Rom Tɩŋŋaa 9 - WƖA TENIŊ

Wɩa fa lɩɩsɛ Iziral tɩŋŋaa dɩ ba ŋaa ʋ nɩaa

¹ Mɩ sɩɩ chɛ dɩ mɩ bʋl wɩɩ-la ŋaa wʋtɩtɩɩ nɛ. Mɩ sɩ ŋaa Kirisito nʋʋ ŋɩɩ, mɩ bɩ wɩaa nyɩɛ. Wɩa Dɩŋ-zɔŋ-la sɩɩ beŋ mɩ tʋɔbɩɩnaa ŋɩɩ, ʋ ma leŋe mɩ jɩŋ arɩ mɩ bɩ wɩaa ka nyɩɛ.

² Mɩ tʋɔŋ faasa chei nɛ a tɩŋ mɩ tɩtɩa nɩaa wɩaa. Ʋʋ walɩmɛmɛ kɩŋkɛŋ kɩŋkɛŋ.

³ Mɩ fa cho dɩ Wɩa ŋmɩɛsa hɛ mɩ lɛ nɛ a kɛmmɛ pɔrɛ Kirisito lɛ, aŋ laa mɩ naambiiriŋ arɩ mɩ doho nɩaa kala ta.

⁴ Ba nɛ Iziral tɩŋŋaa, nɩalɩŋ Wɩa sɩ lɩɩsa. Wɩa leŋe ba nɛ ŋaa ʋ biiriŋ ʋ kɛŋ ʋ tʋla dagɛba. Wɩa bil niiŋ ʋ dɩ ba pɛgɛ, a leŋ Mosis ŋmʋnsɛ wɩaa pɩba dɩ ba tuto, a dagɛba Wɩa chʋɔlʋŋ wombiiŋ, a bʋl dɩ ʋ jaŋ ŋaa wɩaa pɩpɩba.

⁵ Ba nɛ ŋaa la naabalɩmaba doho nɩaa Wɩa sɩ lɩɩsa. Kirisito sɩ bɩrɩmɛ nuhuobiiŋ, ʋ ma fa ŋaa la naabalɩmaba doho nʋʋ nɛ. Má leŋ dɩ la dɛnnɛ Wɩa, a kaa mʋ wuu, bɛɛ wɩaa ʋ nɩɩ beŋ kʋŋkala. Amɩɩ.

⁶ Ama ʋ bɩ naga arɩ Wɩa sɩ sɩ ʋ jaŋ ŋaa wɩɩ-la ʋ vɩa nɛ, bɛɛ wɩaa Iziral doho nɩaa kala dee Wɩa leŋ ba ŋaa ʋ nɩaa.

⁷ Abɩraham doho nɩaa ma kala dee bɩ Wɩa nɩaa ŋaa. Wɩa bʋla pɩ Abɩraham, “Aɩzɩk lɛ nɛ mɩ jaŋ to a pɩŋ ŋ doho nɩalɩŋ wɩaa mɩ fa sɩ bʋla.”

⁸ Wɩɩŋ deeŋ daga arɩ nʋʋkala doho bɩ Wɩa nɩaa doho ŋaa, see biiri-la Wɩa sɩ hɛ niiŋ ba lʋl, ba nɛ ʋ beŋ ba ŋaa ʋ doho nɩaa tɩtɩa.

⁹ Ʋ fa sɩ bʋl wɩaa a tɩgɛ bile ba sɩ jaŋ lʋl lɛ, ŋ-la nɛ ʋ fa bʋl: “Mɩ jaŋ mɩɩra kɔ bʋa deeŋ tɩtɩa lɛ harɩŋ jɩna, dɩ ŋ haala Saara lʋl baal.”

¹⁰ Ŋɩɩ ma dʋndʋŋa dee. Rɩbɛka ma sɩ lʋl daalɩarɩ-la, ba nyɩmma ŋaa kʋbala nɛ, ʋ nɛ la naabalɩma Aɩzɩk.

^11-12 Ka dɩ Rɩbɛka-na lʋl daalɩarɩ-la, biiri-la ha bɩ wʋzɔŋ koo wʋbɔŋ kala ŋaa, ka Wɩa bʋla pʋ, “Ŋ sɩ jaŋ lʋl biiri-la, kʋhɩaŋ jaŋ tɩma pɩpɩ kʋbie.” Ŋɩɩ daga arɩ Wɩa tʋɔtɔrʋŋ lɛ nɛ ʋ yɩrɛ ʋ nɩaa a tʋɔsɛba, ʋ bɩ naga arɩ ba sɩ ŋaa wɩalɩŋ nɛ tɩɩ ʋ tʋɔsɛba. Ʋ sɩ yɩrɛba nɛ tɩɩ ba ŋaa ʋ nɩaa.

¹³ Ba bɩra ŋmʋnsɛ Wɩa teniŋ tʋɔŋ a bʋl ŋ-la nɛ: “Mɩ cho Jekɔb nɛ aŋ bɛrɛ Ɛsɔ.”

Wɩa kɛŋ wʋtɩtɩɩ nɛ

¹⁴ Bɛɛ nɛ saa la jaŋ bʋl? La jaŋ wuo bʋl arɩ Wɩa bɩ wʋtɩtɩɩ kɛnɛɛ? Aɩ, wombii tuo.

¹⁵ Wɩa fa bʋla pɩ Mosis, “Nɩalɩŋ mɩ sɩ lɩɩsa dɩ mɩ fá ba bunso, mɩ jaŋ fá ba bunso. Nɩalɩŋ ma mɩ sɩ lɩɩsa dɩ mɩ fá ba nenige, mɩ jaŋ fá ba nenige.”

¹⁶ Wɩɩŋ deeŋ saa bɩ naga nuhuobiine sɩ cho wɩalɩŋ a wʋwalɩmɛ dɩ ʋ ŋaaba nɛ tɩɩ, ama Wɩa sɩ fá la nenige nɛ tɩɩ,

¹⁷ bɛɛ wɩaa ba ŋmʋnsɛ Wɩa teniŋ tʋɔŋ a tɩgɛ Faaro lɛ arɩ Wɩa bʋla pʋ, “Wɩɩ-la sɩ tɩɩ mɩ leŋ ŋ dii kuoruŋ nɛ ŋ-la: mɩ ŋaa ŋɩɩ dɩ mɩ wuo to ŋ lɛ nɛ a dagɛ mɩ doluŋ, dɩ ba yɩrɛ mɩ yɩrɩŋ dʋnɩa kala lɛ.”

¹⁸ Nɩalɩŋ saa Wɩa sɩ lɩɩsa dɩ ʋ fá ba nenige, ʋʋ fá ba nenige nɛ. Nɩalɩŋ ma ʋ sɩ lɩɩsa dɩ ba kɛŋ nyuduoŋ, ʋ leŋe ba ma kɛŋ nyuduoŋ nɛ.

¹⁹ Ma dɔŋɔ jaŋ wuo pɩɛsɛ, “Dɩ Wɩa nɩɩ ŋaa ŋɩɩ, ɛɛ nɛ saa ʋ jaŋ wuo joŋ cheeriŋ a pɩ nɩaa? Kʋbɛɛ nɛ jaŋ wuo giri Wɩa wʋchɛɛlɩŋ ta?”

²⁰ Kʋbɛɛ nɛ kaŋ, ŋ-na nuhuobiine dɩ ŋ laa wɩaa bʋl Wɩa niiŋ lɛ? Pupoiŋ bɩ jaŋ wuo pɩɛsɛ nɩɩ-la sɩ mɛʋ a bʋl, “Bɛɛ nɛ tɩɩ ŋ mɛmɩ mɩ nagɛ ŋ-la?”

²¹ Pupo-mɛɛrɛ kɛŋ wombiiŋ dɩ ʋ lɔgɛ chʋrʋŋ a kaa mɛ pupoi-zɔmʋŋ a bile gbɛrɛ tapʋl-balaa, a bɩra lɔgɛ chʋrʋ-la tɩtɩa a mɛ pupoiŋ dɔŋɔ ma a kaa tɩtɩŋ tapʋlɩɩ kala.

²² Ŋɩɩ tɩtɩa nɛ Wɩa ma jaŋ wuo ŋaa nɩaa lɛ. Ʋ faa chɛ ʋ dagɛ ʋ baanɩŋ nɛ a leŋ dɩ ba jɩŋ ʋ doluŋ. Ama ʋ fa dii kenyiri nɛ nɩalɩŋ sɩ leŋe ʋ baanɩŋ sii nyuŋ, arɩ ʋ fa sɩ maga dɩ ʋ cheiba ma kala.

²³ Ʋ ŋaa ŋɩɩ dɩ ʋ kɛŋ ʋ tʋla-la sɩ yʋga a dagɛ nɩalɩŋ nenige ʋ sɩ fá nɛ, nɩalɩŋ ʋ sɩ laa sɩpaaŋ lɩɩsɛ dɩ ba na ʋ tʋla-la.

²⁴ La nɛ nɩalɩŋ ʋ sɩ lɩɩsa, la kala dee bɩ Juu tɩŋŋaa ŋaa, la dɔnsʋŋ ma ŋaa nɩalɩŋ sɩ bɩ Juu tɩŋŋaa ŋaa nɛ.

²⁵ Ba bʋl ŋ-la nɛ Wɩa teniŋ sɛmɛ dɔŋɔ ba sɩɩ yɩrɛ Hozaaya, “Nɩalɩŋ sɩ bɩ mɩ nɩaa ŋaa, mɩ jaŋ yɩrɛba mɩ nɩaa. Nɩalɩŋ ma mɩ fa sɩ bɩ cho, mɩ jaŋ yɩrɛba mɩ nɩchooloo.

²⁶ Lee-la tɩtɩa ba fa sɩ bʋla pɩ nɩaa arɩ ba bɩ Wɩa nɩaa ŋaa, lee-la nɛ ba jaŋ yɩrɛba Wɩa sɩ weye biiriŋ.”

²⁷ Azaaya fa ŋaa Wɩa wʋlaabʋllʋ nɛ. Ʋ ma fa heele bʋl a tɩgɛ Iziral nɩaa lɛ a bʋl, “Dɩ Iziral tɩŋŋaa nɛ paala faasa yʋgɛ a nagɛ hagɩlɩ-bumbugulo sɩ pɩŋ mʋgʋ-balɩŋ niiŋ ma, ba tʋɔŋ nɩaa baŋmɛnɛ dʋndʋŋa nɛ Wɩa jaŋ laa ta,

²⁸ bɛɛ wɩaa chɛɛ dɔŋ La Tɩɩna Wɩa jaŋ ŋaa ŋɩɩ ʋ fa sɩ bʋla pɩla, a guu dii dʋnɩa nɩaa sarɩya.”

²⁹ Ŋ-la nɛ Azaaya ma fa bɩra bʋl dɩ Wɩa jaŋ ŋaa maachie. Ʋ fa sɩ, “Dɩ La Tɩɩna doluŋ kala Tɩɩna nɛ fa bɩ la naabalɩma doho nɩaa baŋmɛnɛ leŋe, la kala fa jaŋ sʋʋ, a nagɛ Sodom arɩ Gomora nɩaa kala sɩ sʋʋ ŋɩɩ.”

Iziral tɩŋŋaa dɔnsʋŋ bɩ tʋɔpʋla kɛnɛ Wɩa sɩpaaŋ

³⁰ Bɛɛ nɛ saa laa chɛ dɩ la bʋl: Nɩalɩŋ sɩ bɩ Juu tɩŋŋaa ŋaa fa bɩ chɛ dɩ ba kɛŋ tʋɔpʋla Wɩa sɩpaaŋ. Ba nɛ mɩɩra kʋ kɛŋ tʋɔpʋla Wɩa sɩpaaŋ a tɩŋ ba sɩ laa Wɩa dii.

³¹ Ka Iziral tɩŋŋaa fa loo chɩchɛ dɩ ba to wɩalɩŋ Mosis fa sɩ bile dɩ nɩaa tuto lɛ a kɛŋ tʋɔpʋla Wɩa sɩpaaŋ. Ama ba bɩ wuo na tʋɔpʋla-la Wɩa sɩpaaŋ.

³² Bɛɛ nɛ tɩɩ ba bɩ tʋɔpʋla-la na? Ba bɩ ʋ na bɛɛ wɩaa, ba bɩ Wɩa laa dii aŋ chɩchɛ wɩɩ-la aŋ bɩɩnɛ ba tɩntɩŋŋaa nɛ jaŋ leŋ dɩ ba kɛŋ tʋɔpʋla-la Wɩa sɩpaaŋ. Ba joŋ ba naasɩŋ a ŋmoo tabɩɩ-la sɩ ŋaa nɩaa sɩsɩɛrɛ nɛ.

³³ Ba ŋmʋnsɛ Wɩa teniŋ tʋɔŋ a tɩgɛ tabɩɩ-la lɛ nɛ a bʋl, “Bee na, mɩ joŋ tabɩɩ-la sɩ jaŋ leŋ dɩ nɩaa gɛrɛ a bil lee-la ba sɩɩ yɩrɛ Zaayɔŋ nɛ. Tabɩɩ-la ŋaa bʋŋ nɛ. Ʋ jaŋ leŋ dɩ nɩaa gɛrɛ titel. Ama nʋʋ na-kala sɩ laa nɩɩ-la la sɩɩ yɩrɛ bʋŋ-la wɩaa dii, ʋ bɩ jaŋ dii hɩɩsɩŋ.”