SƖPAALAARAA 13 - WƖA TENIŊ

Ba lʋl Samɩsɩŋ

¹ Iziral tɩŋŋaa bɩra ŋaa wʋbɔŋŋɔɔ La TƖƖNA teeŋ, ʋ jomba a hɛ Fɩlɩsɩtɩa tɩŋŋaa nɩsɩŋ lɛ jɩsɩŋ mahɩŋ balɩa.

² Bʋa-la lɛ baal kʋbala nɛ fa hɛ nɩmɛ baa yɩrɛ Manʋa, a lɩɩ taŋ kʋbala baa yɩrɛ Zora. Ʋ fa ŋaa Daŋ doho nʋʋ nɛ. Ʋ haala fa ŋaa hapɩrɩ nɛ a bɩ bii lʋla.

³ La TƖƖNA tɩndaarʋ kʋbala kɛŋ ʋ tɩtɩa kʋ dagɛ haal-la a bʋla pʋ, “Ŋ ŋaa hapɩrɩ nɛ a bɩ bii kɛnɛ, ama ŋ jaŋ kɛŋ luoruŋ a lʋl hambolibie.

⁴ A chɩŋ bʋa deeŋ lɛ a kaa mʋ, pʋpɔ dɩ ŋ sɩ́ tɩɩnɛnɛɛ sɩnɩŋ koo sɩ-yele kala nyʋa, a sɩ́ kʋŋ na-kala sɩ kɛŋ disiniŋ Wɩa teeŋ dii,

⁵ bɛɛ wɩaa ŋ jaŋ kɛŋ luoruŋ a lʋl hambolibie. Ʋ bɩ maga dɩ ba fʋŋ ʋ nyuŋ, bɛɛ wɩaa ŋ jaŋ joŋu hɛ Wɩa nɩsɩŋ lɛ a chɩŋ tapʋlɩɩ-la ŋ sɩ lʋlʋ, dɩ ʋ ŋaa nʋʋ sɩ tɔ nyukii. Ʋ nɛ jaŋ suomo laa Iziral tɩŋŋaa ta Fɩlɩsɩtɩa tɩŋŋaa nɩsɩŋ lɛ.”

⁶ Ŋɩɩ nɛ haal-la mʋ bʋla pɩ ʋ bala, “Wɩa nʋʋ kʋbala nɛ kɔ mɩ teeŋ. Ʋ nagɛ Wɩa tɩndaarʋ nɛ, ʋ nagɩsɩŋ kɛŋ fawʋllʋŋ woruŋ. Mɩ bɩ ʋ pɩɛsa-na lee-la ʋ sɩ lɩa, ʋ ma bɩ ʋ yɩrɩŋ daga pɩmɛ.

⁷ Ama ʋ bʋla pɩmɛ, ‘Ŋ jaŋ kɛŋ luoruŋ a lʋl hambolibie. Ŋɩɩ wɩaa a chɩŋ lɛɛlɛ a kaa mʋ, pʋpɔ ŋ sɩ́ tɩɩnɛnɛɛ sɩnɩŋ koo sɩ-yele kala nyʋa, a sɩ́ kʋŋ na-kala sɩ kɛŋ disiniŋ Wɩa teeŋ ma dii, bɛɛ wɩaa a chɩŋ bile tapʋl-lʋlʋŋ a kaa mʋ ʋ sʋʋŋ, ʋ jaŋ hɛ Wɩa nɩsɩŋ lɛ a ŋaa nyukii tɩɩna.’ ”

⁸ Ŋɩɩ nɛ Manʋa sʋl La TƖƖNA a bʋl, “Mɩ Tɩɩna, mɩɩ sʋlʋŋ, leŋ Wɩa nɩɩ-la ŋ sɩ tɩma ʋ kɔ la teeŋ bɩra kɔ a dagɛla ŋɩɩ la sɩ jaŋ dagɛ bile dɩ la nɛ lʋlʋ.”

⁹ Wɩa nɩɩ Manʋa sʋla. Wɩa tɩndaarʋ-la bɩra mɩɩra kɔ haal-la teeŋ, dɩ ʋ lɩɩ hɔŋ ŋmaŋkaaŋ lɛ, ama ʋ bala na fa tuo nɩmɛ.

¹⁰ Ŋɩɩ nɛ haal-la guu sii fá mʋ bʋla pɩ ʋ bala, “Baal-la sɩ laa sɩpaaŋ a kɛŋ ʋ tɩtɩa kʋ dagɛmɛ tapʋlɩɩ-la bɩra kɔ nɛ.”

¹¹ Manʋa sii to ʋ haala harɩŋ mʋ. Ʋ sɩ mʋ Wɩa tɩndaarʋ-la teeŋ ʋ pɩɛsʋ, “Ŋ nɛ nɩɩ-la tapʋlɩɩ-la sɩ kʋ bʋl wɩaa mɩ haala teeŋ?” Ʋ bʋl, “Mɩ nɛ.”

¹² Ŋɩɩ nɛ Manʋa bɩra pɩɛsʋ, “Dɩ wɩalɩŋ ŋ sɩ bʋla nɛ sɛnɛ kʋ ŋaa, wʋbɛɛ ba nɛ bile jaŋ tuto? Tɩntɩŋ bɛɛ nɛ ʋ jaŋ tɩtɩŋ?”

¹³ La TƖƖNA tɩndaarʋ-la bʋl, “Ŋ haala maga dɩ ʋ to wɩalɩŋ kala mɩ sɩ bʋla pʋ.

¹⁴ Ʋ bɩ maga dɩ ʋ dii girep nɛnɛɛ koo a nyʋa girep nɛnɛɛ sɩnɩŋ koo sɩ-yele kala, a sɩ́ kʋŋ na-kala sɩ kɛŋ disiniŋ Wɩa teeŋ dii. Ʋ maga dɩ ʋ to wɩalɩŋ kala mɩ sɩ dagʋ.”

¹⁵ Manʋa bɩra bʋla pɩ La TƖƖNA tɩndaarʋ-la, “La jaŋ cho dɩ ŋ hɔnɔ dɩ la kɛŋ bʋ-pɔrʋŋ a kpʋ a ŋaa kʋdiilee pɩŋ.”

¹⁶ La TƖƖNA tɩndaarʋ-la bʋl, “Dɩ mɩ nɛ hɔnɔ ma, mɩ bɩ jaŋ dii ma kʋŋkala. Ama dɩ ma nɩɩ chɛ, má kpʋ bʋʋŋ-la a ŋaa kʋnyɩgaa Wɩɩsʋlʋŋ a pɩ La TƖƖNA.” (Manʋa fa bɩ jɩŋ arɩ La TƖƖNA tɩndaara nɛ.)

¹⁷ Ŋɩɩ nɛ Manʋa pɩɛsɛ La TƖƖNA tɩndaarʋ-la, “Ŋ yɩrɩŋ nɛ bɛɛ? Dɩ la wuo ziliŋ, dɩ wɩalɩŋ ŋ sɩ bʋla nɛ kʋ ŋaa wʋtɩtɩɩ.”

¹⁸ Ʋ pɩɛsɛ Manʋa, “Bɛɛ nɛ tɩɩ ŋ pɩɛsɛ mɩ yɩrɩŋ wɩaa? Mɩ yɩrɩŋ kɩɩ ŋ jɩmɩŋ nɛ.”

¹⁹ Ŋɩɩ nɛ Manʋa kɛŋ bʋ-pɔrʋŋ, a pɛ mɩaa Wɩɩsʋlʋŋ lɛ, a ŋaa Wɩɩsʋlʋŋ bʋŋ nyuŋ a pɩ La TƖƖNA. Ŋɩɩ nɛ La TƖƖNA ŋaa wʋkpuŋkpere, ka Manʋa arɩ ʋ haala bibeŋ.

²⁰ Nyiŋ-geliŋ sɩ lɩɩ koruŋ nyuŋ a jɩjɩl wɩa-nyuŋ, La TƖƖNA tɩndaarʋ-la to nyiŋ-gel-la lɛ a jɩl. Manʋa arɩ ʋ haala sɩ na wɩɩŋ deeŋ, ba tuu tel tinteeŋ a chu.

²¹ La TƖƖNA tɩndaarʋ-la bɩra sɩ bɩ ʋ tɩtɩa kaa dagɛ Manʋa arɩ ʋ haala ŋɩɩ, Manʋa jɩŋ arɩ La TƖƖNA tɩndaara nɛ.

²² Ŋɩɩ nɛ Manʋa bʋla pɩ ʋ haala, “La jaŋ sʋʋ, a tɩŋ la sɩ na Wɩa.”

²³ Ama Manʋa haala bʋla pɩ ʋ bala, “Dɩ La TƖƖNA nɛ faa chɛ dɩ ʋ kpʋla, ʋ fa bɩ jaŋ laa la kʋnyɩgaa Wɩɩsʋlʋŋ arɩ la mɩaa Wɩɩsʋlʋŋ, koo a dagɛla wɩaa deemba koo a bʋl wɩaa deemba a pɩla.”

²⁴ Ŋɩɩ harɩŋ lɛ Manʋa haala lʋl hambolibie, a hɛ ʋ yɩrɩŋ Samɩsɩŋ. Ʋ waa, La TƖƖNA pɛ ʋ lɛ.

²⁵ La TƖƖNA Dɩma suomo pʋpʋ doluŋ, dɩ ʋ fa hɛ lee-la ba sɩɩ yɩrɛ Daŋ buguŋ, tasɩ-la ba sɩɩ yɩrɛ Zora arɩ Ɛsɩtɔl pɛgɛ.