SƖPAALAARAA 12 - WƖA TENIŊ

Jɛfɩta arɩ Efirem tɩŋŋaa laalɩyuoroo

¹ Tapʋlɩɩ kʋbala, Efirem doho nɩaa sii a yɩrɛ ba laalɩyuoroo hɛ dɔŋɔ, a chol Jɔdaŋ fuo-la a mʋ lee kʋbala baa yɩrɛ Zafɔŋ a pɩɛsɛ Jɛfɩta, “Bɛɛ nɛ tɩɩ ŋ mʋ yuo Amɔŋ tɩŋŋaa aŋ bɩ la yɩra dɩ la kʋ pɛ ŋ lɛ? La jaŋ nyɩgɛ ŋ dɩa dɩ ʋ dii a tɔ ŋ lɛ.”

² Jɛfɩta bʋl, “Mɩ dɩ mɩ nɩaa fa chaasa kɛŋ Amɔŋ tɩmma-la loo nɛ woruŋ. Mɩ yɩrɛma, ka ma bɩ kʋ laamɛ ta ba nɩsɩŋ lɛ.

³ Mɩ sɩ na dɩ ma bɩ kɔ dɩ ma pɛ mɩ lɛ, mɩ joŋ mɩ mɩɩsɩŋ a yɔɔ sʋʋŋ, a chol Jɔdaŋ fuo-la a yuo Amɔŋ tɩmma-la, La TƖƖNA leŋ mɩ yuo diiba. Bɛɛ nɛ saa tɩɩ jɩnɩŋ ma kɔ dɩ ma yuomi?”

⁴ Ŋɩɩ nɛ aŋ ka Jɛfɩta yɩrɛ Gɩlɩad laalɩyuoroo kala kʋ hɛ dɔŋɔ ba mʋ yuo Efirem tɩŋŋaa laalɩyuoroo. Gɩlɩad tɩmma-la chaasa kpʋ Efirem laalɩyuoroo woruŋ, bɛɛ wɩaa Efirem nɩalɩŋ fa sɩ, “Ma Gɩlɩad tɩŋŋaa ŋaa Efirem arɩ Manasɛ doho nɩaa nɛ, aŋ lɩɩ fá.”

⁵ Gɩlɩad laalɩyuoroo laa lere-la kala Efirem nɩaa sɩ jaŋ wuo to chol Jɔdaŋ fuo-la a mʋ ba tinteeŋ nɛ. Dɩ Efirem tɩmma-la nɩkaana-la kʋŋ nɛ kɔ a bʋl, “Má leŋ dɩ mɩ chol.” Gɩlɩad tɩmma-la yie pɩɛsʋ, “Ŋ ŋaa Efirem tɩɩna nɛɛ?” Dɩ ʋ nɛ sɩ, “Aɩ,”

⁶ ba yie bʋl, “Ʋ zɔmɔ, yɩrɛ ‘Sɩɩbɔlɛf’. Dɩ ʋ nɛ bɩ woruŋ wuo yɩrɛ aŋ bʋl, ‘Sɩbɔlɛf’, ba yie kɛnʋ nɛ a kpʋ lere-la ba sɩ too chol Jɔdaŋ fuo-la.” Bʋa-la lɛ ba kpʋ Efirem tɩmma-la bʋɩ mahɩŋ balɩa arɩ balɩa nɛ.

⁷ Jɛfɩta fa laa Iziral tɩŋŋaa sɩpaaŋ jɩsɩŋ balɩdʋ nɛ. Ŋɩɩ nɛ aŋ sʋʋ, ba hugu ʋ jaŋ Mɩzɩpa sɩ hɛ Gɩlɩad tinteeŋ lɛ.

Iziral tɩŋŋaa sɩpaalaaraa Ɩbɩzaŋ, Ɛlɔŋ arɩ Abɩdɔŋ

⁸ Jɛfɩta sɩ sʋba harɩŋ, Ɩbɩzaŋ sɩ lɩɩ Bɛtɩlɛhɛm ma nɛ fa laa Iziral tɩŋŋaa sɩpaaŋ.

⁹ Ʋ fa lʋl hambolibiisiŋ mara arɩ fii nɛ, hantolibiisiŋ ma mara arɩ fii. Ʋ fa joŋ ʋ tolie-la pɩ baalaa sɩ bɩ ʋ nyɩŋ-nɩaa ŋaa nɛ ba jaa. Ka ʋ hambolibiisi-la ma, ʋ jaa hantolibiisiŋ mara arɩ fii sɩ bɩ ʋ nyɩŋ-nɩaa ŋaa a pɩba. Ɩbɩzaŋ ma fa laa Iziral tɩŋŋaa sɩpaaŋ jɩsɩŋ balɩpɛ nɛ.

¹⁰ Ŋɩɩ nɛ Ɩbɩzaŋ sʋʋ ba hugu Bɛtɩlɛhɛm lɛ.

¹¹ Ɩbɩzaŋ ma sʋʋŋ harɩŋ, Zebuluŋ tɩŋŋaa Ɛlɔŋ ma nɛ bɩra laa Iziral tɩŋŋaa sɩpaaŋ jɩsɩŋ fii.

¹² Ŋɩɩ nɛ Ɛlɔŋ ma sʋʋ, ba hugu taŋ-la ba sɩɩ yɩrɛ Aɩjalɔŋ sɩ hɛ Zebuluŋ tinteeŋ lɛ.

¹³ Ɛlɔŋ ma sʋʋŋ harɩŋ, Hɩlɛl nanʋala Abɩdɔŋ sɩ lɩɩ taŋ-la ba sɩɩ yɩrɛ Pɩratɔŋ ma nɛ laa Iziral tɩŋŋaa sɩpaaŋ.

¹⁴ Abɩdɔŋ ma fa lʋl hambolibiisiŋ mahɩŋ balɩa nɛ. Ʋ nihee sɩ ŋaa hambolibiisiŋ ma mara arɩ fii. Ba kakusuŋ ma fa ŋaa mahɩŋ batori arɩ fii nɛ ba jɩjɩl. Ʋ fa laa Iziral tɩŋŋaa sɩpaaŋ jɩsɩŋ chori nɛ.

¹⁵ Ŋɩɩ nɛ Hɩlɛl nanʋala Abɩdɔŋ ma sʋʋ, ba hugu Pɩratɔŋ sɩ hɛ Efirem tintee-la peelee sɩ yʋga lɛ. Nɩmɛ nɛ Amalɛk tɩŋŋaa fa hɛ.