ nɩalɩŋ sɩ kɛŋ laalɩŋ janɩŋ torukoba-la vɩvɛŋ arɩ ʋ laalɩyuoroo wɩɩkala vʋgʋmɛ. Fawʋllʋŋ kɛŋ ba kʋŋkala a tɩŋ Barak arɩ ʋ laalɩyuoroo wɩaa. Sɩsɛra fɩla tuu ʋ jaaba toruko lɛ, a fá.

¹⁶ Barak laalɩyuoroo kire to Sɩsɛra janɩŋ torukoba arɩ ʋ laalɩyuoroo harɩŋ a mʋ yi taŋ-la ba sɩɩ yɩrɛ Harɔsɛf Hagoyim, a kpʋ Sɩsɛra laalɩyuoroo kala, kʋbala ma bɩ ka.

¹⁷ Sɩsɛra dʋndʋŋa nɛ wuo foro fá, a mʋ jʋʋ Keni tɩŋŋaa Hɛba haala Jaɛl lɛbɩŋ, bɛɛ wɩaa Hazɔ kuoro Jabɩŋ arɩ Hɛba dɩa nɩaa fa ŋaa sɩma nɛ.

¹⁸ Jaɛl lɩɩ cheŋ Sɩsɛra a bʋla pʋ, “Mɩ nɩhɩaŋ kʋ jʋʋ, sɩ́ fawʋllʋŋ fá.” Ŋɩɩ nɛ ʋ mʋ jʋʋ ʋ lɛbɩŋ. Ʋ kɛŋ gɛrɩŋ pilime tɔʋ.

¹⁹ Sɩsɛra bʋl, “Lɩɩ-nyʋasʋŋ kɛmmɛ nɛ, pɩmɛ lɩɩŋ mʋa dɩ mɩ nyʋa.” Jaɛl kɛŋ nɛ-yɩlɩŋ sɩ hɛ puruŋ tʋɔŋ niiŋ kaa puri a wɛnsɛ pʋ ʋ nyʋa, ka ʋ bɩra kɛŋ gɛrɩŋ pilime tɔʋ.

²⁰ Sɩsɛra bʋla pɩ Jaɛl, “Chɩŋ lɛbɩ-la boiŋ niiŋ, dɩ nʋʋkala kʋʋ bal a pɩɛsɩŋ, ‘Nʋʋ hɛ daha?’ Bʋl, ‘Aɩ.’ ”

²¹ Dɩ lɔlʋŋ fa kɛŋ Sɩsɛra woruŋ ʋ faasa pɩŋ doŋ. Hɛba haala Jaɛl sii joŋ lɛbɩŋ daa-pɛ-bie arɩ hama a kaa lʋara mʋ ŋmoo hɛ Sɩsɛra nyuŋ lɛ a tuu kɛŋ tinteeŋ, ʋ sʋʋ.

²² Barak sɩ kiri Sɩsɛra libe kʋkɔ, Jaɛl lɩɩ mʋ chemu a bʋl, “Kɔ dɩ mɩ dagɩŋ baal-la ŋ sɩ gɔllɔ chɩchɛ.” Ŋɩɩ nɛ ʋ to ʋ harɩŋ ba jʋʋ dɩ Sɩsɛra nɛ, ba joŋ lɛbɩŋ daa-pɛ-bie ŋmoo hɛ ʋ nyuŋ lɛ ʋ sʋʋ pɩŋ ŋɩɩ.

²³ Tapʋlɩɩ-la Wɩa leŋe Iziral tɩŋŋaa yuo dii Kɛnaŋ kuoro Jabɩŋ nɛ.

²⁴ Iziral tɩŋŋaa doluŋ fa pʋŋa pɩpɛ nɛ ba yuo Jabɩŋ ŋɩɩ a mʋ kpʋʋ.