SƖPAALAARAA 3 - WƖA TENIŊ

¹ Tinteyee deemba nɛ La TƖƖNA leŋ dɩ ʋ kaa magɩsɛ Iziral tɩmma-la sɩ bɩ laal-la kala ba sɩ yuo Kɛnaŋ lɛ kʋŋkala na.

² Ʋ ŋaa wɩɩŋ deeŋ dɩ ʋ dagɛ ba doho nɩalɩŋ sɩ bɩ laalɩŋ wɩaa jɩŋ nɛ.

³ Tinteye-la ʋ sɩ leŋe nɛ ŋ-la: Fɩlɩsɩtɩa tinteeŋ sɩpaalaaraa banɔŋ, Kɛnaŋ tɩŋŋaa kala, Sɩdɔŋ tɩŋŋaa arɩ Hivi tɩmma-la sɩ hɛ Lɛbanɔŋ peelee leriŋ, a chɩŋ peel-la ba sɩɩ yɩrɛ Baal Hɛmɔŋ a kaa mʋ Lebo Hamaf.

⁴ Ʋ lemba dɩ ʋ kɛmba magɩsɛ Iziral tɩŋŋaa a na ba jaŋ to niiri-la ʋ sɩ to Mosis lɛ a bile pɩ ba naabalɩmaba nɛɛ.

⁵ Iziral tɩŋŋaa fa hɔŋ nɩaa deemba tʋɔŋ nɛ: Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Pɛrɛs tɩŋŋaa, Hivi tɩŋŋaa arɩ Jebus tɩŋŋaa.

⁶ Ba faa jaa nɩaa deemba toloo nɛ, nɩalɩŋ ma jɩjaa ba toloo, ka ba pɛ kpʋkpaarɛ nɩalɩŋ vesiŋ.

Iziral tɩŋŋaa sɩpaalaara Ofiniel

⁷ Ŋɩɩ nɛ Iziral tɩŋŋaa ŋaa wʋbɔŋ La TƖƖNA teeŋ, ba yʋ La TƖƖNA wɩaa aŋ tuto vesi-la ba sɩɩ yɩrɛ Baal arɩ Asɩra.

⁸ La TƖƖNA baanɩŋ sii Iziral tɩŋŋaa nyuŋ, ʋ jomba hɛ Aram Naharem tɩŋŋaa kuoru kʋbala ba sɩɩ yɩrɛ Kusaŋ-Risatem nɩsɩŋ lɛ. Iziral tɩŋŋaa fa hɛ kuoro deeŋ nɩsɩŋ lɛ jɩsɩŋ chori nɛ.

⁹ Ŋɩɩ nɛ Iziral tɩŋŋaa yele pɩ La TƖƖNA dɩ ʋ pɛ ba lɛ. Ʋ lɩɩsɛ Kenas nanʋala Ofiniel ʋ laaba ta. Kenas fa ŋaa Kalɩb ŋaana nɛ.

¹⁰ Wɩa Dɩma kʋ jʋʋ Ofiniel ʋ ŋaa Iziral tɩŋŋaa sɩpaalaarʋ a kɛmba mʋ laalɩŋ. La TƖƖNA joŋ Aram kuoro Kusaŋ-Risatem a hɛ Ofiniel nɩsɩŋ lɛ ʋ yuo diiu.

¹¹ Ŋɩɩ nɛ tintee-la fɩɛlɛ yuosuŋ lɛ jɩsɩŋ mahɩŋ balɩa a mʋ yi bʋa-la lɛ Ofiniel sɩ sʋba.

Iziral tɩŋŋaa sɩpaalaara Ehud

¹² Iziral tɩŋŋaa bɩra ŋaa wʋbɔŋ kʋbala La TƖƖNA teeŋ. A tɩŋ wʋbɔŋ-la wɩaa, La TƖƖNA leŋ Mʋab kuoro Ɛgɩlɔŋ kɛŋ doluŋ a kɩɩ Iziral tɩŋŋaa.

¹³ Ŋɩɩ nɛ Ɛgɩlɔŋ yɩrɛ Amɔŋ tɩŋŋaa arɩ Amalɛk tɩŋŋaa ba kʋ pɛ ʋ lɛ ba yuo dii Iziral tɩŋŋaa a laa Jeriko, abɛ tɩɩsɩŋ taŋ-la.

¹⁴ Ŋɩɩ nɛ Iziral tɩŋŋaa hɛ Mʋab tɩŋŋaa kuoro Ɛgɩlɔŋ nɩsɩŋ lɛ jɩsɩŋ fii arɩ chori.

¹⁵ Iziral tɩŋŋaa bɩra yele pɩ La TƖƖNA dɩ ʋ pɛ ba lɛ. Ʋ pɩba nʋʋ sɩ jaŋ laaba ta. Ehud nɛ ʋ fa lɩɩsa pɩba. Ehud fa ŋaa gɛlɛ tɩɩna nɛ. Ʋ nyɩmma nɛ fa Gɛra a ŋaa Bɛnjamɩŋ doho nʋʋ. Ŋɩɩ nɛ Iziral tɩŋŋaa tɩŋ Ehud dɩ ʋ kɛŋ kɩaa mʋ tiŋ lampoo pɩ Mʋab kuoro Ɛgɩlɔŋ.

¹⁶ Ehud fa libi tokobiiŋ sɩ kɛŋ niiriŋ balɩa nɛ. Ʋ duomuŋ ŋaa naakieliŋ kpaa magɛ dɔŋɔ. Ʋ joŋo vɔɔ mɛrɛ ʋ nadiiŋ naapuiŋ lɛ, gɛrɩŋ bʋbʋɔŋ.

¹⁷ Ŋɩɩ nɛ ʋ kɛŋ lampoo kɩalɩŋ mʋ time pɩ Mʋab kuoro Ɛgɩlɔŋ. Ɛgɩlɔŋ fa ŋaa nʋʋ sɩ kɛŋ yaraa nɛ woruŋ.

¹⁸ Ehud sɩ kɛŋ kɩalɩŋ mʋ pʋ dɛrɛ, ʋ leŋ baala-la sɩ chʋŋ kɩalɩŋ mʋ mɩɩra kʋkɔ dɩa.

¹⁹ Ka ʋ chɩŋ lee-la tɔŋŋɔɔ sɩ hɛ, a kpagɛ Gɩlɩgal, a mɩɩra mʋ Ɛgɩlɔŋ teeŋ a bʋla pʋ, “Kuoro, mɩ kɛŋ wɩɩ nɛ sɩ maga mɩ lʋara bʋla pɩŋ.” Ŋɩɩ nɛ kuoru-la bʋla pɩ ʋ tɩntɩnnaa, “Má sii aŋ leŋ la dʋndʋŋa.” Ŋɩɩ nɛ ba kala sii lɩɩ.

²⁰ Ehud mʋ ʋ teeŋ dɩ ʋ dʋndʋŋa hɔŋ ʋ lusuŋ nyuŋ dɩa sɩ fɩɛla tʋɔŋ a bʋl, “Mɩ kɛŋ tɩndaarɩ nɛ sɩ lɩɩ Wɩa teeŋ dɩ mɩ bʋla pɩŋ.” Ŋɩɩ nɛ kuoru-la sii chɩŋ.

²¹ Ehud kɛŋ nagʋa lɛrɛ tʋʋrɛ tokobii-la sɩ mɛrɛ ʋ nadiiŋ naapuiŋ, a tɔɔ kuoru-la luoruŋ lɛ.

²² Tokobii-la kala jʋʋ baal-la luoruŋ, a lɩɩ luri ʋ harɩŋ. Ehud bɩ tokobii-la lɛrɛ lɩɩsɛ, nʋʋŋ tɔ tokobii-la kala.

²³ Ŋɩɩ nɛ Ehud kʋ lɩɩ dɩa-la tʋɔŋ aŋ kɛŋ boiŋ niiri-la tɔ a kaa yagɛ.

²⁴ Ʋ sɩ mʋa harɩŋ, kuoru-la tɩntɩnnaa kɔ, dɩ lusuŋ nyuŋ dɩa-la borusuŋ yaga. Ba bʋl, “Ʋ naga ʋ jʋʋ sɩpaaŋ dɩa-la dɩ ʋ togili nɛ.”

²⁵ Ba gbɛrɛ a dieni a lɔl, ama ʋ ha sɩ bɩ dɩa-la borusuŋ kʋŋkala suro, ba joŋ boribiiŋ a suri. Ba suro dɩ ba nɩhɩaŋ tele pɩŋ tinteeŋ a sʋʋ.

²⁶ Bʋa-la lɛ ba gbɛrɛ ŋɩɩ, ka Ehud fa viiri. Ʋ mʋ a kieli tɔmɔ-la leriŋ a fá mʋ taŋ-la ba sɩɩ yɩrɛ Sɛɩra.

²⁷ Ʋ sɩ mʋ yi nɩmɛ, ʋ ŋmʋʋ banyile Efirem tintee-la peelee sɩ yʋga lɛ a yɩrɛ Iziral tɩŋŋaa dɩ ba mʋ yuo laalɩŋ. Ŋɩɩ nɛ ʋ laa ba sɩpaaŋ a lɩɩ dundolo-la nyuŋ kʋ tuu.

²⁸ Ʋ bʋla pɩba, “Má to mɩ harɩŋ, La TƖƖNA joŋ Mʋab tɩŋŋaa sɩ ŋaa ma dʋndɔmɔ a hɛ ma nɩsɩŋ lɛ nɛ.” Ŋɩɩ nɛ ba to ʋ harɩŋ tuu a laa lere-la kala Mʋab tɩŋŋaa fa sɩ jaŋ to a chol Jɔdaŋ fuo-la, ba bɩ leŋe ba nɩbala ma chol.

²⁹ Bʋa-la lɛ ba kpʋ Mʋab tɩŋŋaa a yi nɩaa bʋɩ fii, nɩalɩŋ kala ŋaa nɩduori nɛ, ba bɩ leŋe ba kʋŋkala fori.

³⁰ Tapʋlɩɩ-la Iziral tɩŋŋaa yuo dii Mʋab tɩŋŋaa nɛ, ŋɩɩ nɛ tintee-la fɩɛlɛ laalɩŋ lɛ jɩsɩŋ mahɩŋ banɛsɛ.

Iziral sɩpaalaara Samɩga

³¹ Sɩpaalaarʋ-la ma sɩ kɔ Ehud harɩŋ nɛ Samɩga, Anaf nanʋala. Ʋ ma laa Iziral tɩŋŋaa ta nɛ. Ʋ kɛŋ nɛ-daarɩ-daaŋ a kpʋ Fɩlɩsɩtɩa tɩŋŋaa zɔɔ-balɩdʋ nɛ.