Jɔɔŋ Wʋnaalaa 8 - WƖA TENIŊ

Pie-bie-la kɛŋ teŋ-kaanɩŋ suri

¹ Ŋɩɩ nɛ Pie-bie-la lɛrɛ kelli-la ba sɩ kaa mɛrɛ teŋ-la pɛɩ tɩɩna. Ʋ sɩ suro dɛrɛ, Wɩa-jaŋ kala ŋaa fʋɩɩ a yi hawa kpaa magɛ dɔŋɔ.

² Ŋɩɩ nɛ aŋ ka mɩ na Wɩa tɩndaaraa balɩpɛ-la sɩ yie chɩŋ Wɩa sɩpaaŋ. Ba pɩba nyilliŋ balɩpɛ.

³ Wɩa tɩndaara dɔŋɔ ma kʋ chɩŋ Wɩɩsʋlʋŋ koruŋ sɛmɛ a kori sɛlɩmɛ kʋ-la lɛ ba sɩ yie joŋ kʋsʋɔrʋsʋŋ hɛ, a nyɩga pɩ Wɩa. Ŋɩɩ nɛ ba pʋ kʋsʋɔrʋ-zɔŋŋɔɔ yʋgɛ, dɩ ʋ nyɩga pɩ Wɩa a pɛ Wɩa nɩaa Wɩɩ-chʋɔlʋŋ lɛ. Ʋ jaŋ nyɩgɛba sɛlɩmɛ koru-la nyuŋ, kʋ-la sɩ chɩŋ kuoru kpasa-la sɩpaaŋ.

⁴ Ŋɩɩ nɛ kʋsʋɔrʋsʋ-la nyʋɔsʋŋ arɩ Wɩa nɩaa Wɩɩ-chʋɔlʋŋ lɩɩ Wɩa tɩndaarʋ-la nɩsɩŋ lɛ a mʋ Wɩa teeŋ.

⁵ Ŋɩɩ nɛ Wɩa tɩndaarʋ-la joŋ sɛlɩmɛ kʋ-la a chaanɛ nyiniŋ Wɩɩsʋlʋŋ koru-la nyuŋ, a hɛ kʋ-la tʋɔŋ, a joŋo yuo ʋ kʋ tuu tinteeŋ. Ŋɩɩ nɛ duonuŋ kpɩkpɩa aŋ lɩlɩgɩsɛ, ka tinteeŋ zizigili.

Wɩa tɩndaaraa ŋmʋʋ nyilliŋ

⁶ Ŋɩɩ nɛ Wɩa tɩndaaraa balɩpɛ-la sɩ kɛŋ banyilliŋ balɩpɛ-la kɛŋ ba tɩtɩa dɩ ba ŋmʋʋ.

⁷ Wɩa tɩndaarɩ-bumbuŋ ŋmʋʋ ʋ nyile. Ŋɩɩ nɛ duoŋ-tabɩaa arɩ nyiniŋ guoli chalɩŋ lɛ kʋ tuu tel tinteeŋ. Ŋɩɩ nɛ tinteeŋ, dɩ ŋ nɛ kaa kpaa batori, sɛmpɛɛŋ dɔŋɔ tɩɩsɩŋ arɩ yasɩŋ kala dii nyiniŋ.

⁸ Ŋɩɩ nɛ Wɩa tɩndaarɩ-lɩamɩŋ ma ŋmʋʋ ʋ nyile. Ʋ sɩ ŋaa ŋɩɩ, ba joŋ kʋŋ sɩ nagɛ peel-balɩŋ sɩɩ dii nyiniŋ a yuo hɛ mʋgʋ-balɩŋ tʋɔŋ. Mʋgʋ-bal-la, dɩ ŋ nɛ kaa kpaa batori, sɛmɛ dɔŋɔ kala bɩrɩmɛ chalɩŋ,

⁹ kɩalɩŋ kala sɩ kɛŋ mɩɩsɩŋ a hɛ mʋgʋ-bal-la sɛmɛ-la kala sʋʋ. Lɩɩŋ daborusu-la ma sɩ hɛ lee-la chei.

¹⁰ Ŋɩɩ nɛ Wɩa tɩndaarɩ-tori-la ma ŋmʋʋ ʋ nyile. Ʋ sɩ ŋmʋʋ ŋɩɩ, chɛnwʋl-bal kʋbala lɩɩ wɩa-nyuŋ, a chaanɛ a nagɛ kapɩlɩŋ-nyiniŋ, a kʋ tuu tel fuonuŋ arɩ lɩɩ-bulluŋ sɩ kpaa sɛsɩŋ batori sɛmɛ dɔŋɔ lɛ.

¹¹ Chɛnwʋl-la yɩrɩŋ nɛ kʋhaaŋ. Ʋ sɩ hɛyɛ ŋɩɩ, lɩɩ-la tʋɔŋ ʋ sɩ tele ma hɛɩ. Lɩɩ-la sɩ hɛyɛ ŋɩɩ, nɩ-daŋ-la sɩ nyʋa lɩɩ-haa-la, ba sʋʋ.

¹² Ŋɩɩ nɛ Wɩa tɩndaarɩ-nɛsɛ-la ma ŋmʋʋ ʋ nyile. Ʋ sɩ ŋmʋʋ ŋɩɩ, wɩɩpɔsʋŋ, dɩ ŋ nɛ kaa kpaa butori, sɛmɛ dɔŋɔ biri, chɛnɛ ma dɩ ŋ nɛ kaa kpaa butori, sɛmɛ dɔŋɔ biri, chɛnwʋlaa ma, dɩ ŋ nɛ kaa kpaa butori, sɛmɛ dɔŋɔ biri. Wɩɩhɛyɛ pʋlʋmʋŋ arɩ tɩtaŋɩŋ ma kpaa butori sɛmɛ dɔŋɔ biri.

¹³ Ŋɩɩ nɛ mɩ beŋ a na kachuuŋ dɩ ʋʋ fil wɩa-nyuŋ dɩ-bolii, mɩ nɩɩ dɩ ʋ faasa yiyel, aa bʋl, “Wɩɩŋ puuma, wɩɩŋ puuma, wɩɩŋ puu ma nɩalɩŋ sɩ hɛ tinteeŋ lɛ, a tɩŋ Wɩa tɩndaarɩ-kaana-la batori sɩ jaŋ ŋmʋʋ nyilli-la wɩaa.”