RUF 2 - WƖA TENIŊ

Ruf kuuni kɩaa Bʋas baga lɛ

¹ Nawomi bala Ɛlɩmɛlɛk dɩa nɩaa tʋɔŋ, baal kʋbala nɛ fa hɛ nɩmɛ, ʋ yɩrɩŋ nɛ Bʋas, a kɛŋ kɩaa woruŋ a ŋaa nɩbal.

² Tapʋlɩɩ kʋbala Ruf bʋla pɩ Nawomi, “Mɩ jaŋ mʋ baga kuuni kʋdiilee, mɩ jɩma nʋʋ jaŋ fá mɩ nenige aŋ leŋ dɩ mɩ pɛ tɩŋ.” Nawomi sɩ, “Mɩ tolo, ʋ zɔmɔ, mʋ.”

³ Ŋɩɩ nɛ Ruf sii mʋ baga, a tuto tɩntɩnnaa harɩŋ a kukuuni kɩaa. Ruf kʋ jɩŋ arɩ baga-la lɛ ʋ sɩɩ kuuni kɩaa ŋaa Bʋas baga nɛ. Bʋas fa ŋaa Ɛlɩmɛlɛk dɩa nʋʋ nɛ.

⁴ Ʋ bɩ diene dɩ Bʋas lɩɩ Bɛtɩlɛhɛm kɔ, a chʋɔlɛ tɩntɩnna-la aŋ bʋl, “La TƖƖNA Wɩa jaŋ hɛ ma teeŋ.” Ba ma bʋl, “La TƖƖNA jaŋ pɛ ŋ lɛ.”

⁵ Ŋɩɩ nɛ Bʋas pɩɛsɛ ʋ tɩntɩnnɩ-hɩaŋ, “Hantolibii bɛɛ nɛ ŋ-la?”

⁶ Ŋɩɩ nɛ ʋ tɩntɩnnɩ-hɩaŋ-la bʋl, “Mʋab tɩŋŋaa tolo-la sɩ to Nawomi harɩŋ kɔ nɛ ŋɩɩ.

⁷ Ʋ sʋlmɛ nɛ dɩ mɩ leŋ dɩ ʋ to la harɩŋ a kukuuni kɩalɩŋ la sɩ gɛllɛ ta. Chʋchʋɔŋ kala nɛ ʋ kukuuni kɩaa, lɛɛlɛ nɛ ʋ hɔŋ la lɛbɩŋ lɛ dɩ ʋ wiesi mʋa.”

⁸ Ŋɩɩ nɛ Bʋas bʋla pɩ Ruf, “Mɩ tolo, jegile nɩɩ, sɩ nʋʋkala baga mʋ kuuni kɩaa, hɛ baga deeŋ lɛ, a kpagɛ haala-la sɩ tɩma pɩpɩmɛ.

⁹ Mʋ kuuni kɩaa lee-la baala-la sɩɩ tɩŋ, mɩ bʋla pɩba, dɩ ba sɩ́ ŋ walɩmʋ nɛ ka dɩ ŋ to haala-la harɩŋ dɩ ma kala tɩtɩŋ. Dɩ lɩɩnyʋasʋŋ nɛ kɛnɩŋ, mʋ nyʋa loŋ-la lɛ ba sɩɩ nyʋa.”

¹⁰ Ruf sɩ nɩɩ wɩɩŋ deeŋ, ʋ tuu kpirimi Bʋas sɩpaaŋ aŋ bʋl, “Bɛɛ nɛ tɩɩ mɩ wɩaa faasa chɩlɩŋ ŋ-la? Bɛɛ nɛ tɩɩ ŋ kɛŋ zile mɩ ma nʋhʋɔra deeŋ teeŋ?”

¹¹ Ŋɩɩ nɛ Bʋas bɩra bʋla pʋ, “Mɩ nɩɩ wɩalɩŋ kala ŋ sɩ ŋaa pɩ ŋ bala naaŋ nɛ, ŋ bala sʋʋŋ harɩŋ. Mɩ nɩɩ ŋɩɩ ŋ sɩ leŋ ŋ nyɩmma arɩ ŋ naaŋ arɩ ŋ jaŋ aŋ kɔ dɩ ŋ hɛ nɩaa teeŋ ŋ ha sɩ bɩ jɩŋ.

¹² La TƖƖNA jaŋ timiŋ a tɩŋ wɩalɩŋ kala ŋ sɩ ŋaa lɛ. A leŋ dɩ La TƖƖNA, Iziral tɩŋŋaa Wɩa teeŋ ŋ sɩ kɔ dɩ ʋ pɔŋ, faasa timiŋ yʋgɛ.”

¹³ Ŋɩɩ nɛ Ruf bʋl, “Mɩ nɩhɩaŋ, ŋ zilmi kɩŋkɛŋ nɛ a leŋ mɩ yaraa faasa fɩɛlɛ, a tɩŋ ŋ sɩ fɩɛla bʋl wɩaa mɩ teeŋ. Mɩ paala bɩ mɩ tɩtɩa wuo kaa magɩsɛ ŋ tɩntɩnnɩ-haala-la kʋbala ma.”

¹⁴ Bʋa-la sɩ yie dɩ ba dii kʋdiilee, Bʋas yɩrɛ Ruf, “Kʋ laa kʋdiilee a kaa yuu sɩ-nyalɩŋ a dii.” Ŋɩɩ nɛ ʋ kɔ ʋ dɩ tɩntɩnna-la hɔŋ, Bʋas joŋ mɩɩ-halaa pʋ, ʋ dii a vɔgɛ aŋ ka.

¹⁵ Ʋ sɩ sie dɩ ʋ bɩra kuuni kɩaa, Bʋas bʋla pɩ baala-la sɩɩ tɩŋ baga-la lɛ, “Má leŋ dɩ ʋ to a kukuuni pugulo-la ma tʋɔŋ, má sɩ́ leŋe dɩ hɩɩsɩŋ kɛnʋ.

¹⁶ Má gɛllɛ dɔnsʋŋ ta dɩ ʋ kuuni, má sɩ́ ʋ kiru.”

¹⁷ Ŋɩɩ nɛ Ruf kuuni kɩalɩŋ baga-la lɛ ŋɩɩ deeŋ deeŋ wɩa tuu jʋʋ. Ʋ sɩ ŋmoo mɩa-la ʋ sɩ kuuno, ʋ na kuokuo-gbansɩŋ banɔŋ nɛ.

¹⁸ Ʋ kaa mʋ dɩa a kaa dagɛ ʋ bala naaŋ ŋɩɩ ʋ sɩ kuuni kɩaa magɛ, aŋ pɛ joŋ kʋdii-kaana-la ʋ sɩ die aŋ ka pʋ.

¹⁹ Ŋɩɩ nɛ Nawomi pɩɛsɛ Ruf, “Nɩɩ nɛ ŋ mʋ a kuuni kɩaa magɛ ŋ-la? Kʋbɛɛ baga lɛ nɛ ŋ mʋ kuuni? Wɩa jaŋ pɛ baal-la sɩ cho ŋ wɩaa a pɩŋ kɩaa magɛ ŋ-la.” Ŋɩɩ nɛ Ruf bʋla pɩ Nawomi arɩ nɩɩ-la baga lɛ ʋ sɩ mʋ kuuni kɩaa yɩrɩŋ nɛ Bʋas.

²⁰ Ŋɩɩ nɛ Nawomi bʋl, “La TƖƖNA nɩɩ beŋ nɩweyee arɩ nɩsʋʋnʋŋ kala, ʋ jaŋ pɛ Bʋas lɛ. Bʋas ŋaa mɩ bala naambii nɛ. Ʋ nɛ ŋaa nɩalɩŋ dɔŋɔ fa sɩ maga dɩ ʋ bibenla.”

²¹ Ruf, Mʋab tɩŋŋaa tolo-la, bɩra bʋla pɩ Nawomi, “Ʋ sɩ́ dɩ mɩ pɛ tɩtɩŋ baga-la tɩntɩŋŋaa nɛ dɩ ba mʋ dɛrɛ.”

²² Ŋɩɩ nɛ Nawomi bʋl, “Mɩ tolo, ʋ jaŋ ŋaa wʋzɔŋ dɩ ŋ nɛ pɛ haala-la sɩ tɩmaa pʋ lɛ dɩ ma tɩtɩŋ, bɛɛ wɩaa dɩ ŋ nɛ mʋ nʋʋ dɔŋ baga, ba jaŋ wuo ŋaaŋ wʋbɔŋ.”

²³ Ruf pɛ haala-la sɩ tɩmaa pɩ Bʋas lɛ a kuuni kɩaa ŋɩɩ deeŋ deeŋ ba mʋ kʋŋ mɛmpɛ-la arɩ mɩa-la dɛrɛ. Ka ba dɩ ʋ bala naaŋ ha jʋjʋʋ.