Jɔɔŋ Wʋnaalaa 15 - WƖA TENIŊ

Wɩa tɩndaaraa balɩpɛ kori nyanyal bɔŋŋɔɔ balɩpɛ

¹ Ŋɩɩ nɛ mɩ bɩra na ku-kpuŋkperi-bal ma dɔŋ wɩa-nyuŋ. Ʋ kɛmmɛ fawʋllʋŋ. Mɩ na Wɩa tɩndaaraa balɩpɛ dɩ ba kori nyanyal-bɔŋ dosunuŋ balɩpɛ sɩ ŋaa dɩdɛrɩŋ kɩaa, bɛɛ wɩaa dɩ ba nɛ kʋ ŋaa dɛrɛ, Wɩa baanɩŋ jaŋ fɩɛlɛ.

² Ŋɩɩ nɛ mɩ na kʋŋ sɩ nagɛ mʋgʋ-balɩŋ a tʋtʋl pal pal aŋ pɛ chuchol nyiniŋ. Ka mɩ na nɩalɩŋ sɩ yuo dii baga kʋ-la arɩ ʋ nagɩsɩŋ ba sɩ mɛ bil, arɩ ʋ yɩrɩŋ magɩlɩŋ, dɩ ba chɩŋ mʋgʋ-bal-la sɛmɛ. Ba fa kori chenniŋ Wɩa sɩ joŋo pɩba nɛ,

³ a yɩyɩɩ Wɩa tɩntɩnna Mosis yɩɩlɩŋ arɩ Pie-bie-la yɩɩlɩŋ. Yɩɩla-la ba sɩ yɩa nɛ ŋ-la: “La Tɩɩna Wɩa doluŋ kala Tɩɩna, wʋkpuŋkperisiŋ arɩ tɩntɩŋ-duoruŋ nɛ ŋ tɩtɩŋ. Ŋ kɛŋ wʋtɩtɩɩ nɛ a ŋɩŋaa wɩaa ba bʋa lɛ. Ŋ nɛ kuoro a kaa mʋ wuu.

⁴ La Tɩɩna Wɩa, kʋbɛɛ nɛ bɩ jaŋ fáŋ, aŋ dɛnnɛ ŋ yɩrɩ-balɩŋ? Ŋ dʋndʋŋa nɛ bɩ disiniŋ kɛnɛ. Dʋnɩa nɩaa kala jaŋ kʋ chʋɔlʋŋ, bɛɛ wɩaa ŋ ŋaa tʋɔpʋl wɩaa nʋʋkala na nɛ.”

⁵ Mɩ sɩ nɩɩ yɩɩla-la dɛrɛ, mɩ na Wɩa dɩɩ-bal-la sɩ hɛ Wɩa-jaŋ lee-la zɔmʋŋ sɩ bɩ magɩa kɛnɛ, dɩ ʋ suro.

⁶ Ŋɩɩ nɛ Wɩa tɩndaaraa balɩpɛ-la sɩ kori nyanyal bɔŋŋɔɔ balɩpɛ-la lɩɩ nɩmɛ kʋ lɩɩ. Ba laalɛ gɛrɩ-fʋfʋlaa sɩɩ tʋl a zɔŋ woruŋ, a joŋ sɛlɩmɛ damɛrɩsɩŋ a vɔɔ ba bɔɩsɩŋ lɛ.

⁷ Ŋɩɩ nɛ kɩalɩŋ banɛsɛ-la sɩ weye dɔŋɔ joŋ sɛlɩmɛ gbansɩŋ balɩpɛ a pɩ Wɩa tɩndaaraa balɩpɛ-la. Wɩa baanɩŋ fa su sɛlɩmɛ gbansɩ-la nɛ. Ʋ nɛ jaŋ hɛ nɩmɛ a kaa mʋ wuu.

⁸ Ŋɩɩ nɛ nyʋɔsʋŋ tɔ Wɩa dɩɩ-bal-la kala. Wɩa tʋla arɩ ʋ doluŋ nɛ ŋaa nyʋɔsʋ-la hɛ nɩmɛ ŋɩɩ. Nʋʋkala bɩ Wɩa dɩɩ-bal-la wuo jʋʋ, see Wɩa tɩndaaraa balɩpɛ-la sɩ joŋ nyanyal bɔŋŋɔɔ balɩpɛ-la kala hɛ tinteeŋ lɛ a dɛrɛ.