Jɔɔŋ Wʋnaalaa 5 - WƖA TENIŊ

Teŋ-chuoluŋ arɩ Pie-bie

¹ Ŋɩɩ nɛ ka mɩ na dɩ Nɩɩ-la sɩ hɔŋ kuoru kpasa-la nyuŋ, dɩ ʋ kori teŋ-chuoluŋ ʋ nadiiŋ nɩsɩŋ lɛ. Ba ŋmʋnsɛ teŋ-la tʋɔŋ arɩ harɩŋ kala, aŋ kɛŋ kelliŋ balɩpɛ a mɛrɛ tɔ.

² Ŋɩɩ nɛ mɩ na Wɩa tɩndaarɩ-duo kʋbala dɩ ʋ faasa heeli a bʋl, “Kʋbɛɛ nɛ jaŋ wuo lɛrɛ kelli-la ba sɩ kaa mɛrɛ teŋ-la aŋ suri teŋ-la?”

³ Ama nʋʋkala tuo Wɩa-jaŋ lɛ koo tinteeŋ lɛ, koo lɛlɛɛ-jaŋ lɛ sɩ jaŋ wuo suri teŋ-la koo a nyilimi ʋ tʋɔŋ.

⁴ Mɩ sɩ bɩ nʋʋkala na sɩ jaŋ wuo teŋ-la beŋ, mɩ faasa yel.

⁵ Ŋɩɩ nɛ nɩhɩasɩ-la mara arɩ banɛsɛ-la dɔŋɔ bʋla pɩmɛ, “Sɩ́ yel, bee na nɩɩ-la ba sɩɩ yɩrɛ Juda nɩaa tʋɔŋ Naachigiŋ, ʋ lɩɩ Devit doho nɩaa tʋɔŋ nɛ, ʋ yuo dii Sɩtaanɩ nɛ. Ʋ kɛŋ doluŋ ʋ sɩ jaŋ lɛrɛ kɩalɩŋ balɩpɛ-la ba sɩ kaa mɛrɛ teŋ-la aŋ suru.”

⁶ Ŋɩɩ nɛ mɩ beŋ a na Pie-bie dɩ ʋ chɩŋ kuoru kpasa-la arɩ kɩalɩŋ banɛsɛ-la sɩ weye arɩ nɩhɩasɩ-la tʋtʋɔbaanɩŋ. Pie-bie-la fa naga ba sɩ kpʋa nɛ. Ʋ fa kɛŋ nyilliŋ balɩpɛ nɛ, sɩaa ma balɩpɛ. Sɩa-la balɩpɛ nɛ ŋaa Wɩa Dɩnsɩŋ balɩpɛ-la Wɩa sɩ ta ba kʋ tuu dʋnɩa sɛmɛ na-kala.

⁷ Ŋɩɩ nɛ Pie-bie-la mʋ laa teŋ-la, nɩɩ-la sɩ hɔŋ kuoru kpasa-la nyuŋ nadiiŋ nɩsɩŋ lɛ.

⁸ Ʋ sɩ laa teŋ-la, kɩalɩŋ banɛsɛ-la sɩ weye arɩ nɩhɩasɩŋ mara arɩ banɛsɛ-la, ba kala tuu kpirimi Pie-bie-la sɩpaaŋ a chʋɔlʋ. Nɩhɩasɩ-la kala kori chenniŋ arɩ sɛlɩmɛ gbansɩŋ. Gbansɩ-la su arɩ kʋsʋɔrʋsʋ-la ba sɩ nyɩga pɩ Wɩa. Wɩa nɩaa Wɩɩ-chʋɔlʋŋ nɛ ŋaa kʋsʋɔrʋsʋ-la.

⁹ Ŋɩɩ nɛ nɩhɩasɩ-la arɩ kɩalɩŋ sɩ weye ta yɩɩl-falɩŋ aa yɩɩ, “Ŋ nɛ wuo laa teŋ-la ba sɩ mɛrɛ, a lɛrɛ kel-la ba sɩ kaa mɛrɛ, bɛɛ wɩaa ba kpʋŋ nɛ. Ba sɩ kpʋŋ ŋɩɩ, ŋ joŋ ŋ chalɩŋ a yɔɔ nuhuobiine mɩɩsɩŋ a pɩ Wɩa. Nɩalɩŋ ŋ sɩ yɔbɔ lɩɩ nɩdoho kala tʋɔŋ nɛ aa bʋl yikori doho kala a hɛ taŋ kala arɩ tintee kala lɛ.

¹⁰ Ŋ leŋe nɩalɩŋ ŋ sɩ yɔbɔ, dii kuoruŋ nɛ a laa nɩaa nyuŋ a tɩma pɩpɩ Wɩa. Ba jaŋ beŋ tinteeŋ kala.”

¹¹ Ŋɩɩ nɛ mɩ beŋ a na dɩ Wɩa tɩndaaraa bʋɩ bʋɩba bʋɩ golli kuoru kpasa-la arɩ kɩalɩŋ sɩ weye arɩ nɩhɩasɩ-la. Mɩ nɩa dɩ ba faa yɩɩ yɩɩl nɛ.

¹² Yɩɩl-la ba fa sɩɩ yɩɩ arɩ yikori-balɩŋ nɛ ŋ-la: “Pie-bie-la ba sɩ kpʋa nɛ maga dɩ ʋ kɛŋ doluŋ a bibeŋ nɩaa. Ʋ nɛ maga dɩ ʋ kɛŋ kɩaa, arɩ wʋjɩmɩŋ, arɩ doluŋ kʋŋkala lɛ. Ʋ nɛ maga dɩ ʋ kɛŋ yɩrɩŋ, dɩ nɩaa dɛnnʋ a chʋɔlʋ.”

¹³ Ŋɩɩ nɛ ka mɩ nɩɩ kɩalɩŋ kala sɩ hɛ Wɩa-jaŋ, arɩ kɩalɩŋ kala sɩ hɛ dʋnɩa lɛ, arɩ kɩalɩŋ sɩ hɛ lɛlɛɛ-jaŋ, arɩ kɩalɩŋ kala sɩ hɛ mʋgʋ-balɩŋ tʋɔŋ, arɩ kʋŋ na-kala sɩ hɛ nɩmɛ dɩ baa yɩɩ yɩɩlaa aa bʋl, “Nɩɩ-la sɩ hɔŋ kuoru kpasa-la nyuŋ arɩ Pie-bie-la, ba nɛ maga la dɛnnɛ, a zilba a yɩrɛ ba yɩrɩŋ. Ba nɛ kɛŋ doluŋ a kaa mʋ wuu.”

¹⁴ Ŋɩɩ nɛ kɩalɩŋ banɛsɛ-la sɩ weye bʋl, “Amɩɩ.” Ŋɩɩ nɛ nɩhɩasɩ-la tuu kpirimi a chʋɔlɛ Wɩa.