Jɔɔŋ Wʋnaalaa 19 - WƖA TENIŊ

Pie-bie-la hajaarɩ gbiele

¹ Wɩaa deemba kala sɩ ŋaa harɩŋ, ŋɩɩ nɛ mɩ nɩɩ goŋ Wɩa-jaŋ lɛ. Goŋ-la nagɛ nɩ-daŋ yikoro nɛ aa bʋl, “Haleluya, La Tɩɩna Wɩa kɛŋ doluŋ dɩ ʋ laala ta. Ʋ nɛ kɛŋ yɩrɩŋ arɩ doluŋ.

² Ʋʋ dii nɩaa sarɩya arɩ wʋtɩtɩɩ nɛ. Ʋ dii hachɔrʋŋ-bal-la sarɩya nɛ, nɩɩ-la sɩ ŋaa wʋlɩɩlɩŋ a chei dʋnɩa kala. Wɩa dɔgɩsʋ nɛ a tɩŋ ʋ sɩ kpʋ ʋ tɩntɩnnaa.”

³ Ŋɩɩ nɛ ba bɩra ŋaa goŋ a bʋl, “Haleluya, nyiŋ-la sɩɩ dii haal-la nyʋɔsʋŋ ka jɩl wɩa-nyuŋ nɛ a kaa mʋ wuu.”

⁴ Ŋɩɩ nɛ nɩhɩasɩŋ mara arɩ banɛsɛ-la arɩ kɩalɩŋ banɛsɛ sɩ weye tuu kpirimi a chʋɔlɛ Wɩa sɩ hɔŋ ʋ kuoru kpasa nyuŋ a bʋl, “Amɩɩ, Haleluya.”

⁵ Ŋɩɩ nɛ nʋʋ yikoro lɩɩ Wɩa kuoru kpasa-la teeŋ a bʋl, “Ma Wɩa tɩntɩnnaa kala arɩ ma nɩalɩŋ kala sɩɩ fáʋ, nɩhɩasɩŋ arɩ hambiisiŋ kala, má leŋ dɩ la dɛnnɛ Wɩa.”

⁶ Ŋɩɩ nɛ mɩ bɩra nɩɩ nɩ-daŋ goŋ. Goŋ-la fa nagɛ fuo-balaa sɩɩ pɛllʋ nɛ gbul gbul. Ʋ bɩra nagɛ duonuŋ sɩɩ kpɩa ŋmana ŋmana aŋ pɛ lɩlɩgɩsɛ. Ŋɩɩ nɛ yikoro-la heele bʋl, “Haleluya, La Tɩɩna Wɩa doluŋ kala Tɩɩna dii ʋ kuoruŋ nɛ.

⁷ Má leŋ dɩ la jʋjʋɔsɛ a yɩrɛ ʋ yɩrɩ-balɩŋ a dɛnnʋ woruŋ. Bʋa-la Pie-bie-la sɩ jaŋ jaa haala yie nɛ. Haal-la ma sɩ jaŋ jaaʋ kɛŋ ʋ tɩtɩa hɛ dɔŋɔ nɛ.

⁸ Ba joŋ gɛrɩpɛ tʋlʋŋ sɩ chaasa zɔŋ nɛ a pɩ haal-la dɩ ʋ laalɛ. Gɛrɩpɛ tʋlɩɩ-la nɛ ŋaa Wɩa nɩaa tʋɔpʋl wʋŋaalaa.”

⁹ Ŋɩɩ nɛ Wɩa tɩndaarʋ-la bʋla pɩmɛ, “Ŋmʋnsɛ wɩɩŋ deeŋ, ‘Wɩa jaŋ pɛ nɩalɩŋ ba sɩ yɩra dɩ ba kʋ gbieli Pie-bie-la hajaarɩ gbiele a dii kʋdiilee nɩmɛ.’ ” Ŋɩɩ nɛ Wɩa tɩndaarʋ-la bʋla pɩmɛ, “Wɩa niiŋ wɩaa wʋtɩtɩɩba nɛ ŋɩɩ.”

¹⁰ Ŋɩɩ nɛ mɩ tuu kpirimi dɩ mɩ chʋɔlʋ, ama ʋ bʋla pɩmɛ, “Sɩ́ ŋɩɩ ŋaa, la kala ŋaa tɩntɩnnaa a tɩma pɩpɩ Wɩa, la dɩ nɩalɩŋ kala sɩɩ to wɩalɩŋ Yesu sɩ bʋla. Wɩa nɛ maga ŋ chʋɔlɛ. Wʋtɩtɩɩ-la Yesu sɩ daga nɛ leŋe Wɩa wʋlaabʋllaa kɛŋ doluŋ aa bʋl Wɩa wɩaa.”

Ja-pʋla jɩjɩllʋ-la

¹¹ Ŋɩɩ nɛ mɩ na Wɩa-jaŋ dɩ ʋ suro. Mɩ beŋ a na ja-pʋla dɩ nʋʋ jɩla. Nɩɩ-la sɩ jɩla yɩrɩŋ nɛ Nɩtɛŋɛ arɩ Wʋtɩtɩɩ Tɩɩna. Ʋ dii nɩaa sarɩya arɩ wʋtɩtɩɩ nɛ, aa yuo laalɩŋ ma arɩ wʋtɩtɩɩ.

¹² Ʋ sɩaa kala chuchol a nagɛ nyiŋgeliŋ, aŋ ka ʋ chu kuori-nyunchuuluŋ a yʋgɛ. Ba ŋmʋnsɛ yɩrɩŋ hɛ ʋ lɛ, ama nʋʋkala bɩ yɩrɩ-la jɩŋ, see ʋ tɩtɩa.

¹³ Ʋ laalɛ gɛrɩŋ chalɩŋ sɩ mɩsa nɛ. Baa yɩrɛ nɩɩ-la yɩrɩŋ Wɩa Niiŋ Wɩaa nɛ.

¹⁴ Wɩa-jaŋ laalɩyuoroo laalɛ gɛrɩ-fʋfʋlaa, a ma jɩl ja-pʋllʋŋ a tuto ʋ harɩŋ nɛ.

¹⁵ Ŋɩɩ nɛ tokobiiŋ sɩ kɛŋ niiŋ woruŋ nyagaga lɩɩ ʋ niiŋ lɛ a kʋ lɩɩ. Tokobii-la nɛ ʋ jaŋ kaa yuo dii tinteyee nɩaa kala. Ʋ jaŋ kɛŋ hɔɔŋ dantɩga a beŋ dʋnɩa nɩaa. Ʋ jaŋ dagɛ dʋnɩa nɩaa ŋɩɩ Wɩa doluŋ kala Tɩɩna sɩ na baanɩŋ ba nyuŋ a magɛ. Ʋ jaŋ nʋɔsɛ ba bʋrɩgɛ a nagɛ ba sɩ yie bʋrɩgɛ tɩɩnɛnɛɛ ŋɩɩ a lɩɩsɛ sɩnɩŋ.

¹⁶ Ba ŋmʋnsɛ yɩrɩŋ deeŋ nɛ hɛ gɛrɩ-duduoŋ-la ʋ sɩ laala lɛ arɩ ʋ naapuiŋ lɛ: “KUOROO KALA KUOROO ARƖ LA TƖNNABA KALA TƖƖNA.”

¹⁷ Ŋɩɩ nɛ aŋ ka mɩ na Wɩa tɩndaarʋ kʋbala dɩ ʋ chɩŋ wɩɩpɔsʋŋ lɛ, a yɩrɛ diibiisi-la kala sɩɩ fil wɩa-nyuŋ dɩ-bolii arɩ yikoru-balɩŋ a bʋl, “Má kʋ hɛ dɔŋɔ lɛ a dii kʋdii daŋ-la Wɩa sɩ ŋaa.

¹⁸ Má kʋ dii kuoroo nammɩa, laalɩyuori-hɩasɩŋ arɩ nɩduoruŋ nammɩa, janɩŋ arɩ ba jɩjɩllaa nammɩa, nuhuobiinee, nɩalɩŋ sɩ tɩɩ ba tɩtɩa, nɩalɩŋ sɩ ŋaa yosuŋ, nɩhɩasɩŋ arɩ hambiisiŋ kala nammɩa.”

¹⁹ Ŋɩɩ nɛ ka mɩ na baga kʋ-la arɩ dʋnɩa kuoroo arɩ ba laalɩyuoroo dɩ ba hilime dɩ ba yuo nɩɩ-la sɩ jɩl jɔɔ-la arɩ ʋ laalɩyuoroo.

²⁰ Nɩɩ-la sɩ jɩl jɔɔ-la arɩ ʋ laalɩyuoroo yuo dii baga kʋ-la a kɛŋ ʋ dɩ nɩɩ-la sɩ nyɩɛ wɩaa arɩ ʋ ŋaa Wɩa wʋlaabʋllʋ kala. Nɩɩ-la fa sɩ ŋaa wʋmagɩlaa baga kʋ-la nyuŋ a wuo nyɩsɛ nɩalɩŋ sɩ kɛŋ baga kʋ-la magɩlɩŋ, aa chʋɔlɛ baga kʋ-la nagɩsɩŋ ba sɩ mɛ bil. Nɩaa deemba balɩa kʋweyee nɛ ba joŋo yuo hɛ Wɩa nyiŋ-la sɩɩ dii a nagɛ jiribiiŋ lɛ.

²¹ Nɩɩ-la sɩ jɩl jɔɔ-la kɛŋ tokobii-la sɩ lɩɩ ʋ niiŋ lɛ kaa kpʋ nɩkaanaa. Diibiisiŋ lorigi ba nampɩlɩŋ kala.