RUF 4 - WƖA TENIŊ

Bʋas jaa Ruf

¹ Ŋɩɩ nɛ Bʋas mʋ hɔŋ ba taŋ-la boiŋ niiŋ, lee-la ba sɩɩ hilimu, dɩ Ɛlɩmɛlɛk naambile wɩaa Bʋas sɩ bʋla kʋʋ bal. Bʋas yɩrʋ, “Nandɔŋ, kʋ hɔŋ daha.” Ŋɩɩ nɛ ʋ mʋ a hɔŋ.

² Bʋas yɩrɛ taŋ-la nɩhɩasɩŋ fii ba kʋ pɛ ba lɛ. Ŋɩɩ nɛ ʋ bʋl, “Ma ma hɔŋ daha.” Ŋɩɩ nɛ ba hɔŋ.

³ Ba sɩ kʋ hɔnɔ dɛrɛ, ŋɩɩ nɛ Bʋas bʋla pɩ ʋ naambile sɩ maga dɩ ʋ dii Ɛlɩmɛlɛk dʋa, “Nawomi sɩ lɩɩ Mʋab tinteeŋ kɔ, ka chɛ dɩ ʋ yallɛ la naambie Ɛlɩmɛlɛk ŋmaŋkaaŋ nɛ.

⁴ Mɩɩ chɛ dɩ ŋ jɩŋ wɩɩŋ deeŋ lɛ nɛ, dɩ ŋ nɩɩ chɛ ŋmaŋkaa-la, laa yɔɔ nɩhɩasɩŋ deemba kala sɩ hɔŋ daha sɩpaaŋ dɩ ba na. Dɩ ŋ nɛ bɩra bɩ chɛ ma, leŋ dɩ mɩ jɩŋ. Bɛɛ wɩaa ŋ nɛ maga ŋ yɔɔ ŋmaŋkaaŋ deeŋ, a lɩɩ ŋ harɩŋ mɩ ma nɛ tɩga.” Ŋɩɩ nɛ baal-la bʋl, “Mɩ jaŋ yɔɔ.”

⁵ Bʋas sɩ, “Ŋ wasa nɛ, ta jɩŋ, dɩ ŋ nɛ yɔɔ ŋmaŋkaa-la Nawomi teeŋ, ŋɩɩ daga arɩ ŋ nɛ tɩɩ Ruf ma, Mʋab tɩŋŋaa tolo-la bala sɩ sʋba, dɩ ŋmaŋkaa-la hɛ nɩsʋʋ-la dɩa nɩaa nɩsɩŋ lɛ.”

⁶ Ŋɩɩ nɛ baal-la bʋl, “Dɩ ŋɩɩ-na nɛ mɩ bɩ jaŋ yɔɔ ŋmaŋkaa-la, bɛɛ wɩaa, ŋɩɩ daga dɩ mɩ nɛ sʋba, mɩ biiriŋ bɩ ŋmaŋkaa-la wuo tɩɩ. Laa yɔɔ, mɩ-na bɩ jaŋ wuo.”

⁷ Faafaa-la Iziral tɩŋŋaa naabarɩŋ lɛ, dɩ nʋʋ nɛ maga dɩ ʋ yɔɔ nɩsʋʋŋ kɩaa aŋ vɩa ka nʋʋ dɔŋ laa yʋyɔɔ, nɩɩ-la sɩ vɩa maga dɩ ʋ chaarɛ ʋ nɛntɛŋŋɛɛ pɩ nɩɩ-la sɩ laa yʋyɔɔ nɛ. Dɩ ʋ nɛ ŋaa ŋɩɩ, wɩɩ-la wasa nɛ ŋɩɩ.

⁸ Ŋɩɩ nɛ baal-la bʋla pɩ Bʋas, “Ŋ tɩtɩa laa ŋmaŋkaa-la yɔɔ,” aŋ chaarɛ ʋ nɛntɛŋŋɛɛ pɩ Bʋas.

⁹ Ŋɩɩ nɛ Bʋas bʋla pɩ nɩhɩasɩ-la arɩ nɩalɩŋ kala fa sɩ hɛ nɩmɛ, “Jɩnɩŋ ma kala pɛ na nɛ arɩ mɩ nɛ yɔɔ Ɛlɩmɛlɛk arɩ ʋ biiriŋ Kilioŋ arɩ Malɔŋ dʋa kala Nawomi teeŋ.

¹⁰ A lɩɩ ŋɩɩ harɩŋ, Ruf, Mʋab tɩŋŋaa tolo-la Malɔŋ fa sɩ jaa, ma lɛɛlɛ ŋaa mɩ haala nɛ. Ŋɩɩ nɛ jaŋ leŋ dɩ nɩsʋʋ-la yɩrɩŋ sɩ́ lɛl ʋ nɩaa tʋɔŋ, dɩ ʋ dʋa ma hɛ ba nɩsɩŋ lɛ. Jɩnɩŋ ma ŋaa pɛ-naara nɛ wɩɩŋ deeŋ lɛ.”

¹¹ Ŋɩɩ nɛ nɩhɩasɩ-la arɩ nɩalɩŋ kala sɩ hilimi taŋ-la boi-baalɩŋ niiŋ bʋl, “Oo, la pɛ na nɛ, La TƖƖNA jaŋ pɛ ŋ haal-la lɛ dɩ ʋ nagɛ Rakɛl arɩ Liya sɩ lʋl biiriŋ yʋgɛ ŋɩɩ a pɩ Jekɔb doho nɩaa. Wɩa jaŋ leŋ dɩ ŋ kɛŋ yɩrɩŋ Ɛfɩraf doho nɩaa tʋɔŋ a ŋaa nɩbal Bɛtɩlɛhɛm lɛ.

¹² La TƖƖNA jaŋ leŋ dɩ biiri-la tol-bie deeŋ sɩ jaŋ lʋla pɩŋ nagɛ Pɛrɛs, bile Tama sɩ lʋla pɩ Juda.”

¹³ Ŋɩɩ nɛ Bʋas jaa Ruf ba pɛ bɔsɔ, La TƖƖNA pɛ Ruf lɛ ʋ kɛŋ luoruŋ a lʋl hambolibie.

¹⁴ Ŋɩɩ nɛ haalaa bʋla pɩ Nawomi, “Dɛnnɛ La TƖƖNA, jɩnɩŋ ʋ pɩŋ nihiŋ nɛ dɩ ʋ beniŋ. Wɩa jaŋ leŋ dɩ bie deeŋ kɛŋ yɩrɩŋ Iziral tinteeŋ lɛ.

¹⁵ Ŋ bii-haala choŋ nɛ, ʋ paala kɩɩ hambolibiisiŋ balɩpɛ. Lɛɛlɛ ʋ lʋl nihiŋ sɩ jaŋ leŋ dɩ wɩaa bɩra zɔmɔ pɩŋ nɛ ŋ mɩɩsɩŋ lɛ, dɩ ŋ nɛ kʋ hɩɛsɛ ma ʋ jaŋ bibeniŋ.”

¹⁶ Ŋɩɩ nɛ Nawomi joŋ bile hɛ ʋ naasɩŋ lɛ, a bibeŋ ʋ nyuŋ woruŋ.

¹⁷ Haala-la sɩ hɛ lee-la hɛ bile yɩrɩŋ Ɔbɛd, aŋ bʋla pɩ nʋʋkala arɩ ba lʋl hambolibie nɛ a pɩ Nawomi. Ɔbɛd nɛ sii lʋl Jesi, Jesi ma lʋl Devit.

¹⁸ Pɛrɛs doho nɩaa nɛ ŋ-la: Pɛrɛs nɛ lʋl Hɛzɩrɔŋ.

¹⁹ Hɛzɩrɔŋ ma nɛ lʋl Ram. Ram ma nɛ lʋl Amɩnadab.

²⁰ Amɩnadab ma lʋl Nasɔŋ. Nasɔŋ ma nɛ lʋl Salɩmɔŋ.

²¹ Salɩmɔŋ ma nɛ lʋl Bʋas. Bʋas ma nɛ lʋl Ɔbɛd.

²² Ɔbɛd ma nɛ lʋl Jesi. Jesi ma nɛ lʋl Devit.