NƐHƖMAAYA 9 - WƖA TENIŊ

Iziral tɩŋŋaa dagɛ ba wʋbɔŋŋɔɔ

¹ Chɛnɛ-la tɩtɩa tʋɔŋ tapʋlaa mara arɩ banɛsɛ chɛɛŋ, Iziral tɩŋŋaa hilimi, a vɔɔ niiŋ aŋ laalɛ tʋɔ-chei gɛnnɩŋ a ŋaa hagɩla bʋgɛ ba nyusuŋ.

² Ba fa kɛŋ ba tɩtɩa pɔrɛ lɩɩ nɩwogusu-la kala sɩ hɛ ba tʋɔŋ lɛ nɛ. Ba fa sii chɩŋ nɛ a dagɛ ba wʋcheelee arɩ wʋbɔmɔ-la ba naabalɩmaba sɩ ŋaa.

³ Ba fa chɩŋ lee-la ba sɩ chɩna nɛ ka ba karɩmɛ ba TƖƖNA Wɩa wombiiŋ teŋ-la a mʋ yi hawa batori, aŋ bɩra kɛŋ hawa batori ma a dagɛ ba wʋbɔŋŋɔɔ aŋ chʋchʋɔlɛ ba TƖƖNA Wɩa.

⁴ Ba fa ŋaa kʋŋ nɛ ʋ sii je Levi doho nɩaa deemba jɩla chɩŋ ʋ nyuŋ: Jesua, Banɩ, Kadɩmɩɛl, Sɛbanɩa, Buni, Sɛrɛbɩa, Banɩ dɔŋɔ ma arɩ Kɛnanɩ, a faasa suri ba yikorusuŋ a sʋl ba TƖƖNA Wɩa.

⁵ Ŋɩɩ nɛ Levi doho nɩaa deemba: Jesua, Kadɩmɩɛl, Banɩ, Hasabineya, Sɛrɛbɩa, Hodia, Sɛkanɩa arɩ Pɛtahɩa bʋla pɩ nɩalɩŋ, “Má sii chɩŋ a dɛnnɛ ma TƖƖNA Wɩa sɩ hɛ nɩmɛ a kaa mʋ deeŋ deeŋ. Má zil ʋ yɩrɩ-balɩŋ arɩ la sɩ bɩ jaŋ wuo zilu a magɛ ŋɩɩ sɩ maga ma kala.” Aŋ bɩra chʋɔlɛ Wɩa a bʋl,

⁶ “Ŋ dʋndʋŋa nɛ ŋaa La TƖƖNA. Ŋ nɛ ŋaa wɩa-nyuŋ arɩ chɛnwʋlaa arɩ kɩalɩŋ kala sɩ hɛ ba lɛ. Ŋ nɛ ŋaa tinteeŋ arɩ kɩalɩŋ kala sɩ hɛ ʋ lɛ, a pɛ mʋgʋ-balɩŋ arɩ kɩalɩŋ kala sɩ hɛ ʋ lɛ. Ŋ nɛ pɩ kʋŋkala mɩɩsɩŋ, Wɩa-jaŋ kɩaa kala ziziliŋ.

⁷ Ŋ nɛ ŋaa La TƖƖNA Wɩa. Ŋ nɛ kɛŋ Abɩram kʋ lɩɩ taŋ-la ba sɩɩ yɩrɛ Uu a hɛ Babɩlɔŋ tinteeŋ lɛ a kɛŋ ʋ yɩrɩŋ bɩrɩmɛ Abɩraham.

⁸ Ŋ na dɩ ʋ kɛŋ wʋtɩtɩɩ nɛ ŋ teeŋ, ŋɩɩ nɛ ŋ hɛ niiŋ ŋ dɩ ʋ pɛgɛ arɩ ŋ jaŋ joŋ nɩaa deemba tinteeŋ a pɩ ʋ doho nɩaa: Kɛnaŋ tɩŋŋaa, Hiti tɩŋŋaa, Amɔrɩ tɩŋŋaa, Pɛrɛs tɩŋŋaa, Jebus tɩŋŋaa arɩ Gɩgasɩ tɩŋŋaa. Ŋ kɛŋ nii-la ŋ sɩ hɛ kaa tɩŋ nɛ, bɛɛ wɩaa ŋ ŋaa tʋɔpʋl Tɩɩna nɛ.

⁹ Ŋ na hɛɛ-la la naabalɩmaba fa sɩ na Ijipiti tinteeŋ lɛ nɛ. Ŋ jegile nɩɩ ba bunso nɛ Mʋgʋ-fɩaŋ-la leriŋ.

¹⁰ Ŋ ŋaa wʋmagɩlaa arɩ wʋkpuŋkperisiŋ nɛ Ijipiti kuoro, ʋ tɩntɩnnɩ-hɩasɩŋ arɩ ʋ nɩaa kala lɛ, bɛɛ wɩaa ŋ jɩŋ ŋɩɩ Ijipiti tɩŋŋaa sɩ wʋrɩgɛ ba nɛ. Ŋ laa yɩrɩŋ a pɩ ŋ tɩtɩa nɛ a kaa kɔ arɩ jɩnɩŋ kala.

¹¹ Ŋ leŋe mʋgʋ-balɩŋ kpaa balɩa nɛ Iziral tɩŋŋaa sɩpaaŋ, ba to ʋ tʋɔŋ a vɛŋ tintee-hɩlɩŋ lɛ a lɩɩ. Ama ŋ leŋe nɩalɩŋ sɩ kire to ba harɩŋ tuu lɩɩŋ bʋbʋɔŋ nɛ, a nagɛ ba sɩ joŋ tabɩɩŋ hɛ lɩɩ-balɩŋ lɛ.

¹² Wɩɩhɛyɛ, ŋ leŋe duoŋ-bɩlɩmbaanɩŋ sɩ nagɛ jebiiŋ nɛ laa ba sɩpaaŋ a kɛmba vɩvɛŋ, tɩtaŋɩŋ ma, ŋ leŋ nyiniŋ nagɛ jebiiŋ a laa ba sɩpaaŋ a chaanɛ pʋlʋmʋŋ pɩba.

¹³ Ŋ lɩɩ ŋ jaŋ kʋ tuu Sɩnaɩ peel-la nyuŋ nɛ, a bʋl wɩaa pɩba. Ŋ dagɛba ŋ wombiee sɩ tʋʋla arɩ ŋ wʋdagaa sɩ zɔmɔ nɛ.

¹⁴ Ŋ leŋe ba jɩŋ ŋ chɛ-wiesii-la sɩ zɔmɔ wɩaa nɛ, aŋ to ŋ tɩntɩnna Mosis lɛ a dagɛba ŋ niiriŋ, ŋ wombiee arɩ ŋ wʋdagaa.

¹⁵ Losuŋ sɩ kɛmba, ŋ pɩba Wɩa-jaŋ kʋdiilee nɛ. Lɩɩ-nyʋasʋŋ ma sɩ kɛmba, ŋ leŋe lɩɩŋ lɩɩ bʋŋ lɛ nɛ ba nyʋa. Ŋ bʋla pɩba arɩ ba yuo laa tintee-la ŋ sɩ chaasa ŋmɩɛsɛ arɩ ŋ jaŋ joŋo pɩba nɛ.

¹⁶ Ama la naabalɩmaba ŋaa nyu-duo tɩmma nɛ a kɛŋ babii-ballɩŋ a bɩ dagɩŋ ka nɩɩ, a vɩa dɩ ba to ŋ niiŋ.

¹⁷ Ba vɩa dɩ ba jegile nɩɩ nɛ a bɩ wʋmagɩla-la ŋ sɩ ŋaa ma liise. Ba vɩa aŋ kɛŋ nyu-duo nɛ a lɩɩsɛ ba sɩpaalaara dɩ ʋ mɩɩra kɛmba mʋ Ijipiti tinteeŋ, lee-la ba fa sɩ ŋaa yosi. Ama ŋ ŋaa Wɩa sɩ joŋ wɩaa chɩchɛ nɩaa nɛ, a fɩfá nɩaa nisusuŋ, a kɛŋ zile. Ŋ baanɩŋ bɩ lɩma lɩma ka sii, ŋ chonuŋ ma bɩ dɛrɛ. Ŋɩɩ wɩaa, ŋ bɩ ba vɩa ta,

¹⁸ ba sɩ paala libi kʋŋ sɩ nagɛ nɛ-bie pɩ ba tɩtɩa aŋ bʋl, ‘Vene-la sɩ kɛnla lɩɩ Ijipiti tinteeŋ lɛ kʋ lɩɩ nɛ ŋ-la.’ Ba tʋʋsɛ ŋ joŋ-bɔŋ nɛ.

¹⁹ A tɩŋ ŋ sɩ faasa fɩfá nɩaa nenige wɩaa, ŋ bɩ ba vɩa ta tintee-hɩlɩŋ lɛ. Wɩɩhɛyɛ, duoŋ-bɩlɩmbaaŋ-la sɩ nagɛ jebiiŋ bɩ ba harɩŋ mɩɩra, nyiŋ-la ma sɩ nagɛ jebiiŋ a chaanɛ pʋlʋmʋŋ pɩpɩba a dɩdagɛba wombii-la ba sɩ jaŋ to bɩ ba harɩŋ mɩɩra.

²⁰ Ŋ joŋ ŋ Dɩma sɩ zɔmɔ pɩba nɛ ʋ dɩdagɛba. Ŋ bɩ ba kʋdiile-la ba sɩɩ yɩrɛ ‘mana’ vɔmɔ, ŋ pɩba lɩɩŋ ma nɛ ba nyʋa.

²¹ Ba sɩ hɛ tintee-hɩlɩŋ tʋɔŋ jɩsɩŋ mahɩŋ balɩa-la kala, ŋ pɩba ba kʋchɛɛlɛɛ nɛ. Ba bɩ kʋŋkala chɛ ka, ba gɛnnɩŋ bɩ kɩɛsa, ba naasɩŋ ma bɩ pʋʋsa.

²² Ŋ joŋ kuoroo tinteyee arɩ tinteyee pɩba nɛ, ba tɩɩ ba kala. Ba yuo laa Hɛsɩbɔŋ kuoro Sɩhɔŋ tinteeŋ nɛ arɩ Basaŋ kuoro Ɔgɩ tinteeŋ.

²³ Ŋ leŋe ba biiriŋ yʋgɛ nɛ a nagɛ chɛnwʋlaa sɩ hɛ wɩa-nyuŋ. Ŋ kɛmba kaa kʋ jʋʋ tintee-la ŋ sɩ bʋla pɩ ba naabalɩmaba dɩ ba mʋ laa tɩɩ nɛ.

²⁴ Ba biiriŋ mʋ jʋʋ tintee-la nɛ a laaʋ tɩɩ. Ŋ yuo dii Kɛnaŋ tɩŋŋaa nɛ ba sɩpaaŋ, nɩalɩŋ fa sɩ hɛ tintee-la lɛ, a joŋ ba dɩ ba kuoroo kala hɛ ba nɩsɩŋ lɛ dɩ ba ŋaaba ŋɩɩ ba sɩ cho.

²⁵ Ba yuo laa tabalaa ba sɩ saa kɛrɩsɩŋ golli arɩ tinteyee sɩ sɩma nɛ. Ba laa dɩɩsɩŋ sɩ suo arɩ kʋzɔŋ dosunuŋ, vilee ba sɩ luo, girep tɩɩsɩŋ bagɩsɩŋ, olif tɩɩsɩŋ arɩ tɩɩsɩŋ dɔnsʋŋ ma sɩ yʋga a nɩnɛŋ. Ba dii kɩaa vɔgɛ nɛ woruŋ a kala nɛrɛ, ba tʋɔŋ tɔrɛ ŋ wʋzɔmɔ-la kala ŋ sɩ ŋaa lɛ.

²⁶ Ama ba vɩa ŋ niiŋ nɛ a lɩɩ ŋ harɩŋ, a joŋ harɩŋ yɩa ŋ wombiiŋ ŋ sɩ bile dɩ ba tuto. Ba kpʋ ŋ wʋlaabʋllaa nɛ, nɩalɩŋ sɩ bʋl wɩaa kpʋrɩsɛ ba dɩgɩlaa dɩ ba mɩɩra kʋ toŋ. Ba chaasa tʋʋsɛ ŋ joŋoo nɛ.

²⁷ Ŋɩɩ nɛ ŋ jomba hɛ ba dʋndɔŋŋɔɔ nɩsɩŋ lɛ, ba dɔgɩsɛba. Ama ba sɩ dɔgɩsɛba, ba yele pɩŋ nɛ. Ŋ hɛ ŋ jaŋ lɛ nɛ aŋ nɩɩ, a tɩŋ ŋ sɩ faasa fɩfá nɩaa nenige wɩaa, ŋ pɩba laataaraa nɛ, ba laaba ta ba dʋndɔmɔ-la nɩsɩŋ lɛ.

²⁸ Ama ba sɩ kʋ na wiese, ba bɩra ŋaa wʋbɔŋŋɔɔ nɛ ŋ lɛ. Ŋ bɩra jomba hɛ ba dʋndɔŋŋɔɔ nɩsɩŋ lɛ ba bibemba. Ba bɩra sɩ yele pɩŋ, ŋ hɛ ŋ jaŋ lɛ nɛ aŋ nɩɩ ba yele, a tɩŋ ŋ sɩɩ fá nɩaa nenige wɩaa, ŋ vɛnɛ laaba ta a yʋgɛ nɛ.

²⁹ Ŋ chagɩlɛ ba nɛ arɩ ba mɩɩra kʋ to ŋ wombiiŋ ŋ sɩ bile dɩ ba tuto, ama ba bigisi ba tɩtɩa lɛ nɛ a bɩ ŋ niiŋ to. Ba vɩa ŋ wombie-la nɩa sɩ jaŋ to a kɛŋ mɩɩsɩŋ nɛ, aŋ ha ŋɩŋaa wʋbɔŋŋɔɔ. Ba kɛŋ nyuduoŋ arɩ dɩgɩlɩŋ-bɩnɩɩ nɛ a joŋ harɩŋ yɩaŋ a bɩ chɛ dɩ ba jegile nɩɩ.

³⁰ Jɩ-daŋ nɛ ŋ kɛŋ kenyiri arɩ ba. Ŋ Dɩma to ŋ wʋlaabʋllaa lɛ nɛ a bʋl wɩaa chagɩlɛba. Ama ba bɩ jegile nɩɩ, ŋɩɩ nɛ ŋ jomba hɛ tintee-wogusuŋ nɩaa nɩsɩŋ lɛ.

³¹ Ama a tɩŋ ŋ sɩɩ fá nɩaa nenige kɩŋkɛŋ wɩaa, ŋ bɩ ba cheye koo a vɩaba ta, bɛɛ wɩaa ŋ ŋaa Wɩa sɩ kɛŋ zile nɛ a fɩfá nɩaa nisusuŋ.

³² Lɛɛlɛ la Wɩa, ŋ nɛ yʋga a kɛŋ doluŋ nɩaa fɩfáŋ, ŋ sɩ cho ŋ nɩaa a hɛ nii-la ŋ dɩ ba pɛgɛ, ŋ kaa tɩtɩŋ nɛ. Sɩ́ bee kieli hɛɛ-la la sɩ na a chɩŋ bʋa-la lɛ Asiiria kuoroo sɩ dɔgɩsɛla a kaa kɔ jɩnɩŋ. La kuoroo arɩ la sɩpaalaaraa, la ŋ Wɩɩsʋllɩ sɩpaalaaraa arɩ ŋ wʋlaabʋllaa, la naabalɩmaba arɩ ŋ nɩaa kala nɛ na hɛɛ-la.

³³ Wɩalɩŋ kala sɩ ŋaa la lɛ, ŋ to wʋtɩtɩɩ lɛ nɛ ka la-na bɩ woruŋ ŋaa.

³⁴ La kuoroo, la sɩpaalaaraa, la ŋ Wɩɩsʋllɩ sɩpaalaaraa arɩ la nyɩmmaba bɩ wombii-la ŋ sɩ bile to. Ba bɩ jegile nɩɩ ŋ wʋdagaa koo wɩalɩŋ ŋ sɩ bʋla kpʋrɩsɛ ba dɩgɩlaa.

³⁵ Ba fa sɩ hɛ tintee-la ŋ sɩ joŋo pɩba lɛ a nɩnɩɩ sɩŋ-bal-la kala, tintee-la sɩ jalɩa aŋ pɛ sɩŋ lɛ, ba bɩŋ to koo a bɩrɩma lɩɩ ba wʋbɔŋŋɔɔ lɛ.

³⁶ Ama jɩnɩŋ la ŋaa yosi nɛ tintee-la ŋ sɩ joŋo pɩ la naabalɩmaba lɛ, dɩ ba dii ʋ tɩɩnɛnɛɛ arɩ kʋzɔmɔ-la kala sɩ hɛ tintee-la lɛ.

³⁷ A tɩŋ la wʋbɔŋŋɔɔ wɩaa, tintee-la kʋdii daŋ-la kala mɩɩra ŋaa kuoroo-la nɩsɩŋ lɛ ŋ sɩ joŋ-la hɛ kɩaa nɛ. Baa benla arɩ la pʋsʋŋ ŋɩɩ kala ba sɩ cho nɛ. Hɛɛŋ chaasa vɔgɛla nɛ.

Nɩalɩŋ ŋaa nii-bala

³⁸ A tɩŋ wɩaa deemba kala wɩaa, la Iziral tɩŋŋaa kala ŋaa nii-bala nɛ, dɩ la tɔ boŋ a ŋmʋnsa bil, dɩ la sɩpaalaaraa, la Levi doho nɩaa arɩ la Wɩɩsʋllɩ sɩpaalaaraa sɩ jaŋ joŋ ba magɩlɩŋ hɛ.”