Jɔɔŋ Wʋnaalaa 10 - WƖA TENIŊ

Wɩa tɩndaarʋ-la sɩ kori teŋ-chuoli-bie

¹ Ŋɩɩ nɛ ka mɩ bɩra na Wɩa tɩndaarɩ-duo kʋbala dɩ ʋ lɩɩ Wɩa-jaŋ a kʋʋ tuu. Duoŋ-bɩlɩmbaanaa tɔʋ kala, ka duoŋ-sɩa chugili ʋ nyuŋ lɛ. Ʋ sɩaa tʋtʋl a nagɛ wɩɩpɔsʋŋ. Ʋ naasɩŋ ma nagɛ jebiee sɩɩ dii nyiniŋ.

² Ka ʋ kori teŋ-chuoli-bie ʋ nɩsɩŋ lɛ, ba sɩ kaa polli. Ŋɩɩ nɛ ʋ joŋ ʋ nadiiŋ naaŋ a daŋ mʋgʋ-balɩŋ nyuŋ, a joŋ ʋ nagʋa naaŋ ma a bil tinteeŋ.

³ Ŋɩɩ nɛ ʋ faasa kpɩa goŋ a nagɛ naachigiŋ sɩ huoso. Ʋ sɩ kpɩa goŋ ŋɩɩ, duonuŋ ma laa kpɩa naansɩɩŋ bʋlɩpɛ.

⁴ Bʋa-la lɛ duonuŋ sɩ kpɩa, mɩ faa chɛ dɩ mɩ ŋmʋnsɛ wɩalɩŋ bil. Ŋɩɩ nɛ nʋʋ yikoro lɩɩ wɩa-nyuŋ a bʋla pɩmɛ, “Leŋ dɩ wɩalɩŋ duonuŋ sɩ kpɩa bʋl hɛ ŋ tʋɔŋ, sɩ́ ŋmʋnsa bil.”

⁵ Ŋɩɩ nɛ ka mɩ na Wɩa tɩndaarʋ-la, nɩɩ-la naaŋ dɔŋɔ sɩ chɩŋ mʋgʋ-balɩŋ nyuŋ, ka dɔŋɔ ma chɩŋ tintee-hɩlɩŋ, dɩ ʋ kɛŋ ʋ nadiiŋ nɩsɩŋ kaa yɩa Wɩa-jaŋ.

⁶ Ŋɩɩ nɛ ʋ ŋmɩɛsɛ Wɩa, Nɩɩ-la sɩ hɛ nɩmɛ a kaa mʋ wuu, nɩɩ-la sɩ ta wɩa-nyuŋ arɩ kɩalɩŋ kala sɩ hɛ wɩa-nyuŋ, arɩ tinteeŋ arɩ kɩalɩŋ kala sɩ hɛ nɩmɛ, arɩ mʋgʋ-balɩŋ, arɩ kɩalɩŋ kala sɩ hɛ ʋ tʋɔŋ. Ʋ sɩ, “Bʋa-la yie nɛ, la bɩra bɩ jaŋ wuo kɛŋ wɩɩkala dieni.”

⁷ Ama tapʋlɩɩ-la Wɩa tɩndaarɩ-pɛɩ-la sɩ jaŋ kʋ ŋmʋʋ ʋ nyile, Wɩa wʋfaalɩa-la ʋ fa sɩ dagɛ ʋ wʋlaabʋllaa sɩ ŋaa ʋ tɩntɩnnaa, ba kala jaŋ ŋaa.

⁸ Ŋɩɩ nɛ mɩ bɩra nɩɩ yikoro-la tɩtɩa sɩ lɩɩ wɩa-nyuŋ a bʋl wɩaa pɩmɛ. Ʋ sɩ, “Mʋ a laa teŋ-bie-la ba sɩ suro, Wɩa tɩndaarʋ-la nɩsɩŋ lɛ, nɩɩ-la naaŋ dɔŋɔ sɩ chɩŋ mʋgʋ-balɩŋ nyuŋ, ka dɔŋɔ ma chɩŋ tinteeŋ lɛ.”

⁹ Ŋɩɩ nɛ mɩ mʋ Wɩa tɩndaarʋ-la teeŋ a bʋla pʋ dɩ ʋ joŋ teŋ-bie-la pɩmɛ. Ŋɩɩ nɛ ʋ bʋla pɩmɛ, “Laa teŋ-bie-la a joŋo chaŋ. Ʋ jaŋ sɩŋ ŋ niiŋ lɛ a nagɛ tʋʋŋ, ama ŋ luoruŋ lɛ ʋ jaŋ hɛɩ.”

¹⁰ Ŋɩɩ nɛ mɩ laa teŋ-bie-la Wɩa tɩndaarʋ-la nɩsɩŋ lɛ a joŋo chaŋ. Ʋ sɩma nagɛ tʋʋŋ nɛ mɩ niiŋ lɛ, ama ʋ sɩ tuu mɩ luoruŋ, mɩ fehe nyala nɛ.

¹¹ Ŋɩɩ nɛ ba bʋla pɩmɛ, “Ŋ jaŋ bɩra bʋl wɩaa, Wɩa Dɩŋ-zɔmʋŋ doluŋ lɛ a tɩgɛ nɩ-daŋ, tintee daŋ yikori daŋ arɩ kuori daŋ lɛ.”