Jɔɔŋ Wʋnaalaa 20 - WƖA TENIŊ

Nɩalɩŋ sɩ beŋ dʋnɩa nɩaa jɩsɩŋ bʋɩ

¹ Ŋɩɩ nɛ mɩ na Wɩa tɩndaara dɩ ʋ lɩɩ Wɩa-jaŋ a kʋʋ tuu tinteeŋ, a kori buotuo-luŋii-la boribiiŋ arɩ chɔrʋŋ-bal kʋbala.

² Ŋɩɩ nɛ ʋ kɛŋ dɩŋ-la, dɩŋ-la fa sɩ hɛ nɩmɛ bumbuŋ, a vɔbʋ bil jɩsɩŋ bʋɩ. Dɩŋ-la nɛ ŋaa Sɩtaanɩ.

³ Ŋɩɩ nɛ Wɩa tɩndaarʋ-la joŋ dɩŋ-la a yuo hɛ buotuo-la lɛ a kaa tɔ, a magɩlɛ buotuo-la niiŋ, dɩ ʋ bɩra sɩ́ dʋnɩa nɩaa nyɩsʋ, see dɩ jɩsɩŋ bʋɩ-la bala. Dɩ jɩsɩŋ bʋɩ-la nɛ bala, ba jaŋ kɛnʋ puro ta mʋapɩlɩɩ.

⁴ Ŋɩɩ nɛ mɩ na kuoru kpasɩnɩŋ dɩ nɩaa hɔŋ ba nyuŋ. Nɩaa deemba nɛ Wɩa pa doluŋ dɩ ba dii dʋnɩa nɩaa sarɩya. Ŋɩɩ nɛ aŋ ka mɩ na nɩaa dɩnsɩŋ. Nɩaa deemba nɛ faa bʋl wʋtɩtɩɩ-la Yesu fa sɩ daga a pɩ nɩaa, aŋ pɛɛ bʋl Wɩa niiŋ wɩaa. Ŋɩɩ nɛ ba kpʋba a keri ba nyusuŋ. Nɩaa deemba-na fa bɩ baga kʋ-la ka chʋɔlɛ, ba bɩ kʋ-la ba sɩ mɛ ʋ nagʋ ma chʋɔlɛ. Ba bɩ baga kʋ-la magɩlɩŋ kɛnɛ ba tilliŋ lɛ koo ba nɩsaa lɛ. Nɩaa deemba sii sʋʋŋ lɛ, ba dɩ Kirisito dii kuoruŋ a beŋ dʋnɩa nɩaa jɩsɩŋ bʋɩ.

⁵ Nɩalɩŋ sɩ laa sɩpaaŋ sii sʋʋŋ lɛ nɛ ŋɩɩ. Nɩalɩŋ sɩ sʋba, nɩkaanaa bɩ jaŋ sii sʋʋŋ lɛ, see dɩ jɩsɩŋ bʋɩ-la dɛrɛ.

⁶ Nɩalɩŋ sɩ laa sɩpaaŋ sii sʋʋŋ lɛ, ba bɩ disiniŋ kɛnɛ. Wɩa jaŋ pɛ ba lɛ. Nɩaa deemba sʋʋ bala nɛ, sʋʋ-lɩa-la ma bɩ jaŋ wuoba. Ba jaŋ laa nɩaa nyuŋ a tɩma pɩpɩ Wɩa arɩ Kirisito. Ba dɩ Kirisito jaŋ dii kuoruŋ jɩsɩŋ bʋɩ.

Ba yuo dii Sɩtaanɩ

⁷ Dɩ jɩsɩŋ bʋɩ-la nɛ kiele, ba jaŋ lɩɩsɛ Sɩtaanɩ sarɩka-la lɛ.

⁸ Ʋ jaŋ kʋ lɩɩ a nyɩsɛ dʋnɩa nɩaa sɩ hɛ tinteeŋ sɛmɛ-na kala lɛ dɩ ba kʋ hɛ dɔŋɔ a yuo laalɩŋ. Gɔg arɩ Magɔg nɩaa nɛ ŋɩɩ. Ba yʋga nɛ woruŋ a nagɛ mʋgʋ-balɩŋ niiŋ hagɩlɩ-bumbugulo.

⁹ Ŋɩɩ nɛ ba dʋʋrɛ dʋnɩa kala a mʋ golli lee-la Wɩa nɩaa sɩ hɛ, arɩ taŋ-la Wɩa sɩ cho. Ama nyiniŋ lɩɩ wɩa-nyuŋ a kʋ tuu dii ba kala.

¹⁰ Sɩtaanɩ nɛ nyɩsɛ Gɔg arɩ Magɔg nɩaa hɛ dɩ ba yuo Wɩa nɩaa. Ŋɩɩ nɛ ba joŋu a yuo hɛ nyiniŋ sɩɩ dii a nagɛ jiribiiŋ lɛ, lee-la ba sɩ joŋ baga kʋ-la arɩ nɩɩ-la sɩ nyɩɛ wɩaa arɩ ʋ ŋaa Wɩa wʋlaabʋllʋ a yuo a hɛ. Ba jaŋ na hɛɛŋ wɩɩhɛyɛ arɩ tɩtaŋɩŋ kala a kaa mʋ wuu.

Ba dii dʋnɩa nɩaa sarɩya

¹¹ Ŋɩɩ nɛ mɩ na kuori-kpasɩ-bal kʋbala sɩ ŋaa kʋpʋla dɩ ʋ chɩna, nʋʋ hɔŋ ʋ nyuŋ. Ŋɩɩ nɛ mɩ na dɩ tinteeŋ arɩ wɩa-nyuŋ kala lɛlɛ nɩɩ-la sɩɩŋ lɛ. Ba bɩra bɩ lee kɛnɛ.

¹² Ŋɩɩ nɛ ka mɩ na nɩalɩŋ sɩ sʋba, nɩhɩasɩŋ arɩ hambiisiŋ kala, dɩ ba chɩŋ kuoru kpasa-la sɩpaaŋ. Ŋɩɩ nɛ ba suri tenniŋ, a bɩra suri teniŋ dɔŋɔ ma, mɩɩsɩŋ teniŋ nɛ ŋɩɩ. Tenni-la lɛ nɛ ba ŋmʋnsɛ nʋʋkala sɩ hɛ dʋnɩa lɛ wʋŋaalaa hɛ, ba lɛ nɛ ba to a dii nʋʋkala sɩ sʋba sarɩya.

¹³ Ŋɩɩ nɛ mʋgʋ-balɩŋ kɛŋ nɩalɩŋ kala sɩ sʋʋ ʋ tʋɔŋ kʋ lɩɩ. Sʋʋŋ arɩ lɛlɛɛ-jaŋ ma joŋ nɩalɩŋ sɩ hɛ ba lɛ ta, ba kala kʋ lɩɩ. Ŋɩɩ nɛ ba beŋ nʋʋkala wʋŋaalaa sɩ maga ŋɩɩ a dii ʋ sarɩya.

¹⁴ Ŋɩɩ nɛ ba joŋ sʋʋŋ arɩ lɛlɛɛ-jaŋ a yuo hɛ nyiŋ-bal-la lɛ. Nyiŋ-bal-la nɛ ŋaa sʋʋ bʋlɩa.

¹⁵ Dɩ nʋʋkala yɩrɩŋ nɛ tuo mɩɩsɩŋ teŋ-la tʋɔŋ, ba yie joŋu yuo hɛ nyiŋ-bal-la tʋɔŋ nɛ.