Jɔɔŋ Wʋnaalaa 3 - WƖA TENIŊ

Wɩalɩŋ ba sɩ ŋmʋnsa pɩ Saadɩs nɩaa

¹ Bɩra ŋmʋnsɛ wɩaa deemba a pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi Saadɩs lɛ. Bʋla pɩba: Mɩ-na Nɩɩ-la sɩ kori Wɩa Dɩnsɩŋ balɩpɛ-la aŋ pɛ kɛŋ chɛnwʋlaa balɩpɛ-la nɛ bʋl wɩaa deemba pɩba. Mɩ jɩŋ ma Saadɩs nɩaa tɩntɩŋŋaa kala nɛ. Ma laa yɩrɩŋ arɩ ma weye nɛ, ama ma sʋba nɛ.

² Má sii doŋ lɛ a pɔ dɩ wʋkaana-la mʋa ma ha sɩ kɛnɛ sɩ́ chei, bɛɛ wɩaa mɩ na dɩ ma wʋŋaalaa ha bɩ sɩɩŋ suo Wɩa sɩpaaŋ.

³ Má liise yi wɩalɩŋ ba sɩ dagɛma arɩ wɩalɩŋ ma sɩ nɩa aŋ laa maa. Má toba, aŋ bɩrɩma lɩɩ ma wʋbɔŋŋɔɔ lɛ. Dɩ ma nɛ bɩ doŋ lɛ sie, mɩ jaŋ lʋara kɔ a nagɛ gaara. Ma bɩ jaŋ wuo jɩŋ bʋa-la mɩ sɩ jaŋ kɔ ma teeŋ.

⁴ Arɩ ŋɩɩ kala nɩaa baŋmɛnɛ nɛ ha hɛ Saadɩs lɛ a bɩ disiniŋ kɛnɛ. Ba nɛ jaŋ laalɛ gɛrɩ-pʋllʋŋ a to mɩ harɩŋ, bɛɛ wɩaa ba magɛ ŋɩɩ nɛ.

⁵ Nɩɩ-la kala sɩ wuo yuo dii Sɩtaanɩ, ʋ tɩɩna jaŋ laalɛ gɛrɩ-pʋllʋŋ. Mɩ bɩ jaŋ kpʋ ʋ yɩrɩŋ ta mɩɩsɩŋ teŋ-la tʋɔŋ. Mɩ jaŋ suri mɩ niiŋ a yɩrɛ ʋ yɩrɩŋ mɩ Nyɩmma Wɩa arɩ ʋ tɩndaaraa sɩpaaŋ.

⁶ Dɩgɩlaa tɩŋŋaa, má wuoli ma dɩgɩlaa a nɩɩ wɩalɩŋ Wɩa Dɩŋ-zɔmʋŋ sɩ bʋla pɩ nɩalɩŋ sɩ laa Yesu wɩaa dii aa hilimi Esia tinteeŋ lɛ.

Wɩalɩŋ ba sɩ ŋmʋnsa pɩ Fɩladɛlɩfɩa nɩaa

⁷ Ŋmʋnsɛ wɩaa deemba pɩ Wɩa tɩndaarɩ-la sɩɩ beŋ nɩalɩŋ sɩ laa Yesu wɩaa dii aa hilimi Fɩladɛlɩfɩa lɛ. Mɩ-na Nɩɩ-la sɩ ŋaa tʋɔpʋl Tɩɩna arɩ Nɩtɩtɩɩ nɩɩ bʋl wɩaa deemba. Mɩ nɛ kori Devit taŋ-la boribiiŋ, dɩ mɩ nɛ suro, nʋʋkala bɩ wuo kaa tɔ, dɩ mɩ nɛ bɩra kaa tɔ ma, nʋʋkala bɩ wuo suri.

⁸ Mɩ jɩŋ ma wʋŋaalaa nɛ. Má bee na, mɩ kɛŋ boro kaa suri nɛ a pɩma. Nʋʋkala bɩ wuo kaa tɔ. Mɩ jɩma arɩ ma doluŋ bɩ yʋgɛ, ama ma haa to mɩ niiŋ wɩaa a bɩ mɩ vɩa.

⁹ Má bee na, mɩ jaŋ leŋ dɩ nɩalɩŋ sɩɩ to Sɩtaanɩ a nyɩɛ wɩaa arɩ ba ŋaa Juu tɩŋŋaa nɛ aŋ bɩ Juu tɩmma ŋaa, kpirimi ma sɩpaaŋ, dɩ ba jɩŋ arɩ mɩ choma nɛ.

¹⁰ A tɩŋ ma sɩ to mɩ niiŋ wɩaa a nyalɩmɛ, mɩ ma jaŋ pɔma a lɩɩsɛma hɛɛ-la sɩ jaŋ jʋʋ dʋnɩa nɩaa kala, a magɩsɛba.

¹¹ Mɩɩ kɔ nɛ lɛɛlɛ. Má faasa kɛŋ kʋ-la ma sɩ kɛnɛ, dɩ nʋʋkala sɩ́ kuori-nyunchuul-la sɩ ŋaa ma time kaa laa ma teeŋ.

¹² Nɩɩ-la kala sɩ wuo yuo dii Sɩtaanɩ, mɩ jaŋ leŋ dɩ ʋ nagɛ jebiiŋ a hɛ Wɩa dɩɩ-balɩŋ tʋɔŋ. Ʋ bɩ jaŋ kɔ dɩ ʋ lɩɩ Wɩa dɩɩ-bal-la tʋɔŋ. Mɩ jaŋ ŋmʋnsɛ Wɩa yɩrɩŋ a hɛ ʋ lɛ, a ŋmʋnsɛ Wɩa-jaŋ yɩrɩŋ ma hɛ ʋ lɛ. Jaŋ-la nɛ ŋaa Jerusalɛm falɩɩ-la sɩ lɩɩ Wɩa-jaŋ kʋ tuu. Mɩ jaŋ ŋmʋnsɛ mɩ tɩtɩa yɩrɩ-falɩŋ a hɛ ʋ lɛ.

¹³ Dɩgɩlaa tɩŋŋaa, má wuoli ma dɩgɩlaa a nɩɩ wɩalɩŋ Wɩa Dɩŋ-zɔmʋŋ sɩ bʋla pɩ nɩalɩŋ sɩ laa Yesu wɩaa dii aa hilimi Esia tinteeŋ lɛ.

Wɩalɩŋ ba sɩ ŋmʋnsa pɩ Laadisiya nɩaa

¹⁴ Bɩra ŋmʋnsɛ wɩaa deemba pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi Laadisiya taŋ-la lɛ. Mɩ-na nɛ Nɩɩ-la ba sɩɩ yɩrɛ “Amɩɩ,” a kɛŋ wʋtɩtɩɩ a didii dansɩa arɩ wʋtɩtɩɩ, Nɩɩ-la lɛ Wɩa sɩ to a ŋaa dʋnɩa, mɩ nɩɩ bʋl wɩaa deemba.

¹⁵ Mɩ jɩŋ ma wʋŋaalaa nɛ. Ma ŋaa tɔlɔ tɔlɔ nɛ. Ma bɩ fɩɛla, ma bɩra bɩ lɩŋ ma. Mɩ fa cho dɩ ma fɩɛla nɛ koo dɩ ma lɩŋ.

¹⁶ Ama a tɩŋ ma sɩ ŋaa tɔlɔ tɔlɔ, a bɩ lɩŋ a bɩra bɩ fɩɛla ma, mɩ jaŋ lusima ta mɩ niiŋ lɛ.

¹⁷ Ma yie bigisi ma tɩtɩa lɛ arɩ ma kɛŋ kɩaa nɛ, ma bɩra bɩ kʋŋkala ka chɛ. Ama ma bɩ jɩŋ arɩ ma wɩɩŋ kɛŋ hɛɛŋ nɛ, ma ŋaa nisusu tɩmma, a ŋaa summo, a ŋaa nyʋlɩma aŋ kɛŋ yarɩ-biree.

¹⁸ Ŋɩɩ wɩaa mɩ bʋlaa pɩma dɩ ma yɔɔ sɛlɩmɛ-la ba sɩ chɛsɛ mɩ teeŋ, a ma wuo kɛŋ kɩaa, a yɔɔ gɛrɩ-pʋllʋŋ ma a laala tɔ ma yarɩ-biree, dɩ hɩɩsɩŋ sí ma kɛŋ. Má yɔɔ nʋʋŋ ma a hɛ ma sɩaa a wuo nɩna.

¹⁹ Dɩ nɩalɩŋ mɩ sɩ cho nɛ ŋaa wɩɩ chei, mɩ yie dagɛba nɛ a kɛmba bil wombiiŋ lɛ. Ŋɩɩ wɩaa, má fɩɛsɛ sɩɩŋ a bɩrɩma lɩɩ ma wʋbɔŋŋɔɔ lɛ.

²⁰ Má bee-na, mɩ chɩŋ boiŋ niiŋ nɛ aa ŋmoo boro. Nɩɩ-la kala sɩ nɩɩ mɩ yikoro a kɛŋ boro suri, mɩ jaŋ kʋ jʋʋ ʋ teeŋ, dɩ la dɩ ʋ kala dii kɩaa.

²¹ Nɩɩ-la sɩ wuo yuo dii Sɩtaanɩ, mɩ jaŋ pʋ wombiiŋ dɩ ʋ pɛ hɔŋ mɩ kuoru kpasa nyuŋ arɩ mɩ ma sɩ yuo dii Sɩtaanɩ aŋ pɛ hɔŋ mɩ Nyɩmma kuoru kpasa nyuŋ ŋɩɩ.

²² Dɩgɩlaa tɩŋŋaa, má wuoli ma dɩgɩlaa a nɩɩ wɩalɩŋ Wɩa Dɩŋ-zɔmʋŋ sɩ bʋla pɩ nɩalɩŋ sɩ laa Yesu wɩaa dii aa hilimi lee-kala Esia tinteeŋ lɛ.