Jɔɔŋ Wʋnaalaa 18 - WƖA TENIŊ

Babɩlɔŋ tele

¹ Wɩaa deemba kala sɩ ŋaa bal, mɩ bɩra na Wɩa tɩndaara dɔŋɔ dɩ ʋ lɩɩ Wɩa-jaŋ a kʋ tuu tinteeŋ. Ʋ fa kɛŋ doluŋ nɛ woruŋ, ka ʋ tʋla leŋ dʋnɩa kala pʋllɛ.

² Ŋɩɩ nɛ ʋ faasa suri ʋ yikoro a bʋl, “Babɩlɔŋ tele, Babɩlɔŋ tabal-la tele. Ʋ lɛɛlɛ bɩrɩmɛ jɩŋ-bɔŋŋɔɔ arɩ diibiisiŋ sɩ kɛŋ disiniŋ arɩ kɩalɩŋ ba sɩɩ kɩɩsʋ kala dɩjʋʋlʋŋ nɛ.

³ Babɩlɔŋ nɩaa joŋ ba wʋlɩɩlɩŋ a dagɛ tintee kala nɩaa nɛ. Wʋlɩɩlɩ-la nagɛ sɩ-duoŋ nɛ. Dʋnɩa kuoroo ma kɛnʋ ŋaa wʋlɩɩlɩŋ. Dʋnɩa bayalaa ma to ʋ wʋlɩɩlɩ-la lɛ a dʋa kɩaa.”

⁴ Ŋɩɩ nɛ mɩ bɩra nɩɩ nʋʋ yikoro dɩ ʋ lɩɩ Wɩa-jaŋ aa bʋl, “Mɩ nɩaa, má sii Babɩlɔŋ lɛ, dɩ ŋɩɩ dee ma jaŋ pɛ ŋɩŋaa wʋbɔmɔ-la ba sɩɩ ŋaa. Dɩ ma nɛ ŋaa ŋɩɩ, mɩ jaŋ pɛ dɔgɩsɛma arɩ mɩ sɩɩ chɛ dɩ mɩ dɔgɩsɛ Babɩlɔŋ nɩaa ŋɩɩ.

⁵ Ba wʋbɔŋŋɔɔ chʋara nɛ a jɩlaa tɩgɛ wɩa-nyuŋ, ŋɩɩ nɛ tɩɩ Wɩa bɩ ba wʋbɔmɔ-la wɩaa yʋa.

⁶ Wɩalɩŋ ba sɩ ŋaa ma lɛ, má ma joŋo ŋaa ba lɛ, a tiŋ ma chɩmɩŋ naansɩɩŋ bʋlɩa. Gbaŋa-la ba sɩ kaa ŋaa sɩnɩŋ pɩma ma nyʋa, má ma kɛŋ ʋ tɩtɩa a ŋaa sɩnɩŋ naansɩɩŋ bʋlɩa pɩba dɩ ba nyʋa.

⁷ Má dɔgɩsɛba dɩ ba na hɛɛŋ, a magɛ ŋɩɩ ba sɩ bigisi ba tɩtɩa lɛ arɩ ŋɩɩ ba sɩ nɩɩ sɩma. Ba yie bɩɩnɛ ba kuoro nɛ, ba tʋɔŋ bɩ jaŋ chei a nagɛ yo-haala. Ba yie bʋl arɩ ba bɩ jaŋ kɔ dɩ ba yele.

⁸ Ŋɩɩ wɩaa wʋlɔrʋnʋŋ deemba jaŋ jʋʋba chɛ-bala: Ʋ nɩaa jaŋ sʋʋ, dɩ ba tʋɔŋ chei, dɩ losuŋ ma jʋʋba. Nyiniŋ ma jaŋ diiba. Wɩaa deemba kala jaŋ ŋaa, bɛɛ wɩaa La Tɩɩna Wɩa sɩ jaŋ diiu sarɩya kɛŋ doluŋ.”

⁹ Dɩ dʋnɩa kuorusu-la sɩ kɛnʋ ŋaa wʋlɩɩlɩŋ aŋ pɛ nɩɩ ʋ sɩma-la nɛ na nyiŋ-la sɩɩ diiu nyʋɔsʋŋ, ba tʋɔŋ jaŋ chei dɩ ba yel.

¹⁰ Dɩ ba nɛ beŋ hɛɛ-la taŋ-la nɩaa sɩɩ na, fawʋllʋŋ jaŋ kɛmba. Ba jaŋ chɩŋ dɩ-bolii a ŋmoo niiŋ bʋl, “Ou, ou, tabalɩŋ deeŋ, tabal-la ba sɩɩ yɩrɛ Babɩlɔŋ sɩ kɛŋ doluŋ, ʋ bɩ diene ka ba dɔgɩsʋ.”

¹¹ Dʋnɩa bayalaa jaŋ yel Babɩlɔŋ nɩaa wɩaa, bɛɛ wɩaa nʋʋkala tuo a bɩraa yɔɔ ba kɩaa.

¹² Kɩalɩŋ ba sɩɩ yallɛ nɛ ŋ-la: Sɛlɩmɛ, hɔpʋla, tabɩɩ-tʋlaa, bʋ-sɩaa gɛrɩpɛ tʋlaa, gɛrɩpɛ-fʋfʋlaa, gɛrɩpɛ-fɩɛsɩŋ, arɩ daasɩ-la kala yallɩŋ sɩ hɛyɛ, arɩ kɩalɩŋ kala ba sɩ kɛŋ batu-nyɩlaa ŋaa, arɩ kɩalɩŋ kala ba sɩ kɛŋ daa-la yallɩŋ sɩ hɛyɛ saa, arɩ kɔlɩɩŋ, arɩ kɩalɩŋ ba sɩ kɛŋ hɔɔŋ ŋaa, arɩ lokuŋ-bʋɩyaa,

¹³ kɩaa ba sɩ yie joŋo hɛ kʋdiilee lɛ ba sʋɔra sɩŋ arɩ tegisiŋ, kʋsʋɔrʋsʋŋ, tɩɩ-kel-la ba sɩɩ yɩrɛ mɛɛ arɩ fɩraŋkɩsɛŋ, sɩnɩŋ, nʋʋŋ, munuŋ sɩ bɩɩ nʋgʋgʋ, mɩaa, nɛsɩŋ, arɩ piesee, arɩ janɩŋ, arɩ janɩŋ torukoba, arɩ yosuŋ arɩ nɩaa ba sɩ yuo kɛsɛ laalɩŋ lɛ.

¹⁴ Bayalɩa-la jaŋ bɩra bʋl, “Kʋzɔmɔ-la kala ma fa sɩɩ hɩɛnʋ, ma tel ba kala lɛ nɛ, ma kʋzɔŋ-zɔŋ-na kala arɩ ma sɩma-la kala ma fa sɩɩ nɩɩ, ba bɩra tuo. Ma bɩra bɩ jaŋ kɔ dɩ ma naba.”

¹⁵ Bayalɩa-la kala fa sɩ yallɛ kɩaa pɩ Babɩlɔŋ nɩaa aa na moribiee, ba jaŋ fá fawʋllʋŋ a tɩŋ hɛɛ-la Babɩlɔŋ nɩaa sɩɩ na. Ba kala jaŋ chɩŋ dɩ-bolii a faasa ŋmoo niiŋ a yele bʋbʋl,

¹⁶ “Ou, ou, tabalɩŋ deeŋ fa zɔmɔ a kɛŋ kʋzɔŋŋɔɔ maa. Ʋ nɩaa fa lɩlaalɛ gɛrɩpɛ-tʋlaa, gɛrɩpɛ-vachalɩŋ arɩ gɛrɩ-fɩɛsɩŋ gɛnnɩŋ, a lɩlaalɛ banzɔlɔba ba sɩ kɛŋ sɛlɩmɛ, tabɩɩ-tʋlaa arɩ bʋ-sɩaa a ŋaa.

¹⁷ Ʋ bɩ diene ka kɩaa deemba kala lɛl ŋ teeŋ.” Ŋɩɩ nɛ nɩalɩŋ sɩɩ duori lɩɩŋ dabori-bala-la sɩɩ vɛŋ mʋgʋ-balɩŋ tʋɔŋ kʋhɩasɩŋ, arɩ nɩalɩŋ sɩɩ tɩŋ daboro-la tʋɔŋ, arɩ nɩalɩŋ sɩɩ jʋʋ lɩɩŋ daborusuŋ a mʋmʋ leree, arɩ nɩalɩŋ kala sɩɩ chɛ kɩaa mʋgʋ-balɩŋ tʋɔŋ, ba chɩŋ dɩ-bolii.

¹⁸ Dɩ ba nɛ na nyiŋ-la sɩɩ diiu nyʋɔsʋŋ, ba jaŋ ŋmoo niiŋ a bʋl, “Ta bɛɛ nɛ fa hɛ nɩmɛ a magɛ tabalɩŋ deeŋ?”

¹⁹ Ba jaŋ ŋaa hagɩla hɩhɛ ba nyusuŋ lɛ aŋ yele bʋbʋl, “Ou, ou, tabalɩŋ deeŋ lɛ nɛ nɩalɩŋ kala fa sɩ kɛŋ lɩɩŋ daborusuŋ to a jigi. Má bee na, ʋ bɩ diene ka kɩalɩŋ kala ʋ fa sɩ kɛnɛ lɛl.

²⁰ Ma nɩalɩŋ sɩ hɛ Wɩa-jaŋ lɛ, má jʋjʋɔsɛ Babɩlɔŋ wɩaa. Ma Wɩa nɩaa arɩ Wɩa nanzɔɔba arɩ Wɩa wʋlaabʋllaa, má jʋjʋɔsɛ. Wɩa joŋ wɩalɩŋ Babɩlɔŋ sɩ ŋaa ma lɛ chɩmɩŋ a tiŋ ʋ lɛ nɛ.”

²¹ Ŋɩɩ nɛ Wɩa tɩndaarɩ-duo kʋbala joŋ tabɩɩ-balɩŋ sɩ magɛ nɔmʋŋ a yuo hɛ mʋgʋ-balɩŋ tʋɔŋ aŋ bʋl, “Ŋɩɩ tɩtɩa nɛ ba jaŋ ŋaa Babɩlɔŋ tabal-la lɛ. Ba jaŋ joŋu yuo ta arɩ doluŋ. Ʋ jaŋ lɛl dʋnɩa lɛ.

²² Nʋʋ bɩra bɩ jaŋ nɩɩ cheŋ-dunuŋ nɩmɛ, nɩaa bɩra bɩ jaŋ yɩyɩɩ yɩɩlaa nɩmɛ, ŋmʋl-ŋmɩɩraa arɩ nyil-ŋmɩɩraa ma bɩra bɩ jaŋ ŋmʋŋmʋʋ. Tɩntɩnnɩ-gɔgɔ kala bɩra bɩ jaŋ hɛ nɩmɛ. Nɩaa bɩra bɩ jaŋ nʋnɔŋ munuŋ ʋ lɛ.

²³ Chaanaa ma bɩra bɩ jaŋ chaanɛ ʋ tʋɔŋ. Baalaa arɩ haalaa bɩra bɩ jaŋ jaa dɔŋɔ ʋ lɛ. Babɩlɔŋ bayalaa nɛ fa ŋaa nɩbalaa dʋnɩa deeŋ lɛ. Ʋ kɛŋ ʋ chichiribi wɩaa a nyɩsɛ dʋnɩa nɩaa kala.

²⁴ Babɩlɔŋ lɛ nɛ ba kpʋ Wɩa wʋlaabʋllaa, arɩ Wɩa nɩaa, arɩ nɩalɩŋ kala bɩ sɩ kpʋa dʋnɩa lɛ.”