Jɔɔŋ Wʋnaalaa 7 - WƖA TENIŊ

Iziral tɩŋŋaa tʋɔŋ nɩalɩŋ ba sɩ magɩla

¹ Wɩaa deemba kala harɩŋ, mɩ na Wɩa tɩndaaraa banɛsɛ dɩ ba chɩŋ dʋnɩa laŋgorunuŋ banɛsɛ-la lɛ. Ba fa kɛŋ peliŋ nɛ dɩ ʋ sɩ́ lu hɛ tinteeŋ arɩ mʋgʋ-balɩŋ arɩ tɩɩsɩŋ kala lɛ.

² Ŋɩɩ nɛ ka mɩ na Wɩa tɩndaara dɔŋɔ dɩ ʋ to wɩɩpɔsʋŋ dɩɩrɩŋ aa jɩl wɩa-nyuŋ, a kori kʋ-la Wɩa sɩ weye sɩ kaa magɩlɛ ʋ nɩaa. Ŋɩɩ nɛ ʋ faasa yɩrɛ Wɩa tɩndaara-la banɛsɛ Wɩa fa sɩ pa doluŋ dɩ ba chei tinteeŋ arɩ mʋgʋ-balɩŋ.

³ Ŋɩɩ nɛ ʋ bʋla pɩ Wɩa tɩndaaraa banɛsɛ-la, “Má sɩ́ tinteeŋ koo mʋgʋ-balɩŋ koo tɩɩsɩŋ chei, see dɩ la magɩlɛ la Wɩa tɩntɩnnaa ba tilliŋ lɛ.”

⁴ Ŋɩɩ nɛ ba dagɛ nɩalɩŋ Wɩa sɩ magɩlɛ niiŋ pɩmɛ. Ba ŋaa bʋɩ bʋɩ zɔlɔ arɩ mahɩŋ balɩa arɩ banɛsɛ nɛ. Nɩaa deemba lɩɩ Iziral doho doho tʋɔŋ nɛ.

⁵ Nɩaa bʋɩ fii arɩ balɩa nɛ ʋ magɩlɛ Juda doho nɩaa tʋɔŋ. Nɩaa bʋɩ fii arɩ balɩa ma lɩɩ Rubiŋ doho nɩaa tʋɔŋ. Nɩaa bʋɩ fii arɩ balɩa ma lɩɩ Gad doho nɩaa tʋɔŋ.

⁶ Nɩaa bʋɩ fii arɩ balɩa ma lɩɩ Asa doho nɩaa tʋɔŋ, Nafɩtalɩ doho nɩaa tʋɔŋ ma, nɩaa bʋɩ fii arɩ balɩa. Nɩaa bʋɩ fii arɩ balɩa ma lɩɩ Manasɛ doho nɩaa tʋɔŋ.

⁷ Nɩaa bʋɩ fii arɩ balɩa ma lɩɩ Simioŋ doho nɩaa tʋɔŋ. Nɩaa bʋɩ fii arɩ balɩa ma lɩɩ Levi doho nɩaa tʋɔŋ. Nɩaa bʋɩ fii arɩ balɩa ma lɩɩ Ɩsaka doho nɩaa tʋɔŋ.

⁸ Nɩaa bʋɩ fii arɩ balɩa ma lɩɩ Zebuluŋ doho nɩaa tʋɔŋ. Nɩaa bʋɩ fii arɩ balɩa ma lɩɩ Josɛf doho nɩaa tʋɔŋ. Ʋ magɩlɛ nɩaa bʋɩ fii arɩ balɩa ma Bɛnjamɩŋ doho nɩaa tʋɔŋ.

Nɩ-daŋ-la sɩ dɛnnɛ Wɩa

⁹ Ʋ ŋɩɩ harɩŋ nɛ mɩ beŋ a na nɩ-dandaŋ, nʋʋ bɩ ba wuo dɩɩsɛ, sɩ lɩɩ tintee-dosunuŋ, do-yiriba arɩ nɩdosunuŋ sɩɩ bʋl yikori-wogusuŋ. Mɩ na dɩ ba chɩŋ kuoru kpasa-la arɩ Pie-bie-la sɩpaaŋ a laalɛ gɛrɩ-pʋl-duduosuŋ, a kori abɛ pɩpaarɩŋ ba nɩsaa lɛ.

¹⁰ Nɩ-daŋ-la faasa ŋaa goŋ aa bʋl, “La Wɩa sɩ hɔŋ kuoru kpasa-la nyuŋ arɩ Pie-bie-la, ba nɛ kɛŋ doluŋ dɩ ba laala ta.”

¹¹ Ka Wɩa tɩndaaraa kala chɩna golli kuoru kpasa-la arɩ nɩhɩasɩ-la arɩ kɩalɩŋ banɛsɛ-la sɩ weye. Ŋɩɩ nɛ Wɩa tɩndaara-la tuu kpirimi kuoru kpasa-la sɩpaaŋ a chʋɔlɛ Wɩa

¹² a bʋl, “Amɩɩ. La jaŋ dɛnnɛ La Tɩɩna Wɩa a yɩrɛ ʋ yɩrɩŋ, aa lɔllʋ, bɛɛ wɩaa ʋ nɛ wʋjɩmɩŋ arɩ doluŋ a kaa mʋ wuu. Amɩɩ.”

¹³ Ŋɩɩ nɛ nɩhɩasɩ-la dɔŋɔ pɩɛsɛmɛ a bʋl, “Kʋbɛɛba nɛ laalɛ gɛrɩ-pʋl-duduosuŋ ŋɩɩ, nɩɩ nɛ ba lɩɩ?”

¹⁴ Ŋɩɩ nɛ mɩ bʋla pʋ, “Ŋ nɛ jɩma, mɩ kʋhɩaŋ.” Ŋɩɩ nɛ ʋ bʋla pɩmɛ, “Nɩaa deemba nɛ Wɩa lɩɩsɛ hɛɛ-bal-la tʋɔŋ. Ba chɛsɛ ba gɛnnɩŋ Pie-bie-la chalɩŋ lɛ nɛ, ba lɩɩ a pʋllɛ.

¹⁵ Ŋɩɩ nɛ tɩɩ ba chɩŋ Wɩa kuoru kpasa-la sɩpaaŋ a tɩma pʋpʋ wɩɩhɛyɛ arɩ tɩtaŋɩŋ kala ŋɩɩ ʋ dɩɩ-balɩŋ lɛ. Nɩɩ-la sɩ hɔŋ kuoru kpasa-la lɛ nɛ jaŋ chu tɔ ba.

¹⁶ Losuŋ bɩra bɩ jaŋ kɛmba, lɩɩnyʋasʋŋ ma bɩ jaŋ kɛmba, wɩɩpɔsʋŋ ma bɩ jaŋ kpʋba, wulumuŋ ma bɩ jaŋ kɛmba.

¹⁷ Wɩɩkala bɩ jaŋ ŋaaba, bɛɛ wɩaa Pie-bie-la sɩ chɩŋ Wɩa kuoru kpasa-la sɩpaaŋ nɛ jaŋ bibeŋ ba nyuŋ, a nagɛ pie-daara. Ʋ nɛ jaŋ kɛmba kaa mʋ lɩɩ-bulo leriŋ, lɩɩ-la sɩɩ pɩ nɩaa mɩɩsɩŋ. Wɩa ma jaŋ fɩɩsɛ sɩ-lɩɩrɩ kala sɩ hɛ ba sɩaa lɛ ta.”