Jɔɔŋ Wʋnaalaa 21 - WƖA TENIŊ

Wɩa-jaŋ falɩɩ-la arɩ tintee-falɩɩ-la

¹ Ŋɩɩ nɛ mɩ na Wɩa-jaŋ kʋfalɩɩ arɩ tintee-falɩɩ. Bumbuŋ Wɩa-jaŋ arɩ bumbuŋ tinteeŋ kala lɛlɛ nɛ. Mʋga kala tuo.

² Ŋɩɩ nɛ mɩ na Wɩa taŋ-la sɩ bɩ disiniŋ kɛnɛ, Jerusalɛm falɩɩ-la, dɩ ʋ lɩɩ Wɩa-jaŋ a kʋ tuu. Wɩa kpɩɛrʋ ʋ zɔŋ a nagɛ ba sɩ yie kpɩɛrɛ haala ŋɩɩ nɛ a kaa mʋ pɩ ʋ bala.

³ Ŋɩɩ nɛ aŋ ka mɩ nɩɩ nʋʋ yikori-balɩŋ dɩ ʋ lɩɩ kuoru kpasa-la sɛmɛ a bʋl, “Má bee na, lɛɛlɛ Wɩa kɔ nuhuobiine teeŋ nɛ. Ʋ jaŋ hɔŋ ba tʋɔŋ. Ba nɛ jaŋ ŋaa ʋ nɩaa. Wɩa tɩtɩa jaŋ hɔŋ ba teeŋ a ŋaa ba Wɩa.

⁴ Ʋ jaŋ fɩɩsɛ ba sɩlɩɩrɩŋ kala ta. Ba bɩra bɩ jaŋ sʋʋ, ba tʋɔŋ bɩra bɩ jaŋ chei. Ba bɩra bɩ jaŋ yel a bɩra bɩ jaŋ na hɛɛŋ ma, bɛɛ wɩaa wʋbɩnɩa-la kala bala nɛ.”

⁵ Ŋɩɩ nɛ Nɩɩ-la sɩ hɔŋ kuoru kpasa-la nyuŋ bʋl, “Má bee na, mɩ ŋaa kʋŋkala bɩrɩmɛ kʋfalɩɩ nɛ.” Ŋɩɩ nɛ aŋ bɩra bʋl, “Ŋmʋnsɛ wɩaa deemba mɩ sɩ bʋla, bɛɛ wɩaa ba ŋaa wʋtɩtɩɩ nɛ, a magɛ dɩ nɩaa laaba dii.”

⁶ Ŋɩɩ nɛ ʋ bʋla pɩmɛ, “Wɩɩkala dɛrɛ nɛ. Mɩ nɛ ŋaa Alɩfa arɩ Omega, mɩ nɛ dɩ-suomuŋ arɩ dɩdɛrɩŋ. Nɩɩ-la kala lɩɩnyʋasʋŋ sɩ kɛnɛ, mɩ jaŋ ŋaa lɩɩ-bulo lɩɩ-la sɩɩ pɩ nɩaa mɩɩsɩŋ a pʋ dɩ ʋ nyʋa pɛɩ.

⁷ Nɩɩ-la kala sɩ wuo yuo dii Sɩtaanɩ jaŋ na kɩaa deemba kala. Mɩ jaŋ ŋaa ʋ Wɩa, ʋ ma jaŋ ŋaa mɩ bii.

⁸ Ama nɩalɩŋ sɩ ŋaa fawʋlʋba, arɩ nɩalɩŋ sɩ bɩ Wɩa wɩaa laa dii, arɩ disiŋ ŋaaraa, arɩ nɩkpʋʋraa, arɩ nɩalɩŋ sɩɩ ŋaa wʋlɩɩlɩŋ, arɩ nɩalɩŋ sɩɩ ŋaa chichiribi wɩaa, arɩ vʋɩ-kpaaraa, arɩ nɩalɩŋ kala sɩɩ nyɩɛ wɩaa, ba jaŋ jʋʋ nyiniŋ sɩɩ dii a nagɛ jiribiiŋ tʋɔŋ. Sʋʋ bʋlɩa-la nɛ ŋɩɩ.”

Jerusalɛm falɩɩ-la

⁹ Ŋɩɩ nɛ Wɩa tɩndaaraa balɩpɛ-la sɩ kori gbansɩŋ balɩpɛ-la sɩ suo arɩ dɩdɛrɩŋ wʋbɔmɔ-la balɩpɛ kʋ bʋla pɩmɛ, “Kɔ dɩ mɩ dagɩŋ haal-la Pie-bie-la sɩ jaŋ jaa.”

¹⁰ Ŋɩɩ nɛ Wɩa Dɩŋ-zɔmʋŋ kʋ hɛ mɩ lɛ, Wɩa tɩndaarʋ-la jommi kaa jɩl peel-bal kʋbala sɩ leŋie nyuŋ. Ŋɩɩ nɛ ʋ dagɛmɛ taŋ-la sɩ bɩ disiniŋ kɛnɛ baa yɩrɛ Jerusalɛm, dɩ ʋ lɩɩ Wɩa-jaŋ kuu tuu tinteeŋ.

¹¹ Wɩa tʋla chaana hɛ taŋ-la lɛ, ʋ tʋtʋl a nagɛ tabɩɩ-tʋlaa, a bɩra nagɛ tabɩɩ-la ba sɩɩ yɩrɛ jasɩpa, a tʋtʋl a nagɛ beenantɩrɛ.

¹² Taŋ-la kɛŋ kɛrɛ-bal kʋbala nɛ. Ʋ leŋie nɛ woruŋ a kɛŋ boiŋ-niiriŋ fii arɩ balɩa a golli. Wɩa tɩndaaraa fii arɩ balɩa chɩŋ boye-la lɛ, ka ba ŋmʋnsɛ Iziral doho doho fii arɩ balɩa-la yɩraa hɛ boye-la lɛ.

¹³ Wɩɩpɔsʋŋ dɩɩrɩŋ kɛŋ boyee batori nɛ, wɩɩpɔsʋŋ nagʋa ma kɛŋ batori, wɩɩpɔsʋŋ nadiiŋ ma kɛŋ batori, wɩɩjʋʋlʋŋ dɩɩrɩŋ ma kɛŋ batori.

¹⁴ Kɛrɛ-la gentine lɛ, ba bil tabɩaa fii arɩ balɩa nɛ. Tabɩa-la lɛ nɛ ba ŋmʋnsɛ Pie-bie-la nanzɔɔba fii arɩ balɩa-la yɩraa hɛ.

¹⁵ Wɩa tɩndaarʋ-la sɩ bʋl wɩaa mɩ teeŋ kori sɛlɩmɛ daaŋ ba sɩ kaa magɩsɛ kɩaa nɛ dɩ ʋ kaa magɩsɛ tabal-la arɩ ʋ boi-baalaa arɩ ʋ kɛrɩsɩŋ.

¹⁶ Tabal-la sɛsɩŋ kala magɛ dɔŋɔ nɛ. Ŋɩɩ nɛ ʋ magɩsɛ taŋ-la arɩ sɛlɩmɛ daa-la dɩ ʋ ŋaa meel-daasɩŋ bʋɩ arɩ zɔɔ-banɔŋ. Ʋ duomuŋ arɩ ʋ jalɩŋ arɩ ʋ leŋiŋ kala magɛ dɔŋɔ nɛ.

¹⁷ Wɩa tɩndaarʋ-la bɩra magɩsɛ tabal-la kɛrɛ-la barɩmɩŋ ma, ʋ ŋaa naakieliŋ mahɩŋ batori arɩ fii arɩ balɩa. Nuhuobiinee sɩɩ magɩsɛ kɩaa ŋɩɩ, ŋɩɩ tɩtɩa nɛ Wɩa tɩndaarʋ-la ma magɩsɛ.

¹⁸ Ba kɛŋ tabɩa-la ba sɩɩ yɩrɛ jasɩpa nɛ kaa saa kɛrɛ-la, aŋ ka tabal-la kala ŋaa sɛlɩmɛ, a kala chaanɛ pɩrr a nagɛ beenantɩrɛ.

¹⁹ Tabal-la kɛrɛ-la gentine tabɩaa kala ŋaa tabɩɩ-zɔmɔ nɛ ba kaa kpɩɛrɛ. Bumbuŋ kʋa yɩrɩŋ nɛ jasɩpa, lɩamɩŋ kʋa ma yɩrɩŋ nɛ safɩya, torimuŋ kʋa ma yɩrɩŋ nɛ agɛtɩ, nɛsɩmɩŋ kʋa ma yɩrɩŋ nɛ ɛmɛral,

²⁰ nɔŋ kʋa yɩrɩŋ nɛ ɔnɩs, dʋmʋŋ kʋa yɩrɩŋ nɛ kaanɛlɩaŋ, pɛɛmɩŋ kʋa yɩrɩŋ nɛ kirisola, chorimuŋ kʋa ma ŋaa bɛrɛl, nibimiŋ kʋa ma yɩrɩŋ nɛ topas, fiimiŋ kʋa yɩrɩŋ nɛ kirisopiris, fii arɩ kʋŋ kʋa yɩrɩŋ nɛ jasɩŋ, ka fii arɩ balɩamɩŋ kʋa ma yɩrɩŋ ŋaa amɛtɩs.

²¹ Boi-baala-la fii arɩ balɩa kala ŋaa bʋ-sɩaa fii arɩ balɩa nɛ. Boi-kala ŋaa bʋ-sɩɩ bala. Tabal-la womporuŋ kala, sɛlɩmɛ sɩ chaasa zɔŋ nɛ ba kaa ŋaa, a tʋtʋl a nagɛ beenantɩrɛ.

²² Ŋɩɩ nɛ mɩ beŋ tabal-la tʋɔŋ a bɩ Wɩa dɩɩ-bal kala na nɩmɛ, bɛɛ wɩaa La Tɩɩna Wɩa doluŋ kala Tɩɩna arɩ Pie-bie-la nɛ ŋaa Wɩa dɩɩ-balɩŋ lee-la.

²³ Tabal-la bɩra bɩ wɩɩpɔsʋŋ arɩ chɛnɛ ka chɛ, bɛɛ wɩaa Wɩa tʋla nɛ ŋaa ba pʋlʋmʋŋ. Pie-bie-la ma nɛ ŋaa ba chaanɩŋ.

²⁴ Ʋ pʋlʋmʋŋ lɛ nɛ dʋnɩa nɩaa kala jaŋ vɛŋ. Dʋnɩa kuoroo kala jaŋ kɛŋ ba dʋa kaa jʋʋ nɩmɛ.

²⁵ Ba bɩ jaŋ kɔ dɩ ba kɛŋ tabal-la boi-baala-la kaa tɔ, bɛɛ wɩaa, tɩtaŋɩŋ tuo nɩmɛ.

²⁶ Tinteyee nɩaa kala jaŋ kɛŋ ba dʋa arɩ ba kuori kɩaa kaa jʋʋ nɩmɛ.

²⁷ Ama kʋŋkala sɩ kɛŋ disiniŋ, koo nɩɩ-la kala sɩ ŋaa nɩbɔŋ, koo wʋnyɩɛrʋ kala bɩ jaŋ jʋʋ taŋ-la, see nɩalɩŋ Pie-bie-la sɩ ŋmʋnsɛ ba yɩraa hɛ mɩɩsɩŋ teŋ-la lɛ nɛ jaŋ jʋʋ nɩmɛ.