Jɔɔŋ Wʋnaalaa 17 - WƖA TENIŊ

Hachɔrʋmʋŋ sɩ hɔŋ baga kʋa nyuŋ

¹ Ŋɩɩ nɛ Wɩa tɩndaaraa balɩpɛ-la sɩ kori gbansɩŋ balɩpɛ-la, ba dɔŋɔ kɔ mɩ teeŋ a bʋla pɩmɛ, “Kɔ dɩ mɩ dagɩŋ ŋɩɩ Wɩa sɩ jaŋ dɔgɩsɛ hachɔrʋŋ kpantɩɩgʋ deeŋ. Ʋ nɛ hɔŋ lee-la lɩɩŋ sɩ hɛ kɩŋkɛŋ ŋɩɩ.

² Dʋnɩa kuoroo arɩ dʋnɩa nɩaa kala kɛnʋ ŋaa wʋlɩɩlɩŋ a kala bugi, a nagɛ ba sɩ nyʋa sɩ-duoŋ.”

³ Ŋɩɩ nɛ Wɩa Dɩŋ-zɔmʋŋ kʋ hɛ mɩ lɛ, Wɩa tɩndaara jommi kaa jʋʋ tintee-hɩlɩŋ tʋɔŋ. Nɩmɛ nɛ mɩ na haal kʋbala dɩ ʋ hɔŋ baga kʋfɩaŋ kʋbala nyuŋ. Ba fa ŋmʋnsɛ yɩraa sɩɩ tʋʋsɛ Wɩa joŋoo nɛ a hɛ baga kʋ-la yaraa kala lɛ. Ʋ fa kɛŋ nyusuŋ balɩpɛ nɛ, ʋ nyilliŋ ma ŋaa fii.

⁴ Haal-la fa laalɛ gɛrɩ-fɩaŋ arɩ gɛrɩ-vachalɩŋ, a hɛ sɛlɩmɛ kpɩɛraa arɩ tabɩɩ-tʋlaa a pɛ bʋ-sɩaa lɛ. Ʋ fa kori sɛlɩmɛ nyʋnyʋala nɛ. Wʋtɔɔnʋ arɩ wʋlɩɩlɩ-la ʋ sɩɩ ŋaa su nyʋnyʋala-la,

⁵ ka ba ŋmʋnsɛ yɩrɩ-kpuŋkpere a hɛ ʋ tile lɛ: “Babɩlɔŋ ŋaa tabal nɛ. Nɩalɩŋ kala sɩ hɛ dʋnɩa lɛ a ŋɩŋaa wʋtɔɔnʋŋ, arɩ wʋlɩɩlɩŋ naaŋ.”

⁶ Ŋɩɩ nɛ ka mɩ na haal-la dɩ ʋ nyʋa Wɩa nɩaa chalɩŋ, a pɛ nɩalɩŋ ba sɩ kpʋa a tɩŋ Yesu wɩaa lɛ a bugi. Mɩ sɩ naʋ, ʋ wɩaa kperimi kɩŋkɛŋ kɩŋkɛŋ.

⁷ Ŋɩɩ nɛ Wɩa tɩndaarʋ-la pɩɛsɛmɛ, “Bɛɛ kʋŋ nɛ tɩɩ wɩɩŋ deeŋ ŋaa wʋkpuŋkpere ŋ lɛ? Mɩ jaŋ dagɩŋ wɩalɩŋ sɩ faa a mʋ tɩgɛ haal-la lɛ, arɩ baga kʋ-la ʋ sɩ jɩla sɩ kɛŋ nyusuŋ balɩpɛ arɩ nyilliŋ fii.

⁸ Baga kʋ-la ŋ sɩ na nɛ fa hɛ nɩmɛ bumbuŋ aŋ bɩra tuo. Ʋ jaŋ lɩɩ buotuo-luŋii-la tʋɔŋ kʋ lɩɩ a mʋ sʋʋ. Nɩalɩŋ kala sɩ hɛ dʋnɩa lɛ ka ba bɩ ba yɩraa ŋmʋnsa hɛ mɩɩsɩŋ teŋ-la lɛ a lɩɩ dʋnɩa dɩ-suomuŋ jaŋ na baga kʋ-la dɩ ʋ ŋaaba wʋkpuŋkpere, bɛɛ wɩaa ʋ fa hɛ nɩmɛ bumbuŋ aŋ bɩra tuo, aŋ saa jaŋ bɩra kɔ.

⁹ Nɩɩ-la sɩ kɛŋ wʋjɩmɩŋ nɛ jaŋ wuo jɩŋ wɩɩŋ deeŋ bʋbʋɔŋ. Nyusuŋ balɩpɛ-la ŋaa peelee balɩpɛ nɛ. Ba nyuŋ nɛ haal-la hɔŋ. Nyusuŋ balɩpɛ-la ha ŋaa kuoroo ma balɩpɛ nɛ.

¹⁰ Kuoroo balɩpɛ-la tʋɔŋ banɔŋ nɛ sʋba, dɔŋɔ nɛ dii kuoruŋ lɛɛlɛ, aŋ ka dɔŋɔ-na ha bɩ kuoruŋ die. Dɩ ʋ ma nɛ kʋ dii kuoruŋ, ʋ bɩ jaŋ hɛ nɩmɛ a dieni.

¹¹ Baga kʋ-la fa sɩ hɛ nɩmɛ aŋ bɩra tuo, ʋ nɛ fa ŋaa kuori-chori. Ʋ ma pɛ kuorie-la balɩpɛ-la tʋɔŋ ba sɩ jaŋ chei nɛ.

¹² Nyilli-la fii ŋ sɩ na ŋaa kuoroo fii nɛ, ama ba-na ha bɩ kuoruŋ die. Ba dɩ baga kʋ-la jaŋ dii kuoruŋ, ama ba kuoruŋ jaŋ ŋaa hawa bala dʋndʋŋ nɛ.

¹³ Kuoroo deemba kala tʋɔbɩɩnaa ŋaa kʋbala nɛ, ba jaŋ joŋ dol-la ba sɩ kaa bibeŋ nɩaa a pɩ baga kʋ-la.

¹⁴ Ba dɩ Pie-bie-la jaŋ yuo dɔŋɔ, ama Pie-bie-la jaŋ yuo diiba, bɛɛ wɩaa ʋ nɛ ŋaa nɩalɩŋ kala sɩɩ beŋ nɩaa Kʋhɩaŋ, a kɛŋ kuoroo kala ma doluŋ. Ʋ dɩ ʋ harɩ-tooroo nɛ jaŋ yuo diiba. Nɩaa deemba nɛ ŋaa nɩalɩŋ Wɩa sɩ yɩra aŋ lɩɩsɛ, ba ŋaa nɩaa sɩ kɛŋ wʋtɩtɩɩ.”

¹⁵ Ŋɩɩ nɛ Wɩa tɩndaarʋ-la bɩra bʋla pɩmɛ, “Lɩɩrɩ-la ŋ fa sɩ na lee-la hachɔrʋŋ-la fa sɩ hɔnɔ ŋaa nuhuobiinee nɛ, a yʋgɛ woruŋ, a lɩɩ tintee kala aa bʋl yikoro kala.

¹⁶ Nyilli-la fii ma ŋ sɩ na, ba dɩ baga kʋ-la jaŋ bɛrɛ hachɔrʋŋ-la. Ba jaŋ wuri ʋ kɩaa ta ka dɩ ʋ kɛŋ yarɩ-biree. Ba jaŋ chaŋ ʋ nammɩa aŋ nyɩgɛ ʋ haŋgbelee.

¹⁷ Wɩa nɛ joŋ ŋɩɩ tʋɔbɩɩnaa hɛ ba lɛ dɩ ba ŋaa wɩɩ-la ʋ sɩ cho. Ŋɩɩ nɛ tɩɩ ba sɛɩ a joŋ dol-la ba sɩ kɛnɛ a bibeŋ nɩaa a pɩpɩ baga kʋ-la. Ba jaŋ bibeŋ kʋ-la, see dɩ wɩalɩŋ kala Wɩa sɩ bʋla ŋaa dɛrɛ.

¹⁸ Haal-la ŋ sɩ na ŋaa tabal nɛ. Tabalɩŋ deeŋ kɛŋ doluŋ nɛ a bibeŋ kuorusu-la sɩ hɛ dʋnɩa lɛ.”