Jɔɔŋ Wʋnaalaa 16 - WƖA TENIŊ

Gbansɩŋ balɩpɛ-la lɛ Wɩa baanɩŋ sɩ hɛ

¹ Ŋɩɩ nɛ mɩ nɩɩ nʋʋ yikoru-balɩŋ dɩ ʋ lɩɩ Wɩa dɩɩ-bal-la tʋɔŋ a bʋla pɩ Wɩa tɩndaara-la balɩpɛ, “Má kɛŋ gbansɩ-la balɩpɛ lɛ Wɩa baanɩŋ sɩ hɛ a kaa mʋ bɩsa hɛ dʋnɩa lɛ.”

² Ŋɩɩ nɛ Wɩa tɩndaarɩ-bumbuŋ tɩɩna joŋ ʋ gbaŋa-la Wɩa baanɩŋ sɩ hɛ ʋ tʋɔŋ, a kaa mʋ bɩsa hɛ tinteeŋ lɛ. Ʋ sɩ bɩsa hɛ dɛrɛ, ŋɩɩ nɛ naawɩɩl-bɔŋŋɔɔ sɩɩ wɩɩ woruŋ ŋaa nɩalɩŋ kala sɩ kɛŋ baga kʋ-la magɩlɩŋ lɛ, aŋ pɛ chʋɔlɛ ʋ nagɩsɩŋ ba sɩ mɛ bil.

³ Ŋɩɩ nɛ Wɩa tɩndaarɩ-lɩamɩŋ joŋ ʋ gbaŋa arɩ Wɩa baanɩŋ a kaa mʋ bɩsa hɛ mʋgʋ-balɩŋ lɛ. Ŋɩɩ nɛ mʋgʋ-bal-la lɩɩŋ bɩrɩmɛ a nagɛ nuhuobiine sɩ sʋba chalɩŋ. Ŋɩɩ nɛ kɩalɩŋ kala sɩ kɛŋ mɩɩsɩŋ a hɛ mʋgʋ-bal-la tʋɔŋ sʋʋ.

⁴ Wɩa tɩndaarɩ-tori-la ma kɛŋ ʋ gbaŋa kaa mʋ a bɩsa hɛ fuo-biisiŋ arɩ lɩɩ-buloo lɛ. Ba kala bɩrɩmɛ chalɩŋ.

⁵ Ŋɩɩ nɛ Wɩa tɩndaarʋ-la sɩ kɛŋ lɩɩŋ doluŋ ma bʋl wɩaa. Ʋ sɩ, “La Tɩɩna Wɩa, ŋ kɩaa sɩma nɛ dɩ ŋ dɔgɩsɛ dʋnɩa nɩaa. Ŋ bɩ disiniŋ kɛnɛ, ŋ nɛ Nɩɩ-la fa sɩ hɛ nɩmɛ faafaa kala arɩ Nɩɩ-la sɩ hɛ nɩmɛ lɛɛlɛ.

⁶ Dʋnɩa nɩaa kpʋ ŋ nɩaa arɩ ŋ wʋlaabʋllaa nɛ. Ba sɩ ŋaa ŋɩɩ nɛ tɩɩ ŋ ŋaa chalɩŋ pɩba dɩ ba nyʋa. Ʋ maga dɩ ba nyʋa nɛ.”

⁷ Ŋɩɩ nɛ mɩ nɩɩ nʋʋ yikoro sɩ lɩɩ Wɩɩsʋlʋŋ koru-la nyuŋ. Ʋ sɩ, “Wʋtɩtɩɩ, La Tɩɩna Wɩa doluŋ kala Tɩɩna, wʋtɩtɩɩ nɛ ŋ kaa dii nɩaa sarɩya.”

⁸ Ŋɩɩ nɛ Wɩa tɩndaarɩ-nɛsɛ-la joŋ ʋ gbaŋa a bɩsa hɛ wɩɩpɔsʋŋ lɛ, a pʋ doluŋ ʋ faasa pɔsɛ a nyɩnyɩgɛ nɩaa a nagɛ nyiniŋ.

⁹ Wɩɩ-pɔsʋ-la faasa nyɩgɛ nɩaa woruŋ, ba tʋtʋʋsɛ Wɩa joŋŋoo, bɛɛ wɩaa ba jɩma ʋ nɛ kɛŋ doluŋ nyanyal-dosunuŋ deemba kala lɛ. Ama ba bɩ bɩrɩma lɩɩ ba wʋbɔŋŋɔɔ lɛ dɩ ba chʋɔlɛ Wɩa.

¹⁰ Ŋɩɩ nɛ Wɩa tɩndaarɩ-nɔŋ-la joŋ ʋ gbaŋa a bɩsa hɛ baga kʋ-la kuoru kpasa lɛ, birimiŋ tɔ lee-la kala ʋ sɩɩ beŋ, nɩalɩŋ kala sɩ hɛ nɩmɛ nɩna hɛɛŋ a dɩdɩŋ ba nandelimee.

¹¹ Ŋɩɩ nɛ ba tʋtʋʋsɛ Wɩa sɩ hɛ ʋ jaŋ lɛ joŋŋoo a tɩŋ ba naawɩɩla-la arɩ hɛɛ-la ba sɩɩ na wɩaa. Ama ba bɩ bɩrɩma lɩɩ ba wʋbɔŋŋɔɔ lɛ.

¹² Ŋɩɩ nɛ Wɩa tɩndaarɩ-dʋ-la joŋ ʋ gbaŋa arɩ Wɩa baanɩŋ a bɩsa hɛ fuo-bal kʋbala baa yɩrɛ Yufireti lɛ. Ŋɩɩ nɛ fuo-la kala hʋ aŋ ka wombiiŋ pɩ kuorusu-la sɩ lɩɩ wɩɩpɔsʋŋ dɩɩrɩŋ kʋkɔ.

¹³ Ŋɩɩ nɛ mɩ na jɩŋ-bɔŋŋɔɔ batori dɩ ba nagɛ yɩŋŋaa. Dɔŋɔ lɩɩ dɩŋ-la niiŋ lɛ, dɔŋɔ ma lɩɩ baga kʋ-la niiŋ lɛ, dɔŋɔ ma lɩɩ baga kʋ-lɩa-la sɩ nyɩɛ wɩaa arɩ ʋ ŋaa Wɩa wʋlaabʋllʋ niiŋ lɛ.

¹⁴ Jɩŋ-bɔŋŋɔɔ deemba batori lɩɩ Sɩtaanɩ lɛ nɛ a yie ŋɩŋaa wʋkpuŋkperisiŋ. Ba nɛ gɔllɛ dʋnɩa kuoroo kala teeŋ, a kɛmba hɛ dɔŋɔ lɛ baa kɛŋ ba tɩtɩa dɩ ba yuo laalɩŋ La Tɩɩna doluŋ kala Tɩɩna tapʋl-bal-la.

¹⁵ Má bee na, mɩ jaŋ kɔ arɩ gaara sɩ yie kɔ ŋɩɩ. Wɩa jaŋ pɛ nɩɩ-la kala sɩ bɩ doŋ pɩna aŋ pɔ lɛ, nɩɩ-la kala sɩ laalɛ ʋ gɛrɩŋ, dɩ nɩaa sɩ́ ʋ yarɩ-biree na.

¹⁶ Ŋɩɩ nɛ jɩŋ-bɔmɔ-la kɛŋ dʋnɩa kuorusu-la a kaa mʋ hilimi lee kʋbala dɩ ba yuo laalɩŋ. Hiburu tɩŋŋaa yikoro lɛ baa yɩrɛ lee-la Amagɛdɔŋ.

¹⁷ Ŋɩɩ nɛ Wɩa tɩndaarɩ-pɛɩ-la joŋ ʋ gbaŋa tʋɔŋ kɩaa bɩsa hɛ peliŋ lɛ. Ŋɩɩ nɛ yikori-bal kʋbala lɩɩ lee-la kuoru kpasa-la sɩ chɩna Wɩa dɩɩ-bal-la tʋɔŋ a bʋl, “Wɩalɩŋ dɛrɛ nɛ.”

¹⁸ Ŋɩɩ nɛ duonuŋ lɩlɩgɩsɛ leriŋ kala, ba nɩnɩɩ yikorusuŋ, ka duonuŋ kpɩkpɩa ŋmana ŋmana, tinteeŋ ma faasa zigili. Dʋnɩa sɩ suomo kala, tinteeŋ ha bɩ ŋɩɩ zigile aŋ ka.

¹⁹ Tinteeŋ sɩ zigili ŋɩɩ, tabal-la ba sɩɩ yɩrɛ Babɩlɔŋ kpaa leree batori, tinteyee tabalaa ma tel. Ŋɩɩ nɛ Wɩa liise mʋ yi Babɩlɔŋ lɛ, a dɔgɩsʋ woruŋ a magɛ ŋɩɩ ʋ sɩ na baanɩŋ ʋ nyuŋ.

²⁰ Ŋɩɩ nɛ tinteye-la lɩɩŋ sɩ gollo chu arɩ peelee kala lɛl.

²¹ Ka duoŋ-tabɩɩ-balaa sɩ faasa yuŋ kɩŋkɛŋ a nagɛ nɔmbiee lɩɩ wɩa-nyuŋ kʋ tuu yɩyagɛ nɩaa. Ŋɩɩ nɛ nɩaa tʋʋsɛ Wɩa joŋŋoo a tɩŋ duoŋ-tabɩa-la wɩaa. Wɩɩ-la fa ŋaa wʋlɔrʋ nɛ woruŋ.