Jɔɔŋ Wʋnaalaa 13 - WƖA TENIŊ

Baga kʋ-la sɩ hɛ mʋgʋ-balɩŋ tʋɔŋ

¹ Ŋɩɩ nɛ mɩ na baga kʋŋ dɩ ʋ lɩɩ mʋgʋ-balɩŋ tʋɔŋ a kʋʋ lɩɩ. Ʋ fa kɛŋ nyusuŋ balɩpɛ nɛ, ʋ nyilliŋ ma fii. Ʋ fa chu kuori-nyunchuuluŋ fii nɛ ʋ nyilliŋ fii-la lɛ. Yɩrɩ-la ʋ fa sɩ kɛnɛ ʋ nyusu-la lɛ faa tʋʋsɛ Wɩa joŋŋoo nɛ.

² Baga kʋ-la mɩ sɩ na fa nagɛ kpeye nɛ, aŋ ka ʋ naasɩŋ nagɛ lugumuŋ kɩaa, ʋ niiŋ ma nagɛ naachigiŋ kʋa. Ŋɩɩ nɛ dɩŋ-la joŋ ʋ doluŋ kala arɩ ʋ kuoru kpasa-la a pɩ baga kʋ-la.

³ Baga kʋ-la nyusuŋ balɩpɛ-la dɔŋɔ fa kɛŋ naawɩɩl-bal nɛ sɩ faasa lɔrɛ woruŋ, ama ʋ fɩɛla nɛ. Dʋnɩa nɩaa kala sɩ na dɩ naawɩɩl-la fɩɛla, ʋ ŋaa ba wʋkpuŋkpere, ba sii to ʋ harɩŋ.

⁴ Ŋɩɩ nɛ nɩaa chʋɔlɛ dɩŋ-la a tɩŋ ʋ sɩ joŋ ʋ doluŋ a pɩ baga kʋ-la wɩaa, aŋ chʋɔlɛ baga kʋ-la ma a bʋl, “Kʋbɛɛ nɛ kɛŋ doluŋ a magɛ kʋa deeŋ? Kʋbɛɛ nɛ jaŋ wuo kɛnʋ yuo yuosuŋ?”

⁵ Ŋɩɩ nɛ ba pɩ baga kʋ-la wombiiŋ ʋ bʋl babiibal wɩaa a tʋʋsɛ Wɩa joŋŋoo. Ba pʋ wombiiŋ nɛ dɩ ʋ dii doluŋ chɛnsɩŋ mahɩŋ balɩa arɩ balɩa.

⁶ Ŋɩɩ nɛ ʋ tʋʋsɛ Wɩa arɩ ʋ jaŋ arɩ ʋ jaŋ nɩaa kala joŋŋoo.

⁷ Ba pʋ wombiiŋ nɛ dɩ ʋ kɛŋ Wɩa nɩaa a yuo laalɩŋ, a yuo diiba. Ba fa pʋ doluŋ nɛ ʋ wuo doho kala, nɩaa kala, tinteyee kala arɩ nɩaa sɩɩ bʋl yikoro kala.

⁸ Nɩɩ-la kala yɩrɩŋ sɩ tuo mɩɩsɩŋ teŋ-la lɛ a lɩɩ dʋnɩa dɩ-suomuŋ, jaŋ dɛnnɛ baga kʋ-la. Pie-bie-la ba sɩ kpʋa nɛ tɩɩ teŋ-la.

⁹ Dɩgɩlaa tɩŋŋaa, má wuoli ma dɩgɩlaa a jegile nɩɩ wɩɩŋ deeŋ.

¹⁰ Dɩ nʋʋ nɛ maga dɩ ŋ mʋ yoŋ-baga, ŋ jaŋ sɛnɛ mʋ, dɩ nʋʋ nɛ maga dɩ ba kpʋʋ arɩ tokobiiŋ, ba jaŋ sɛnɛ kpʋʋ arɩ tokobiiŋ. Wɩɩŋ deeŋ daga arɩ nɩalɩŋ sɩ laa Wɩa wɩaa dii maga dɩ ba nyalɩmɛ nɛ a chɩŋ wɩalɩŋ ba sɩ laa dii lɛ.

Baga kʋ-la sɩ lɩɩ tinteeŋ kʋ lɩɩ

¹¹ Ŋɩɩ nɛ mɩ bɩra na baga kʋa dɔŋɔ dɩ ʋ lɩɩ tinteeŋ a kuu lɩɩ. Ʋ fa nagɛ pie-bie nɛ a kɛŋ nyilliŋ balɩa. Ʋʋ bʋl wɩaa a nagɛ kʋ-la sɩ nagɛ dɩŋ-la nɛ.

¹² Ʋ ma kɛŋ dol-la bumbuŋ baga kʋ-la fa sɩ kɛnɛ nɛ, a leŋ dʋnɩa nɩaa kala chʋɔlɛ bumbuŋ baga kʋ-la fa sɩ kɛŋ naawɩɩl-bal-la, ka ʋ fɩɛlɛ.

¹³ Baga kʋa deeŋ ŋaa wʋmagɩlaa yʋgɛ nɛ. Ʋ paala leŋ nyiniŋ lɩɩ wɩa-nyuŋ kʋ tuu tinteeŋ, nʋʋkala na.

¹⁴ A tɩŋ wʋmagɩla-la ba sɩ pʋ doluŋ ʋ ŋaa bumbuŋ baga kʋ-la nyuŋ, ʋ nyɩsɛ dʋnɩa nɩaa dɩ ba mɛ kʋŋ sɩ nagɛ bumbuŋ baga kʋ-la, kʋ-la ba sɩ pɩra arɩ tokobiiŋ ka ʋ ha wei.

¹⁵ Ba pɩ baga kʋ-lɩa-la doluŋ dɩ ʋ wuo joŋ wiese hɛ kʋ-la ba sɩ mɛ lɛ dɩ ʋ wuo wɩaa bʋbʋl, dɩ ʋ leŋ dɩ ba kpʋ nɩalɩŋ kala sɩ vɩa dɩ ba chʋɔlɛ baga kʋ-la ba sɩ mɛ.

¹⁶ Kʋ-la bɩra fʋgɛ nʋʋkala a magɩlɛba, ba tilliŋ lɛ koo ba nɩsaa lɛ, nɩhɩasɩŋ arɩ hambiisiŋ, kuoroo arɩ summoo, nɩalɩŋ sɩ tɩɩ ba tɩtɩa arɩ nɩalɩŋ sɩ ŋaa yosi.

¹⁷ Nʋʋkala bɩ jaŋ wuo yɔɔ kʋŋ, koo a yallɛ kʋŋ dɩ ŋ bɩ magɩlɩŋ deeŋ kɛnɛ, kʋ-la yɩrɩŋ koo ʋ yɩrɩ-la sɩ magɛ ŋɩɩ.

¹⁸ Nʋʋkala bɩ jaŋ wuo jɩŋ wɩɩŋ deeŋ bʋbʋɔŋ, see dɩ ʋ kɛŋ wʋjɩmɩŋ. Nɩɩ-la kala sɩ kɛŋ wʋjɩmɩŋ jaŋ wuo kɛŋ baga kʋa deeŋ magɩlɩŋ niiŋ kaa dɩɩsa na, magɩl-la ŋaa nʋʋ yɩrɩ nɛ. Magɩl-la nɛ zɔɔ-balɩdʋ mahɩŋ batori arɩ balɩdʋ.