Jɔɔŋ Wʋnaalaa 11 - WƖA TENIŊ

Kɩalɩŋ balɩa sɩ ŋaa Wɩa pɛ-naaraa

¹ Ŋɩɩ nɛ ba joŋ daaŋ ba sɩ kaa magɩsɛ kɩaa pɩmɛ, a nagɛ dantɩga, aŋ bʋla pɩmɛ, “Sii mʋ magɩsɛ Wɩa dɩɩ-bal-la arɩ koru-la sɩ hɛ ʋ tʋɔŋ, aŋ dɩɩsɛ nɩalɩŋ kala sɩɩ chʋɔlɛ Wɩa nɩmɛ,

² ama sɩ́ Wɩa dɩa-la kaala-na magɩsʋ, bɛɛ wɩaa ba joŋ lee-la pɩ nɩalɩŋ sɩ bɩ Juu tɩŋŋaa ŋaa nɛ, ba jaŋ fɩrɩgɛ tabal-la sɩ bɩ disiniŋ kɛnɛ chɛnsɩŋ mahɩŋ balɩa arɩ balɩa.

³ Mɩ-na Wɩa jaŋ pɩ mɩ pɛ-naaraa balɩa-la doluŋ dɩ ba wuo bʋl mɩ wɩaa, tapʋlaa bʋɩ arɩ zɔɔ-balɩa arɩ mahɩŋ batori, aŋ baagɛ tʋɔ-chei gɛrɩ-bɔsʋnʋŋ.”

⁴ Wɩa pɛ-naara-la balɩa nɛ ŋaa Olif tɩɩsɩ-la balɩa arɩ chaaŋ daasɩ-la balɩa sɩ chɩŋ La Tɩɩna sɩpaaŋ, nɩɩ-la sɩ tɩɩ tinteeŋ.

⁵ Dɩ nʋʋkala nɩɩ chɛ dɩ ʋ ŋaaba wʋbɔŋ, nyiniŋ yie lɩɩ ba niiŋ lɛ nɛ a dii ba dʋndɔŋŋɔɔ kala. Nʋʋ na-kala sɩɩ chɛ ʋ ŋaaba wʋbɔŋ, ŋ-la nɛ ʋ yie sʋʋ.

⁶ Wɩa pɩba doluŋ dɩ ba wuo kiri duonuŋ, dɩ ʋ sɩ́ nɩɩ tapʋlɩa-la ba sɩɩ chɛ dɩ ba bʋl Wɩa wɩaa lɛ. Wɩa bɩra pɩba doluŋ dɩ ba wuo ŋaa dɩ lɩɩŋ bɩrɩmɛ chalɩŋ. Ba jaŋ wuo leŋ dɩ nyanyalaa jʋʋ dʋnɩa nɩaa, bʋa na-kala lɛ ba sɩ cho.

⁷ Dɩ ba nɛ bʋl Wɩa wɩalɩŋ dɛrɛ, baga kʋŋ jaŋ lɩɩ buotuo-luŋii-la tʋɔŋ kʋ lɩɩ yuo diiba, a kpʋba.

⁸ Ba kʋsʋʋnʋŋ jaŋ pɩŋ tabal-la womporuŋ lɛ, lee-la ba sɩ kpaasɛ ba Tɩɩna daagɛsɛ nyuŋ. Tabal-la fa nagɛ Sodom koo Ijipiti tinteeŋ nɛ.

⁹ Nɩaa sɩ lɩɩ doho kala, a bʋbʋl yikori doho kala a lɩɩ tintee kala jaŋ beŋ ba kʋsʋʋnʋŋ tapʋlaa batori arɩ kpaa magɛ dɔŋɔ. Ba bɩ jaŋ sɛɩ dɩ ba paaba hugi.

¹⁰ Dʋnɩa nɩaa tʋɔŋ jaŋ tɔrɛ arɩ ba sɩ kpʋ ba balɩa-la. Ba jaŋ gbieli a ŋaa kɩaa didii zile dɔŋɔ lɛ, bɛɛ wɩaa Wɩa wʋlaabʋlla-la balɩa fa walɩmɛ dʋnɩa nɩaa nɛ woruŋ.

¹¹ Ama tapʋlaa batori arɩ kpaa magɛ dɔŋɔ-la harɩŋ lɛ, Wɩa joŋ wiese hɛ nɩaa deemba balɩamɩŋ lɛ, ba sii chɩŋ. Nɩalɩŋ kala sɩ naba, fawʋllʋŋ kɛmba woruŋ.

¹² Ŋɩɩ nɛ ba nɩɩ nʋʋ yikoro dɩ ʋ lɩɩ Wɩa-jaŋ a bʋla pɩba, “Má kʋ jɩl daha.” Ʋ sɩ bʋl ŋɩɩ dɛrɛ, ba to duoŋ-bɩlɩmbaanɩŋ lɛ a jɩl Wɩa-jaŋ. Ba dʋndɔŋŋɔɔ bibemba, ka ba jɩjɩl.

¹³ Bʋa-la tɩtɩa lɛ tinteeŋ faasa zigili. Tabal-la, dɩ ŋ nɛ kaa kpaa leree fii, sɛmɛ dɔŋɔ kala tel a kpʋ nɩaa bʋɩ balɩpɛ. Fawʋllʋŋ kɛŋ nɩkaanaa, ba dɛnnɛ Wɩa sɩ hɛ Wɩa-jaŋ lɛ.

¹⁴ Hɛɛ-lɩa-la dɩdɛrɩŋ nɛ ŋɩɩ, ama torimuŋ jaŋ kɔ lɛɛlɛ.

Wɩa tɩndaarɩ-pɛɩ-la ŋmʋʋ ʋ nyile

¹⁵ Ŋɩɩ nɛ Wɩa tɩndaarɩ-pɛɩ-la ŋmʋʋ ʋ nyile. Mɩ nɩɩ yikori-balaa dɩ baa bʋl wɩaa, Wɩa-jaŋ lɛ. Ba sɩ, “Dʋnɩa kuorii-la lɛɛlɛ ŋaa La Tɩɩna Wɩa arɩ Kirisito, Nɩɩ-la ʋ sɩ lɩɩsa kʋa nɛ. Wɩa jaŋ dii kuoruŋ a kaa mʋ wuu.”

¹⁶ Ŋɩɩ nɛ nɩhɩasɩŋ mara arɩ banɛsɛ-la sɩ hɔŋ ba kuoru kpasɩnɩŋ nyuŋ Wɩa sɩpaaŋ, ba kala tuu kpirimi a chʋɔlɛ Wɩa a bʋl,

¹⁷ “Laa lɔllʋŋ La Tɩɩna Wɩa doluŋ kala Tɩɩna, Nɩɩ-la fa sɩ hɛ nɩmɛ faafaa arɩ Nɩɩ-la ha sɩ hɛ nɩmɛ. Lɛɛlɛ-na ŋ kɛŋ ŋ dol-bal-la, a suomo bibeŋ dʋnɩa nɛ.

¹⁸ Dʋnɩa nɩaa fa na baanɩŋ nɛ ŋ nyuŋ. Ama bʋa-la ŋ baanɩŋ sɩ jaŋ sii ba nyuŋ yie nɛ. Bʋa-la lɛ ŋ sɩ jaŋ dii nɩalɩŋ sɩ sʋba sarɩya yie nɛ, arɩ bʋa-la lɛ ŋ sɩ jaŋ siili ŋ tɩntɩnnaa sɩ ŋaa ŋ wʋlaabʋllaa, a pɛ ŋ nɩaa kala lɛ, arɩ nɩalɩŋ sɩɩ ziliŋ lɛ, nɩhɩasɩŋ arɩ hambiisiŋ kala, Bʋa-la yie nɛ dɩ ŋ chei nɩalɩŋ sɩ chei dʋnɩa.”

¹⁹ Ŋɩɩ nɛ ba kɛŋ Wɩa dɩɩ-bal-la sɩ hɛ Wɩa-jaŋ boro suri, mɩ na Wɩa niiriŋ daga-la ʋ tʋɔŋ. Ŋɩɩ nɛ duonuŋ lɩlɩgɩsɛ leriŋ kala, ba nɩnɩɩ yikorusuŋ, ka duonuŋ kpɩkpɩa ŋmana ŋmana, tinteeŋ zigili, ka duoŋ-tabɩaa faasa titel.