SƖPAALAARAA 18 - WƖA TENIŊ

Daŋ doho nɩaa hɔŋ taŋ-la ba sɩɩ yɩrɛ Las lɛ

¹ Faafaa-la Iziral tɩŋŋaa fa bɩ kuoro kɛnɛ. Bʋa-la lɛ nɛ Daŋ doho nɩaa gɔllɔ chɩchɛ leriŋ ba sɩ jaŋ hɔŋ, bɛɛ wɩaa ba-na fa ha bɩ ba tinteeŋ kpaalɩŋ laa Iziral doho doho-la tʋɔŋ.

² Ŋɩɩ nɛ Daŋ doho nɩalɩŋ tɩŋ laalɩyuori-babiibalaa banɔŋ ba lɩɩ tasɩ-la ba sɩɩ yɩrɛ Zora arɩ Ɛsɩtɔl a mʋ dɩ ba lʋara beŋ tintee kʋbala a na lee-la ba sɩ jaŋ hɔŋ. Nɩaa deemba banɔŋ, nʋʋkala chɩŋ ʋ nyɩŋ-nɩaa nyuŋ nɛ. Ba bʋla pɩba, “Má mʋ a lʋara beŋ tintee-la a na.” Nɩalɩŋ lɩɩ mʋ Efirem tintee-la peelee sɩ yʋga, a mʋ jʋʋ Mɩka dɩa dɩ ba chʋa nɩmɛ.

³ Ba fa sɩ mʋʋ kpagɛ Mɩka dɩa, ba nɩɩ Levi doho nɩaa bapʋɔsɩ-bie-la yikoro. Ba mʋ ʋ teeŋ a pɩɛsʋ, “Kʋbɛɛ nɛ kɛnɩŋ kɔ daha? Bɛɛ kʋŋ nɛ ŋ ŋɩŋaa daha?”

⁴ Ʋ bʋl wɩɩ-la Mɩka sɩ ŋaa pʋ a pɩba. Ʋ sɩ, “Ʋ ŋaa mɩ kpʋkpaarɛ ʋ tɔŋŋɔɔ nɛ, ka ʋ titimmi.”

⁵ Ŋɩɩ nɛ ba bʋla pʋ, “Laa sʋlʋŋ, pɩɛsɛ Wɩa a na la wombiiŋ deeŋ la sɩɩ vɛŋ jaŋ zɔŋ.”

⁶ Tɔŋ-kpaarʋ-la bʋla pɩba, “Má mʋmʋ, wɩɩkala tuo, La TƖƖNA chɩŋ ma harɩŋ nɛ.”

⁷ Ŋɩɩ nɛ baala-la banɔŋ lɩɩ a mʋ taŋ-la ba sɩɩ yɩrɛ Las, a na dɩ nɩalɩŋ sɩ hɛ nɩmɛ hɔnʋŋ zɔmɔ, a nagɛ Sɩdɔŋ tɩŋŋaa sɩ hɔnɔ ta jɩa ŋɩɩ, wɩɩkala bɩ baa walɩmɛ. Ba tinteeŋ fa kɛŋ kɩaa nɛ woruŋ, ba bɩ kʋŋkala chɛɛ ka. Las tɩmma-la fa bɩ Sɩdɔŋ tɩŋŋaa kpaga, ba dɩ nɩa kala ma bɩ dɔŋɔ jɩŋ.

⁸ Ŋɩɩ nɛ baala-la banɔŋ mɩɩra mʋ Zora arɩ Ɛsɩtɔl. Ba naambiiriŋ pɩɛsɛba, “Ɛɛ nɛ ma na wɩaa dɩ ba naga?”

⁹ Nɩalɩŋ banɔŋ-la bʋl, “Má kɔ dɩ la mʋ yuo Las. La sɩ na ba tinteeŋ, ʋ zɔmɔ nɛ woruŋ. Má sɩ́ leŋe la hɔŋ daha pɛɩ. Má sii la mʋ lɩma a yuo laa tintee-la.

¹⁰ Dɩ la nɛ mʋ lee-la, ma jaŋ na ŋɩɩ nɩalɩŋ sɩ hɔnɔ ta jɩa. Ba tintee-la jalɩa nɛ woruŋ, a kɛŋ kʋŋkala nuhuobiine sɩɩ chɛ. Wɩa joŋ tintee-la hɛ la nɩsɩŋ lɛ nɛ.”

¹¹ Ŋɩɩ nɛ Daŋ doho nɩaa laalɩyuoroo zɔɔ-balɩdʋ nyɩgɩlɛ a lɩɩ Zora arɩ Ɛsɩtɔl dɩ ba mʋ yuo laalɩŋ.

¹² Ba sɩɩ mʋ, ba mʋ ŋmoo buguŋ a kpagɛ taŋ-la ba sɩɩ yɩrɛ Kɩrɩaf Jɩarɩm sɩ hɛ Juda tinteeŋ lɛ. Ŋɩɩ nɛ tɩɩ ba kɛŋ Kɩrɩaf Jɩarɩm wɩɩjʋʋlʋŋ dɩɩrɩŋ aa yɩrɛ Daŋ Buguŋ arɩ jɩnɩŋ kala.

¹³ Nɩmɛ nɛ ba lɩɩ a mʋ Efirem tintee-la peelee sɩ yʋga a mʋ kpagɛ Mɩka dɩa.

¹⁴ Ŋɩɩ nɛ nɩalɩŋ banɔŋ fa sɩ mʋ lʋara beŋ Las tintee-la bʋla pɩ ba naambiiri-la sɩ nyɩgɩla dɩ ba yuo laalɩŋ, “Dɩɩsɩŋ deemba dɔŋɔ lɛ, gɛrɩ-laala-daŋɩŋ hɛ nɩmɛ, arɩ tɔmʋŋ ba sɩ kɛŋ daaŋ saa a kɛŋ hɔpʋla taara tɔ a pɛ tɔŋŋɔɔ dɔnsʋŋ lɛ. Lɛɛlɛ ma jɩŋ ŋɩɩ ma sɩ jaŋ ŋaa.”

¹⁵ Ba gɛbɛ jʋʋ Levi doho nɩaa bapʋɔsɩ-bie-la sɩ hɛ Mɩka leriŋ, a chʋɔlʋ.

¹⁶ Daŋ doho nɩaa laalɩyuoro-la zɔɔ-balɩdʋ sɩ nyɩgɩla dɩ ba yuo laalɩŋ, chɩŋ boi-baalɩŋ niiŋ.

¹⁷ Ka nɩalɩŋ banɔŋ fa sɩ mʋ lʋara beŋ tintee-la jʋʋ dɩa tʋɔŋ a joŋ tɔŋ-la ba sɩ saa a kɛŋ hɔpʋla taara tɔ, gɛrɩ-laala-daŋɩɩ-la, arɩ ba tɔŋŋɔɔ dɔnsʋŋ. Baa paa kɩalɩŋ, ka tɔŋ-kpaarʋ-la arɩ laalɩyuoro-la zɔɔ-balɩdʋ chɩŋ boi-baalɩŋ niiŋ.

¹⁸ Nɩalɩŋ sɩ jʋʋ Mɩka dɩa a paa kɩalɩŋ kʋ lɩɩ, ŋɩɩ nɛ tɔŋ-kpaarʋ-la pɩɛsɛba, “Bɛɛ nɛ ma ŋɩŋaa ŋɩɩ?”

¹⁹ Ba bʋla pʋ, “Tɔrɛ ŋ niiŋ! Sɩ́ wɩɩkala bʋl. Kɔ a to la harɩŋ, a ŋaa nɩɩ-la sɩ jaŋ chɩchagɩlɛla arɩ nɩɩ-la sɩ jaŋ kpʋkpaarɛ la tɔŋŋɔɔ. Ʋ jaŋ ŋaa wʋzɔŋ, dɩ ŋ nɩɩ kpaarɛ Iziral doho dɔŋɔ tɔmʋŋ, a kɩɩ ŋ sɩ ŋaa nɩbala tɔŋ-kpaarʋ.”

²⁰ Ŋɩɩ nɛ tɔŋ-kpaarʋ-la tʋɔŋ tɔrɛ. Ʋ joŋ gɛrɩ-laala-daŋɩɩ-la, arɩ tɔŋŋɔɔ dɔnsʋŋ a pɛ tɔŋ-la ba sɩ saa a kɛŋ hɔpʋla taara tɔ a to nɩalɩŋ harɩŋ.

²¹ Daŋ doho nɩalɩŋ kɛsɛ ba hambiisiŋ, pʋsʋŋ arɩ kɩalɩŋ kala ba sɩ kɛnɛ a hɛ sɩpaaŋ a lɩɩ mʋmʋ.

²² Ba sɩ lɩɩ mʋ dɩ-bolii mʋa, Mɩka yɩrɛ nɩalɩŋ sɩ jʋʋ aa kpagʋ a bʋl wɩɩ-la pɩba. Ŋɩɩ nɛ ba lɩɩ kiri ba libe, a mʋ puu Daŋ doho nɩalɩŋ.

²³ Ba sɩ puuba, ba kpɩa ba lɛ. Daŋ doho nɩalɩŋ mɩɩra pɩɛsɛ Mɩka, “Wʋbɛɛ nɛ kɔ, ŋ yɩrɛ ŋ nɩaa ma kɔ dɩ ma yuola?”

²⁴ Ʋ bʋl, “Bɛɛ nɛ tɩɩ ma pɩɛsɛmɛ ŋɩɩ? Ma paa mɩ tɔmɔ-la mɩ sɩ mɛ nɛ, a pɛ kɛŋ nɩɩ-la ma sɩɩ kpaarɛba viviiri. Mɩ bɩra bɩ kʋŋkala kɛnɛ.”

²⁵ Daŋ doho nɩalɩŋ bʋla pɩba, “Sɩ́ la kaa lɩlɛrɛ, dɩ ŋ nɛ leŋe la baanɩŋ sii, la jaŋ kpʋ ŋ dɩ ŋ dɩa nɩaa kala.”

²⁶ Ŋɩɩ nɛ Daŋ doho nɩalɩŋ viviiri. Mɩka ma sɩ na dɩ nɩalɩŋ kɛŋ doluŋ a kɩɩʋ, ʋ ma mɩɩra mʋ dɩa.

²⁷ Ba kɛŋ kɩalɩŋ kala Mɩka sɩ mɛ, arɩ ʋ tɔŋ-kpaarʋ-la, a kaa mʋ Las, dɩ ba yuo nɩalɩŋ sɩ hɔnɔ ta jɩa, wɩɩkala bɩ baa walɩmɛ. Ba mʋ a yuoba, a kpʋba arɩ tokobiee aŋ nyɩgɛ ba jaŋ.

²⁸ Nʋʋkala fa tuo dɩ ʋ laaba ta, bɛɛ wɩaa ba dɩ Sɩdɔŋ tɩŋŋaa fa bɩ dɔŋɔ kpaga, ka ba dɩ nɩa ma kala bɩ dɔŋɔ jɩŋ. Taŋ-la fa hɛ fuonaaŋ tʋɔŋ nɛ a kpagɛ lee-la ba sɩɩ yɩrɛ Bɛf Rehob. Daŋ doho nɩalɩŋ mɩɩra wasa saa taŋ-la a hɔŋ nɩmɛ.

²⁹ Daŋ doho nɩalɩŋ mɩɩra kɛŋ Las yɩyɩrɛ ba naabalɩma Daŋ tinteeŋ. Jekɔb nɛ fa lʋl Daŋ.

³⁰ Daŋ doho nɩalɩŋ joŋ tɔmɔ-la bil nɩmɛ a kpʋkpaarɛ. Levi doho nɩɩ-la nɛ faa kpaarɛ ba tɔmɔ-la. Ʋ yɩrɩŋ nɛ Jonataŋ. Jonataŋ nyɩmma nɛ fa Gesom. Gesom ma nyɩmma nɛ fa Mosis. Jonataŋ arɩ ʋ doho nɩaa nɛ fa ŋaa Wɩɩsʋllɩ sɩpaalaaraa Daŋ doho nɩaa tʋɔŋ, a kaa kɔ bʋa-la lɛ ba dʋndɔŋŋɔɔ sɩ kʋ yuo kɛsɛba viiri.

³¹ Tɔmɔ-la Mɩka fa sɩ mɛ nɛ ba kpʋkpaarɛ, bʋa-la lɛ dɩ lɛbɩ-la lɛ ba sɩɩ dɛnnɛ Wɩa fa hɛ Sɩlɔ lɛ.