Jɔɔŋ Wʋnaalaa 1 - WƖA TENIŊ

¹ Wɩaa deemba nɛ Wɩa joŋo pɩ Yesu Kirisito dɩ ʋ joŋo dagɛ ʋ tɩntɩnnaa, dɩ ba jɩŋ wɩalɩŋ sɩ jaŋ ŋaa lɛɛlɛ. Wɩa tɩŋ ʋ tɩndaara ʋ kɔ ʋ tɩntɩnna Jɔɔŋ teeŋ a bʋl wɩalɩŋ pʋ.

² Ŋɩɩ nɛ Jɔɔŋ bʋl wɩalɩŋ kala ʋ sɩ na, wɩalɩŋ Wɩa sɩ dagʋ arɩ wɩalɩŋ kala Yesu Kirisito sɩ bʋla pʋ.

³ Nɩalɩŋ sɩ karɩmɛ wɩaa deemba nɩaa nɩɩ arɩ nɩalɩŋ sɩ jegile nɩɩ wɩaa deemba a laa hɛ ba tʋɔŋ lɛ a tutoba, Wɩa jaŋ pɛ ba lɛ, bɛɛ wɩaa bʋa-la wɩaa deemba sɩ jaŋ ŋaa kpaga nɛ.

Jɔɔŋ chʋɔlɛ nɩalɩŋ sɩ laa Yesu wɩaa dii a hɛ Esia lɛ

⁴ Mɩ-na Jɔɔŋ nɛ ŋmʋnsɛ teniŋ deeŋ a pɩpɩ nɩalɩŋ sɩ laa Yesu wɩaa dii aa hilimi tasɩŋ balɩpɛ-la sɩ hɛ Esia tinteeŋ lɛ. Wɩa lahɔrɩmɔ lɛ, ʋ jaŋ leŋ dɩ ma hɔŋ arɩ yarɩfɩɛlaa. Ʋ nɛ ŋaa Nɩɩ-la sɩ hɛ nɩmɛ, Nɩɩ-la fa sɩ hɛ nɩmɛ faafaa kala arɩ Nɩɩ-la sɩ jaŋ kɔ. Wɩaa deemba lɩɩ Wɩa Dɩnsɩŋ balɩpɛ-la sɩ chɩŋ Wɩa kuoru kpasa-la sɩpaaŋ nɛ

⁵ arɩ Yesu Kirisito teeŋ. Ʋ nɛ ŋaa wɩalɩŋ sɩada tɩɩna a kɛŋ wʋtɩtɩɩ. Ʋ nɛ ŋaa Nɩɩ-la sɩ sʋba aŋ laa sɩpaaŋ sii sʋʋŋ lɛ. Ʋ nɛ kɛŋ dʋnɩa kuoroo kala doluŋ. Má leŋ dɩ la dɛnnʋ, a tɩŋ ʋ sɩ chola ŋɩɩ a joŋ ʋ chalɩŋ a jaasɛ, a lɩɩsɛla wʋbɔŋŋɔɔ lɛ.

⁶ Ʋ nɛ leŋe la dɩ ʋ kala dii kuoruŋ a tɩmaa pɩ Wɩa, Nɩɩ-la sɩ ŋaa ʋ Nyɩmma. Ʋ nɛ kɛŋ yɩrɩŋ arɩ doluŋ a kaa mʋ wuu. Amɩɩ.

⁷ Má bee na, ʋ nɛ to duoŋ-bɩlɩmbaanaa tʋɔŋ a kʋkɔ. Nʋʋkala jaŋ naʋ. Nɩalɩŋ ma sɩ joŋ kɩaa tɔbʋ jaŋ naʋ. Dʋnɩa nɩaa kala jaŋ yel ʋ wɩaa. Ŋɩɩ sɛnɛ jaŋ ŋaa. Amɩɩ.

⁸ La Tɩɩna Wɩa sɩ, “Mɩ nɛ ŋaa Alɩfa arɩ Omega. Mɩ-na Wɩa doluŋ kala Tɩɩna, mɩ nɛ ŋaa Nɩɩ-la sɩ hɛ nɩmɛ arɩ Nɩɩ-la fa sɩ hɛ nɩmɛ faafaa kala arɩ Nɩɩ-la sɩ jaŋ kɔ.”

Wɩalɩŋ Jɔɔŋ sɩ na arɩ duosoo tʋɔŋ a tɩgɛ Yesu lɛ

⁹ Mɩ-na ma naambie Jɔɔŋ nɛ ŋmʋnsɛ teniŋ deeŋ a pɩpɩma. A tɩŋ Yesu Kirisito wɩaa nɛ laa na hɛɛŋ. Ama la nɩalɩŋ sɩ na hɛɛ-la ŋɩɩ a tɩŋ ʋ wɩaa, la ma jaŋ jʋʋ Wɩa kuorii-la tʋɔŋ. Hɛɛ-la kala lɛ la dii kenyiri nɛ a nyalɩmɛ. Mɩ fa bʋl Wɩa wɩaa nɛ aŋ pɛ ŋaa Yesu Kirisito sɩada tɩɩna. Ŋɩɩ wɩaa nɛ tɩɩ ba kɛmmɛ kaa mʋ tintee kʋbala baa yɩrɛ Patɩmɔs. Lɩɩŋ golli tintee-la kala chu nɛ.

¹⁰ La Tɩɩna Wɩa tapʋlɩɩ kʋbala nɛ Wɩa Dɩŋ-zɔmʋŋ doluŋ kʋ hɛ mɩ lɛ woruŋ. Ŋɩɩ nɛ mɩ nɩɩ nʋʋ yikori-bal mɩ harɩŋ a nagɛ ba sɩɩ ŋmʋʋ banyilliŋ ŋɩɩ.

¹¹ Ŋɩɩ nɛ yikoro-la bʋla pɩmɛ, “Ŋmʋnsɛ wɩalɩŋ kala ŋ sɩ na, a joŋo tɩŋ dɩ ba kaa mʋ pɩ nɩalɩŋ sɩ laa Yesu wɩaa dii aa hilimi tasɩŋ balɩpɛ-la sɩ hɛ Esia tinteeŋ lɛ. Ba nɛ ŋ-la: Ɛfɛsɩs, Sɩmɩɩna, Pɛgamɔm, Taataya, Saadɩs, Fɩladɛlɩfɩa arɩ Laadisiya.”

¹² Ŋɩɩ nɛ mɩ mɩɩra daasɛ harɩŋ dɩ mɩ na nɩɩ-la sɩɩ bʋl wɩaa mɩ teeŋ. Mɩ sɩ daasa, mɩ na chaaŋ daasɩŋ balɩpɛ. Sɛlɩmɛ nɛ ba kaa ŋaa ba kala.

¹³ Ka nʋʋ chɩŋ ba tʋtʋɔbaanɩŋ a nagɛ Nuhuobiine Bie, a laalɛ gɛrɩ-duduoŋ, a kɛŋ sɛlɩmɛ gɛrɩpɛlɩɛɛ-bie a vɔɔ ʋ bɔyɛ.

¹⁴ Ʋ nyuŋ arɩ ʋ nyu-pʋnaa kala pʋllɛ a nagɛ kuŋkunuŋ, a pʋlla nagɛ bʋrʋŋ sɩ tɔ. Ʋ sɩaa kala nagɛ nyiŋgeliŋ.

¹⁵ Ʋ naasɩŋ ma nagɛ kɔlɩɩŋ ba sɩ joŋo hɛ nyiniŋ lɛ ʋ fɩɛsɛ. Ʋ yikoro ma nagɛ lɩɩ-balɩŋ sɩɩ pɛllʋ gbul gbul.

¹⁶ Ka ʋ kori chɛnwʋlaa balɩpɛ ʋ nadiiŋ nɩsɩŋ lɛ, tokobiiŋ lɩɩ ʋ niiŋ lɛ a kʋ lɩɩ. Ʋ niiriŋ balɩa kala didii nyagaga. Ka ʋ sɩaa kala tʋtʋl a nagɛ wɩɩpɔsʋŋ sɩ faasa pɔsɛ.

¹⁷ Mɩ sɩ naʋ ŋɩɩ, mɩ tuu tel ʋ sɩpaaŋ a pɩŋ nɩmɛ chɩm a nagɛ dɩ mɩ sʋba. Ŋɩɩ nɛ ʋ joŋ ʋ nadiiŋ nɩsɩŋ daŋ mɩ lɛ aŋ bʋla pɩmɛ, “Sɩ́ fawʋllʋŋ fá, mɩ nɛ ŋaa Nɩɩ-la fa sɩ hɛ nɩmɛ bumbuŋ arɩ Nɩɩ-la sɩ jaŋ hɛ nɩmɛ dʋnɩa dɩdɛrɩŋ.

¹⁸ Mɩ nɛ ŋaa Nɩɩ-la sɩ weye. Mɩ fa sʋba nɛ, ama lɛɛlɛ mɩ weye nɛ a kaa mʋ wuu. Mɩ kɛŋ sʋʋŋ arɩ lɛlɛɛ-jaŋ kala doluŋ nɛ.

¹⁹ Lɛɛlɛ ŋmʋnsɛ wɩalɩŋ ŋ sɩ na, wɩalɩŋ sɩ hɛ nɩmɛ arɩ wɩalɩŋ sɩ jaŋ ŋaa harɩŋ.

²⁰ Wʋkpuŋkpere-la ŋ sɩ na a mʋ tɩgɛ chɛnwʋla-la balɩpɛ ŋ sɩ na mɩ na-diiŋ lɛ arɩ chaaŋ daasɩ-la balɩpɛ bʋbʋɔŋ nɛ: Chɛnwʋlaa balɩpɛ-la nɛ ŋaa Wɩa tɩndaara-la sɩɩ beŋ nɩalɩŋ sɩ laa Yesu wɩaa dii a hihilimi a hɛ tasɩ-la balɩpɛ-la sɩ hɛ Esia tinteeŋ lɛ. Chaaŋ daasɩ-la balɩpɛ nɛ ŋaa nɩalɩŋ sɩ laa Yesu wɩaa dii a hihilimi tasɩŋ balɩpɛ-la sɩ hɛ Esia tinteeŋ lɛ.