SƖPAALAARAA 11 - WƖA TENIŊ

Iziral tɩŋŋaa sɩpaalaara Jɛfɩta

¹ Gɩlɩad tɩɩna kʋbala ma nɛ fa hɛ nɩmɛ, baa yɩrɛ Jɛfɩta. Ʋ fa ŋaa laalɩyuori-babiibal nɛ. Ʋ nyɩmma yɩrɩŋ nɛ Gɩlɩad, ʋ naaŋ fa ŋaa hachɔrʋŋ nɛ.

² Gɩlɩad haala tɩtɩa ma fa lʋl hambolibiisiŋ nɛ a pʋ. Ba sɩ waa, ba kiri Jɛfɩta ta, aŋ bʋla pʋ, “Ŋ bɩ maga dɩ ŋ pɛ dii la dɩa dʋa, bɛɛ wɩaa ŋ ŋaa ha-wogo bii nɛ.”

³ Ŋɩɩ nɛ Jɛfɩta lɩɩ ʋ naambiiri-la leriŋ a mʋ hɔŋ Tob tinteeŋ. Nɩmɛ nɛ nɩtɔɔnʋŋ kʋ hɛ dɔŋɔ a ŋaa ʋ harɩ-tooroo.

⁴ Ʋ ŋɩɩ harɩŋ lɛ, Amɔŋ tɩŋŋaa kɔ a yuyuo Iziral tɩŋŋaa.

⁵ Gɩlɩad nɩhɩasɩŋ sii mʋ dɩ ba kɛŋ Jɛfɩta Tob tinteeŋ a kɔ.

⁶ Ba bʋla pʋ, “Kʋ laa la sɩpaaŋ dɩ la mʋ yuo Amɔŋ tɩŋŋaa.”

⁷ Jɛfɩta pɩɛsɛba, “Ma sɩ bɩ mɩ cho dee bɩ tɩɩ ma kirimi ta mɩ nyɩmma dɩa lɛɛ? Bɛɛ nɛ tɩɩ wɩaa jʋʋma lɛɛlɛ ma chɩchɛ mɩ leriŋ?”

⁸ Gɩlɩad nɩhɩasɩ-la bɩra bʋl, “La mɩɩra kɔ ŋ teeŋ nɛ lɛɛlɛ, dɩ ŋ kɔ la mʋ yuo Amɔŋ tɩmma-la, ka dɩ ŋ ŋaa la nɩalɩŋ kala sɩ hɛ Gɩlɩad tinteeŋ lɛ nɩhɩaŋ.”

⁹ Ŋɩɩ nɛ Jɛfɩta bɩra pɩɛsɛ, “Dɩ ma nɛ kɛmmɛ mɩɩra mʋ dɩ la yuo Amɔŋ tɩŋŋaa, dɩ La TƖƖNA nɛ jomba hɛ mɩ nɩsɩŋ lɛ, mɩ sɛnɛ jaŋ ŋaa ma tinteeŋ nɩhɩaŋ a bibemmaa?”

¹⁰ Gɩlɩad nɩhɩasɩ-la bʋl, “La TƖƖNA nɛ pɛ na wɩɩŋ deeŋ, wɩɩ-la kala ŋ sɩ bʋla, la sɛnɛ jaŋ ŋaa.”

¹¹ Jɛfɩta to Gɩlɩad nɩhɩasɩ-la harɩŋ ba mʋ, nɩalɩŋ leŋ ʋ ŋaa ba nɩhɩaŋ arɩ ba laalɩyuori-hɩaŋ. Wɩalɩŋ ʋ fa sɩ bʋla, ʋ bɩra wasa bʋl ba tɩtɩa La TƖƖNA sɩpaaŋ taŋ-la ba sɩɩ yɩrɛ Mɩzɩpa lɛ.

¹² Ŋɩɩ nɛ Jɛfɩta tɩŋ tɩndaaraa ba mʋ pɩɛsɛ Amɔŋ tɩŋŋaa kuoro: “Bɛɛ kʋŋ yuosi nɛ hɛ la pɛgɛ, ŋ kʋ yuola?”

¹³ Amɔŋ kuoro bʋla pɩ nɩalɩŋ Jɛfɩta sɩ tɩma, “Bʋa-la lɛ Iziral tɩŋŋaa sɩ lɩɩ Ijipiti tinteeŋ lɛ, ba laa mɩ tinteeŋ nɛ, a chɩŋ Anɔŋ fuo-la a kaa mʋ Jabɔk fuo-la, a kɛŋ ŋɩɩ kala a mʋ yi Jɔdaŋ fuo-la. Má joŋ tintee-la tɩa sɔm.”

¹⁴ Jɛfɩta bɩra mɩɩra tɩŋ tɩndaaraa ba mʋ Amɔŋ tɩŋŋaa kuoro teeŋ

¹⁵ a bʋl, “Wɩɩ-la Jɛfɩta sɩ bʋla nɛ ŋ-la: Iziral tɩŋŋaa bɩ Mʋab tinteeŋ koo Amɔŋ tɩŋŋaa tinteeŋ laa.

¹⁶ Ba sɩ lɩɩ Ijipiti tinteeŋ lɛ, ba to tintee-hɩlɩŋ tʋɔŋ nɛ a mʋ to Mʋgʋ-fɩaŋ a mʋ Kadɛs.

¹⁷ Ŋɩɩ nɛ Iziral tɩŋŋaa tɩŋ tɩndaaraa ba mʋ sʋl Ɛdɔm kuoro a bʋl, ‘Pɩla wombiiŋ dɩ la to ŋ tinteeŋ a lɩɩ.’ Ama Ɛdɔm kuoro bɩ jegile nɩɩ. Ba bɩra tɩŋ tɩndaaraa ba mʋ Mʋab kuoro ma teeŋ, ʋ ma bɩra vɩa. Ŋɩɩ nɛ Iziral tɩŋŋaa hɔŋ Kadɛs lɛ,

¹⁸ a bɩra sii to tintee-hɩlɩɩ-la tʋɔŋ a kpɛrɛ Ɛdɔm arɩ Mʋab tinteeŋ, a joŋ ŋɩɩ mʋ Mʋab tinteeŋ wɩɩpɔsʋŋ dɩɩrɩŋ, a mʋ ŋmoo buguŋ Anɔŋ fuo-la sɛmɛ. Ba bɩ Mʋab tinteeŋ jʋa, bɛɛ wɩaa Anɔŋ fuo-la nɛ fa ŋaa ʋ bʋa.

¹⁹ Ŋɩɩ nɛ Iziral tɩŋŋaa tɩŋ tɩndaaraa ba mʋ bʋla pɩ Amɔrɩ tɩŋŋaa kuoro Sɩhɔŋ sɩ hɛ Hɛsɩbɔŋ lɛ aŋ bibemba, ‘Leŋ dɩ la to ŋ tinteeŋ tʋɔŋ a lɩɩ a mʋ la leriŋ.’

²⁰ Sɩhɔŋ ma fa bɩ Iziral tɩŋŋaa laa dii arɩ ba sɩ jaŋ to ʋ tinteeŋ bal. Ʋ sii kɛŋ ʋ laalɩyuoroo kala hɛ dɔŋɔ ba ŋmoo buguŋ taŋ-la ba sɩɩ yɩrɛ Jahas lɛ, a yuo Iziral tɩŋŋaa.

²¹ Ŋɩɩ nɛ La TƖƖNA, Iziral tɩŋŋaa Wɩa joŋ Sɩhɔŋ arɩ ʋ laalɩyuoroo kala hɛ Iziral tɩŋŋaa nɩsɩŋ lɛ, ba yuo diiba, aŋ laa Amɔrɩ tɩŋŋaa tintee-la kala lɛ ba sɩ hɔnɔ,

²² a chɩŋ Anɔŋ fuo-la a kaa mʋ Jabɔk fuo-la, a lɩɩ nɩmɛ a kaa mʋ tintee-hɩlɩŋ a kɛŋ ŋɩɩ mʋ yi Jɔdaŋ fuo-la.

²³ La TƖƖNA, Iziral tɩŋŋaa Wɩa, sɩ folo kiri Amɔrɩ tɩŋŋaa ta ʋ nɩaa Iziral tɩŋŋaa sɩpaaŋ, bɛɛ wombii nɛ ŋ kɛŋ dɩ ŋ laa tintee-la la teeŋ?

²⁴ Ma vene-la ba sɩɩ yɩrɛ Kɛmɔs sɩ joŋ kʋ-la pɩma nɛ jaŋ ŋaa ma kʋa. Ŋɩɩ tɩtɩa nɛ la ma jaŋ tɩɩ kʋŋ na-kala La TƖƖNA Wɩa sɩ joŋo pɩla.

²⁵ Ŋ kpɩa Mʋab kuoro Zipo nanʋala Balak nɛɛ? Ʋ ha kɛŋ Iziral tɩŋŋaa yuo yuosuŋ koo a kɛmba yuo laalɩŋ ŋ naa?

²⁶ Jɩsɩŋ zɔɔ-batori nɛ Iziral tɩŋŋaa hɔŋ Hɛsɩbɔŋ lɛ, arɩ Arʋa, arɩ tabiisi-la sɩ gollo chu arɩ tabala-la kala sɩ chɩŋ ŋɩɩ a kaa mʋ yi Anɔŋ fuo-la. Bɛɛ nɛ tɩɩ ŋ bɩ tintee-la laa bʋa-la lɛ?

²⁷ Mɩ bɩ wɩɩkala ŋaa a cheyiŋ, ama ŋ-na nɩɩ ŋaamɛ wʋbɔŋ ŋ sɩ kɛmmɛ yuyuo laalɩŋ. La TƖƖNA nɛ ŋaa sarɩya diire, ʋ jaŋ laa wɩɩŋ deeŋ sɩ hɛ Iziral tɩŋŋaa arɩ Amɔŋ tɩŋŋaa pɛgɛ a jɩma pɩba jɩnɩŋ.”

²⁸ Ama Amɔŋ kuoro bɩ jegile nɩɩ tɩndaarɩ-la Jɛfɩta sɩ tɩma pʋ.

²⁹ Ŋɩɩ nɛ La TƖƖNA Dɩma kʋ jʋʋ Jɛfɩta. Ʋ sii chol Gɩlɩad tinteeŋ arɩ Manasɛ tinteeŋ, a kiele mʋ Mɩzɩpa sɩ hɛ Gɩlɩad lɛ, a lɩɩ nɩmɛ a mʋ dɩ ʋ yuo Amɔŋ tɩmma-la.

³⁰ Ŋɩɩ nɛ ʋ ta niiŋ La TƖƖNA teeŋ: “Dɩ ŋ nɛ leŋe mɩ yuo dii Amɔŋ tɩŋŋaa,

³¹ kʋŋ na-kala sɩ laa sɩpaaŋ lɩɩ mɩ dɩa lɛ a kʋ lɩɩ chemmi, ʋ jaŋ ŋaa ŋ-na La TƖƖNA kʋŋ, mɩ sɩ jaŋ kpʋ a kaa sʋl kʋnyɩgaa Wɩɩsʋlʋŋ a pɩŋ.”

³² Ŋɩɩ nɛ Jɛfɩta mʋ dɩ ʋ yuo Amɔŋ tɩmma-la. La TƖƖNA jomba hɛ ʋ nɩsɩŋ lɛ.

³³ Ʋ chei tasɩŋ mara, a chɩŋ taŋ-la ba sɩɩ yɩrɛ Arʋa lɛ a kaa mʋ kpagɛ tabal-la ba sɩɩ yɩrɛ Mɩnɩf, a kɛŋ ŋɩɩ mʋ yi Abɛl Kɛramɩm. Ʋ ŋɩɩ harɩŋ nɛ, Amɔŋ tɩŋŋaa bɩra bɩ wuo yuo Iziral tɩŋŋaa.

³⁴ Jɛfɩta sɩ mɩɩra kʋkɔ ʋ jaŋ Mɩzɩpa, nʋʋ sɩ laa sɩpaaŋ kʋ lɩɩ chemu nɛ ŋaa ʋ tolo. Ʋ fa chɩgɩsɛ chɩnchɩga nɛ aŋ gʋgʋa a tɩŋ ʋ nyɩmma sɩ yuo laalɩŋ dii. Jɛfɩta bie kala nɛ fa ŋɩɩ.

³⁵ Jɛfɩta sɩ naʋ, ʋ tʋɔŋ chei ʋ kɛŋ ʋ gɛnnɩŋ kɩɛsɛ aŋ ŋmoo niiŋ a bʋl, “Ou! Mɩ tolo! Ŋ kaa jʋʋ mɩ lɛ, mɩ tʋɔŋ faasa chei nɛ, bɛɛ wɩaa mɩ ta niiŋ nɛ La TƖƖNA teeŋ, mɩ bɩ jaŋ wuo vɩa nii-la lɩɩsɩŋ.”

³⁶ Tolo-la bʋl, “Mɩ nyɩmma, dɩ ŋ nɛ ta niiŋ La TƖƖNA teeŋ, kɛmmɛ ŋaa wɩɩ-la kala ŋ sɩ ta nii-la bʋl. La TƖƖNA folo leŋ ŋ yuo dii ŋ dʋndɔŋŋɔɔ Amɔŋ tɩŋŋaa nɛ.

³⁷ Ama mɩɩ sʋlʋŋ, ŋaa wɩɩŋ deeŋ pɩmɛ: Pɩmɛ chɛnsɩŋ balɩa dɩ mɩ dɩ mɩ tanlɔsʋŋ gɔllɛ peelee nyuŋ a yel, a tɩŋ mɩ sɩ bɩ jaŋ jaa bala wɩaa.”

³⁸ Ʋ nyɩmma bʋl, “Ŋ jaŋ wuo mʋ,” aŋ pʋ chɛnsɩ-la balɩa. Ʋ dɩ ʋ tanlɔsʋ-la gɔllɛ peelee nyuŋ a yel, a tɩŋ ʋ sɩ bɩ jaŋ jaa bala wɩaa.

³⁹ Chɛnsɩ-la balɩa sɩ bala, ʋ mɩɩra kɔ ʋ nyɩmma teeŋ ʋ kɛnʋ ŋaa ŋɩɩ ʋ sɩ ta nii-la a bʋl, dɩ ʋ ha ŋaa hapuŋ. A chɩŋ ŋɩɩ lɛ nɛ wɩɩ-la ŋaa Iziral tɩŋŋaa naaba wɩɩ.

⁴⁰ Jɩna na-kala Iziral tɩŋŋaa hantolibiisiŋ yie lɩɩ gɔllɔ yel tapʋlaa banɛsɛ, a liliisi Gɩlɩad tɩŋŋaa Jɛfɩta tolo-la wɩaa.