Rom Tɩŋŋaa 4 - WƖA TENIŊ

Abɩraham sɩ laa Wɩa dii nɛ tɩɩ ʋ kɛŋ tʋɔpʋla Wɩa sɩpaaŋ

¹ Wʋbɛɛ nɛ saa la kɛŋ dɩ la bʋl a tɩgɛ la naabalɩma Abɩraham lɛ? Wʋbɛɛba nɛ ʋ na a tɩgɛ ʋ Wɩa laa diiniŋ lɛ?

² Dɩ Wɩa nɛ fa leŋe ʋ kɛŋ tʋɔpʋla ʋ sɩpaaŋ a tɩŋ ʋ wʋzɔmɔ-la ʋ sɩ ŋaa lɛ, ʋ fa jaŋ wuo bibigisi ʋ tɩtɩa lɛ, ama Wɩa teeŋ dee.

³ Wɩa teniŋ tʋɔŋ ba bʋla arɩ Abɩraham laa Wɩa dii nɛ. Ʋ sɩ laa Wɩa dii nɛ tɩɩ Wɩa leŋ ʋ kɛŋ tʋɔpʋla ʋ sɩpaaŋ.

⁴ Dɩ nʋʋ nɛ tɩŋ tɩntɩŋŋaa, ʋ maga dɩ ba timu nɛ. Time-la ʋ sɩ laa, ʋ bɩ naga arɩ chɔgɩta nɛ ba joŋo pʋ. Ʋ tɩma nɛ a laa.

⁵ Ama nɩɩ-la sɩ bɩ ʋ wʋŋaalaa lɛ nɩɩ beŋ, aŋ laa dii arɩ Wɩa jaŋ wuo ŋaa dɩ nɩɩ-la sɩɩ ŋaa wʋbɔŋŋɔɔ na tʋɔpʋla ʋ sɩpaaŋ, ʋ sɩ laa Wɩa dii ŋɩɩ jaŋ ŋaa dɩ ʋ kɛŋ tʋɔpʋla Wɩa sɩpaaŋ.

⁶ La naabalɩma Devit ma fa bʋl ŋɩɩ nɛ. Ʋ sɩ dɩ Wɩa nɛ leŋe dɩ nʋʋ kɛŋ tʋɔpʋla ʋ sɩpaaŋ, ka ʋ bɩ ŋɩɩ ŋaa a tɩŋ tɩɩna wʋzɔŋŋɔɔ ŋaanɩŋ lɛ, tɩɩna tʋɔŋ jaŋ tɔrɛ.

⁷ Ŋ-la nɛ Devit bʋl: “Nɩalɩŋ wʋbɔŋŋɔɔ Wɩa sɩ joŋo chɛba a kɛŋ ba wʋbɔŋŋɔɔ faa, ba tʋɔŋ jaŋ tɔrɛ.

⁸ Nɩɩ-la ma Wɩa sɩ bɩ ʋ wʋbɔŋŋɔɔ ka beŋ, ʋ ma tɩɩna tʋɔŋ jaŋ tɔrɛ.”

⁹ Tʋɔtɔrʋŋ deeŋ wɩaa saa Devit sɩ bʋla, ʋ ŋaa nɩalɩŋ sɩɩ keri ba penee dʋndʋŋa kʋŋ nɛɛ? Aɩ, nɩalɩŋ ma sɩ bɩ ba penee keri, ba ma tɩɩʋ nɛ. La laa sɩpaaŋ bʋl arɩ Abɩraham sɩ laa Wɩa dii nɛ tɩɩ ʋ ŋaa tʋɔpʋl tɩɩna Wɩa sɩpaaŋ.

¹⁰ Bʋa bɛɛ lɛ nɛ Wɩa ŋaa wɩɩŋ deeŋ Abɩraham lɛ? Ʋ ŋaa ŋɩɩ bʋa-la lɛ dɩ ʋ keri ʋ peniŋ nɛ koo dɩ ʋ ha bɩ ʋ peniŋ kere nɛ? Ʋ ŋaa ŋɩɩ dɩ ʋ ha bɩ ʋ peniŋ kere.

¹¹ Abɩraham sɩ keri ʋ peniŋ ŋɩɩ ŋaa magɩl nɛ, aa dagɛ arɩ ʋ sɩ laa Wɩa dii nɛ tɩɩ ʋ kɛŋ tʋɔpʋla ʋ sɩpaaŋ, bʋa-la lɛ ʋ ha sɩ bɩ ʋ peniŋ kere dee. Ŋɩɩ leŋ Abɩraham kʋ ŋaa nɩalɩŋ sɩ bɩ ba penee kere aŋ laa Wɩa dii naabalɩma. Wɩa jomba ba ŋaa tʋɔpʋl tɩmma ʋ sɩpaaŋ arɩ ba sɩ bɩ ba penee kere ma kala.

¹² Ʋ nɛ ŋaa nɩalɩŋ sɩ keri ba penee ma nyɩmma. Ama ʋ bɩ naga ba sɩ keri ba penee dʋndʋŋa wɩaa nɛ tɩɩ ʋ ŋaa ba nyɩmma. Ba laa Wɩa dii nɛ a pɛ ba penee keriŋ lɛ, a nagɛ Abɩraham ma fa sɩ laa Wɩa dii ŋɩɩ, aŋ-na keri ʋ peniŋ.

A tɩŋ la sɩ laa Wɩa dii, la ma jaŋ wuo kɛŋ tʋɔpʋla Wɩa sɩpaaŋ

¹³ Abɩraham arɩ ʋ doho nɩaa nɛ Wɩa fa bʋla pa dɩ ba jaŋ dii dʋnɩa. Ʋ bɩ naga Abɩraham fa sɩ to wɩalɩŋ Mosis fa sɩ bile dɩ nɩaa tuto nɛ tɩɩ Wɩa bʋl ŋɩɩ. Ama Abɩraham fa sɩ laa Wɩa dii nɛ tɩɩ Wɩa leŋ ʋ kɛŋ tʋɔpʋla ʋ sɩpaaŋ.

¹⁴ Dɩ nɩalɩŋ sɩɩ to wɩalɩŋ Mosis fa sɩ bile dɩ nɩaa tuto, dɩ ba dʋndʋŋa nɛ fa jaŋ dii dʋnɩa, ŋɩɩ-na nɩaa sɩ laa Wɩa dii fa ŋaa pɛɩ nɛ. Wɩalɩŋ Wɩa sɩ bʋla ma fa ŋaa pɛɩ.

¹⁵ Wɩalɩŋ Mosis fa sɩ bile dɩ nɩaa tuto nɛ yie leŋ Wɩa baanɩŋ sisii nɩaa nyuŋ. Dɩ wɩalɩŋ Mosis fa sɩ bile nɛ fa tuo, nɩaa fa bɩ wɩalɩŋ ka chei.

¹⁶ Ŋɩɩ wɩaa, nii-la Wɩa sɩ hɛ, nɩalɩŋ sɩ laa Wɩa dii nɛ jaŋ naʋ. Ʋ ŋaa zile kʋŋ nɛ a pɩ Abɩraham doho nɩaa kala. Ʋ bɩ naga arɩ ʋ joŋo pɩ nɩalɩŋ sɩɩ to wɩalɩŋ Mosis sɩ bile dʋndʋŋa nɛ, ama ba dɩ nɩalɩŋ kala sɩ laa Wɩa dii a nagɛ Abɩraham fa sɩ laa Wɩa dii ŋɩɩ, ba kala nɛ ʋ joŋo pa nɩalɩŋ sɩ keri ba penee arɩ nɩalɩŋ sɩ bɩ ba penee kere kala, bɛɛ wɩaa Abɩraham nɛ ŋaa la kala nyɩmma Wɩa sɩpaaŋ.

¹⁷ Ba fa ŋmʋnsɛ ŋɩɩ nɛ Wɩa teniŋ tʋɔŋ. Wɩa bʋla a tɩgɛ Abɩraham lɛ, “Mɩ leŋe ŋ ŋaa tintee daŋ nyɩmma nɛ.” Wɩa sɩpaaŋ Abɩraham nɛ ŋaa la nyɩmma. Wɩa-la sɩ wuo leŋ kɩalɩŋ kala sɩ sʋba, dɩ ba sii sʋʋŋ lɛ a kɛŋ mɩɩsɩŋ, aŋ bɩra wuo dagɛ wɩalɩŋ sɩ jaŋ ŋaa aŋ ha bɩ ŋaa, Wɩa deeŋ nɛ Abɩraham laa dii.

¹⁸ Wɩa fa bʋla pɩ Abɩraham arɩ ʋ jaŋ kʋ ŋaa tintee daŋ nyɩmma. Wɩɩ tuo fa sɩ jaŋ leŋ dɩ Abɩraham yɩyɩɛlɛ wɩɩŋ deeŋ, aŋ ka ʋ vɩa aŋ ha yɩɛlɛ. Ŋɩɩ wɩaa ʋ sɛnɛ kʋ ŋaa tintee daŋ nyɩmma arɩ Wɩa fa sɩ bʋl ŋɩɩ pʋ. Wɩa fa bʋla pʋ dɩ ʋ doho nɩaa jaŋ yʋgɛ a nagɛ chɛnwʋlaa.

¹⁹ Bʋa-la lɛ Wɩa fa sɩ bʋl ŋɩɩ pɩ Abɩraham, dɩ Abɩraham ka mʋa ka dɩ ʋ yi jɩsɩŋ zɔlɔ. Ʋ jɩma arɩ ʋ hɩɛsa nɛ, ʋ yaraa bɩra bɩ doluŋ kɛnɛ dɩ ʋ lʋl bie. Ʋ haala Saara ma fa ŋaa hapɩrɩ nɛ a ma hɩɛsɛ, a bɩ bii wuo lʋl. Abɩraham sɩ hɩɛsa ŋɩɩ ma kala, ʋ ha laa Wɩa dii nɛ.

²⁰ Wɩa sɩ bʋl ŋɩɩ pʋ, ʋ bɩ ŋɩɩ ʋ sɩ laa Wɩa dii lɛ begili. Ʋ laa Wɩa dii nɛ a kɛŋ doluŋ, a leŋ Wɩa yɩrɩŋ yɩra.

²¹ Ʋ paala chaasa laa Wɩa dii nɛ woruŋ arɩ Wɩa kɛŋ doluŋ dɩ ʋ ŋaa wɩɩ-la ʋ sɩ sɩ ʋ jaŋ ŋaa.

²² A tɩŋ ʋ sɩ laaʋ dii wɩaa, Wɩa leŋ ʋ kɛŋ tʋɔpʋla ʋ sɩpaaŋ.

²³ Ba fa sɩ ŋmʋnsa a bʋl dɩ Wɩa nɛ leŋe Abɩraham kɛŋ tʋɔpʋla ʋ sɩpaaŋ, Abɩraham dʋndʋŋa wɩaa dee ba ŋmʋnsɛ ŋɩɩ.

²⁴ Ba ŋmʋnsɛ ŋɩɩ la ma wɩaa nɛ, la nɩalɩŋ sɩ laa dii arɩ Wɩa chɩsɛ La Tɩɩna Yesu sʋʋŋ lɛ. Ʋ jaŋ leŋ dɩ la ma kɛŋ tʋɔpʋla ʋ sɩpaaŋ,

²⁵ bɛɛ wɩaa ʋ leŋe Yesu sʋʋ a tɩŋ la wʋbɔŋŋɔɔ wɩaa nɛ, a bɩra leŋ ʋ sii sʋʋŋ lɛ dɩ la kɛŋ tʋɔpʋla ʋ sɩpaaŋ.